11/05/2006

ماحدش يعرف هناك ، إنى بدون

أول مشاكل الشغل الجديد

ماقولتلكوش أنا إنى رجعت اشتغل تانى "فل تايم".. أصلى بعد قعدة فى البيت استمرت قرابة تسعة أشهر.. بقى نظام حياتى زى حياة اخواتنا الوطاويط.. نوم بالنهار وسهر بالليل مع انى مابحبش.. وبكسل أخرج حتى اروح لصاحبتى اللى فى نفس بلدى، ما بال اصحابى اللى فى مصر.. يعنى كنت اكسل اطلع الهدوم واكويها.. اقول يييي انا لسه هكوى، واحيانا لما يستبد بيا الشوق والاقى ان التليفونات مش جايبة همها، ألبس العباية واروح، مع انى ماما مش عايزانى اخرج بالعباية.. وكمان فى فترة التسع شهور دى وزنى زاد بتاع تسعة كيلو.. وطبعا اكتئبت لهذه الزيادة اللى لا على البال ولا الخاطر

مكنش قصادى غير انى اقبل بأى فرصة شغل تجيلى.. بس عشان أخرج.. اظبط نهارى وليلى ووزنى واتعود ع الخروج.. فاروح لاصحابى تانى بنشاط وحيوية.. طول الصيف كنت شغالة حاجات فرى لانسر.. فمكنش فى مشكلة من ناحية الفلوس.. حقة لو مكنتش بتجيلى فلوس كنت اكتئبت اكتر.. لأنى من ساعة ما اشتغلت من سنتين وانا معتبرة نفسى مستقلة ماليا عن بابا وماما.. صحيح بفطر وبتغدى وبتعشا على حسابهم.. وصحيح مابحطش حاجة نهائى فى مصاريف البيت.. إلا انى كنت هتضايق لو رجعت اخد مصروف من بابا وماما تانى.. أولا لأنه استحالة يكفينى دلوقتى وانا طلباتى كتيرة.. وثانيا منظرى ايه قصاد نفسى وانا اعتبرت نفسى "بنوتة كبرت خلاص ومش بتاخد مصروف" ه

حلو.. اشتغلت.. من شهر وعشرين يوم كده.. كل يوم اخرج من سبعة ونص الصبح وارجع سبعة ونص بالليل منهم اربع ساعات مواصلات وتمانية فى الشركة.. صحيح بشتغل هناك حاجتين فى نفس واحد.. بصمم جرافيك وبترجم.. صحيح كل الجرافيك اللى بعمله لحد دلوقتى هو رسم خرايط على إليستراتور.. الا انى كنت مبسوطة بردو

مبسوطة لأنى رجعت ظبطت يومى.. ومبسوطة لأن الناس هناك فى الشركة محترمين.. ومبسوطة كمان انى اتعلمت إليستراتور.. يعنى تقدروا تقولوا بدوس فيه دلوقتى

طيب المشاكل جت منين؟؟
أولا أى مكان فيه بنى أدمين أكيد هيكون فيه مشاكل.. دى حاجة اتعلمتها وأكيده.. وكتبتها فى سجل خبراتى
ثانيا خلينى أحكيلكوا عن خلفية المشاكل اللى قابلتنى فى أى شغل قبل كده
ممممم، أبدا.. ما حصلش انى اختلفت مع حد او اتخانقت مع حد.. باختصار لأنى شايفة ان كل واحد حر فى تصرفاته.. ولأن الناس بيتعاملوا معايا بأخلاقهم هما مش بأخلاقى أنا وبالتالى اكيد المقاييس بتختلف، وأخيرا لأنى مبعرفش اتخانق
انما لما حد يدوس لى على طرف.. مش ممكن هسكت.. وهاخد حقى يعنى هاخده.. ماما علمتنى كده

المشكلة اللى حصلت بأه، واللى خلتنى اكتب لكو عنها من باب تبادل الخبرات وتقوية أواصر العلاقات بين قوى الشعب العاملة :) هى انى من كام يوم كده قالى نائب رئيس الشركة انهم هينقلوا مكتبى لأودة تانية غير اللى انا فيها. أنا ما علقتش على كلامه.. عادى يعنى ما ينقلوه.. عايزين يغيروا نظام الشركة وانا محبش اقف فى وجه اى "تغيير"، بس كل الحكاية انى عملت اعتبار للمدير بتاعى وبلغته باللى قالهولى نائب الرئيس. هو ماكنش يعرف وقاللى هشوف الحكاية دى

بس بأه.. كل يوم والتانى، النائب ده يعدى عليا ويرمى كلمة من تحت لتحت انى هتنقل هتنقل.. وانا مش فارق معايا خالص، مش عارفة ليه يعنى هو عاملها ازمة ومصر كل شوية يفكرنى
مرة يقولى.. ماتقلقيش يا زينب، كام يوم وننقلك مكتبك (يا عم ومين قالك انى قلقانة) ه
ومرة يقولى.. زينب، على فكرة ما تقلقيش بعد اسبوع كده وللا عشر ايام هننقلك مكتبك (بردو قلقانة؟ جالك منين يا عم الحج انى قلقانه) ه
وأخيرا يقول.. بكرة هتيجى تلاقى متبك منقول (الجملة الاخيرة اتقالت بعد الجملة القبل الأخيرة بيوم واحد) ه

