10/22/2006

جاتوه الفقرا وهدية كمان

لقيت نفسي فاضية شوية قلت اقولكو على حاجة بقالي فترة بشوفها وبنسى اقول. بس الأول احب اعرفكم إن التدوينة دي غالية جداً لأني بكتبها وأنا أعصابى هتنهار خلاص. أصل الكي بورد بتاعتي باظت وبتهنج الجهاز ففصلتها وجهازي النهاردة من غير كي بورد، طبعا هتقولولي وبتكتبي أزاي التدوينة دي. وأكيد اللي مش هيسأل السؤال ده هيكون عمل زيي وافتكر إن أول ما اتعلمنا ويندوز عرفنا إن في كي بورد ابليكشن موجود فى اكسيسوريز اكسيسابيليتي فأنا ضرب في دماغي أجرب أشوفها كده. وطبعاً أنتو عرفتوا دلوقتي سبب الإنهيار العصبي الوشيك. هتقولولي طيب إيه اللى جبرك تكتبي تدوينة دلوقتي ماتستني لحد بكرة لما تجيبي كي بورد جديدة ، أصل المشكلة كمان إن شغلي واقف بسبب الكي بورد ومش لي مزاج أشتغل بالكي بورد العورة بتاعة ويندوز فقلت أهو أتسلى بيها وأدون.

المهم أنا بأه هتشل وخصوصاً مع المدخلات اللى بتحتاج شيفت. ومع ذلك بردو مصرة إني استخدم الألفات المهمذه وعلامات الترقيم. يعني أنا بردو هشلني قريب من دماغي اللي ماشية شمال دي.

المهم بأه كنت عايزة احكيلكوا على عربية نص نقل مقفلة وجواها قطع جاتوه مكشوفة على المارة في الشارع ويافطة متعلقة على العربية ... اليافطة بتقول:

دستة جاتوه 4 جنيه
دستة جاتوه لوكس 6 جنيه
تورتة صغيرة 5 جنيه
تورتة كبيرة 7 جنية
وكمان هدية

طبعاً مش شبه الصورة دي بالمرة

هااا! أسيبكم تتأملوا اليافطة وللا أكمل كتابة. عموماً هكمل عشان على ما اكتب سطر واحد هتكونوا فقتوا من الصدمة.
دلوقتي لما دستة جاتوه يا بشر تبقى بأربعة جنيه تبقى مش ممكن تكون مكوناتها هى المكونات الطبيعية للجاتوه الطبيعى يعني استحالة يكونوا استخدموا بيض واحنا عارفين إن البيضة بخمسين قرش وعن خبرة مطبخية الجاتوه بيتعمل بالكيكة الإسفنجية ودي بتاخد في وشها سبع تمن بيضات. وكمان مش ممكن تكون اتعملت بالدقيق المخصوص للجاتوهات ولا غير المخصوص كمان. دا كيلو الدقيق العادي بجنيه وستين قرش حسب أخر نشرة أسعار من مامتي العزيزة. وطبعا مش معقول يكون استخدم لبن أو بودرة الكريمة بتاعة التذويق.. استحالة،

إلا إذا.. إلا إذا كل المكونات اللي استخدمها مسروقة أو انتهت صلاحيتها ومحلات الحلوانية رموها
ما هو مش ممكن يكون دى حاجات تتعمل بتكاليف طبيعية وتطلع بالأسعار دي. وماعتقدش إن يكون فى حد دمه خفيف مسك اليافطة الصدمانة العدمانة بتاعتهم ومسح الصفر من على يمين كل رقم. دا أنا بقالى رمضان بطوله بشوفها. كمان منظر القطع نفسها باين عليها الفقر والنشفان.. ماتفتحتش النفس أصلاً

لا حول ولا قوة إلا بالله وكمان الناس بتقف تشتري. أنا بجد خايفة عليهم. دي أكيد حاجات مضرة وبايظة. باين عليها متاكلة قبل كده

لو حد يعرف حد بتاع تموين مسؤول قولوله يركب المترو وياخد خط شبرا وينزل كلية الزراعة. أول ما يخرج م المحطة هيلاقي العربية واليافطة

