8/13/2006

يا ورد مين يشتريك ويبيع بعد بكرة فيك.؟

أحيانا لا أفهم تصرفات البشر.. ما يجعلنى أشك فى أنهم بشر أو فى قدرتى على الفهم.. ربما لأن لدى قناعات ثابتة لا أستطيع فى غير وجودها -أو فى حال تخطيها- أن أتفهم وأتسامح وأبارك.

طبعا مش فاهمين منى ولا كلمة، وطبعا يمكن اللى أقصدها بالكلام ده ما تعرفش إنى أقصدها.. بس هى لو تعرف قد إيه أنا حطاها فى مكان مميز جدا.. وبحترمها جدا.. وبقدر قلمها جدا جدا.. وبحس دايما قد إيه هى حساسة وجميلة ورقيقة وشفافة .. وبعرف إنها كمان عبقرية ومدركة وملهمة .. وقادرة تخلق من الكلام البسيط معنى عميق، ومن الأحاسيس المنزوية دايرة ضوء.. ومن الصبر المر والسنين العلقم مضادات حيوية.. لكل ده وعشان ده مش قادرة أستوعب إزاى الايدين الجميلة تحفر فى الأرض حفرة.. وتغطيها بورق شجر.. وتقرر إنها تعدى من عليها.. برجليها.. مش مستوعبة إزاى العينين الجميلة تغمض عن دموع بريئة.. وإزاى توهب كل المستقبل لليالى هتفوق فيها فى يوم وتتمنى لو ترجع للحفرة تسدها، أو حتى تكشف عنها ورق الشجر فلا تخطىء القدمين المرور

يمكن نكون ما تقابلناش غير مرة واحدة.. لكن قريت لك كتير. مقدرش أدعى إننا أصحاب، لكن دا مايمنعش إن جوايا اترسملك بورتريه يخلينى أستغرب من قراراتك الأخيرة . أنا حزينة جدا، ومش قادرة أستوعب إزاى كل ده حصل وبيحصل، وبإسم إيه؟؟ إوعى تقولى الحب.. الحب بيلم مش بيفرق.. وانتى وقعتى فى حب أول حاجة عملها إنه فرّق.. بس أنا رغم حزنى، ليا فى ربنا عشم يبعت شوية هوا يطيروا ورق الشجر - دا حتى أصفر وناشف - أو حتى تقعى تتكعبلى - بعد الشر عليكى - قبل ما تخطى الخطوة الجاية والكعبلة دى تفوقك

---------
دا أول بوست أخد رأي حد تانى فى إنى انشره، وكمان على عكس الحد ده اللى قاللى ماتنشريهاش، انا بنشرها.. يعنى م الآخر بوست اندفاع ومش عارفة ممكن يفيد بإيه

25 comments:

  1. عروستى
    :)))

    وحشانى جدا والله يا زيزى بقالى كتير ما عدتش هنا اعذرينى
    يارب تكونى بخير يارب ومبرووووك لرشا وعقبالك كدة يارب لما نفرح فيكى اصدى نفرح بيكى
    واعذرينى كمان عشان مش عارف اعلق على البوست ده
    اصل مش فاهم حاجة
    :$
    :D

    ReplyDelete
  2. واضح ان الحاله النفسيه على البلوجز كلها مش ولا بد :)) في حاجه غلط

    عايزين علاج للحاله النفسيه دي .. حد عنده حل .. اريد حلا

    ReplyDelete
  3. ياستي طالما بتعزيها كده لازم تصارحبها أكتر وإذا كنتي حاسه إنها هتقع لازم تاخدي بأديها لغاية ماتعدي إزمتها بإذن الله

    ReplyDelete
  4. بوست حلو قوي يا أجمل بنوته ف بلوجر .. بجد بجد البنوته اللي تقصديها صعبت عليا قوي و نفسي اعرفها .. بس الحمد لله اني اعرفك انتي كويس .. بس انا مع بلقاس ف انك تحذريها حتي لو مكنتوش اصحاب .. و لو هي من قارئات "بنت مصرية" اكيد ممكن ربنا يلهمها و ينور بصيرتها و تفهم .. و ابقي قوليلنا عملت ايه و ايه اخر اخبارها ..