قلت يا مسهل

جيت تانى يوم.. تن تن تن تااااا
والاقى مكتبى اتنقل.. (جميل) ه
فين بقى؟؟ (أهو دا اللى مش كميل) ه
فى أودة.. على البلاط.. (السيراميك يعنى.. ودا اسوأ من البلاط فى الشتا).. ومش بتدخلها شمس نهائي.. وفي فى بلوكنتها الصغنونه كومة سجاد ملموم ومتربة شكلها بقالها كام سنة كده وسدة شمس وهوا عن الاودة.. تخيلوا باه كمية الميكروبات اللى فيها.. لو أوبرا وينفري شافت الوضع اللى انا بقيت فيه كانت جت سجلت معايا حلقة عن انتهاكات حقوق الانسان فى مصر والشرق الأوسط

تفتكروا أسكت؟؟

أنا فى لحظة واحدة.. أول ما شفت المنظر ده، حسيت بإن كرامتى اتبعترت، وانسانيتى اهدرت.. ولا تسلم النفس الرفيعة من الأذى حتى يراق على جوانبها الدم.. عنها وخدت سيفى وطلعت للمدير بتاعى فى الدور التانى

سيبوكوا من مشهد طلوعى ع السلم وتحضيرى للكلام اللى هقوله والفلاشات باك لطفولتى، ونصائح امى الغالية بإنى حقى وكرامتى فوق كل شىء.. وحلقة اوبرا وينفرى اللى عملتها عن الاماكن الصحية وضرورة ان اى مكان تقعد فيه لازم يكون بتدخله الشمس كل اليوم لمدة لا تقل عن ساعتين وخطورة الميكروبات وكمياتها الخرافية فى اى مكان مش بتدخله شمس، والامراض اللى ممكن تنتج عن كده.. بداية من البرد حتى السرطان،

المهم ندخل ع الماستر سين، او المشهد الرئيسى، لما دخلت ع المدير بتاعي، ولقيت نفسى بكل هدوء بقوله: سلامو عليكو.. صباح الخير.. ازى حضرتك. وقعدت ع الكرسى قصاد مكتبه
بعد التحيات والسلامات، قلت له: فاكر حضرتك لماقلت لك ان استاذ (ح) قالى انه هينقل المكتب بتاعى وانا قلت لحضرتك وقلت لى طيب انا هشوف الموضوع ده؟؟ (ومن جوايا متنرفزة جدا.. فاكر وللا لأ؟اعترف بسرعة.. خلينى اقول السطر اللى بعده. برررررر) ه
قالى: اه فاكر
طيب، انا جيت النهاردة لقيت مكتبى اتنقل الاودة الفلانية (فى معاميق معاميقى: اودة الفيران يا حضرت.. اللى بيخوفوا بيها العيال الصغيرة.. اللى هى سابقا كانت مقر أمنا الغولة و"الروم ميت" بتاعتها كانت ام رجل مسلوخة) ه

مديري العزيز فضل ساكت.. ماعلقش، قعد كتير من غير ما يتكلم.. بتاع سبع تمن ثوانى كده
وأنا يعجبنى أوى دور "الذوق.. ذوق.. ذوق.. الصراحة" وقلت له: هو انا معطلة حضرتك؟
انتبه بسرعة وقاللى، لا ابدا ( فى البير اللى جوايا: حلوة لا ابدا دى، امال ايه بأه؟؟) ه
سكت بردو، معرفش بيفصل منى ليه كده؟.. اضطريت اقوله الخطبة السريعة اللى حضرتها وانا طالعة ع السلم
الاودة دى غير ادمية بالمرة، وانا مش مستعدة اقعد فيها ثانية واحدة، دى مابيدخلهاش شمس.. و...( قطع عليا الخطبة) ه
انا مش عارف هو ليه عمل كده (بكلم نفسى: ما هو لو انت كنت افتكرت وكلمته من الاول كنت عرفت ووفرت عليا وعليك الموقف ده. ما علينا قول يا سيدى) اصلا احنا نجهز أوده ليكى وللناس اللى هتيجى (اصل الشركة هتعين هتشغل ناس جداد) وهتكون (قعد يوصفلى ازاى المكاتب بتتحط وانا مافهمتش حاجة لان دا مش موضوعى وما يهمنيش.. بس ماعلينا، كان ضرورى ابدى اهتمامى بالاودة الجديدة اللى بتتجهز واتفاعل انسانيا مع حدوتة المكاتب) ه
المهم يعنى على البلاط بردو؟
لا بلاط ايه -ابتسامة- موكيت ومكيفة وبتدخلها شمس (الواحد عايز ايه غير كده، مع ناس حلوة وطيبة مش شريرة ومفترية) ه
طيب انا لحد ما تجهز الاودة دى، مش هقدر اقعد فى الاودة التانية
لا بس، اصبرى شوية لحد ما تجهز الاودة
لا يا استاذ (م) مقدرش، مش هقعد فيها.. دا آخر كلام. هى الاوده الجديدة دى هتجهز فى خلال قد إيه؟
يعنى عشر ايام كده.. يمكن اكتر شوية
طيب انا لحد ما تجهز، هقعد فى بيتنا، وممكن اخلص لك الشغل من البيت، وبعدين ارجع بعد العشر ايام
-لا مش هينفع تشتغلى من البيت (بصراحة فعلا، مش هينفع، بس انا كان لازم اقوله كده، بدل ما اقوله هقعد فى بيتنا الكام يوم اتفرج على هالة سرحان) ه
ما هو انا كمان مش هينفع اقعد فى الاودة اللى تحت دى
طيب بس، النهاردة اقعدى فيها
ولا ثانية واحدة
اسمعى الكلام بس.. النهاردة.. و.. كام يوم لحد ما
-استاذ (م)، انا هقعد النهاردة بس، عشان خاطر حضرتك (بصراحة اتكسفت انى اكسفه كده وافضل ماسكة على كلمة لأ، فعملت كومبرميز خفيف كده) لكن بقية الايام لأ، انا النهاردة بالليل هتصل بحضرتك واعرف منك اذا كنتو نقلتوا مكتبى لمكان تانى افضل وللا لا، غير كده اناهقعد فى بيتنا

