البنات: تتوسد أحلامها وتنام

فى الفترة الأخيرة، لاحظت أن عدد من صحباتى وصديقاتى والبنات اللاتى أعرفهن أصبح لديهن قصص أو حكايات.. لا أعرف لماذا لاحظتها الأن.. ولكنها حكايات مختلفة ومتنوعة.. لكل منهن حكاية عاشتها أو تعيشها، قصص كنت أظنها أفلام عربى فقط.. وأن الواقع أبسط من ذلك أو على الأقل الناس رأت الأفلام العربى فستفضل التجديد على ممارسة نفس الحكايات والمشاكل

ما خطر ببالى هو أن أحكى لكم حكايات البنات، منهن التى أعرفها منذ زمن والتى عرفتها حديثاً والتى سمعت حكاياتها من صديقة أخرى.. لكن أريد بالفعل أن أعرض جانب حقيقى من حيواتنا نحن البنات... على إختلاف طبائعنا ومشاكلنا.. لكنى أعرضها للمناقشة وسألتزم برواية حقائق

:سأسمى السلسة (البنات) وكل حكاية سيكون لها إسم وحكاية اليوم

...................تتسود أحلامها وتنام...................

سأبدأ بحكاية بنت.. مشكلتها هى التى شجعتنى أن أقوم بهذه الفكرة أساساً

س تكبرنى بحوالى سنتينن كنت أراها وأنا فى أولى ثانوى وكانت هى فى ثالثة ثانوى... كنت لاجئة بمكتبة المدرسة وهى أيضاً.. ولكن لم نتعرف على بعض ولم يدور بيننا حوار تقريباً

ومنذ ما يقرب من شهرين.. أتت لمقر عملى "فى شغل" ، ومع تكرار الزيارة تعرفنا على بعضنا وأصبحت تأتى مخصوص لزيارتى والجلوس معى للحديث

ومنذ عدة أيام أتت لى.. فى منتهى الأناقة والتألق.. ومن عينيها رأيت ما حل بها.. خمنت ولم أفصح.. وقالت: فى حاجة حلوة.. انا هاجى لك بكرة وأحكيلك على كل حاجة.. أنا معرفتش أحكى لاختى هى مش هتفهمنى.. هجيلك بكرة


كنت أثق تمام الثقة بما ستأتى لتقوله.. ابن الحلال جه بأه.. وأنها تحبه أيضاً.. ليس الموضوع تقليدى.. هناك حب أو اعجاب

أتت لى اليوم التالى.. لكنها لم تمكث.. وقالت انها ستأتى غداً لتحكى لى على كل شىء.. ولكنها فقط تريد أن ترينى ماذا اشترت.. طقمين ملابس.. كلاهما وردى اللون

لن أطيل عليكم اتت لى فى اليوم الموعود..اجلستها بجانبى وأخَذنَا الكلام فقلت

ها.. احكى -

( أنا.. بحب (يااا، لو تشوفوها وهى بتقول الكلمة -

وهو؟ -

وهو طبعاً -

(جميل.. إتقدملك (سامحونى.. صحبتكو بريئة حبتين -

تسكت قليلاً

هو أكبر منى، يعنى بشوية كتير -

يعنى كام -

قولى كده -

كبير بكتير..! يعنى عدى الخمسة وتلاتين مثلاً -

(معلش تانى، صحبتكو بريئة أوى)

(مسكت كلتا يداى وضغطت عليهما (تحاول إمتصاص صدمتى

لأ.. أربعين -

أربعين؟ ومكنش لسه اتجوز؟ -

(تترك كلتا يداى)

ما هو متجوز -

(الصدمة الأولى كانت أهون.. سابت إيدى ليه، سابت إيدى ليه)


نعم؟ -

ما هى دى المشكلة -

مشكلة؟ -

وفى لحظة شعرت أنى تحولت من "صديقة تستمع لصديقتها" إلى إضطرار للقيام بدور الناصح الأمين.. وهو دور لا أطيقه

إنتى عارفة يا زيزي! الأفلام دى بتاعة البنات اللى بيتجوزوا عرفى -

أنا بيتهيئلى.. انه لو طلب منى، هوافق
عرفى؟ -

حاولت أن أتماسك بشدة، وأن أناقش معها الموضوع ببرود أعصاب حتى لا تتركنى وتذهب لتتزوجه، فأكون شاركتها الجريمة بغبائى

...وأكملت

طيب واحدة واحدة، إنتى عرفتيه إزاى؟ -

معايا بيحضر ماجستير بردو، وهو كان بيهتم بيا -

وكنت بحس منه إهتمام خاص ليا.. ويتضايق لما أقف مع حد تانى.. يعنى شغلنى، وأنا أول..أول مرة ألاقى نفسى كده.. بحب

يعنى.. ملقتيش غير ده.. متجوز -

بحبه -

تقولها وكلتا يديها تحاولان بشكل لا إرادى التعبير عن معنى هذا الحب.. كأنهما يتلمسانه فى الجو من حولها

هو مش بيحب مراته ومتضايق منها.. هو إتجوزها عشان يرضى أهله -

يا سلام وإنتى هتعملى فيها مؤسسة حنان -

(حكمت القفشة، ثم شعرت أنى سأفقد نقطة التحكم وتراجعت)

دلوقتى يعنى مفيش غيره .. واحد متجوز -

مش حكاية مفيش غيره، أنا لو عايزة أتجوز أى حد كان زمانى إتجوزت -

من أى حد إتقدملى.. لكن مكنتش بحس بأهمية حد فيهم، مكنتش بحس بأى حد منهم.. لكن ده.. فهمانى ؟