أنا تعبت م الكتابة أوى. اخدت ساعة إلا ربع أكتب في الكام سطر دول. عشان تعرفوا إنها تدوينة غالية.. أغلى من الجاتوه

39 comments:

  1. هو غالبا الجاتوه ده مش كيكة إسفنجبة
    هو تقريبا ممكن يكون عيش فينو المعروف ومتخفى فى بعض بقايا الكريمة أو الله أعلم هى إيه بالضبط
    !!
    :)
    وكل سنة وإنتم طيبين

    ReplyDelete
  2. البيضة بخمسين قرش ؟
    ليه إنتوا بتجيبوا البيض منين ؟ .. أه صحيح إنتوا ساكنين جنب السورس :D
    على العموم أنا أخر مرة أشتريت البيض ده من قيمة 4 أيام كده كانت الكرتونة ب 22.5 يعني تقف البيضة ب 0.75 قرش بالتمام والكمال ..
    وربنا يجعله عامر
    وكل سنة والجميع بألف خير وصحة وسلام

    ReplyDelete
  3. بنت مصرية
    صباح الخير اولا
    وكل سنة وانتي طيبة ثانيا ..
    اعتقد ان موضوع التورت ده هيعتمد على المكان وتوقيت النهار المباع فيه التورت ..
    وده لاكتر من سبب .. فيه محلات كتير من المحلات الكبيرة للتورت بتقوم ببيع التورت المتبقية والتي لم تباع في المحل في نهاية النهار إلى بعض الباعة الجائلين بدلا من رميها ..

    المفروض ان جميع أنواع التورت بتتعمل بصورة يومية فقط يعني ما ينفعشي التورتة تبات وتتباع في المحل بعد مرور اكتر من 24 ساعة وده لان بيبقى فيها عناصر كتير زي ما انتي عارفة ممكن تبوظ أولها البيض طبعا .. غير ان الكريمات بتنشف وحاجات كتير زي كده .. المهم ..
    في مواسم الركود ممكن يتبقى في نهاية اليوم في اي محل عدد من التورت وبدل ما تترمي يبيعها المحل للباعة الجائلين لتباع بأسعار أرخص بدل من مفيش .. بس طبعا بتكون بايتة ..

    فيه كمان محلات ودي مشهورة جدا منها واحد في أول رمسيس وآخر بجوار موقف احمد حلمي دائما عليهم زحام مفزع .. وطبعا الاماكن دي هي أماكن وصول وسفر القادمين والمغادرين القاهرة للاقاليم .. المحلات دي بتبيع دستة الجاتوه ب7 جنيه ونوع تاني ب12
    ولك أن تتخيلي .. 12 قطعة جاتوه ب7 جنيه هتكون إزاي ..
    بس المحلات ناجحة جدا وبتحقق مكاسب فوق الوصف .. ولم ترد منها شكاوي مثلا أن الحاجة فاسدة مثلا .. ربما ليست بالجودة المطلوبة .. ولكنها بالتأكيد بالسعر المطلوب

    ReplyDelete
  4. كل سنة وانت طيبة يا جميل
    علي فكرة انا سمعت ان التورتات والحاجات ده بتبقي من بقايا الفنادق الكبيرة بتتباع للغلابه ..مش عارفه صحة الكلام ده اذا كانت هي اللي تقصديها ولا ايه لكن اعرف ان في سوق للبقايا ده

    ReplyDelete
  5. أولاَ أنا بعلق بس عشان أرفع قبعتي أحتراماً للطريقة آلي أنتِ كتبتِ بيها التدوينة.
    آلي عاجبني أن آلي أنت عملتيه ده متزامن مع حوار طويل عريض كان على الجوجل جروب بتاعت المدونين المصرين عن صعوبة الكتابة والقراءة بأشكال معينة وأن كل واحد بيستسهل الطريقة آلي بتريحه ويكتب بيها.
    كلنا ممكن نعمل كل حاجة المهم أحنا عايز نعملها بقوة ولا لأ.
    كل سنة وأنتِ طيبة شكراً.