بس، معرفش ياخد منى لا حق ولا باطل.. انا كنت ذوق معاه للآخر، ومحددة جدا، وقصاد كده هو قاللى طيب، على اخر النهار هكون حليت المشكلة دى

سيبته ونزلت، وانا نازله ع السلم متضايقة اوى انى هقعد فى الاودة دى، وقعدت ألوم نفسى أنا ليه وافقت، وليه أحرجت لما اصر أقعد النهارده.. واعتبرت انى بهوقت حقى، يعنى بقى مبهوق، فيه اختراق ما.. كونى هقعد يوم كامل فى اودة الفيران، وقلت اطلع له تانى وارفض، بس اتكسف ارجع فى كلامى واطلع عيلة.. ياللا جنت على نفسها زراقش (زيزي+براقش) ه

وبعدين دخلت على مكتبى وفتحت الجهاز والبرامج اللى هشتغل عليه وتنحت للشاشة ماليش نفس اشتغل.. لسه احساس القهر شاملنى، ومش قادرة اتخلص منه. وبعد شوية كده ماما اتصلت بيا. قلت لها على كل حاجة.. ُلك.. لُك.. لُك.. لُك.. (لُك تعبير عن الرغى). ماما كانت عايزانى انزل من الشركة على طول، وانا اللى قعدت اهدى فيها واقولها خلاص يا ماما انا اديته كلمه النهاردة بس.. وبكرة لو ماتحلتش المشكلة مش هروح

قفلت مع ماما، ورجعت أبحلق فى الشاشة.. وبعد ساعة كده جه المدير بتاعى أودة الفيران، وبص لى مبتسما كده.. ما هى حلوة اهيه :)) انا ابتسمت "بملء فيي" ولو كنت فى مود أحسن كنت ضحكت جامد
يرضيك المنظر ده؟
لا مايرضنيش، اللى مرضهوش لنفسى ، مارضهوش للموظفين بتوعى (أنا طبعا الموظفين بتوعه) ه

وبعدين اتكلمنا فى الشغل شوية، وفى وسط الكلام قلت له انا مااشغلتش حاجة النهاردة، ماليش نفس. وفتحت تانى فى السيرة وقلت اكمل الخطبة، من باب التوعية مش أكتر.. بس مالحقتش، أخد الموضوع هزار، وقاللى كفاية انتى بتشعلليها أكتر.. انا متضايق من الى حصل اساسا، وكلامك بيزود

خسارة، قطع عليا، ماقلتلوش الحتة بتاعة " لو دى كانت بلد محترمة، كنت رفعت عليكو قضية حقوق انسان" وللا حاجة تقريعية زى "أستاذ (ح) لو ليه بنت يرضى انها تقعد فى اودة زى دى؟" وللا جملة من نوعية "انا بقضى فى الشغل هنا تمن ساعات، يعنى تلت يومى، أكتر ما بقضى فى بيتنا صاحية، لازم اكون قاعدة فى مكان يليق بانسانيتى"

مش عايزة أطول عليكو، أخر النهار كلمنى تانى قبل ما امشى وأكد عليا ان المشكلة هتتحل النهاردة وانى ما اقلقش. وفعلا وأنا فى طريقي للبيت اتصل بيا وقاللى خلاص المكتب تباعك نقلنها الأودة الفلانية (ودى اودة كويسة جدا وترضينى)، طبعا شكرته وقلت له ميرسي أوى، يستاهل بصراحة أقوله ميرسى، بداية من تناولة للموضوع وهدوءه مرورا بإنه محاولش يظلمني على حساب الأخ التانى اللى هو أكيد علاقته بيه اقدم واهم من معرفته بيا.. وانه فى الناهية انسان مابيرضاش لغثيره اللى مش بيرضاه لنفسه. حسيت فعلا ان ربنا بيوقفلى ولاد الحلال لما اكون قوية وحازمة ومصرة أخد حقى وعملت اللى عليا
---
تعرفوا بحكيلكوا الكلام ده ليه؟ عشان أنا مبسوطة من نفسى النهاردة، وحاسة انى عملت حاجة كويسة. اللى هى انى ماسكتش وخفت على لقمة عيشى.. واللى انا اعتبرته حقى دافعت عنه باستماته.. وكنت متقبلة النتائج مهما كانت، حتى لو سبت الشركة دى.. كفاية انى انا فى نظر نفسى لسه بكرامتي

38 comments:

  1. الجزء الأول من القصة فكّرني بفيلم
    Office Space
    لكن الحمد لله بقية القصة بعيدة كل البعد عن الفيلم :)

    ReplyDelete
  2. يا بنت يا مصرية لو كنت دخلت قبل ذلك أى قسم شرطة فى مصر المحروسة , أو زنزانة صغيرة و جميلة كده , كنت حمدت ربنا على ما أعطاك وشكرت للمدير و نائبه غرفة الفيران . أما حكاية الكرامة وعدم الخوف من ترك الشغل و التحدث مع المدير من منطلق ذلك . فذلك يرجع لأنك غير مسئولة بعدعن أسرة , معذرة عن الخوض فى فيما لايعنينى - وما زلت تأكلين و تشربين على حساب والديك , فلا يهمك شىء لو تركت الشغلة دى يعنى , مش كدة و لا اييييييه

    ReplyDelete
  3. اولا:- بقالي كتير قوي ما جيتش هنا ولا جيت اي بلوج .. بس قلت لما اخش ابص بصه .. و لقيت بوست طازه علي حظي .. و ده شئ كويس ..

