11/26/2006

وجميع ما فيها حُسني

بالنيابة عن نفسى
وبالأصالة عن أنا
وبصفتى ملتزمة بقواعد الزي الإسلامي.. اللى بيقولوا عليه اللفظ الشائع "الحجاب"
وبصفتي مقتنعة بيه أصلا
وبصفتى مش بحب فاروق حسني.. حيلة الحكومة
وبصفتى سمعت بودانى من لسانه ان دا مجرد رأي شخصى
وبصفتى بحترم الاراء كلها مهما كان اختلافى معاها
وبصفتي مابحبش حد يصادر على رأيي.. او يمنعني إنى أعبر عنه.. حتى لو كنت وزيرة
وبصفتي يهمني أكتر أرواح الناس والعدل والحق قبل اللبس والشكل والمظهر
وبصفتي قرفت من الجرايد اللى ما صدقت تلاقى موضوع تبيع على حسه
وبصفتي مواطنة مصرية باعيش تحت سماء مصر وبشرب من نيلها ولسه حافظة النشيد خالد الذكر:
مصر العزيزة لي وطن/ وهى الحما وهى السكن / وجميع ما فيها حسن

بصفتي كل الحاجات دى.. أعلن من مدونتى الحندوقة المحندقة والمتحندقة
أن لعنة الله على مجلس الشعب
ولعنة الله على الهيافة
ولعنة الله على المزايدة والمتاجرة
ولعنة الله على حماة الدين البلاستيكيين

اسمع مني يا رب
وريني فيهم يوم
آمين أمين أمين

26 comments:

  1. البقية فى حياةمجلس الشعب وطوال ما فى وزير مثلى فى الحكومة والشعب ساكت الله يرحم مصر

    ReplyDelete
  2. يا سبحان الله معاكى حق والله يازينب
    العلماء و الفقهاء منشغليين فى ماليزيا
    بمسألة كيفية صلاة رائد الفضاء الماليزى فى محطة الفضاء لأنها بتلف حول الأرض كذا مره فى اليوم و أحنا هنا فى المحروسه كل همنا أزاى نتجادل فى الأعلام عن الحجاب و العلاج بالقرأن
    فعلا حاجه تقرف

    ReplyDelete
  3. الحجاب فرض ولا مش فرض الحجاب تخلف ولا تقدم مبقاش فى حاجه الناس تكلم فيها اللا الحجاب خلاص خلصت مشاكلنا
    وبصفتى طبعا مومن بنظريه المؤامره فانا باكد ان دى مؤامره علشان يلهو الشعب ويخلو علطول متخلف وسلاااااااام

    ReplyDelete
  4. لو فرضنا نظرية المؤامره فيه مقوله الناس بتتناقلها أن الشوشره بتاعة فاروق حسنى المقصود بيها التغطيه على خطاب عم الحج حسنى الكبير اللى كان كله أبداعات منغوليه و أن سوف يحكم مصر لأخر لأخر لفه فى مراوح قلبه.

    ReplyDelete
  5. آمين..

    وأنا مش عارف ليه بعض الناس مصدقة ومتنحررة قوي لما تشوف صحافة الحزب الوطني البيروقراطي بتدافع عن فاروق حسني و"حريته" في "إبداء رأيه" في الوقت اللي بيهيجوا فيه على أي واحد مش عاجبه الحزب ومش عاجبه سيمبا زي ما يكون قال إن القرآن محرف!

    واللي مستغرب له إزاي بيسخن صبيان المعلمة روزا على كافة خلق الله في الصحافة باستثناء المستصوف عادل حمودة الذي فيما يبدو حصل على الحق الحصري لشتم - أكرر : شتم - وليس نقد رئيس الوزراء..

    واللي مستغرب له أكثر وأكثر الاحتفاء الأكثر من اللازم بجمال البنا رغم أن البلد خرجت مؤخراً من أجواء انتخابات نقابية عنيفة ، ورغم أنه من أشد أنصار تسييس النقابات المهنية تطرفاً.. أمر يفترض أنه يتعارض مع "مشيئة الحكومة" التي لا تسمح بالسياسة إلا في اتجاه واحد..