    ReplyDelete
  6. حرااااااااااااااااااااااااااااااااام
    عليكيييييييييييييييييييييييييي
    جوعتينيييييييييييييييييييي
    (بالصورة مش بالحكاية طبعا)
    ربنا يسامحك
    انتي مدينة ليا بتورتة من "لا بوار"سلام يا معزبة بطون الجعانين
    :D

    ReplyDelete
  7. ده أكازيون البواقي والفضل
    :)

    ReplyDelete
  8. Far east people living in the Middle East always use this way bel monasba :D. They are used to it because it is very hard to find a computer which supports Chinese and Korean and so.

    Congrats on your attempt anyway (I ocne tried it for absence of arabic support and I sweard not to try it again :D. rabena ye3enek.

    ReplyDelete
  9. السلام عليكم اولا وكل سنة وانتوا طيبين
    الموضوع جميل ويا ريت برضه اللى بيعرف حد من بتوع التموين يبلغ عن الموضوع وده مش عيب ولا حرام لان اللى صعبان عليك النهاردة علشان ارتفاع الاسعار والبطالة ومسئول عن كوم عيال فيه الف طريقة وطريقة تساعده غير انك تقف تتفرج عليه بيشسترى حاجة ممكن تموته لا قدر الله لو هيا فاسدة او مسممة او منتهية الصلاحية
    وبالنسبة لموضوع جابوها منين ممكن تكون مصنوعه تحت السلم لان محلات الجاتوه بتعدم الجاتوه الفاسد الا لو هيتباع للباعه الجائلين بنفس اليوم وبالنسبة للفنادق الكبيرة صعب جدا تكون مصدر ليها لعدم وجود ادارة اسمها بيع الطعام الغير مباع لانه ده هيفتح مجال للسرقات مش هتقدر تسيطر عليه الادارة ولا الجهة المالكة للفندق ولا الحسابات
    وبالنسبة لموضوع البيض عندنا حاجة اغرب من اللى قلتوه
    عندنا محل البيضة فيه ب 75 قرش وتنقيها بنفسك
    وبنفس المحل لو عايز بيضة ارخض وتمنها 50 قرش بس موجود بس فيها عيب مكسورة مثلا مش نضيفة من بره حاجات زى كده برضه
    وربنا يستر علينا من اللى جاى :(

    ReplyDelete
  10. يا أيكاني (صح اسمك كده) خودها كلمة موثوق فيها من واحدة تسعين في المية من عيلتها في مجال الأوتيلات. بواقي البوفيهات بتتباع فعلا وبالذات الجاتوهات يا سيدنا. وكمان في جمعية خيرية بتلم بواقي البوفيهات للفقراء. ثانية بياع البيض الي جنبكم نضيف والله لو الموضوع واقف عنده عند نوعين من البيض. ده في اساسا البيض الي بيتباع في كوبيات علشان اتكسر كله اساسا وشوف بقى اتلم ازاي

    ReplyDelete
  11. كل عام وانت بالف خير وكل عام ومصر وشعبها بالف خير

    ReplyDelete
  12. هو دا الي فاضل كمان مش كفاية المية الملوثة والقطارات البايظةوالبرنامج النووي بتاع اونكل جمال
    شكلنا كلنا هنروح كازينو الفروتيكانا مع بعض
    وناكل الوز العراقي بتاع عم فلانتينو
    وصبح صبح ياعم الحج
    وكل سنة وانتوا طيبين
    عيد سعيد عليكم
    ============================
    الامبراطورية المفقودة
    عالم مختلف !
    www.lost-empire.blogspot.com

    ReplyDelete
  13. هو دا الي فاضل كمان مش كفاية المية الملوثة والقطارات البايظةوالبرنامج النووي بتاع اونكل جمال
    شكلنا كلنا هنروح كازينو الفروتيكانا مع بعض
    وناكل الوز العراقي بتاع عم فلانتينو
    وصبح صبح ياعم الحج
    وكل سنة وانتوا طيبين
    عيد سعيد عليكم
    ============================
    الامبراطورية المفقودة
    عالم مختلف !
    www.lost-empire.blogspot.com