س بس الحب ده مش من حقك -

نظرت لى ثم أطرقت رأسها
تعرفى.. جوايا بيقول لأ، وجوايا كمان إنى مش قادرة أستغنى عنه -

يعنى يرضيكى تاخدى واحد من مراته -

مش تصعب عليكى الست دى اللى قاعدة فى بيتها لا بيها ولا عليها كده

مش عارفة.. إنتى إيه أهم حاجة عندك... ماتقدريش تستغنى عن إيه.. إنا بحبه -

ودخلت فى محاولة فاشلة فى وصف كيف تحبه، فالكلمات عاجزة عن التعبير.. هذا شانهم جميعاً.. من يحبون

:تذكرت وقتها فايزة أحمد وهى تغنى

كنت أشوف الورد.. بيفتح بحب.. بين إيديا

كنت أقول ع الشمس.. بتروح تحب.. فى دنيا تانية

كانوا كل الناس عرايس لابسة حب ورايحة جاية

كان ساعات الود ودى.. من هَنَا الحب.. اللى فيا

عايزة أفرق منه للدنيا.. عشان دا كتير.. كتير عليا

أبكتنى سامحها الله.. تلك النظرات فى عينيها والحب الذى تحكى عنه وكيف انه فاجأها وهى التى لم تنتظره

مسحت دموعى قائلة: بس يا س الحب ده جه فى الزمن الغلط.. مع الإنسان الغلط.. فى الظروف الغلط
عارفة، بس أعمل إيه.. مش قادرة -

ابعدى، تجنبى رؤيته تماماً.. لازم تبعدى -

مش هأقدر حاولت مرة ومقدرتش -

بعدتى قد إيه؟ -

أسبوع.. أسبوع بحاله -

لو كنت استنيتى شوية كمان كنت هتبتدى تفوقى -

يا "س" وربنا.. ربنا مايرضيهوش -

والله أنا بصحى الفجرأصلى وأعيط.. دا أنا قلت أعمل إستخارة -

إنى أستمر وللا لأ. بس قلت أستخير ربنا على إيه.. على انى اخد واحد من مراته
يعنى إنتى عارفة أهو -

عارفة بس مش قادرة، عايزة أتجوزه وبس، طيب بلاش.. حتى تفضل المشاعردى وبس -

إنتى كده عايزة حاجة مش من حقك -

أنا عايزة حاجة بحبها -

..حاوت أن أهدئ اللعب بعض الشىء

هو متجوز بقاله كتير؟ -

ست سنين -

عنده أولاد طبعاَ-

لأ بس مراته حامل -

يعنى عايش حياته يا ماما -

بس مش مبسوط معاها -

يعنى بدل ما يحاول يصلح الخلل بينهم يروح يحب بره -

وسألتها: هو اللى قال لك إنه يتجوزك عرفى

لا هو ماطلبش حاجة أصلاً -

لأ دا إنتى إتجننتى بأه -

إتجننت اه، بحبه -

لما كنت أشوف إتنين بيحبوا بعض.. كنت أقول إيه لعب العيال ده، أكيد بيضحك عليها، إنتى مش عارفة طعم الحب حلو إزاى

حب مش من حقك.. هفضل أقولها لك -

" لحد "لأ" اللى جواكى يبقى صوتهاأعلى من" أه

قوليها.. أنا عايزة أسمعها.. أنا عارفة إنى غلط، بس مش قادرة -

...ثم نهضت حتى تلحق بموعد ورائها

هجيلك تانى قريب -

أنا عارفة إنك مش هتيجى تانى.. عشان لقيتينى بقولك لأ

(ما هو اليومين دول، لما أقول لحد حاجة مش عجباه يسبنى ويمشى)

أنا جيت أحكيلك عشان عارفة إنك هتقولى لأ -

وهاجيلك تانى عشان بتقولى لأ

وهاتحكيلى على كل حاجة.. ومش هتتصرفى فى أى حاجة إلا لما تقوليلى؟ -

حتى "صباح الخير" لو قالها هاجى وأقولك -

إوعدينى إنك تبعدى -

ما وعدت، قالت أنها تتعجب أنى أنصحها رغم صغر سنى عنها وأستدركت أنها أصبحت مثل العيال.. هى قالت ذلك، ورحلت

رحلت تاركة بداخلى علامات إستفهام وتعجب متشابكة

كيف يصبح الإنسان على إستعداد أن يأخذ شيئاً ليس من حقه لمجرد أنه يحبه؟

كيف تتحول بنت فى منتهى الإخلاق والأدب والهدوء إلى طائشة لا يهمها سوى مشاعر محفوفة بالمخاطر

أنا أعرف أن الحب نعمة من الله يلقى بها فى القلوب كيف يشاء وطالما أنه هبه ربانية فهو يجب أن يكون موجه للخير دائماً وليس للشر لذا لا أتصور أبدا أن ما تمر به صديقتى حب.. ولكن ماذا أسميه؟ لا أعرف

أثق أنها لن تقدم على خطوة تضيع بها عمرها.. فهى أعقل من ذلك، على ما أظن

ولكن أشد ما يخيفنى هو تلك الأيام التى تعيشها متوسدة أحلامها.. لتنام تفكر فيه وتصحو تفكر فيه.. ستتألم حتماً، لكن العلاج لابد أن يؤلم، وألم العلاج أهون بكثير من ألم ينتظرها لا قدر الله لو إتبعت هواها الذى سيغرقها فى الندم بقية العمر

لم تنتهى حكايتها بعد، ولا أعرف على ماذا ستنتهى، وأرجو خيراً