8/09/2006

إلى س.س. العملية طلعت فى النملية

الله الله الله، دى الأووشاعة طلعت صح، والتخمين طلع فى محله، والوساوس القهرية بتاعة المنع والرقابة جت فى الجون المرة دى
أصل الحكاية إن "س.س" :) اتصلت بيا من يومين كده تقولى انها بتحاول تدخل على بنت مصرية والصفحة مش راضية تنزل
ازاى يا بنتى مابتنزلش، استنى عليها شوية هى تقيلة حبتين
لا، ما بتنزلش ومكتوب.. وقريتلى كلمتين جامدين كده اللى خمنت منهم ان الموقع ممنوع مثلا يا بسكيورتى معينة او فاير وول، قلت لها تخمنى ده
كانت لسه معايا ع التليفون، وبتجرب تفتح كمان المدونة بتاعتها، وتم تم تم.. مدونتها كمان مش بتفتح
امممم، س.س. فكرت ان الاهرام منع تصفح المدونات ، لأنها صحفية فى الأهرام وكانت بتتصفح المدونات يومها من هناك

المهم يعنى المكالمة انتهت انها هتحاول تشوف ايه الحكاية دى. بس انا نسيت اسألها تانى، ولقيت صاحب الأشجار بيقوم صحفيى الأهرام على الإدارة اللى منعت تصفح المدونات وبيقولهم ازاى يتخطوا الرقابة دى

يا سلام سلام، بقى مثلا يعنى مثلا المدونات ممكن تكون خطيرة اعلاميا أو معلوماتيا لدرجة ان مؤسسة بحجم الأهرام تمنع تصفحها؟
وللا يمكن تكون شمت خبر عن الكلام الكتير جريدة الدستور على المدونات المصرية والاعترافات - الغير مؤكده- من ناس بيدخلوا يقولوا انهم صحفيين فى الدستور، فمش عايزة مثلا أصجاب الضمائر الحية فى المؤسسة يستغلوا المدونات ويتكلموا شوية عن مؤسستهم الغراء؟؟
ههههههههههه انا عرفت فايدة جديدة للتدوين كده

بس بجد بجد انا عايزة اعرف السبب.. هموت كده واعرف السبب

13 comments:

  1. أقريت من شوية خبر عن إن المدونات وخاصة موقع
    Blogger
    ممنوع من داخل مؤسسة الأهرام الصحفية ..
    يعنى المنع مش عام للمدونات
    كُلٌ فى مكانه
    محدش يقلق
    :)

    ReplyDelete
  2. زي ما تي إي داتا منعت بعض المواقع والمنتديات بتهمة نقد الداخل المصري..

    العملية مش قاصرة على مؤسسة الأهرام ، وإلا من بكرة الصمح - مع الاعتذار لبوحة-لشنت كل المؤسسات الحكومية حملة على التدوين واللي بيدونوه!

    ReplyDelete
  3. أنا شخصيا متفائل خيرابأن التغيير آت ..آت ..والبداية ستكون من هنا ..من المدونات ...فقط مع إنتشار الفكرة وتعميمها ..سيجد كل شخص متنفس له فى الكتابة ...هناك بالمناسبة فائده أخرى للتدوين بأنه سوف يصبح مستقبلا المؤشر لفكر وثقافة الشعوب ...و سنستطيع أن نعرف من خلاله المفهوم الصحيح للرأى العام ..هذا الأخير الذى فرض علينا فرضا فى الماضى من خلال إعلام فاسد سيطر على فكر الناس وجعلهم يعتقدون أن ما يقوله الإعلام هو (الرأى العام )ولكن مع إنتشار فكرة التدوين سوف يتولد رأى عام حقيقى ...وسنستطيع تحليل ثقافة وتكوين الناس ..إذا إعتبرنا أنه ليس بالضرورة كل من يدون مستقبلا مثقفا واعيا ...وبالتالى نستطيع تقييم مدى التقدم الفكرى والإبداعى والثقافى وحتى العلمى أو على النقيض التأخر والتخلف والنزوح نحو الفساد والتفاهة والتسطيح والرغبات الممقوته

    سوف تنتشر الأفكار وسيتم تداولها ومناقشتها بحرية و ستكون المدونات فى يوم ما مرجعا حتى للجرائد الكبرى (إذا أرادت أن تكون كبرى )ومصدرا مهما للمعومات ...