    ReplyDelete
  14. أنا كنت هادخل أقول نفس كلام رضوى

    ***
    عادة لما بنحضر فرح فى قاعة أو فندق الجارسونات بيجمعوا باقى قطع الجاتوهات والباتيهات والحاجات دى ولما سألت هما بيودوها فين (أكيد مش بيرموها علشان عددها بيكون كبير قوى) فيه ناس قالت إنهم بيقسموها على بعض وياخدوها معاهم البيت وناس قالت بتبيعها
    بس متهيألى إنها فعلاً جاتوهات بس من غير فلوس علشان كده بتتباع رخيصة بالشكل ده
    ****

    بصى بقى .. أنا مش عارفة المشكلة فين بالظبط
    فى الشاشة بتاعتى ولا نظارتى الحمرا:((
    المرة الجاية علشان الإحراج خلى الألوان لا تحتمل التأويل

    ReplyDelete
  15. الف نهار ابيض

    المدونة ظهرت عندي أخيرا يابركة العيد يابركة الكي بورد
    بس موضوع الجاتوه اللي الدستة بأربعة جنيها مثالا آخر يدل على غننا عيشين في بلد العجايب

    شكلهم كده بيحققوا كلام ماري انطوانيت بتاعت الشعب اللي مش لاقي ياكل عيش

    ياكلوا جاتوه ياكلوا كل اللي بيحبوه

    ReplyDelete
  16. كل سنة وانتى طيبه يا بنوتة يالى زى العسل انتى

    ReplyDelete
  17. kol sana wenty tayeba,
    i wish to be once the first comentator on your blog, do readers of your blog wait on the door to comment on your posts?

    anyway, i just want to send my best regards to you and to all of your readers!

    ReplyDelete
  18. كيمو
    كل سنة وانت طيب،
    نظرية حلوة :)
    ---------

    ابويوسف
    ابويوسف بيعلق عندنا، يا مرحبا يا مرحبا.. كل عيد بأه تعلق :)
    اسكت ما تكسفنيش بأه، طلعت البيضة بسبعين قرش، وانا اللى معلوماتى بايتة كام شهر :)
    كل سنة وانت طيب وعيد سعيد
    ----------

    بلوستون
    صباح النور يا جميلة :)
    وكل سنة وانتى طيبة وبصحة وسلامة
    انا مكنش عندى فكرة خالص عن الحكاية دى، مجاش فى بالى ان فى جاتوهات بواقى بترميها المحلات :) او تبيعها، بس كمان اللى بتاخدها محلات تانية، اهى دى اللى غريبة
    -------------

    رضوة
    وانتى طيبة وبالصحة والسلامة يا جميلة :)
    بجد بجد عايزة نتقابل تانى، ونرغى كتيير

    .. وسوق كمان :)) يعنى مش باعة جائلين بس.. ومش محلات بس.. دا سوق، يعنى طلع بيزنس جامد
    -----------

    The eyewitness
    ولو انى مش عارفة انت تقصد ايه بالظيط بس ماشى :) ميرسى اوى ع القبعة بس هترفعها وبس مش هتيهالى البسها شوية
    :D
    --------

    عربى
    بجد انا قاصدة اجوع بيها الناس.. لأنى انا بحب جدا التورتات تبقى غرقانة شيكولاتة كده :)))
    -------

    عبده باشا
    نورت مصر :)
    ---------

    IRC Precident
    كونجراتس على ايه :) دى محاولة تطلع الروح. انا مش عارفة اللى خبط فى دماغى استعملها
    ------------

    aichany
    ما هو انا بردو بيتهيئلى لو حتى صنوعها تحت السلم هتبقى اغلى من كده، انا برجح دلوقتى فكرة البواقى والفضل

    المهاجر
    كل سنة وانت طيب ، وعيد سعيد
    ---------

    الكسندرا
    بيتباع فى كوبيات؟؟ انا هسورء م المعلومات الى بعرفها النهاردة
    ----------