    أما الإخوان فقد شربوا الطعم كما شربت القوى السياسية كلها طعم المادة 76 ، ديماجوجية البيروقراط والأتاتورك حولت أزمة الحجاب إلى "احنا ولا الناس التانيين" .. حيث وضع الإعلام البيروقراطي الأتاتوركي بما فيه صحيفة "الفقر" كل من يعترض على البيه فاروق في سلة الإخوان ، وظهر الموضوع على أنه صراع بين الوزير والإخوان وليس حماقة وطولة لسان وألفاظ لا تليق بوزير..

    وطبعاً لا تسألوني عن محاسبة الوزير ، أو أي وزير على أي ترهات يقولها ، فهذا رأيه ، وإن خرج وزير النقل ليقول على شاشات التليفزيون عقب كارثة قطار أن الفلة في المنافلة فلا يجب أن يسأله أحد لأنه أدرى بالفلة والمنافلة ، وإن خرج وزير التعليم العالي بتصريح علني يسمح فيه بتسييس الجامعات في اتجاه واحد فلا يجب أن يحاسبه أحد في مقلة الشعب ولا الشورى!

    مش ممكن حاجة تتغير بالطريقة دي .. أو في الظروف دي..دة مش إحباط قد ما هو إقرار بأمر واقع فوق نافوخنا جميعاً..

    ReplyDelete
  6. يا زينب الحرية ديه مش لعبة
    يعني ماينفعش اقف اشتم في الناس اللي في الشارع واقول حرية شخصية...وبعدين ده وزير...يعني ده راي الدولة...ترضي انهم يمنعوكي عن لبس الحجاب زي فرنسا وهولندا وتونس؟الواحد حر طول ما ازاش حد...وده ازي كل مصري...كل مسلم وكل مسلمة
    انا رايي انه يقال

    وبعدين ماله هو ومال شعر الستات
    مايخليه في شعر الرجالة
    ولا دلوقتي بقه راجل اوي

    ReplyDelete
  7. اقري البوت اللي كتبته

    ReplyDelete
  8. بغض النظر عن رأي الفقيه المجدد حسني وعن ثورة بعض المتاجرين بالموضوع ومطالبتهم الرجل بالاستقالة أو المحاكمة الخ الخ أحب أفكر نفسي وإياكم أن فاروق هو اللي فتح الموضوع وقبله كانت أبلتي روزاليوسف فمش معقول لما حد يجي يرد - أيا كان الرد - نقول ايه ده هوه انتوا مش بيشغلكم الا الحجاب؟؟؟!!! المفروض دي كانت تتقال لأبلتي روزاليوسف وللحاج الفقيه الإمام المجدد فاروق حسني. ومبدئيا مفيش خلاف ان الموضوع ملحوس وكل الناس لغوصت فيه للركب بكلام عجيب من أول ثورة أعضاء الحزب الوطني مرورا بقانون ازدراء الأديان وانتهاءا بالمطبلتية بتوع حرية الرأي والتنوير. أمال ياخويا الناس دول فين لما واحد صحفي بيتفشخ عشان انتقد أحد الكبار أو كبير الكبار؟؟!!! وفين بتوع الحرية دول من اللي بيحصل للناس في المظاهرات؟؟ وفين همه باردوا من المسجونين الاسلاميين اللي اعتقلوا مش عشان حرية رأي ، لأ ده لمجرد ان واحد ساب لحيته تطول شوية. وأخيرا ما حدث سيتكرر بشكل ما دائما

    ReplyDelete
  9. آمين
    Although I do not wear a head cover and I do not believe it is a command ( I believe we are commanded to dress decently , but not necessarily cover our heads), I do respect women who wear it and believe it is stupid of Farouq Hosni to say that it sets us backwards . In my opinion, it is a decent style of clothing that does not make a woman smarter or dumber, and from what I see it really is not affecting behavior or morality although I think it should.
    Anyways, regardless of what Farouq Hosni said or meant, it is very obvious how this is being politically exploited to the max. It is also surreal that this will be "the thing", of all things, to end this man's 28 year old scandalous and corrupt career as minister.
    The way most of us ,the Egyptian people, are decieved by NDP in this matter, is to say the least, sad.

