3/26/2007

لأني مدونة: هل تقبل شهادتي وللا مجروحة؟

رحت النهاردة لجنة من لجان الاستفتاء، هى نفسها اللجنة اللى رحت انتخبت فيها قبل كده. وكلمتكوا عليها.. مدرستى الجميلة اللى كل ما اشوفها افتكر البراءة والضحك واللعب واحس انها مكان مقدس مينفعش يلوثوه بالتزوير والغش والضحك ع الدقون

المهم.. انا اصلا اخدت بعضى ورحت وانا خايفة اتاخر ع الشغل، بس استبيعت بصراحة وحسيت انى مسئولة اوى اروح.. بما ان يعنى نص الشعب مايعرفش حاجة، والنص التانى مقاطع الا قليل.. والقليل بأه يإما انصار الحزب الوطنى او اللى زيي هيروح يقول لأ ومش هيقاطع

اول ما وصلت لقيت طنط اللى هى حد مهم فى الجناح النسائى بالحزب الوطنى عندنا فى بلدنا.. وهى تعرفنى وتعرف ماما شخصيا، كان الجو هادى جدا، وكل اللى موجودين طنط دى وخمس ست سيدات وسبع تمن بنات، كلهم حواليها ماسكين كشوف وبطاقات مكتوب عليها الحزب الوطنى

سلمت على طنط وهى اتبسطت لما شافتنى، سألتنى بشتغل فيه دلوقتى وازى ماما واخواتى وكده
وبعدين خلت البنات يقفوا يدورا على اسمى فى الكشوف اللى معاهم

وانا واقفة جمبها وهى بتتكلم معايا، جت واحدة وهى بتقولها: اللجنة سبعتاشر حلوة اوى و
انا حسيت طبعا بلعب فقلت اطرطأ ودانى
بس طنط قاطعتها فى الكلام وقالت لها طيب اسكتى ، دا وقته

المهم لاقوا اسمى وكتبوه فى بطاقة وادهولى وشاورولى على اللجنة بتاعتى
وسبت طنط وقلت لها بعد اذنك، قالت لى ابقى عدى عليا بعد ما تخرجى
قلتها حاضر

طلعت الدور التانى، واخدت الورقة، واتلفت على الستارة، فقلت للراجل، اروح هناك.. سؤال غبى لا مؤاخذه معرفش سألته ليه
بس النكتة بأه انه قاللى: هناك او هنا... براحتك
هو ما شفش البطاقة بتاعتى على فكرة

رحت ورا الستارة وعلمت على الدايرة السودا.. هما ليه عاملين الرفض بدايرة سودا.. هل معناه انها سنة سوده على دماغ الرافضين للتعديلات؟
وبعدين حطيت الورقة فى الصندوق بعد ما طبقتها، وخرجت من غير ما يوصمولى صباعى بالحبر الازرق ده

وخرجت
ورحت لطنط اشوفها عايزة منى ايه
فوجئت بيها بتقولى: ما تيجى ادخلك لجنة تانية
انا ضحكت ضحكة ساذجة اوى وقلت لها ايه لأ ، ماينفعش، اصلى متأخرة ، شغلى فى مصر

وسلمت عليها وسيبتها وانا مخضوضه من العرض اللى عرضته عليا
طبعا هى عرضته عليا لانها متصورة او واثقة منى انى تبعها مش تبع الناس التانيين
بس انا والله لما بسلم عليها اوبضحك فى وشها، لانها صحبة ماما وست كبيرة وبحترمها

ازاى هى تتصور انى ممكن اشاركها فى الغش والتزوير.. طيب هتقولولى ليه ماديتهاش محاضرة فى الحلال والحرام وجاية تقوليها هنا
هقولكوا لانها ست كبيرة، واكتسف اقولها حاجة زى كده.. وكمان معتقدش ابدا انها هتسمع لأن دا اللى بتعمله فى كل انتخابات.. ازاى هتيجى النهاردة وتسمع من عيلة زيي

طيب هتقولولى كنتى استغليت الموقف ووافقت وطلعت علمت بالرفض تانى
بس طبعا دا بردو اسمه غش، وتزوير، والهدف لا يبرر الوسيلة باختصار