    ثانيا:- انا لسه مقموصة منك نص نص و كل ما افتكر اكتئب .. بس ما علينا .. اهو موقف و عدي .. و مبروك عليكي الشغل الجديد اللي واخدك من كل الناس ..

    ثالثا:- انا بقول كل ده هنا و علي رؤوس الاشهاد لاني يئست من انك تفتحي الياهو مسنجر .. يا ريت حضرتك تقيلنا حته نبقي نتكلم فيها ..

    رابعا:- ممكن بعد الغيبة دي كلها أقولك ان انترفيس المدونة حزين و خريفي قوي ؟؟ فرفشية شوية .. ده الجو حلو قوي و الشتاء موسم جميل و هادي .. و متهيألي انه موسمك المفضل زيي .. مش كده ؟

    خامسا:- و اخيرا .. فيما يتعلق بالبوست .. انا كمان مبسوطه منك علي الموقف اللي عملتيه و حقك اللي اخدتيه .. الصراحة انا اللي اسمي انا :) اللي عارفه لساني ما بيسكتش ما كنتش نطقت ولا اتنفست .. بس كنت هرقدلهم لحد ما يصدر منهم اي حركه و لو ضئيلة و تبقي القاضية و اسيبلهم الشغل .. و ممكن كنت نضفت الاوضه و البلكونه و السجاد اللي ف البلكونه من سنين و فرشته و احتسبت عند ربنا و موت نفسي من العياط من القهر و النكد ولا اتكلمتش الا مع أول فرصه للكلام .. لكن مكنتش هتكلم و اعترض بهذا الثبات .. برافو يا زيزي .. و الله كبرتي و بقيتي بميت راجل .. ربنا يكرمك و يتبت أقدامك ف الشغل ده و تترقي و ما تنسيش انك تربطي علي يومين اجازه ف شهر 12 من دلوقتي لحد ما اديكي ساعة الصفر .. ماشي ؟؟

    اخيرا .. وحشتيني قوووووووووووووي

    ReplyDelete
  4. دروس مستفادة من اللي حصل لا حصر لها :)
    شكراً يا زينب على انك شاركتينا القصة

    http://www.abutaleb.net/me

    ReplyDelete
  5. :)
    الشغل مهما كان فيه مشاكل، أحسن من القعدة فى البيت

    بس جدعة‘ بجد لازم نبطل نسكت بقة عن أى حق لينا

    ReplyDelete
  6. أولا مبروك ع الشغل الجديد و بما انبقالك شهر و شوية يبقى قبضتى
    يعنى كل سنة وانتى طيبة بقى
    " بكره الجملة دى "

    ثانيا المدير بتاعك ده جوهرة و امير سلميلى عليه و قوليله ربنا يكتر من امثاله و قعدله فىعياله ان شاء الله

    " يالهوى معقول علشان واحد عمل الحق بقى غريب و بندعيله ؟ دى مصيبة ايه دى ؟ "

    ثالثا بحييكى انك اخدتى حقك و أصريتى عليه
    يعنى انا مثلا كنت ممكن عملت زيك كده بس وافقت ع المهلة مثلا بتاعته
    بس انتى جدعة ربنا يحرسك كده
    احسن تفتكرينا بنحسد


    رابعا مبسوطة جدا انى عرفت المدونة بتاعتك ولو انى واضح عرفتها متاخر
    بس كل تأخيرة و فيها خيرة ان شاء الله


    خامسا
    جميل ان قصص شخصية و فردية تبعث حماس فى حد مالوش اى علاقة بالموضوع

    اكيد لو كلنا خوفنا على حقنا
    مش هيضيع


    فى انتظار بوست جديد

    ReplyDelete
  7. لو أنا كنت مكانك كنت قعدت في المكان الجديد وخلاص !! غير آدميه غير آدميه وهو من إمتى كانت أي حاجه في البلد دي آدميه .. برافو عليكي

    ReplyDelete
  8. فيه حاجة انا لاحظتها غير عدم ادامية الاودة تدل انها بلد عاوزة الحل(وانا مش قصدي انتقدك انتي انا هانتقد الشركة)ازاي شغلوكي علي ادوب اليستراتور من غير ماتعرفي تتعاملي معاه قبل كده...يعني تتعلمي وتاخدي فلوس؟


    وعاوز اسالك المظاهرة اللي حاطلها لينك ديه للبنات بس ولا ينفع اجي؟

    ReplyDelete
  9. مبروك الشغل الجديد بس يا بنتي كل حاجه عايزه شوية صبر وانشاء الله الامور بتتحسن وشويه شويه بتصيري مديره أد الدنيا
    مع تمنياتي لك بالتوفيق

    لا تسيبي شغلك خاصه اذا كنت بتحبيه

    ReplyDelete
  10. zarakesh :) meya meya illi inty 3amaltih, and remember "al donia mabtedeesh me7tag" fa gamedy 2albik kida we rabina beyoustor :)
    we gayez "magah" 3ando 7a2 bas bardo nerga3 we ne2oul "la yadee3 7ak wara2aho motaleb"

    ReplyDelete
  11. I am happy for you and obviously what you did was right.It worked!
    The thought of being jobless again after 9 months of staying at home is a difficult one. Yet you did not allow it to deter you. kudos to you.
    Being assertive is one of the most important qualities people, and especially women, should try and develop. For some it is harder than others. Wishing you success and happiness.