    ReplyDelete
  10. و الله فعلا جبتي من اﻵخر.

    آميييييييييييييين

    ReplyDelete
  11. آآآآآآآآآآآميييييييييييييييين

    ReplyDelete
  12. كله كذب ونفاق وزفت وهباب وعك واستنكار و دا كله ليه ؟؟!! علشان نرضى ماما امريكا وبابا بوش وستنا وتاج راسنا كونداليزا يقولوا لنا امشوا يمين نمشى امشوا شمال نمشى اقفوا واتكتموا خالص نخرس ولا كان لينا لسان اتعفرتوا وهدوا الدنيا وقعدوها ( على الفاضى طبعا ) نعمل كل حاجه واى حاجه مش مهم بقى بتخالف الشريعه بتخالف التقاليد بتخالف الاعراف المهم اننا نتبع شريعة امريكا واسرائيل وزى ما ريسنا حبيب قلبنا شعاره " طاطى راسك طاطى انت فى وطن ديموقراطى "
    ربنا يخده ويريحنا منه ومن امثاله

    ReplyDelete
  13. القاعدة الموزمبقية تقول

    الحجاب فرض
    والتفكير سنة
    ومحاسبة الظالم مكروهة
    وتغيير الحاكم كبيرة

    ReplyDelete
  14. نسيت اقول امين
    وان كنت بقولها بكل حرف باكتبه من ساعة ما قلنا
    يا كتابة

    ReplyDelete
  15. وكل واحد هنا بيتكلم في وادي!!

    ReplyDelete
  16. يا جماعة الراجل اللي قال الكلام دا لو كان واحد عادي مش مهم بس دا واحد بيمثل وزارة في بلد وبعدين مسلم والمفروض في بلد اسلامية وهو مصرحش بالكلام دا مثلا بينه وبين صاحبه او مع نفسه كدا لا دا قاله لصحفي يعني طبيعي هيتنشر والمفروض انه ياخد باله من الكلام اللي بيقوله وبعدين عيب اوي اوي اننا نجادل في مسلمات ... الفروض اللي تخص الدين مينفعش ابدانتناقش ونجادل فيها دي مسلمات ... وبعدين لما يقول الحجاب رجوع لورا او تخلف عن الحضارة دا معناه انه والعياذ بالله امر ربنا دا تخلف ... واذا كان وزيرنا كدا يبقى نستاهل كل اللي بيعمل فينا برة دا

    ReplyDelete
  17. اللهم آمين

    دى بلد فنجرية بق أصلا
    تحسى اننا فاضيين قوى و معندناش اى مشاكل علشان نفكر نحلها
    لا احنا بعون الله بنخلق مشاكلنا بايدينا
    عندنا اكتفاء ذاتى و لامؤاخذة
    ربنا يورينا فى كل اللى جابونا وراء يوم

    ReplyDelete
  18. كل واحد يخطأ وبعد ذلك يقول زلة لسان , بوش يخطأ وحوارييه يقولوا زلة لسان , بابا روما يخطأ ومريديه يقولوا زلة لسان , كل واحد فى هذا العالم يخطأ فى حق ديننا وعندما يرى دفاعا عصيا يقول زلة لسان , حتى هذا الحسنى - و كل ما اسمه حسنى بغيض - كان عليه أن يترك ذلك لوزير الأوقاف أو الشيخ المجدد - طنطاوى باشا - ولكن كل ذلك لأن عجوز مصر الهرم يريد ذلك , وزير بلا أى معنى يظل فى وزارته أكثر من عشرون عاما , عشرون عاما , هذا الوزير غير المثقف يخلف الدكتور أحمد هيكل فى هذه الوزارة , وشتان بين الرجلين , كم عمر أصحاب المدونات الآن فى مصر , لقد ولد أغلبهم وهذا الوزير و رئيسه الهرم مازالوا فى مقاعدهم ,هناك أجيال كاملة ضاع حقها فى القيادة لأن الرئيس الهرم يريد الثبات و الديمومة و الفساد , فلا يهم بعد ذلك أن يكون هناك شخص بغيض يجذب بغض الناس بعيدا عن الرئيس الهرم البغيض رغم أنفه , الحجاب فرض الهى منزل فى القرآن , ليس فى ذلك رأى لوزير أو رئيس