المهم انا لحد دلوقتى مخضوضه.. باه الحكاية سهلة اوى كده؟ اطلع ادى صوتى ومايتعلمش على ايدى بالحبر، وما يبصوش فى بطاقتى الشخصية، واخرج من لجنة اروح لجنة باسم حد تانى وادى صوتى وما يتعلمش على ايدى بالحبر، وما يبصوش فى بطاقتى الشخصية، واخرج من لجنة اروح لجنة باسم حد تانى وادى صوتى وما يتعلمش على ايدى بالحبر، وما يبصوش فى بطاقتى الشخصية واخرج من لجنة اروح لجنة باسم حد تانى و يالاااااااهوى

44 comments:

  1. مش مشكلة أهو برضه رحتى وشوفتى الوضع على الطبيعة
    عشان تعرفى بس أن المقاطعة كانت أحسن
    على العموم
    النظام فى مصر مش حينفع معاه أصلاح
    ده أخرة (أنسف حمامك القديم) عشان رحته بقت وحشة قوى والسباكة اللى فيه تائكلت من زمان
    ومنك لله ياللى فى بالى

    ReplyDelete
  2. المهم بالليل هتشوفي ان اللي راحو كانو كتير جدا
    ومعظمهم قالوا نعم لدرجة انك هتحسي انك الوحيدة في مصر اللي قالت لأ
    وعموما فكرة انا لوحدي دي هتبقى عند كل اللي راح واللي لواتجمعوا هيطلعوا كل اللي راح برده
    واضحة مش كده

    ReplyDelete
  3. ما تزعليش مني:
    الساكت عن الحق شيطان اخرس

    Sorry, I can't type more in Arabic beause I don't have a keyboard with the Arabic letters printed here.

    ReplyDelete
  4. والله برافو عليكي انك رحتي علشان ماتبقيش آثمة القلب زي مامولانا الإمام الأكبر قال.
    يارب اليوم دة يخلص بقى علشان انا حاسس ان كل ساعة فيه بنضرب على قفاية 100 مرة بعدد البطاقات المزورة وعدد الناس السازجة اللي بتروح توافق على الإستفتاء دة.
    مدونة الأغلبية الصامتة
    http://theegyptiansilentmajority.blogspot.com/

    ReplyDelete
  5. nsameer

    ما زعلتش طبعا، من حقك

    بس يمكن انا مقتنعة بمبرراتى اللى اولها ان اتكسفت واحرجت انى اقول لها اى حاجة وهى واحدة كبيرة فوق السبعين سنة، وتعرف ماما وتعرفنى من وانا لسه فى الحضانة، ومش معرفة صبح وليل وليل وصبح تخلينى متعودة عليها مثلا انى اقدر اقولها حاجة، الموضوع اصعب من كده بكتير،

    انا كمان ساعتها كل اللى فكرت فيه انفد بجلدى منها، احتمال اكون مش بعرف افكر فى المواقف المفاجأة او اكون محتاجة اتعلم ازاى ما تكسفش
    لكن معتقدش ابدا انى شيطان اخرس
    والا مكنتش جيت حكيت هنا ع اللى حصل
    وللا انت مش معتبر ان المدونات ممكن تكون منبر نقول بيه الحق ومانسكتش عنه

    انا حاولت اقول الحق فى الظرف والموقف اللى انا محطوطة فيه، عشان كده انا حاسة ان رأيك ده فى قسوه عليا انا مستحقهاش
    ومع ذلك انت بردو حر فى رأيك وانا لازم احترمه

    ReplyDelete
  6. ده الموضوع قلب بجد

    هو الصراحه انا ماكانش قصدى. ساعات الواحد ماينفعش يقول كل حاجه

    هو انا كنت قاعد زهقان و مش لاقى حاجه اعملها قلت اغلس

    هو دا بس الموضوع

    و ممنون على تسامحك معايا!