    ممكن
    كل سنة وانت طيب وتعود علينا الايام بخير
    ----------

    the emperor
    عيد سعيد عليك وعلى الامبراطورية المفقودة
    ------------

    فيولينا
    حاضر من عنيا، هو بردو لو شوفتيها رمادى هبقى مبسوطة :)
    -----------

    شقير
    احمدك يا رب :) اخيرا ظهرت يعنى.. هو انا بردو تخلصت من كل الاسكربتات اللى كنت مغرقة بيها التصميم اللى فات ،
    ----------

    شاب اسكندرانى
    وانت طيب وعيد سعيد على كل اهل اسكندرية
    -------

    عبدربه التايه
    هههههههههه مش للدرجة دى يعنى :) ان شاء الله ربنا يحكملك بنصيب وتعلق مرة الاول
    كل سنة وانت طيب

    ReplyDelete
  19. انا بقه مابحبش الشوكلاته بتاعة التورت والجاتوهات...لما تيجيبيها تبقي كريمة علشان مش باعرف انام من الشوكلاتة...تقيلة

    ReplyDelete
  20. كل سنة وانتي طيبة
    انا عايزة اقولك ان انا شوفت المنظر ده برده عند محطة مترو فيصل بس كانت والله اسعار ارخص من كده ووقفت انا واختي نتفرج عليها وعلى الناس اللي كانت بتشتري

    ReplyDelete
  21. كل سنة وانت طيبة ومبروك على الشكل الجديد 00تدوينة جميلة لولا الصورة دي 00يعني كان لازم تجوعينا كده 00؟

    ReplyDelete
  22. مبروك النيو لوك.. هذا أولاً .. كل سنة وانتي والكل بألف خير .. هذا ثانياً..

    بس بيني وبينك ومع احترامي لكل ما قيل على وجاهته ، برضه الواحد يقلق..

    لما ألاقي كرتونة البيض وأنا في المنصورة بتمشي الهوينى مقتربة من العشرين جنيه ، في المنصورة أكرر ، مش في قاهرة المعز اللي الكل بيشهد بغلاء العيشة فيها .. تبقى البيضة في أم الدنيا بكام؟

    ReplyDelete
  23. السلام عليكم وكل سنة وانتم طيبين

    انا من زمان كنت عايزة ازورك واشكرك لأنك صاحبة اول مدونة ازورها وعرفتيني على التدوين في التوتوريال الي كنتي عاملاه "ا ب تدوين" ,,

    ومش هعلق على موضوعك زيادة على الكلام الي قالوه الي قبلي ,, ولكن عايزة احييكي على صبرك وطولة ابلك على الكي بورد بتاعت الويندوز .. انا جربتها لفترة لما كان عندي حرف الام وحرف العين على ما اذكر بايظين في الكيبورد (كانو حرفين بس واتجننت !!) وربنا يفك زنقتك بواحدة جديدة قريب قادر يا كريم !!

    بتمنى زيارتك وعيد سعيد :)

    ReplyDelete
  24. لاتخافى على شعب مصر يا بنت يا مصرية, سواء قطع الجاتوه من فضلات الفنادق أو صنعت بأى طريقة, الشعب تعود على ذلك منذ عهد ما قبل مينا موحد القطرين

    مع تحيات
    صاحب النهر

    ReplyDelete
  25. الناس لما صدقت طبعا البلد حالها صعب و اسمهم يبقي كلوا جاتوه
    مش مشكلة لو طلع عيش بتاو حتي المهم كلوا جاتوه
    ربنا يتولانا يرحمتنا
    كل سنة وانت طيبة
    عيد
    سعيد
    بجاتوه

    ReplyDelete
  26. كل عام وأنت بخير يا بنت يا مصرية وينعاد عليكم بالخير والسعادة على رأي اخواننا الشوام!

    ReplyDelete
  27. By the way, I liked your 'insistance' to type this post to your eager readers!

