11/24/2006

التعداد يضمن الاستعباد

عرفتوا بأه مشكلة البطالة طلعت فى ايه؟؟
طلعت فى التعداد.. اه والله، عمو اللى فى الاعلان بيقول كده
بيقول إن سبب البطالة - أو خلينا نتمتع بالدقة ومانبقاش زى اللى بيصطادوا فى الميه العكرة - بيقول إن من أسباب البطالة هو اننا - الشعب يعنى- مش بنتعاون كويس مع الناس اللى بيعدونا وبالتالى الحكومة مش بتعرف كام واحد بطالة وبناءا عليه مش بتعرف تجيب لهم شغل

طيب واحدة واحدة كده، أنا أولا عشان بس الوضوح- مش مؤمنة بحكاية إن الحكومة عليها انها توفر اعمال للناس، انت بدراعك و شهادتك و دماغك تقدر تشتغل.. بس دور وانت هتلاقى، وسيبك من حكاية الميرى والحكومة بلا قرف
انما لما الست هانم الحكومة تقول انها عايزة تحل المشكلة وان المشكلة من اسبابها اننا مش بنتعاون مع التعداد يبقى معلش الحكومة دى مهيسه جامد والجبنة سايحة ع السلوك

وبعدين تعداد ايه اللى واجعين قلبنا باعلانته كل شوية
اللى غايظنى مش التعداد فى حد ذاته، اللى غايظنى هو الشعار بتاعهم "التعداد يضمنننن الاستعداد" ، اه عمو بتاع الاعلان هو اللى بيتك على النون كده.. يضمننن الاستعداد

انما الاستعداد لإيه بالظبط؟؟ يعنى لما تعدونا واحد واحد.. هتعرفوا ساعتها فاضل كام قرش فى جيوبنا لسه ماسرقتهوش؟؟ لما تعرفوا عددنا هتعرفوا نسبة البشر للخطة الجاية اللى ناويين تدهسوهم فى حوادث القطارات والعبارات وطريق مصر اسكندرية الزراعي؟؟هتتنبأوا بعدد اللى هيصابوا السرطان وفيروس سى وتعملوا حسابكم فى سراير زيادة؟؟ هتعرفوا كام واحد بياخد رشوة وبيمد ايده ويسرق عشان يأكل عياله؟؟؟ هتقولوا لعياله؟؟ هتعرفوا كام شاب بيقف على ناصية فى جيبه مطوه ولسانه سابقة ايده على اى بنت معدية، او حتى هتعرفوا مواعيد حفلات اللى بالى بالك الجماعية فى وسط البلد وما شابه؟؟ هتعرفوا كام طفل شوارع؟؟؟ طيب دول هتعدوهم ازاى؟؟ هتاخدوا منهم ورقة التعداد ازاى؟؟ طيب هما اصلا شافوا اعلانتكوا؟؟ حقتكوا كنتو عملتوا اعلانات فى الشوارع.. عشان يعدوا ويستعدوا.. ممممم، وسع كده شوية... يا ترى هتعدوا كام واحد فى المعتقلات؟؟ مش دول بردو لازم تضمنوا لهم الاستعداد..... الا هو ايه الاستعداد دا بأه؟؟؟؟

19 comments:

  1. يعني
    هو موضوع التعداد ده مش مفهوم اوي ايه سببه
    فجاءة كدة بس هو مش غلط اوي بس المشكلة ان مفيش حاجة ماشية صح

    و الامور مش طبيعية في البلد
    فعلشان كدة بس ممكن يبقي مش مفهوم

    الي بيضايقني اكتر هو ان الاعلانات دي بتيجي
    علي قنوات زي ام بي سي و كدة
    طب لية
    اول مرة اشوف كدة اننا نعمل اعلان
    المفروض انه نوع من التوعية و يتم عرضة
    علي قنوات فضائية غيرتابعة اصلا
    للدولة ديه

    ولا ده علشان الاعلانات هناك ارخص والناس
    بتتفرج عليها اكتر

    نفس الكلام حصل في الاعلانات بتاعت الضرائب دي

    ReplyDelete
  2. الله أنا شايف إن سيت زي بتاع ال سي أي إيه بتاع الكتاب الشهري بتاع كل دولة أدق من أي تعداد.

    بلا خيبة علي الحكومة واللي معينها

    ReplyDelete
  3. This is the factbook of Egypt

    https://www.cia.gov/cia/publications/factbook/geos/eg.html

    ReplyDelete
  4. عادي يا زينب
    فاكرة محمد صبحي في مسرحية تخاريف
    ؟
    شعب زفت صحيح
    مش عاجبه حاجة
    غيروا الشعب

    الا بقولك ايه

    انتي فين اليومين دول ؟

    ReplyDelete
  5. نفسي اكتب كتييير زيك كده بس مشغول
    انتي بقيتي بتكتبي كل يوم بوست ولا ايه يا زينب؟

    ReplyDelete
  6. نقطة مختلفة شوية..
    صحيح الحكومة مش مطلوب منها توفر شغلانة لكل مواطن، متفق معك في الفكرة..