    ReplyDelete
  7. مش كنتي قاطعتي احسن
    كده كده النتيجة طلعت في الكنترول
    مجدي مهنى النهاردة في المصري اليوم قال ان اللي هيروح يصوت هو عارف ان صوته هيتسرق ..
    طيب يبقى ليه وجع القلب بقى
    ما هو مسروق مسروق
    ومن زمان

    ReplyDelete
  8. بسم الله الرحمن الرحيم
    سيدتي الجميله
    ------------
    النظام ده خبيث جدا جدا الي درجه لا تتصوريها...ازاي يعني؟
    هاقولك........
    عندنا 3 حالات ممكن تحدث و هي.......
    1-مقاطعة الاستفتاء و ده معناه فرصه ذهبيه للتزوير و تقفيل الصناديق
    2-الذهاب و الادلاء بلا و ده معناه التزوير برضه بس هيدي مصداقيه للنظام علشان هيتبجح و يقول ان الاقبال كان كبير و كان فيه حريه ووو....
    3-الذهاب و الادلاء بنعم و ده عز الطلب
    بس ده كل اللي كنت عايز اقوله...سلام

    ملحوظه...لقبتك بسيدتي الجميله لجمال القلم و الروح و بالتالي اكيد جمال الصوره...(بعاكس بقي)

    ReplyDelete


  9. بجد اللي بيحصل ده كارثة
    انا عن نفسي صوتت النهارده تلات مرات
    من غير ما يتحطلي الحبر الفسفوري اللي بيقولوا عليه ده
    بس الكارثه ان المرات التلاته باسمي
    وفي لجان جنب بعضها
    ومن غير ما يبص في البطاقة
    ده كله لاني معايا مندوب من الحزب الوطني
    ................
    علي فكره
    هما عايزين يوفروا الحبر ده للمرات الجايه
    ...............
    عزيزتي
    دمتي بود

    ReplyDelete
  10. مفيش فايدة انا برده رحت و محدش اهتم بالحبر وكان عندي امل ان الوضع يتغير بس برده النتيجة الي هما محددنها هية الي طلعت في الآخر واضح اانه فعلا مفيش فايدة

    ReplyDelete
  11. عارفة يازينب

    انا مش مصدقة بحد اللي بيحصل ده

    بس انا فخورة بكي انك رحتي النهاردة

    احب واحترم شجاعتك ياعسل

    ReplyDelete
  12. لا والله انا رحت النهارده فى مدرسة فى الخليفة المامون وادليت بصوتى وغمست ايدى فى الحبر الفوسفورى ورئيس اللجنه اصر ان انا اغمس صابعى بجدية فى الحبر ولسه على ايدى لحد دلوقتى انا عارف ان كله ماعملش كده لكن هى المشكله ان انا عارف ان صوتى مالوش لازمه ودى اكتر حاجة بتضايقنى

    ReplyDelete
  13. we r in diemtta and port said its dangerous here they know wt we can do so they r so tough with us if someone of them touched me by names or hands i will make him mark to egypt so .... we will wait and see if they can use guns agianst us we r the rocks

    ReplyDelete
  14. the peace can not help the wake to take his rights fight learn kung fu learn sniper learn how to defend your rights its the revoultion agianst the old realves

    ReplyDelete
  15. خسئتى يا بت يا مصرية خسئتى وخسئ اللى سماكى بنت مصرية
    هى دى الروح الوطنية تسيبى مصر للاوغاد اللى مش عاوزين يحدثوا الدستور ويسيبوه على قديمه الجماهير يا حلوة تدافعت وعوروا بعض وهما بيتزاحمو على صناديق الاستقراع عشان يسجلوا اسماءهم فى كشوف الشرف اللى منحهولنا الحاج

    خسئتى
    خلاص مش شايفين النعمة اللى مغطياكو ومش شايفين الالفية الجديدة اللى دخلنا فيها بالمجرى السريع
    ايه العما صابكو جماعة
    يا خرابى عليكى بلد والنعمة عزبة ابو جمال هى الجنة خليكو فى التخلف وجهنم المعارضة اللى انتو لابدين فيها زى الوطاويط
    اسفوخس