    ReplyDelete
  5. مع ان الموضوع شكله كدة نسائي
    بس يعني بما اني برضك متشاكس مع زينب في الفترة اللي فاتت :)
    من شاكس يشاكس مشكلة
    فممكن ادلو بدلوي

    طبعا انا معرفشي تفاصيل الموضوع
    بس من الاخر كدة

    الصديق الحقيقي
    هو من يقبلك علي علاتك
    ويتواصل معكي في قمة الاختلاف
    ويرعي سركي في ذروة الغضب

    وهذا النوع من البشر نادر جدا
    واذا وجدتيه قولي لي اين اجدهم

    اما ان كانت صديقتك دي في ازمة
    فالمسالة نسبية
    ما هي الازمة
    اهو اختلاف في الراي في قضية ما؟
    وهل هذا يسمي ازمة؟

    انا لاحظت ان كل اللي علقوا حكموا علي الموضوع من وجهة نظر زينب
    مع ان الشخص التاني دي محدش سمعله برضك

    المهم
    زي ما قلتي يمكن البوست ده تنفيسة بس
    وماله

    ربنا يرفع عنكي الهم ان شاء الله
    امين

    ReplyDelete
  6. مسمعتيش كلام اللي سألتيه ليه...محدش فاهم اي حاجة...كان المفروض تبعاتيلها اللي عاوزاه في جواب وتكتبي فاعل خير...لانك انتي اللي وقعتي كده برجلك في الحفرة...صحيح البلوج ده بيمثل الانسان ومن حقق انك تكتبي اللي عاوزاه المشكلة انك بدأاها سياسي..وعمري ماشفتك كاتبه حاجة تانية...بس بغض النظر عن الحفرة ديه اسلوبك حلو جدا

    ReplyDelete
  7. سويدى
    مرورك بيفرحنى :) دايما، حتى لو طليت من غير ما تعلق، الله يباارك فيك وعقبالك

    وانا عذراك طبعا انك مش هتقدر تعلق على البوست ويمكن مكنتش منتظرة ان اى حد يفهم اى حاجة غير اصحاب المشكلة
    ------------

    زانجولا
    يا عم زانجولا صلى ع النبى :) انت اللى عملت ازمة نفسية لبتوع الدستور وشكلهم هيقلبوا ع المدونين عشان خاطرك :D
    -----------

    بلقاس
    ما هو الموضوع ده ماينفعش فيه اكتر من كده، انك تقول نصيحة وتنتظر معجزة من السما، اعتقد انى عملت اللى عليا.. او بمعنى تانى تدخلت فى موضوع نظرا لتأثرى بيه ويمكن اصحابه مكنوش يحبوا ابدا انى اتدخل فيه
    -------------

    رومانتيك روز
    ربنا يخليكى ليا يا كوكى، انا عارفة انك هتضايقى ، لو عرفت تفاصيل جديدة اكيد هقول ، تعرفى ان واحدة من اهم صديقاتها شكرتنى على البوست ده؟ هى كمان يا حبيبة قلبى متضايقة من اللى حصل وحاولت كتير، عشان كده بقول ان الموضوع ماينفعش فيه غير النصيحة وكل واحد حر بعد كده
    --------------------------

    بن عبدالعزيز


    الصديق الحقيقي
    هو من يقبلك علي علاتك
    ويتواصل معكي في قمة الاختلاف
    ويرعي سركي في ذروة الغضب

    وهذا النوع من البشر نادر جدا
    واذا وجدتيه قولي لي اين اجدهم


    انت بترمى كلام على مين :) يا شريف
    عموما اعتقد ان التعريف دا للصداقة موجود، على الاقل انا ليا اصدقاء كده، منهم طبعا الآنسة الجميلة اللى كانت معلقة قبلك