    لكن لما الحكومة تدمر القطاع الخاص وسوق العمل بإجراءاتها وسخافاتها، واما المصانع تقفل بسبب اقتصاد متدهور تسببت فيه الحكومة، واما الضرايب تتحط بهبل وتخرب بيوت المستثمرين، واما يبقى احتكار السلع لحساب رجالة العصابة هو القاعدة بحيث تنعدم المنافسة في السوق وينعدم الاهتمام بالتميز أو الجودة، مما يترتب عليه تسريح العمال وحتى الكفاءات ده غير قلة الوحدات المنتجة أصلا، مبنفعش نقول الحكومة مالها ولازم كل واحد يلاقي لنفسه شغل..

    على فكرة انا باشتغل يعني مش بارمي بلايا عالحكومة..

    ReplyDelete
  7. اكتر حاجه عجبتنا في تدوينتك الجميله دي ..انك قلتي ان لازم الواحد بشهادته و دراعه يلاقي الشغل اللي هو عايزه..ياريت كل الشباب يفكروا كده و يبدأوا في التنفيذ

    ReplyDelete
  8. انا الصراحه اللى منرفزنى فى اعلانات التعداد انها بتيجى على قنوات فضائيه مش مصريه زىmbc وتقريبا قناه تانيه كده مش فاكرها نفسى اعرف ليه هما ناوين يروحو يعدوا اللى فى الدول العربيه كمان
    اصلهم كده شكلهم فى الخطه الخامسيه الجايه مزودين العدد شويه وحنا مش مكفيييييييييين
    بس برده التعداد فيه فايده اننا نعرف فى كام واحد بيتسرق اه صح
    هو الريس وعيلته هيعدوهم فى التعداد
    ياريت حد يجاوبنى؟؟؟؟؟؟؟؟؟؟؟؟؟
    وموضوع جامد يا بنت يا مصريه
    وياريت تزورنى فى مدونتى الجديده
    وسلااااااااااام

    ReplyDelete
  9. بصى, سمعت خبر عدى جنب ودنى كدا اننا بنرصف طريق سكة حديد من عندنا للسودان..مش عارف يجوز يكون دا له علاقة بالاستعداد

    ReplyDelete
  10. زينب بعد صباح الخير لو كنتى فى الصبح ومساء الخير لو كنتى بعد الظهر انا عملت مدونة وعندى مشكلة انى كتبت الباسورد والنيم وكل ما اجرب على بلوجر يقول انى النيم والباسورد بتوعى غلط رغم انى عملت زى ما انتى قلتى وميش عارف اعمل اية وارجوا الاجابة على الاميل بتاعى اذا كان يهمك مساعدتى
    fine_4no.@yahoo.com
    fine_4no@hotmail.com
    وشكرا ليكى من كل قلبى
    بااااااااااااااااااااااى

    ReplyDelete
  11. منجى
    اعتقد ان عرض الاعلانات على الام بى سى معناه ان التلفزيون المصرى عارف ان جمهوره هجره الى القنوات الفضائية وبالتالى عشان يقدر يوصلهم لازم يعرض اعلاناته هناك

    تحيا الريادة المصرية
    -----

    irc president

    طيب ما نحاول نجيب رقم الموبايل بتاع الحكومة ونقولهم ع السايت ده
    :)
    ----

    بن عبد العزيز

    حالياً بالأسواق :D
    ----

    عربى
    ما هو الأر دا اللى جايبنا لورا
    يعنى ما صدقت نفسى اتفتحت شوية ونزلت كام حاجة ورا بعض، مش عاجبك يعنى يا احمد؟ ارجع انام تانى

    وبعدين انت وراك ثانوية عامة اساسا ، روح افتح لك كتاب مش مدونة ، روح بدل ما اقول لبابا
    ههههههههه
    ----

    ارحم دماغك
    انا معنديش فكرة خلص عن الحكاية دى يا يحيى
    هى الحكومة عاملة ايه بالظبط فى القطاع الخاص؟؟
    ---

    شايفنكو

    يااااريت
    ----

    fnan_geology
    حاضر هرد لك الزيارة، وفى ايدى اتنين كيلو برتقان :)
    ---

    خوليو
    مممم، دول عايزين يطبقوا التجربة المصرية فى السكك الحديدة على الدول المجاورة والشقيقة

