الولد الشقى

فى إحدى الجلسات البناتية التى نعقدها أنا وصديقاتى المقربات.. تطرق الحديث إلى موضوع بدا فى أوله أنه فى غاية البساطة ولكن النقاش مع الوقت إحتد وإزداد سخونة

قالت أحدنا للأخريات.. "تعرفوا يا بنات .. أنا طبعا بتمنى أتجوز واحد يكون بيعرف ربنا وملتزم حقيقى.. بس... ياااه لو كان قبل إلتزامه شقى..". نعم قالت "شقى.." يعنى كان يعرف بنات.. يعنى مقطع السمكة وديلها.. ولكن هداه الله و غض من بصره وإقترابه من الله , وقبل أن أناقشها فى رأيها.. هاجمتها صديقة أخرى.. "إزاى يعنى.. أنا شايفة إن الولد الملتزم من صغره.. الخام يعنى.. أفضل.. إزاى تبقى عايزة تتجوزى ولد شقى

ردت عليها وقالت " أنا مقصدش أنا عايزاه شقى دلوقتى.. لأ طبعا.. الدين أهم شرط.. أنا بتكلم كان إيه الاول.. " لم تسكت صديقتى المتحيزة للولد الخام قائلة " أنا فاهمة تقصدى إيه.. ومش بشكك فى رغبتك من إنك تتجوزى واحد بيعرف ربنا.. بس إذا كنتى تقصدى إن الولد اللى كان شقى يقدر يعاملك أحسن من الولد الخام فدا مش صح.." قالت صديقتى صاحبة نظرية الولد الشقى "مين قال كده.. بالعكس الولد الشقى عنده خبرة إزاى بيعامل البنت.. ويحبها.. و يوم ما هايعامل مراته هيكون سهل عليه يتقرب منها و يعاملها بحنية مش بغشومية.." و تضحك

فردت الأخرى قائلة.. "لااااااا.. إنتى عارفة.. الولد الخام.. هتكونى إنتى بالنسبة له الأولى والأخيرة.. هيحاول يديكى كل الحب اللى كان شايله وكل الحنية اللى كان محوشها.. وكمان مش هتكون عنده فرصة يقارن فى عقلة بينك وبين غيرك.. مش زى الولد الشقى اللى عرف دى ودى ودى و هيقارنك بيهم

و مع إشتداد النقاش شردت بعيداً عنهم قليلا .. فلم أكن أفكر أبداً فى نوعية زوج المستقبل من حيث شقاوتة أو "خاميته" إن صح التعبير.. فقد كنت أتصور دائما أن الإنسان عندما يحب فإنه يعطى الحب والحنان لحبيبه بدون تدريب مسبق.. فهى فطرة وهى طبيعة... وأن الزوج الملتزم سيراعينى ويراعى الله فى معاملته مقتدياً فى ذلك بأسوته الحسنة.. محمد سيد المرسلين "صلى الله عليه وسلم".. واضعاً بين عينيه معاملته الرقيقة لزوجاته وهو المعصوم من الهوى من قبل الرسالة.. وأول إمراة إقترب منها كانت الحبيبة "خديجة" رضى الله عنها وأرضاها.. و كونا معاً أحلى قصة حب طاهر وقوى عرفها التاريخ.. قصة زوجان حبيبان

... " لا برضه.. الولد الشقى أحسن.. هيحسسك إنك ملكة"-

... "لأ.. مش هتحسى بالحب الحقيقى إلا مع الولد الخام"-

لم اتحمل أكثر من ذلك... " يووووووووووه أنتو لسه بتتكلموا فى إيه.. شقى وللا خام.. هو مش بيعرف ربنا.. حلو أوى.. بس ييجى اللى بيعرف ربنا.." مش كده وللا إيه