    انا زى ما قلت فى البوست ان انا والبنوتة مش اصحاب واننا اتقابلنا مرة واحدة بس، وكل علاقتى انى بقرألها، وعلى قد علاقتى الطفيفة دى قمت باللى حسيت انى واجب اعمله، يعنى مقدرش ابدا ارفع سماعة التليفون واقولها اى حاجة ، لأنها ممكن تقولى انتى ايه دخلك فى الموضوع، دى نقطة، ثانيا مكنتش هعرف اشرح لها بالظبط انا شايفة ايه ومتضايقة ازاى عشانها.. وانا عارفة نفسى هنا

    عموما الازمة مش اختلاف فى الرأى بالمرة، بس سيبك، كلامى وصلها واتمنى انا تكون فكرت فيه خمس دقايق

    ---------

    عربى
    احيانا بيكون التدوين انك عايز تكتب حاجة توصل لحد واحد بس، او حتى توصل لنفسك من غير ما اى حد تانى يفهمها.. بكلم نفسى يعنى.. ومحدش مضطر انه يفهم ويعلق ويناقش :) كمان انا مش بكتب فى السياسة.. انا معرفش حاجة فيها عشان اكتب فيها.. انا بكتب عنى وعن الحاجات حواليا، هتلاقى بوستات كتير شخصية، وبوستات كمان مش هتفهم منها حاجة زى البوست ده، وبوستات يمكن تقول انت عليها سياسية بس ان جيت للحق دى مجرد رأى شخصى من واحدة ما بتفهمش فى السياسة بس متضايقة من الحكومة :)) يعنى ارجع للأرشيف حالا واتعرف عليا اكتر

    بمناسبة الحفرة ، بينى وبينك انا بردو مكنتش عجبانى، مبحبش الصور التقليدية، بس انا كنت بكتب بسرعة واللى بيييجى على بالى بكتبه ومش بمسحه، كنت عايزة الحكاية من قلبى لقلبها على طول.. فجت كده

    ReplyDelete
  8. انا اول مرة ادخل البلوجر بتاعك ولو اني سمعت عنه كتير مأجمله هايلة بجد

    ReplyDelete
  9. علي فكرة انا مكنش قصدي اتريق...بس ده تاني اسبوع ليه فيالبلوجينج كنت بسمع هيكل بيتكلم عنه من زمان واخويا عامل نصر مصر بقاله سنه..بس من غير مجامله انا اللي حببني في حكاية البلوجز لما شوفتك وشفت خالد عزت والشرقاوي.........وقلت لازم اعمل ومنال وعلاء بلوج في الصيف لاني كنت في ثانوية عامة...وعن حكاية من القلب للقلب ديه..زانا ممكن اعدل موضوع بعد اربع مرات لو لقيت معلومة جديدة او كده...البلوج ده هو انت وانا وكل اللي بلوجينج..هي ديه المساحة اللي بنعبر فيها عن روحنا لاننا مش لافيين حزب او اي حد يسمعنا

    ReplyDelete
  10. معلش أنا بقالي مده ما زرتكيش .....................ولكنه للأسف أعمى ولن نأتي ونجري له عمياه فيعود بصيرا

    ReplyDelete
  11. عزيزتي بنت مصرية
    لو اللي انا فهمته صح.. يبقى إنتي كده عملتي اللي عليكي ومحدش يقدر يغلطك
    الصديق ليه حق النصيحة
    وفي حالات محتاجة شد ودان علشان الصديق ميرجعش يلومك إنك منصحتيش و محاولتيش

    ReplyDelete
  12. ليه نسينا الصراحة . من غير حساسيات لو كل واحد راح واجه اللى زعلان منه او منهم باللى مزعله , الموضوع هيخلص والحساسيات هتروح

    ReplyDelete
  13. زيزى.. بصى بعد ما علقتى.. معلش بس زودتك للاستقصاء ولا الــ
    tag
    زى ما تسميه...