    منذ يومين مثلا وجدت بحث علمى منشور على أحد المدونات المصرية والكاتب هو الباحث نفسه ....هل تعلمون ماذا يعنى ذلك ؟؟؟؟؟؟؟؟؟؟؟؟؟؟؟؟؟؟؟

    دعوة إلى جميع المدونين ...........تفاءلوا خيرا ....فكلما ضاقت وضاقت وضاقت ...فتيقنوا أن فرج الله قريب .

    يوما ما ستكون هذه المدونات تراثا يحكى بدقة وبشكل إنسانى عن حاضرنا اليوم

    ودعوة لكى يا بنــــت مصريـــــــــة
    إكتبى وإكتبى وإكتبى ...وسوف يعلوا صوتك يوما ما ..وسوف يتحقق حلم جريدتك من هنا مدونة بنت مصرية
    فى يوم ما أتصور أن تحمل المدونات رخصة للنشر كجرائد مستقلة ...ولكن أدعوا الله أن يكون هذا اليوم فى ظل مناخ أفضل من الحريات ..بعيدا عن الحكم العسكرى الذى تعيش فيه بلادنا فى ظل الإحتلال الإنجليزى الذى ما زال قابعا فى بلادنا ولم يخرج حتى الآن ..بل تبعه إحتلال بلاد أخرى ...وحتى إحتلال ملوك وسلاطين قرروا عزل الملك السابق وهو طفلا ليحتلوا بلادنا للأبد

    بدون التعرض للمزيد من التفاصيل المحبطة ....تفاءلوا فإن فرج الله قريب


    بنت مصرية ...مفتقدين تعليقاتك على التعليقات ...فجدوى التدوين فى نظرى يأتى من التفاعل مع الآخر وهذا ما يجعل المدونات متفوقة على الجرائد المنشورة

    ReplyDelete
  4. This comment has been removed by a blog administrator.

    ReplyDelete
  5. أنا شخصيا أكتر حد سعيد بالتعليق ده.. بصراحة جه فى وقته، فعلا كذا حد لاحظ إنى مش بقيت أرد على التعليقات كتير، وانا بصراحة مقدرش احط ايدى على سبب معين لكده.. بس أظن انه كسل، وربما يكون ابعد من كده.. بس بجد هحاول الفترة الجاية انى اخلق جو مناقشة وتفاعل حقيقى

    معاك جدا ان المدونات هتكون فى يوم من الايام تراث يحكى عننا وعن رؤيتنا وعن اللى بيحصل من غير ايد التاريخ ما تزيفه، يمكن نكون اكثر حظا من كل العصور اللى قبلنا فى النقطة دى

    وممكن مع الوقت تكون المدونات هى الرأى العام الحقيقى ونبض الشارع من غير تزييف

    واتمنى ان التغيير ييجى، سواء من المدونات او من غيرها، لكن اتمنى يكون حقيقى ونضيف وواقعى وشامل

    ودعوتك ليا بالكتابة.. لازم استجيب ليها، بعد جرعة التدعيم والحماس دى :) ولو انى مش قد كده فى الكتابة يعنى، انا بكتب اللى على بالى وخلاص

    ميرسى يا سعدنى على تعليقك بجد

    ReplyDelete
  6. يا زيزي السبب الرئيسي ان اسامه سرايه واللي معينه عندهم حساسيه مزمنه من الحقيقه خصوصا اللي بيقولها العيال قلالات الادب بتوع البلوجرز دول