    الفاتحة مقدما على ارواح الشهداء من اخواننا السودانيين
    ---

    الرأى الحر
    انا بعت لك ميل
    -----

    ReplyDelete
  12. انا شايف انهم يحسبوها من المواليد و الوفيات اسهل
    اكيد كل مولود عنده شهادة ميلاد و كل واحد مات طلع له شهادة وفاة

    ReplyDelete
  13. هقولكم خبر الموسم و رزقي علي الله .. تلاته بالله العظيم .. أنا كان معروض عليا "ازور" التعداد و أملي في السجلات نفس بيانات أخر تعداد اخدوه .. اللي هو كمان غالبا مزور .. بمبلغ 400 جنيه و انا قاعدة ف البيت !! ايه رأيكم ف التعداد و الاستعداد ؟؟؟

    تاني حاجه .. انا ساكنه ف اسكندريه و ف البيطاش و علي الشارع الرئيسي و المفروض ان العدادين بدؤا من يوم 20/11 و هيستمروا 3 اسابيع و لحد دلوقتي محدش خبط علينا ولا قالنا انتوا فين !! ايه رأيكم ف التعداد و الاستعداد ؟؟؟

    البلد دي خلالالالالالالاص .. و الله خلالالالالالالاص .. الله يعوض .. مفيش أي حاجة صح بتحصل .. و كل حاجة غلط بس هي اللي بتحصل .. و المسؤلين سبحان الله تقعد تسمعهم تحس ان الحياه بقي لونها بمبي و ترجع تبص علي حالك تتأكد ان اكيد انت اللي عندك عمي ألوان .. ربنا يسترها يا ناس !!

    ReplyDelete
  14. برة الموضوع سنة صغيرة :

    كنت من الناس اللي ترددوا جداً في عمل البطاقة الجديدة ، واضطريت للرضوخ للأمر الواقع رغم إن الغرض منها ببساطة هو سهولة ويسر عمل البطاقات الانتخابية!

    وجايز ييجي مزايد وطنجي بيروقراطجي ويعمل التصويت بقانون ، واللي ما يصوتش (يا لهوووويييي) يتعمل عليه غرامة!

    التعداد في حد ذاته شأن يهم المصريين ، زيه زي البطاقة الجديدة ، لكن المصيبة إن البيروقراط بيسيسوا كل حاجة ، بيقولوا في الصحف-عفواً الصفائح-بتاعتهم إنهم حكومة حزب ، في الوقت اللي الحزب فيه من الحكومة والحكومة فيه من الحزب..

    ما عادش ناقص لحزب روزا اليوسف إلا إنه يسيس الهوا كمان.. تبقى مصيبة لما نشم أكسجين حزب وطني!

    ReplyDelete
  15. اسواق؟
    ومحدش قاللي

    :)

    ReplyDelete
  16. اقولك بقى بتوع التعداد جم عندنا امبارح يابنتى و سألوا أسئلة غريبة جدا جدا
    اسم بابا و ماما و شهادتهم و بيشتغلوا و للا لا و اسامينا انا واخواتى و بنعمل ايه فى الحياه و عندنا اجهزة كهربية و للا لا و الغسالة اتوماتيك و للا لا ايه اسئلة المسخرة دى يعنى هم هيعرفوا مستوانا الاقتصادى بقى فيقولوا لا ول عايشين شوف غيرهم و للا ايه ؟

    بجد احنا بقينا بلد شماعات كل حاجه تعلق عليها خيبتها
    مصيبة لنطلع بنستور الشماعات م الصين


    غطينى و صوتى يا زينب

    ReplyDelete
  17. كعادة بلدنا الحبيبة كل حاجة لدينا شعارات مجرد شعارات، فبعد الإنطلاقة الأولى و العبور لللمستقبل و إعلانات دفع الضرائب التي من مصلحتنا أن ندفعها ها هو شعار التعداد، يا جماعة دي سياسة و ماشية من زماااااااااااان.

    ReplyDelete
  18. انا اصلا مش فاهم موضوع التعداد دة من الاساس

    برغم ان والدتي بتشتغل في الجهاز المركزي للتعبئة والاحصاء

    اللي هوة معمول اصلا علشان يقوم بالتعداد دة هههههههههههههههه

    والله عالم هبلة

    ومتخلفين

    تعداد اية يا ولاد الهبلة اللي عاوزين الناس تعدوهم نفر نفر هوة انتم فاكرينهم بهايم في زريبة ولا فراخ في عشة

    قولولي عن دولة متقدمة بتعرف عدد سكانها بالشكل المهين دة

    مش فية ورق
    وبيانات ومسجلة على الكمبيوتر المركزي

    يعني شهادات ميلاد اللي اتولدوا - شهادات الوفيات - المسافرين للخارج ومثبتين في مصلحه الجوازات

