فتافيت السكر

زى ريشة فى هوا.. كان فورست جمب
زى فورست جمب.. إحنا.. بس من غير علبة شيكولاته

Run Forrest.. run

بس جربى تسمعى مصطفى كامل.. هيرتقى بإحساسك أوى
خليت لك إنتى الإرتقاء.. معلش أنا واحدة على قدى.. بسمع فيروز
بتاعة بحلاااق لى بحلااااق لى.. بحلق لى وبص لى!!؟


كانت بتبكى
قالت لها: إيه؟ حوشى اللؤلؤ.. بينزل من عيونك ليه؟


أول يوم فى المدراس السنة دى.. كنت خايفة من المواصلات والزحمة وقلت يومها لازم اصحى بدرى
صحيت متأخرة نص ساعة، ولقيت عربيات بسهولة، ووصلت شغلى قبل المعاد بخمس دقايق معرفش إزاى


ياااه انا رغيت كتير، وإنتى اخبارك إيه؟
لا.. ولا حاجة
نو نيوز جود نيوز
تفتكرى؟


طفل صغير عنده سنتين شاف كتكوتين عند جدته، واحد اصفر وواحد إسود
مسك الأصفر يطبطب عليه وفرحان بيه بيدلعه
ومسك الأسود بيقول له انت وحش، وعايز يخنقه.. لولا لحقوه


الشيطان يكمن فى التفاصيل
.......


لما ترجعى اسكندرية ابقى ابعتيلى جوابات
قصدك ميل؟
لأ.. جوابات زى زمان يا ايمو
ليه يا بنتى؟
عايزة استلمه، واقطع الظرف وافتح الجواب وانا قافلة عليا اودتى قال يعنى أسرار حربية وأقرا.. وأمسك ورقة وقلم وأرد على كلمة كلمة واحكيلك يوم بيوم.. زى زمان يا ايمو


كل يوم أعدى على بياع جرايد، الناس بيبقوا واقفين ملمومين عليه
نظرة فضول منى.. أغلفة الجرايد كلها عليها صور بنات يعنى.. كده بأه


تعرفى ان معايا كارنية الحزب الوطنى
بجد؟ جاسوسة؟
لا.. كنت مطلعاه انا واصحابى عشان نطلع معسكرات
ههههه
بجد والله


رحت أشترى شنطتين واحده بيضا والتانية سودا
إشتريت اللونين من نفس الموديل.. ملقتش أحلى منه


خلاص يا أستاذة، متأسف.. إنسى الموضوع
أوكى يا دكتور


زميلى بيقول لدعاء -مازحاً- وهى بتصمم غلاف المجلة اللى بنشتغل فيها: يا دعاء حطى انجلينا جولى وللا نيكول.. خللى المجلة تبيع


قالت لى: إمبارح قصيت شعرى
قلت لها: يا خبر، وماندمتيش يا بنتى وانتى شايفة شعرك بين اديكى؟
روحت يومها قصيت شعرى عشرة سم وماندمتش
أوكى.. ندمت تانى يوم


إشتريت كتاب "نشرة أخبار قريتهم" -إسم حركى- قريت منه ميه وعشرين صفحة وبعدين فصلت، مبقتش أعرف أستقبل الموجة

تعرفى إن الدنيا مطرت فى يونيو اللى فات
فى الصيف!؟
أيوه، مش هنسى اليوم ده.. حستها مش زى أى مطرة، ودعيت ربنا كتير أوى


رحت أزور صحبتى، لقيت عندها أعداد قديمة من "زهور"، ومع إنى ماقرتش منها زمان إلا قصه واحدة وسبتنى منها، إلا إنى المرة دى أخدت منها كام قصة أقراهم فى البيت


ماما، تيته وحشتنى أوى
لما توحشك إقرى لها الفاتحة


صحبتى بتعمل ريجيم.. لازم تاكل كرمب مسلوق.. طعمه بشع.. العذاب بعنيها شايفاها وبردو بتاكله


هى ليه ماقالتلوش بحبك؟
قالتها
هو بيقول ما قالتهاش
قالتها.. بس بلغتها، وهو بيفهم لغة تانية
يعنى مين السبب فى فسخ الخطوبة؟
ولا حد.. دا مجرد إختلاف لغات


رقم قياسى جديد: ما فتحتش الياهو مسنجر بتاعى لمدة 48 ساعة.. وماقعدتش ع الجهاز طول اليومين إلا عشر دقايق اشوف مدونتى والميل
تالت يوم: مكافأة.. نص اليوم قصاد النت

إيه يا بنتى، مالك كده.. دا يوم حِنتك تبقى مكلضمة كده

أصل دى آخر ليلة أبات فيها هنا.. فى بيت بابا

فتحت شنطتى أطلع الموبايل وقلبى حاسس إن فيه رسالة. لقيت بنت خالتى باعته تقولى: انا حلمت حلم جميل اوى ليكى لما اشوفك أقولك عليه

أغنية: فتافيت السكر مابقتشى تحلى البسبوسة

نظرية: مش يمكن بتحلى بس إحنا مش بقينا نستطعم؟

مرة كمان عشان الحبايب.. إحنا إيه؟

إحنا فورست بس من غير علبة الشيكولاته

ok Forrest.. stop it, have you asked yourself where to go?