    بس انتى من الشخصيات اللى نستها رغم انى بجد احب اعرف ردها

    يلا مستنياه
    وبالمرة جاوبى على مين شبهك.. ومين أثر فيكى

    :P

    تدبيسة هى

    ReplyDelete
  14. sahar
    ميرسى يا جميل :)
    سمعتى عليه من مين بأه؟؟ ها
    :D
    --------------------

    عربى
    لا انا عارفة انك مش بتتريق، بس يمكن الموضوع قلب معايا وبقثيت زى اللى على راسه بطحه
    ---------------

    هيومان
    يا خبر ا خبر.. انت تنور سعادتك فى اى وقت.. شاى وللا حاجة ساقعة يا فندم
    ---------------

    مى تو
    ريحتينى يا بنتى، بس انا مخدتش بالى من حكاية ما ترجعش تلوم دى، انا بجد مش عايزاه تاخد الخطوة الجاية دى ابدا.. لو فى ايدى حاجة اكتر اقدر اعملها كنت عملتها
    ---------------

    انسان
    هو الموضوع مش موضوع حساسيات، وللا اختلاف بينا، بالعكس

    ------------

    لست أدرى
    ميرسى يا بلو :))
    مفاجاة جمييييييلة

    ReplyDelete
  15. هل من حقنا ان نعلق على موضوع هو بالأصل من خصوصيات كاتبه
    واذا كان من الخصوصيات ولا يجب ايضاح اكثر مما هو واضح فلم اذن طرحه للتعليق
    اللافت ان هذه المرة اعرتي اهتماما كبيرا برأي كل من علق تقريبا على عكس كثير من المواضيع السابقة
    وانا مع زانجولا في كلامه عن الحالة النفسية ولكني احب ان اصفها بالشاعرية بدلا من النفسية فكلمة نفسية مبتذلة وتشعرني ان الموصوف بها مجنونا او مكتئبا
    ولكننا هنا امام حالة من الاحساس المتدفق

    ReplyDelete
  16. أحمد
    طرحى للموضوع لا يعنى طرحه للتعليق، دا اوبشن مفتوح طول الوقت
    نادرا جدا لو قفلته، حصلت مرة واحدة
    انما مش بحط فى بالى انى اقفله عموما حتى لو طرحت موضوع مش عايزة عليه تعليق
    بردو الحكاية مش انى عايزة او مش عايزة.. دا يمكن موقف خاص شوية.. ان الرسالة موجهة لمدونة هنا معانا ويمكن دى الوسيلة الانسب نظرا لسطحية علاقتى الشخصية بيها وعمق اهتمامى بيها كمدونة

    ثانيا اهتمامى بالرد على التعليق المرة دى عن المرات السابقة دا راجع للموضع اللى فات او اللى قبله، لما احد زوار المدونة لفت انتباهه انى بقيت بعلق نادرا ووعدته انى احاول اهتم اكتر بالنقطة دى
    بس :)

    ReplyDelete
  17. ياااه يا زيزي.. اد كدة هي حد رقيق وجميل وشفاف؟ بجد حبيتها وصعبت عليا كمان بس البوست غامض قوي وبيتهيالي حتى لو هي نفسها قرته باعتبارها بلوجر مش هتفهمه.. كان المفروض توضحي اكتر او تقولي حاجة تفهمها

    ReplyDelete
  18. rose

    عندى امل فى ربنا تكون فهمته يا بنتى

    بس طالما هى اثرت فيك كده وحبتيها ، تقوليها ايه؟؟
    اكتبى عندك بوست ليها، وانا هعمل كل جهدى انه ويصلها كلامك
    يمكن انا وانتى يكون لينا تأثير عليها، طالما انتى فى صفى يا جميل