    ReplyDelete
  28. hehehe, cake le kol mewaten, we 7'alo al sha3b yakol :P

    kol sana we entom tayebeen, we 3aleekon we 3ala antitoxic medecines ma3a kol cake hedeya :)

    ReplyDelete
  29. بالنسبه لي يبيعوه باربعه بسبعه مش فارقه كتير لاننا مبنستخدمهوش كتير
    ولو كان فيه سم و مواد مسرطنه لا اظن انها هتكون ذات فاعليه عندنا لان عدد مرات الاكل النادر فيه وقايه منها

    ReplyDelete
  30. علينا ان نواجه الحياه بشجاعه كي نستحق سعادتنا

    ReplyDelete
  31. ارجو من بنت مصريه ان تضيف مدونتي في قائمة المدونات الخاصه بها ،و ان كان للاضافه قواعد خاصه ارجو ايضاحها كي استفي هذه الشروط فتكون اضافتي ممكنه
    و لكي جزيل الشكر و خالص الاحترام

    ReplyDelete
  32. جبتوه لنفسكم يا بلد اشاعات - ههي دي الجمله الافتراضية التي سيقولها مفتش التموين الشريف الافتراضي برضه
    يعني انتي كنتي اكلتي منه هه جالك تسمم ولا كان جالك تسمم
    شوفي بقى الشعب ده يبلع الزلط بصرف النظر عن معهد الاورام اللي مليان على عينه ولا الغسيل الكلوي ولا فيروس سي لالا دي كلها اشاعات على راي الست سميرة سعية
    روحي نامي ومتخفيش على الغلابه خليهم يتبسطوا وياكلوا جاتوه
    انتهى كلام المفتش
    اما عن كلامي يا ريت التاريخ يعيد نفيه من ماري انطوانت اللي طلبت من شعبها ياكل جاتوه لحد ------ انتوا عارفين بقى ويجعل كلامنا خفيف عليهم

    ReplyDelete
  33. عربى
    كويس انك مش بتحبها، عشان مانتخانقش عليها.. خد انت الفانيليا وانا الشوكولاتة
    ------------

    توتة توتة
    كل سنة وانتى طيبة وبالصحة والسلامة يا جميلة :)
    --------------

    د/ احمد المصرى
    مش بقولكوا قاصدة اجوعكوا :) كل سنة وانت طيب
    -------------

    علا
    عليكم السلام ورحمة الله وبركاته
    يا جميلة العفو العفو.. ماتشكرنيش :) دا واجب

    شفى يا بنتى، احنا بنصبر يا ماما على الكمبيوتر والاجهزة المتخلفة دى :) اول ما تبوظ بتوقف لنا الدنيا
    ---------------

    نجاح
    مينا موحد القطرين لو يعرف اللى بيحصل فى بلده ولاحفاده مكنش وحد القطرين
    ----------

    سارة يا زهرة التيوليب

    اسمك حلو اوى اولا.. انا بموت فى التيوليبات
    وكل سنة وناتى طيبة وعيد سعيد بجاتوه ما يجراش حاجة :) :)
    ---------

    علاء الدين
    كل سنة وانت طيب يا علاء.. وعساكم من عوده على رأي اخوانا الخلايجة
    وشكرا على الكلمتين الانجليزى دول :) على رأى الخواجية بتاعة مسرحية الهمجى
    thaaaank uuuuu, thaaaaaank uuuuuu
    -------

    2 B || ! 2 B ®
    كل سنة وانت طيب ، ورنبا يبعد عننا الامراض والادوية والجاتوه البواقى والفضل
    ------------

    ذو النون المصري
    اعتقد بردو ان اللى هيجيب المرض للناس مش الجاتوه البايظ,, بالعكس اللى بيجيب السرطان دلوقتى بيبقى اكل شكله بيلمع ويبرق وحجمه كبير.. بس طعمه ماسخ.. وجاب للمصريين سرطان وفيروس سى ولسه المستقبل مليان بلاوى مش هتقدر عليها مستشفى 57357 دا اذا اشتغلت فى يوم من الايام وخلصوا الشحاته باسمها

    مممم هفكر اعمل شروط :)
    بس بصراحة معنديش شروط اكتر من انى احب احط المدونة اللى تعجبنى وخلاص
    -----------