    ReplyDelete
  12. موقفك جميل وليكي حق تكوني مبسوطة لانك انتصرتي في النهاية على ظلم وقع عليكي
    بس انتي عملتي كده لأنك زي ما فهمت مش محتاجه للشغلانة دي جامد
    يعني مش مسألة حياة او موت
    بس ايه رأيك لو الظروف اختلفت؟؟
    يعني لو افترضنا - جدلا - انك محتاجه للشغلانه دي جدا..وانك عندك اولاد وكده ومصاريف وانهم ملزومين منك
    يا ترى كنتي هتتصرفي بنفس الطريقة
    اشك
    ولو لتي ايوة هيبقى ده اكيد تصرف غير مسئول منك
    اعتقد ان كثير من المظلومين لا يستطيعون ان يأخذوا نفس الموقف الذي اتخذتيه تجاه ظلم مرؤسيك
    انا مثلا موظف حكومي
    لو حصل معايا كده
    مش هتعدى الرئيس المباشر لاني لازم ارفع ليه مذكرة بان المكان غير مناسب لاداء العمل ثم بعد ذلك اتجه للمدير الاعلى
    حبيت ادلي بخبرتي مش اكتر

    ReplyDelete
  13. This comment has been removed by a blog administrator.

    ReplyDelete
  14. برافوووووووو يا زيزي

    صح جدااا

    ده اللي لازم يتعمل اصلا

    و ما تبصيش للأستاذ اللي رأيه أكل العيش بدعوى المسؤليات و البيت و الأسرة

    ما هو ده اللي مودينا لورا و مخلي كرامتنا تتبهدل في كل مكان و يخلينا نصبر على الذل و على امتهان الكرامة ثم على التواطؤ في أي بلوة بتحصل قدامنا و أي حرام نقبله على نفسينا بعد كده بدعوى " أنا عبد المأمور " ، ما هو السكوت على هضم الحقوق و التنازل عنها هوه أول مراحل السكوت على الفساد


    سعيدة جداااا يا زيزي اني قريت كلامك

    اتأكدي ان ده أكيد ممكن جدااا يغير حاجات كتير بالنسبة للي بيقروه

    ReplyDelete
  15. انا احيي الموقف اللي اتخذتيه ،انا نفسي مبحبش المشاكل في شغلي لكن هي بتيجي بتيجي ،طبيعتها كده ،مهيش زي العفريت يطلع للي يخاف منه .لا دي بتطلع للكل
    لكن فيه حاجه كلامك الانجليزي بالحروف العربيه كتير و احيانا منفهمش معناه .
    يا ريت بين قوسين تحطي معني الكلام

    ReplyDelete
  16. مساء الفل ..يا بنت يا مصرية ..أنا مبسوط جداً منك ..وفرحان بيكى قوى ...ورغم أنى مش جبان ولا حاجة والله ..لكن أعتقد أن الشغل بالذات ممكن البنى آدم مننا يقبل فيه حاجات ويتنازل كتير عن أشياء من أجل لقمة العيش ...والمسئولية ...مع الإحترام الشديد ليكى كأخت فاضلة ..إلا أنك مش مسئولة 100%..أنا مثلا لا أستطيع أن أهدد بترك العمل لأن الحصول على عمل فى هذا الزمان شئ صعب .....يا ريت إيماننا بالله يبقى قوى ونقدر فعلاً نمارسه..الممارسة الحقيقية للإيمان أن نؤمن فعلا وواقعاً أن الرزق بيد الله هو الرزاق ولا أحد سواه ..مما يعنى أن لا نتحمل أى إهانات ولا إملاءات ...يا ريت يقوى ربنا إيماننا .......يا رب ..وشكراً ليكى على البوست الجميل ده

    ReplyDelete
  17. اهلين " بنت مصرية " يشرفني جدا انو يكون اول تعليق ليا في مدونتك والف مبروك على الشغل الجديد وعقبال مانشوفك بيزنسس وومن

    ودمتي بخير
    ..انا مش مصري
    ولاشامي
    ولاخليجي
    انا عربي



    العَبدِالرَحَمن.