    والعاقبه عندهم في المسرات

    احنا نغيظهم ونعمل بلوك لسايت الاهرام

    ReplyDelete
  7. سوري بس ...الاهرام فيها ناس محترمة جدا...انا ليه من حوالي20 صحفي يقربولي كلهم معارضين وزيهم الاف...المشكلة ان فيه ناس تافهة ماسكة قيادات كتير...مش كلهم طبعا...ابويا مثلا يبقي مدير تحرير اخبار الادب وفي نفس الوقت عضو في كفاية بس في ناس مثلا زي ممتاز القط اللي قعد يحسد الحمار بتاعنا وابنه جمال حبيب الملايين وانه ليه طباخ تحت امره يعمله ملوخية ومن غير ما يسمع الطشة...الكلام ده كنت باقوله وانا عندي 4 سنين بس ماكنتش ملوخية..كان طموحي اعلي شوية"شاورما"وحازم عبد الرحمن اللي كتب عن ان الفراخ مهمة في حياتنا علشان العزومات والاعياد وانها بتتسلق او تتحمر او تتحشي...طبعا الناس ديه ممكن تبقي محترمة وتفهم لو قروا ارائنا وهايقفلوا صفحة ابله نظيرة اللي فتحنها ديه وهايرجعوا لمؤسساتهم كرامتها الضايعة

    ReplyDelete
  8. أهلا بنت مصرية
    موش فاهم مايقع عندكم في مصر، إيش السبب في منع تصفح المدونات؟!!..كلمة أخرى أنا سمعت عن مكتب مكافحة التدوين الذي تم إنشاؤه في أمن الدولة!! نكت إيه دي؟
    مشكورة لست

    ReplyDelete
  9. نور
    قلت لى :)
    ------------

    عربى
    طبعا فيها ناس محترمين، وكتير كمان.. مش بقول انا ليا واحدة صحبتى هناك.. وهى من اجمل الناس اللى عرفتهم
    -------------------

    اومرزوك
    والله انا نفسى مش عارفة اذا كانت نكتة وللا بجد
    بس النكتة الحقيقة ان الموضوع يكون حقيقى

    ReplyDelete
  10. واضح ان في فيلم جديد هينزل قريب اسمة الاهرام اتهبلت
    www.nardeen.blogspot.com

    ReplyDelete
  11. انا كنت علقت قبل كده بس اسمحيلي انا عندي اخبار مؤكده غير اللي انتي بتتكلمي عليها ديه من اكتر من مهندس واكتر من صحفي وكلهم معارضين....الاخبار كالاتي:حكاية منع البلوغز ديه جت صدفة....لان في صحافيين عندهم مراهقة متئخرة...بيدخلوا بالليل يفتحه مواقع مش تمام...والحجات ديه طبعا بيبقي فيها فيروسات وكوكيز....فعملوا فلتر للكمبيوتر بيمنع اي موقع شكل عنوانه غريب وطبعا مافيش اغرب من شكل عنوان البلوغز لانه حاجة جديدة....وبعد الاوشاعة ديه خففوا الفلتر بس المشكلة ان اي كمبيوتر هايبوظ كل الكمبيوترات اللي في الاهرام لانهم علي شبكة...والكلام ده ممكن يمنع نزول الجرنان زي ما حصل في "نيو يورك تايمز"(او واشنطون بوصط مش فاكر اوي)انا اسف اني بوظطلك موضوع كبير بس الدقة اهم طبعا
    ولا انتي ايه رايك

    ReplyDelete
  12. عربى
    وليه تقول بوظته
    كده الحقيقة بانت وكده اجمل

    ميرسى جدا يا فندم :)

    ReplyDelete
  13. طبعا واضح جدا ان المدونات صارت ذات سلطه واضحه علي عقول فئه من الناس اغلبهم شباب .و المشكله _عندهم طبعا _ان هذه السلطه قائمه علي المعرفه و المعلومه ذات المصدر الموثوق علي الاقل لدي الشباب المتابع للمدونات الذي لم يعد يثق ابدا في المصادر الحكوميه ولان هذه المدونات من صنع الشباب نفسه فهو يتابعها اكثر و باهتمام اكبر ،لذلك اصبحت عند الحكومه مصدر خطوره و هو ان تصبح مصدر هامشي للمعلومات التي هي بمثابة وسيلة التحكم و السيطره

    ReplyDelete