    ReplyDelete
  19. انا كنت عايزة ادعى عليهم وبس مش عايزة ادخل فى مناقشة الموضوع
    بس الظاهر انى لازم ارد ع التعليقات المثيرة دى
    :D

    fnan_geology
    ولعن الله نظرية المؤامرة
    :D
    ---

    قلم جاف
    مش عارفة يا قلم، اعتقد ان المشكلة مش فى حكاية ان وزير يقول رأيه فنعتبر انه دا رأى الدولة وان تعبيره عن رأيه من موقعة كوزير جريمة.. الحكاية كلها مش راكبة فى دماغى
    اولا انت نفسك لو بقيت وزير وليك رأى ما مختلف عن الرأى الاغلب، هل عليك انك تسكت وتخبيه لمجرد ان الاغلبية مختلفة معاك؟؟
    ثانيا لما نحاسب فاروق حسنى عن رأيه فى الحجاب -و اللى هو قضية ابسط بيكتير بكتير من مشاكل تانية كتير حوالينا واعتقد ان انت من العقليات اللى مقدرة فكرة ان الحجاب فرض لكن تم تهويله وتكبير فكرته بشكل شرس وعنيف فى القرون الاخيره لدرجة بقى معاها الطرفين متطرفين جدا ضد بعض اللى مع الحجاب او اللى مش معاه
    وبالتالى، ننسى نحاسب فاروق عن بلاوى تانية ونقوم نقف وقفة رجل واحد ضده عشان كلامه عن الحجاب.. لا لا لا.. انا مش هبلع الحكاية دى ابدا

    ---

    عربى
    ممكن تقرا رأيي اللى قلته لقلم جاف
    واضيف كمان
    ان عندك حق ما ينفعش ابنى حريتى على اذية الاخرين
    بس لازم نفرق ان الرأى مس أذية يا احمد
    الكلام وووجهة النظر والفكر يختلف تماما عن الفعل والتصرف

    الناس هتفضل طول عمرها مختلفة فى الافكار والاتجاهات.. المهم ان انت ليك مخ وبتفكر وهتوزن الامور فى النهاية مش هتسمع كلام فاروق حسنى وتجري تنفذ مثلا

    وبعدين ما بلاش تلقيح ع الراجل.. إن بعض الظن إثم


    ----
    hope
    اهو انتى جبتى التايهة يا هوب، انتى اهو بتقولى انك مش شايفة ان الحجاب فرض.. وانى حد انا بحترمه جدا وبحب اقراله، ومش معنى انا اننا ممكن نختلف فى نقطة اننا نهد الدنيا.. الموضوع انفجر بشكل دعائى جدا
    وفى الاخر الحزب الوطنى اللى بيقش التحية والتقدير لوقفته النبيله مع الحجاب

    ReplyDelete
  20. قبل 1952 كانت هناك حياة ليبرالية في مصر رغم كل ما يقال عن فسادها ورغم الاحتلال ، وتعلمنا منها ما يحدث في كل دول العالم أن منصب الوزير هو منصب سياسي في المقام الأول ..

    معظم من ردوا على تلك التدوينة القيمة بمن فيهم أنتِ والعبد لله ولدوا بعد أن "دلدل" البيروقراط أقدامهم على السلطة .. وبالتالي ترسخ في عقلياتنا أن الوزير منصب بيروقراطي ، مجرد موظف ليس لنا عنده إلا عمله فقط.. وذلك لأننا لم نر في حياتنا انتخابات طبيعية تسفر عن وصول أحزاب طبيعية إلى السلطة ، يصبح الوزير فيها عضواً عاملاً في الحزب ، لا مجرد بيروقراطي يتم ضمه كما تضم الشركات لاعبي الأندية أثناء دوري الشركات!