    ReplyDelete
  19. يمكن أكون فهمت شوية
    انتى تقصدى البنت اللى كتبتى عنها فى كتاب (بنات زعتر ) الموضوع اللى كتبتيه عن البنت اللى بتحي راجل متزوج

    وعاوزه تتجوزه

    بصى اى حب فى الدنيا لازم يكون تحت مظلة ربنا عز وجل
    فى الحلال يعنى
    والتعدد حلال
    احسن من حاجات تانيه كتير
    المهم نفكر ونخطط ونتوكل على الله
    وكل واحد بياخد نصيبه

    انا ضد الكلام بتاع
    هتاخد واحد مش حقها
    هتسرقه من بيته
    والكلام اللى ورثناه من غير ما نفهم معناه


    اتمنى اكون اتكلمت فى الموضوع

    وميكنش استنتاجى خاطئ

    ReplyDelete
  20. وليد
    لا يا وليد.. غلط خالص.. مش هى يا بنى، بص البنت اللى انت تقصدها موضوعها باظ كده من عند ربنا بعد شهرين تلاتة، لأنه هو اللى سابها
    البنت اللى انا اقصدها خطيبها طلق مراته ،
    واساسا لو كنت هوجه نصيحة لصحبتى اللى انت تقصدها كنت قلتلها فى وشها لأنها صحبتى ولأنها مابتقراش مدونات

    انما موضوع التعددد وكده ، انا مش هناقشك فيه.. انا عندى صداع من الموضوع ده ومش بحبه

    ReplyDelete
  21. ما هو انا يا زيزي اصلا لا اعرفها ولا اعرف حاجة عن الموضوع الا لما رديتي على وليد اللي علق بعدي.. بتقولي ان خطيبها طلق مراته عشانها، طيب اذا كنتي مقابلتيهاش غير مرة واحدة زي ما قلتي في البوست بتتكلمي في الموضوع على اساس ايه وعلى اي اساس بتصدري حكم على حبها وموضوعها كله؟ صدقيني لو فهمتيني التفاصيل وادتيني معلومات هكتب عنها بوست عندي وهيعجبك كمان.. دا وعد

    ReplyDelete
  22. روز
    بتكلم عن الموضوع على اساس انى عرفت الموضوع من مصادر قريبة منها.. هى نفسها ماتقدرش تقول ان المصادر دى كدبت عليا فى تفاصيل الموضوع.. انا عرفت الموضوع وتفاصيله، كمان انا اعرف ان خطيبها دلوقتى كان بيحب مراته، او هكذا كان يبدو لما قابلته كذا مرة فى وسط مجموعة اصحاب، او بلاش اقول انه بيحبها.. ربنا اعلم بالقلوب، بس كان بيتكلم عنها بحب وتقدير.. دا غير انه عنده منها ولد ما شاء الله عنده سبع سنين، وكان عنده خطه حياة.. ساب كل ده ، طبعا تفاصيل اكتر مش هقدر اقول عليها هنا، كمان انتى مش مضطرة تكتبى عنها

    اه صحيح.. انا جملتى لوليد كانت واضحه.. انا قلت له " خطيبها طلق مراته" ودى جملة معلوماتية بحتة ليس فيها ما يدل على رأى او حكم منى.. انا مقلتش عشانها.. عموما الناس دى مش بيطلقوا عشان خاطر حد.. لو تفهمينى

    ReplyDelete
  23. انا ليا سؤال بس علشان انا واخويا(نصر مصر) مختلفين عليه بس مش انتي البنت بتاعة اسكندرية اللي كانت في برنامج المدونون علي الجزيرة ولا انا اللي مهيس

    ReplyDelete
  24. زيزى
    كويس انك وضحتى
    الظاهر فى ازمة فى مصر .. محدش مستريح

    ReplyDelete
  25. هي بنت مصرية مش بترد ليه علي التعليقات

    ReplyDelete