    ReplyDelete
  18. مبروك الشغل الجديد
    موقفك رائع احييكي علية
    وانا مع رومانتك روز ان التصميم بتاع المدونة مش لذيذ الاول كان احسن منة
    منتظر زيارتك للامبراطورية المفقودة
    عالم خالي من التلوث
    عالم يحترم المواطن
    عالم مليان بالاثارة والتشويق
    .
    .
    .
    عالم مختلف
    http://www.lost-empire.blogspot.com/

    ReplyDelete
  19. nice blog . i wish more progress to u :)

    ReplyDelete
  20. check your emai and reply plzzzzz
    sabah

    ReplyDelete
  21. معلش يا جماعة اتأخرت عليقكو فى الرد
    وانا عارفة دى قلة ذوق مني
    بس كان غصب عنى وكده

    ماينسويبر
    ممم مش فاكرة انى شفت الفيلم ده..
    هحاول اعرف بتاع مين وادور عليه
    ----

    نجاح
    مش حكاية لو كنت جربت الأسوأ كنت رضيت باللى حصل.. اعتقد ان التنازل هو اللى بيوصل فى النهاية لدرجات اسوأ وأسوأ

    كمان مش معنى انى مسئولة عن اسرة او اقدر اجيب فلوس من مصدر تانى انى مش محتاجه للشغل ده
    كل واحد ليه اسبابه اللى بيعتبرها مهمة وضرورية وعلى اساسها بيعمل الف حساب قبل ما يتخذ اى قرار
    ----

    رومانتيك روز
    يا حبيبى انا اللى مكسوفة من نفسى ولما بفتكر بتضايق كل كل وبكتئب اوى
    اللى انا عملته جريمة استحق عليها الشنق
    ووحياتك انا مش بفتح اى مسنجرات عشان مشغولة
    ما انا قلت لك
    بس هانت هفضى على نص الاسبوع ده
    :)

    الثيم اللى عملته للمدونة كئيب فعلا، بس انا قصداها :) انا عايزة حاجة كئيبة وتسد النفس

    وبعدين يا ست هانم هما يومين بس؟؟؟؟ احنا نعمل اللى بالى بالك اربعين ليلة بأربعين يوم
    صح يا رجال؟؟
    ههههههههههههه
    نورتى بعد غيبة يا كوكي
    ---------

    على ابو طالب
    منور عندنا :)
    ----

    ايمان
    ياهه، كانت ايام ما يعلم بيها الا ربنا، القعدة فى البيت دى
    ----

    انا حرة
    جميل اوى يا بنوتة ان وصلك كل الحاجات دى :) وانا كمان مبسوطة اوى انى عرفت مدونتك
    دا انا نسيت حتى اقولك انى عايزة اخد معاكى كورس تصوير لما تبتدى فيه تقولليلى
    هبقى اروح احط تعليق :)
    ----

    شيريهان
    اهى محاولة يا شيري انى اخلق بيئة ادمية صغنتوتة على قدى
    ----

    عربى
    بص يا بنى.. انا بعرف جرافيك كويس، على كذا برنامج
    وفى ادوات فى فوتوسوب هى نفسها اللى فى اليستراتور
    فكان ضرورى ان اللى تشتغل تكون بتعرف جرافيك بصرف النظر عن ايه هو البرنامج اللى بتشتغل عليه
    يعنى الشركة مش غبية ولا هبلة ولا متساهلة بالمرة
    اقدر اقولك ان مش هيلاقوا كتير يعرفوا اللى انا اعرفه مجتمع.. يعنى مش هيلاقوا بسهولة حد بيعرف جرافيك وترجمة فى شخص واحد، بالعكس دى شركة موفرة جدا، جابتنى انا بدل اتنين بدل ما تدفع مرتب شخصين
    فهمتها دى؟
    ----

    ممكن
    شكرا على النصيحة
    اكيد هحاول احافظ على شغلى، على الاقل لحد ما الاقى شغل فى الى انا تخصصصت فيه فعلا :)
    ----

    تو بى اور نوت تو بى
    فعلا.. وانا حبيت اطبق اللى ممكن انصح بيه غيرى
    ----

    هوب
    شكرا يا جميلة
    كلامك مشجع
    ----

    مصريون بلا حدود
    يعنى انت بتعيد نفس تساؤل نجاح
    طيب كنت استنى لما اجاوبه يعنى
    وعموما لو عايز تعرف انا ممكن اتصرف ازاى فى موقف ما ما تسألنيس اتصرف ازاى انما حطنى فيه واتفرج وشوف انا هعمل ايه
    دا لأنى انا فعلا مقدرش اقرر ايه هيكون تصرفى، احيانا كتير بتصرف تصرفات مختلفة وجديدة عن اللى ممكن يتصرفه الناس
    واحتمال تكون مفاجأة ليا انا كمان
    ----

    ألِف
    شكراً يا ألف
    كلمة هايلة دى فاجأتنى
    ---

    شغف
    الله يا شغف.. انتى جميلة اوى :) كلامك اسعدنى اوى اوى.. وهيخلينى دايما ما افرطش فى حقى
    ودايما احكيلكوا
    ----

    ذو النون المصري
    انا اسفة واله على الكلمات الدخيلة دى :) بس يمكن معناها بيروح من دماغى بالعربى وبكتبها استسهالا
    بص هى الكلمات اللى فى البوست ده

    فُل تايم = full time = بشتغل يعنى طول اليوم وطول الاسبوع بشكل منتظم ومستمر

    فري لانسنج = freelancing = شغل بالقطعة. .يعنى مثلا حد يتفق معايا على تصميم موقع واصممه واخد المقابل
    بتاع التصميم ده

    جرافيك = graphic = الكلمة فى الاصل معناها صورة، انما اصطلح دلوقتى عليها انها تصميم صور وحاجات كده

    إليستراتور = illestrator =دا برنامج تحرير صور من نفس الشركة المنتجة باعة برنامج فوتوشوب لو تسمع عنه، هما الاتنين برامج تحرير تصور، بس كل واحد متخصص فى نوع معين.. صعب اشرحلك الفرق بينهم هنا