    ويوجد دعائم من خلال التجنيد-الاحوال المدنية-السجلات الجنائية- مجمع التحرير باداراتة - السجلات التجارية- التامينات- مكاتب العمل- المباحث والمخابرات - رخص السيارات - رخص القيادة - شركات الكهرباء والمياة والغاز غير اللي قلناهم مصلحه السجل المدني - الجوازات والهجرة

    يعني مفروض ان البيانات دي كلها موجودة على اجهزة الكمبيوتر المركزية
    Main Frame
    مش محتاجة تتجمع من مندوب يفوت عالشقق في كل مصر بمدنها وقراها و عشوائياتها يسالهم انتم كام واحد في الشقة
    كمان ببساطة ممكن يعدي عليا في المكتب وواحد تاني يعدي عالبيت ومراتي تقولة وبكدة يبقى اتعدينا مرتين انا ومراتي والاولاد

    ودة بالفعل اللي حصل معايا

    المهم اللي انا افهمة ان كل بني ادم في مصر لازم معاه ورق شهادة ميلاد - بطاقة شخصية- بطاقة رقم قومي- باسبور- شهادة تجنيد- تامينات- سجل تجاري- الخ الخ الخ

    يعني المطلوب هوة تجميع تلك البيانات من كل الهيئات دي وتخرينها في كمبيوتر مركزي من اللي في الاجهزة الحكومية و تصفية البانات دي للوصولل للتعداد المطلوب
    انا ممكن ساعتها استوعب ان ممكن 1% مماعهمش ورق من اي نوع يعني لا شهادة ميلاد ولا بطاقة ولا باسبور ولا اي شيء ودة ممكن في الارياف او العشوائيات وان كنت اعتقد ان النسبة لن تزيد عن نص في المية(0ز5%) يعني نسبة خطا مقبولة جدا ولا شك انها اقل بكتير من اخطاء جمع البيانات اللي تمت في التعداد العشوائي اللي بيتعمل دة

    ReplyDelete
  19. على فكرة في امريكا فية حاجة اسمها
    Social Security Number

    ودة رقم بيبقى خاص بكل شخص و بيكون رقمة في كل شيء من بطاقة لرخصة سواقة لباسبور لتامينات ولتامين صحي لكل شيء بيبقي برقم واحد بيحفظة ومش ممكن يقول رقمة لحد ابدا غير موثوق فية الا لجهات حكومية او جة عملة وخلافة

    ومن خلال الرقم دة كل معاملاتة واوراقة وكل ماهو خاص بة متسجل على كمبيوترات الحكومة حتى حالتة الجنائية ومخالفات السواقة

    يعني تعداد سهل بضعطة زر عالكمبيوتر المركزي اللي في السي اي اية ولا تقولي جهاز مركزي للتعبئة والاحصاء ولا دياولو اكتر من 3000 موظف ومصاريف وزارة بحالها بالملايين ومحسوبيات وشراء ماكينات تصوير وسيارات و اسانسيرات و بلاوي زرقة من سفريات برة و حضور مؤتمرات دولية وخلافة كل دة علشان يعرفوا تعداد البلد كام مرة كل 10 سنين

    وياريت بيعرفوا
    والله العظيم ولا بيعرفوا اي حاجة وبياناتهم كلها غلط في غلط وانا عارف ومتأكد

    وحتى لو بياناتهم صح الموضوع مش فارق اصلا مع البهوات ولا عمرة يفرق

    ولا لة اهمية ولا لازمة

    والاجهزة المركزية وعلى رأسها التعبئة والاحصاء هيه مجرد اجهزة حكومية مهمتها تبديد مال الشعب فيما لا يفيد ولا ينفع

    بصوا كدة كل رؤساء الجهاز دة طلعوا بفضايح رشوة وتبديد

    مختار هلودة

    أهاب علوي

    ولما نشوف الجديد اللي اسمة الجندي دة اللي قلبها وحدة عسكرية من كتر الضباط المتقاعدين من زمايلة السابقين وعمال يجيبهم الجهاز ويعينهم في وظائف ولا يقفهموا فيها حاجة واهه خللي كلة ينبسط ويسافر برة على حساب الحكومة يتفسح وتفرج ويصرف قرشين من ميزانية الدولة

    والباشا عمال يغير في عربياتة من بيجو لبي ام لشيروكي

    الباشا عندة اسطول من حوالي 7 سبعه سيارات لخدمتة لوحدة غير بقية سيارات الحاشية الجديدة من الضباط اللي عالمعاش اللي باضت لهم في القفص

    ReplyDelete