    كراكيب
    براحة :)
    هو انا اللى عملت الجاتوه
    وللا انا اللى جبت فيروس سى والاورام
    ----------

    مصراوى
    يا مساء الحاجات الحلوة دى كلها :) وكمان يا مساء الخروجات والقرايب والضيوف والزحمة .. ويا رب يجعل ايامنا كلها اعياد

    ReplyDelete
  34. شكرا علي الموضوع لكن احنا ممكن نبصله نظرة تانية ان في ناس مرتبها 150 جنيه مثلا وعنه اولاد ومن حقهم زي اي حد يعرف حتي يعني ايه جاتوه وماظنش انه هايرمح يشتري من لابوار بمرتب 4 شهور وياكل طوب بالباقي وبعدين المفروض ان الناس اللي بتبيع دي واخدة تصريحات من الصحة والتموين وبما ان في مصرنا دي المفروض حاجةوالواقع حاجة تانيةخالص زي الفرق بين جاتوه العربية وجاتوه محلات المهندسين يبقي هو ده اللي هايستمر ويجعله عامر

    ReplyDelete
  35. أولا، "يا صبرك!" :)

    الجاتوه دا موجود من زمان. في المناطق الشعبية.

    اسمه "باسطا" برضو و اللا أنا غلطان؟

    و كنت اتعجب زيك كدا من سعره و بعدين بطلت.

    ما هي العائلات ال عايشة ب300 جنيه في الشهر أكيد بتعمل حاجات احنا مش ممكن نتخيلها.

    ReplyDelete
  36. miro
    اكيد طبعا عندك حق
    هى الفكرة انى مش واثقة ابدا ان الناس دى واخدة تصريح وان الجاتوه بتاعهم مش منتهية صلاحيته مثلا

    -------------

    ألِف
    :)
    اه، ما انا حرمت اصبر

    ممم، مش عارفة اسمه باسطا وللا لأ، بس هو شكله زى الجاتوه العادى يعنى، ومكتوب على اليافطة جاتوه

    ReplyDelete
  37. البوست ده دمه خفيف
    لحد السطر 16
    فيه غلطه املائية
    مش لطيفة
    الألفات المهمذة
    بالزاي يا استاذتي العظيمة
    تبقى المهمزة
    من همز يهمز
    بس بردو بوست خفيف ويمس الواقع
    انعدام الضمير
    في كل شئ وكل مكان
    نحتاج الى وقفة مع النفس
    زي ما قال هيكل
    سبب تراجع السوفييت
    ان الحلم تلاشى
    مبقاش فيه هدف
    واحنا كمان ملناش هدف
    تقدري تقوليلي ايه هدف مصر
    او اي مصري
    مفيش
    اقفي في الشارع مرة واول واحد تقابليه قوليلو انا صحفية وبعمل ريبورتاج
    واساليه ايه هدفه في الحياة
    وهتنصدمي فعلا
    ممكن يقولك اتجوز
    او اخد الليسانس

    ReplyDelete
  38. اطلعي علي كوبر اللمون و انت رايحه شبرا برضه هتلاقي نفس الجاتوه ده برضه اللي مجازا بيسموه دسته جاتوه مع اني مش عارف هو ازاي متقطع و هو اصفر اوي كده !!!
    انتوك

    ReplyDelete
  39. بصى هو غالبا هيبقى جاتوه متاكل قبل كده
    زى ما بنتنفس هواء مستخدم اكيد

    الناس خلاص بقوا عايزين يعيشوا الدور و خلاص و يضحكوا على نفسهم و على اللى حواليهم


    حاجة كمان
    اذا كانت الناس بتاكل فى لحم بعض
    تفتكرى هيهمها طعم الجاتوه
    ده انتى حتى لو قولتيلهم ان صلاحيته منتهيه برضة فى ناس هتشتريه

    الوضع متردى جدا اصلا
    و عموما غالبا الجاتوه هيبقى حته اسفنجه عليها اى لون و دمتم

    وكله بيصدق
    و كله بيسكت

    ReplyDelete