    الجالس في الوزارة لا يعرف أنه مختار من قبل الحزب ، وأنه جزء من الحكومة ، وأن تصرفاته محسوبة على الحكومة ..

    قد لا يكون هناك فرق بين شخص يسب بعلو حسه في الشارع وبين وزير يسب في تصريح من الناحية الأخلاقية ، لكن سياسياً الفرق كبير ، فالشخص في الحالة الأولى لا يمثل إلا نفسه فقط ، أما في الحالة الثانية فهو محسوب على الحزب إن كنا في دولة ديمقراطية ، أو على الدولة كلها في بلد بيروقراطي!

    حتى وإن سلمنا بحرية فاروق حسني في إبداء رأيه من حيث هي ، لكن الألفاظ تعني الكثير في قلب التصريح.. ولو اختار ألفاظاً أخرى لكانت الضجة المثارة أقل بعض الشيء.. لكن هذه مشكلته ومشكلة أي وزير في مصر سواء أكان تكنوقراطياً أو بيروقراطياً عندما يأخذه الغرور ويدلي بعبارات غريبة الشكل والصياغة..

    بالمناسبة .. لماذا سلمنا تماماً بأن ما قاله الدكتور هاني هلال عن الدعم العلني للحزب الوطني داخل الجامعات هو مجرد رأي شخصي؟ أليس في ما قال انقلاباً على ما تقوله الحكومة في العلن؟

    ReplyDelete
  21. انا شايف ان في حاجة ناس كتير مش واخدين بالهم منها.
    الموضوع مش مجرد حجاب و عدم حجاب الموضوع ان وزير الثقافة بينكر ثابت من ثوابت الدين.
    وكمان فهمت من كلامه انه بيقول الاسلام ما فيهوش ثوابت و كل واحد ممكن يفهمه براحته.
    يعني كل واحد يعمل لنفسه اسلام تفصيل
    اظن ان موضوع الطعن في ثابت من ثوابت الدين والادعاء بما يخالخ صريح القرءان انه ليس من الاسلام ده موضوع خطير و مش سهل(ما اعتقدش ان فيه اهم من الطعن في ثوابت الدين).
    و خصوصا لو دي الثقافة اللي الوزارة بتحاول تنشرها.
    الا اذا اخذنا بمنطق مرشد الاخوان ان وزير الثقافة ده راجل الشعب كله عارف انه بيحب يهرتل و ما حدش بياخدله على كلام

    ReplyDelete
  22. آميييين
    آميييييييين
    آميييييييييين

    ReplyDelete
  23. بجد خدتى الكلام من على طرف لسانى
    الناس بقت ما بتصدق
    معاكي بدعي وانا خالعة راسي اهو
    عشان ميبقااش بيني وبين ربنا حجاب
    امين
    أااااااااااااامين
    آمييييييييييييييييييييين

    ReplyDelete
  24. سلام عليكم
    انا زينب من لبنان
    حبيت مدونتك أوي وخصوصا الموضوع ده
    أنا بدعمك في دعائك وبضم صوتي لصوتك كمان
    ربنا يوفقك
    ولو تحبي تتعرفي على مدونتي شهيدة كاتبة فيها شوية حاجات عن الحرب والاعتصامات وكدة
    سلام

    ReplyDelete
  25. عزيزتي بنت مصرية؛ الأرهاب الفكري الذي تعرض له فاروق حسني من الأخوان والوطني وهما الأثنين بيجروا ورا نوع من الأستبداد، يوريلك ايه نوع الدولة اللي هنشوفها لو دول وصلوا للحكم! يعني نخلص من الديكتاتورية، نلاقي حكم الشريعة زي ما فرعون كتب.

    الحل في مصر هو تفعيل مفهوم المواطنة والمساواه ومفاهيم حرية الرأي والتعبير والعقيدة، في إطار دستور علماني يفصل الدين عن الدولة.
    نهضة مصر

    ReplyDelete