    اوبرا وينفري = oprah winvry = دا اسم مذيعة امريكية ليها برنامج على نفس اسمها اوبرا مشهور جدا فى امريكا وعلى مستوى العالم، تقدر تتابعه على قناة
    mbc 4

    روم ميت = room mate = يعنى رفقيتها فى الغرفة، يعنى بتسكن معاها ، انا قلت روم ميت وما قلتش رفقيتها، لأنه مصطلح معروف بره اكت رمن هنا، احنا هنا مش عندنا ناس بتسكن فى بعض الا نادرا

    بيتهيئلى دا كل الكلام :)
    ----

    مصراوى
    ربنا يبارك لك
    انا فعلا ابتديت افقد فيهم
    سفر كل يوم بأه.. ساعتين رايح وساعتين جاى
    ----

    رجل من غمار الموالي

    لا ما هو انا ماهددتش انى اسيب العمل خالص، بالعكس انا كنت محاسبة على كلامى جدا، عشان مجرد التلويح بحجاة زى دي ممكن يستفز المدير من غير داعى، انا قلت له انى هقعد فى البيت لحد ما تجهز الاودة.. انما قرار انى اسيب الشغل كان قرار من جوايا ما اطلعتوش عليه

    ------

    العبد الرحمن
    اهلا اهلا بيك
    ويشرفنى يكون اول تعليق ليك عندى
    :)
    يا سيدى.. مصرى وللا عراقي.. وللا عربى حتى.. اهو كله برتقال
    ههههههههه

    -----

    دماغ ماك
    حاضر يا فندم
    ---

    الامبراطور
    طب ما تقلهاش فى وشى كده :) هو انا مش عايزاه لذيذ انا عايزاه كئيب
    حرام يعنى تبقى مدونتى كئيبة شوية.. من نِفسها
    ---

    بالعربى

    متشكرين جوى جوى جوى يا بوى :)

    ---

    كويس انك قلت لى ، اصلى ما بتشكش الميل ده خالص دلوقتى
    ---

    رجل الشتاء الأخير
    انت بتحط مسئولية على كتافى.. وبتحملنى هم.. لا يا عم.. انا كده هسيب واجرى
    :)
    كمان اتنين يقولو زيك كده، وانا هعلن بنت مصرية دستور قومي للبلاد. .وانصب نفسى رئيسة الجمهورية الجديدة.. وابتدى ادور على عريس.. ييى قصدى على وريث
    :D

    ReplyDelete
  22. واضح اني استفزيتك فنسيتي تردي علي سؤالي وضيعتي عليا فرصة كويسة
    بس معلش...تتعوض

    ReplyDelete
  23. الله عليكي يا بنوتة مصرية
    احب البنت اللي متضيعش حقها
    و لو ان في ستات و رجالة كمان بيشتغلوا في ظروف قاسية جدا و معندهمش الجرأة و لا القدرة علي الاعتراض
    لان لقمة العيش مهمة ميقدروش يعرضوا نفسهم لكلمة ان كان عجبك اقعد و ان مكنش عاجبك الباب يفوت جمل
    بجد قلبي معاهم
    و ربنا يفرجها علي كل المصريين
    الف مبروك علي الشغل الجديد
    و ربنا يوفقك دايما

    ReplyDelete
  24. هيه عدوى التدوينات الطويله اتنقلت للكل ولا إيه

    بصراحه نقطه الكلام بكرامه ده فعلا علشان مفيش مسؤوليه عليكي دلوقتي .. عايشه فرداني يعني .. بس التنازلات بتبدأ لما الواحد بيتربط .. ربنا ما يحوجنا لحد هههههه .. علشان كده بقول لا للزواج احسن


    تحياتي لك .. ومبروك الوظيفه هههههه عقبالنا يا رب

    ReplyDelete
  25. لم يكن تعليقى السابق ينم عن أننى اذا كنت مكانك سأفعل العكس , بل هو جدال لكى نضع أنفسنا مكان هؤلاء الذين لا يستطيعون أن يتخذوا قرار مثل قرارك , علما بأننى أؤيدك فيما عملتيه , وأيضا لقد أعجبت بالتعليقات الأخرى و التى تنم عن أن هناك روح متمردة جديدة تأبى الذل ,أخيرا بالنسبة لى لم أعمل اطلاقا قبل ذلك كمرؤس ودائما كنت أعمل أعمال حرة حتى وأنا هنا فى أقصى الأرض , و لذلك تعليقى السابق ما هو الا معايشة ما يعانيه شعبنا من معاناة دائمة بلا انقطاع

    ReplyDelete
  26. مبروك ع الشغل الجديد

    أيوة كده وريهم العين الحمرا

    هو احنا بنات سكة والا ايييه؟

    الي الأمام يا روميل

    تحياتي

    ReplyDelete
  27. زينب مبروك الشغل
    اوحش حاجه ان الواحد تضطره الظروف يسيب شغله عشان مش قابل وضع
    البيت يجنن
    بس
    انا مع اللى بيقولوا
    احنا مش فارقه معانا
    ساعات بتضطر الظروف و المسؤليات الواحد انه يقبل حاجات
    لو حد كبير و عنده عيال و بيت
    بيكون مش سهل عليه قرار زى ده
    خصوصا لو مفيش بديل
    و دلوقتى للاسف مفيش شغل اصلا

    ReplyDelete
  28. صحيح العنوان؟؟؟انتى بدون

    ReplyDelete
  29. بصي انت كده اختصرتي علي نفسك مشوار طوييييييييييييييل جدا من الإهانات والخناقات والحاجات الكتيرة اللي كانت ممكن في الآخر تخليكي تسيبي الشغل ... انت كده جدعة وانا استجدعتك لأنك وقفتي من الأول واللي اولوا شرط يا جماعه يبقي اخره نور ... تمام كده!

    ربنا يوفقك ويكرمك.

    ReplyDelete
  30. بجد انتي جدعة
    في حاجات كه صغيرة يمكن بس بترفعنا في عنينا

    ReplyDelete
  31. برافو عليكى
    ايوه كده لا يضيع حق ورائه مطالب

    ReplyDelete
  32. ازيك يا بنوته وحشتيني
    انا بقالي كتير كنت غطسانه اصلي زي حلاتك قعدت في البيت من اخر شغل و جالي تكوكع على راي اووسا و دورت لحد ما اشتغلت اول الشهر في مكان الحمد لله اكثر من رائع بس المشكله اني تيمب يعني 6 شهور بعدين يا اه يا لأ هي الحياه كده لما الواحد يلاقي ضاليه تبقى مشروطه
    سيبك استاذه ارفعي دائما رايت كرامتي فوقققققققق و الي مش عاجبو راسو و الحيط

    ReplyDelete
  33. عربى
    ما استفزتنيش ولا حاجة ، انا بس نسيت والله اجاوب ع السؤال :)

    انت بتحاول تستفزنى يعنى؟؟
    ----

    كلبوزة
    امين يارب.. كل المصريين وكل الموظفين :)
    ---

    طنطاوى
    معلش بأه، هى طلعت جويلة عشان كانت نفسى مفتوحة للرغى.

    الله يبارك فيك وعقبالك
    ---

    نجاح
    طيب انت عملت اعمال حرة.. يعنى كان ليك مثلا مرؤوسين؟ يا ترى بتعاملهم ازاى؟ ولو حصلت مشكلة زى دى.. هتعمل ايه؟
    ----

    برايد
    والا ايييييه؟ :)
    كل بنت من موقعها توريهم العين الحمرة
    هههههه
    -----

    دنانير
    تفتكرى دى مشكلة ثقافة حفرت جوانا الخوف؟
    بمعنى اننا مش بنعمل الصح والمفروض واللى لازم يحصل عشان خايفين
    مش بنفكر مثلا ان دى ارزاق، وان صاحب الشغل ده مش هو اللى بيوزع الرزق.. دا بتاع ربنا
    والولاد والمدام والبيت والمسئولية.. كلها اسباب مش حقيقة بقدر الخوف اللى جوانا وعدم التسليم لربنا بجد
    ومع ذلك.. اعتقد ان كل موقف له ظروفة المختلفة واللى المفروض تتعاملى معاها بذكاء

    انا بدون.. يعنى بدَوِّنْ.. من تدوين.. يعنى مايعرفوش انى عندى مدونة وبَدون
    ----

    عز
    يعنى تمام :)
    اخد عشرة من عشرة ونجمة وممتازة

    الله يكرمك
    ---
    ابن مر
    بالظبط.. عليك نور.. الحاجات الصغيرةاللى اتعودنا نتجاهلها.. ونفوتها ونقول مش مشكلة، مع انها مقدمة لمشاكل اكبر
    ----

    سارة
    اهلا يا سارة
    وميرسى يا جميلة
    --

    ام العيال
    وانتى وحشتينى يا غطسانة هانم :)
    ربنا معاكى فى حكاية التمب دى
    بس فى حد يختبروه ست شهور؟؟ هو تعيين وتأمين وكادر بعدها وللا ايه؟؟

    ReplyDelete
  34. تصدقى بالله

    انا كنت ناوية ارجع الشغل يوم السبت

    كده مش راجعه مش راجعه مش راجعه

    :]

    ReplyDelete
  35. ليس لى رؤساء وليس لى مرؤسين - واذا حدثت هذه المشكلة افتراضا لو كنت مرؤوس لن أعمل أقل مما عملت , بل سأترك العمل فى الحال , أما اذا كنت افتراضا رئيسا للبعض و حدث شىء مشابه فأننى سأخير المرؤوس بين البقاء فى البيت حتى يجهز مكتبه, أو التفضل بالأنتقال لمكتب آخر أو لمكتبى حتى يتم تجهيز مكتبه, علما مرة أخرى يا سيدتى فأنا لا أعمل أعمال حرة بالمعنى المعروف و الذى يبدو قد فهمتيه بعيدا عن الحقيقة.فأنا أقل من ذلك بكثير جدا جدا . ودمتم و المصريين دائما بخير .

    ReplyDelete
  36. شفتي بقة الحرية اللي بتستمتع بيها البنت

    أنا عملتها قبل كده مرتين

    وسبت الشغل

    ولكن الجوع كافر

    وبقيت اليومين دول اسكت

    صحيح مش بقول حاضر ونعم

    لكن بحاول اصبر شوية

    الجوع كافر يا بنتي

    والسعار الجنسي أصعب

    ربنا يصبرنا على ما بلانا

    ReplyDelete
  37. Zainab:

    I was delighted to read this post. I found your blog through Justice 4 all blog. I think your an excellent writer and I am astonished to know of Egyptian women so smart and independant (I am Egyptian as well). MashALlah 3aleeki. I am proud of you.

    Will continue to read your blog.

    Organic :)

    (P.S: damik 7'afeef)

    ReplyDelete