    ReplyDelete
  16. نعم نعم من جوه الكيس
    ده رئيسنا طيب وحريص
    شاف دستور محتاج تنكيس
    شاله وف عين العدو تخميس
    إدانا دستور حليوه وحديث
    ده دستور اخر جمال
    دستورنا
    ولا فيش زييه
    دستورنا
    ده قلوبنا هاتحميه
    دستورنا
    نقفوا نحييه
    ونحى الحاج ابو جمال
    يا شعب قوم وانهض
    دستور حديث جالك اسعد
    ويا معاض يالا ابعد
    ده احنا شعب الرجال
    حيوا معانا ابو جمال
    ابو جمال
    ابوجماااااااااااااااال

    ReplyDelete
  17. كلمتان لفتتا نظرى

    الأولى بحترمها . . بأمارة ايه

    الثانية مخضوضة . . هو احنا ليه بنتصدم اما نحتك بالحقائق اللى معروفه سلفاً

    ReplyDelete
  18. مبارك وعائلته صوتوافي مصر الجديدة

    أدلي الرئيس حسني مبارك وأفراد أسرته بأصواتهم أمس أمام لجنة مدرسة مصر الجديدة الثانوية في الاستفتاء علي التعديلات الدستورية. وعقب التصويت غمس مبارك إصبعه في الحبر الفسفوري، وتفقد اللجان المجاورة بنفس المدرسة.

    من المصرى اليوم
    http://www.almasry-alyoum.com/article.aspx?ArticleID=52640&r=t

    أخدت بالك من غمس مبارك إصبعه في الحبر الفسفوري دى
    أكيد خايفين لينتخب اكتر من مرة
    ههههههها

    ReplyDelete
  19. حرام عليكم و الله العظيم .. النتيجة طلعت 24% قالوا لآ .. يعني لو المقاطعين "الاخوان و الغد و الوفد و الكرامة و كفاية و حزب اللي مكبرين دماغهم" دولا راحوا و رفضوا التعديلات مش كانت الكفه مالت و التعديلات اترفضت .. انتوا كسبتوا ايه كده يا بشر ؟؟ اللي زوروا تفتكروا سودوا ورقهم ازاي ؟؟ بأسماء مين ؟؟ مين اللي اتمضي قصاد اسمه و هو ما راحش اصلا ؟؟

    مثل بسيط .. لو فيه ماتش بين الاهلي و الزمالك مثلا .. و الاهلي لعب زي الزفت و الزمالك لعب برفكت .. و مع ذلك الاهلي جاب جون ف غفلة من الزمن و الماتش خلص 1/0 للاهلي .. الزمن هيسجل ايه ؟ فوز الاهلي 1/0 ولا لعب الزمالك اللي ما حصلش و المفارقة اللي خلت الاهلي يحط الجون ؟؟ ببساطة هو ده الوضع عندنا دلوقتي !!! التاريخ مش هيسجل الا وجود تعديلات دستورية وافق عليها الشعب بنسبة 76% .. و هذا كل شئ ..

    انا المره دي مش ناقمه علي النظام .. لآ انا ناقمه علي السلبية و السلبيين .. و ذنبنا و ذنب ولادنا ف رقابيكم الي يوم الدين .. و حسبي الله و نعم الوكيل ..

    ReplyDelete
  20. لا شهادتكم متبقاش مجروحه بس
    دي تبقي غلبانه و منكسره و مكسورة الجناح كمان
    تحياتي
    و كل دستور و انتم طيبين

    ReplyDelete
  21. اهلاً وسهلاً

    تصويت بين مؤيد ومعترض
    هذا الكلام نختلف عليه الجميع ولكن لا يفيد الكلام الان لان الامر اصبح واقع

    المهم لنتكلم عن الواقع الان
    وعن مجريات الامور
    للعلم إن كنت ضد فكرة المشاركة
    وسبب انه سوف يحصل تزوير بشكل غير طبيعي ودليل عدم وجود قضاء يشرف على هذه المهزلة ثانياً اذا شارك الافراد والمجتمع سعيتها اذا تصويت بنعم على القانون حتى ولو كان تزوير سوف يتذكر العالم وسوف يذكر في المستقبل بان هذا القانون كان من اردة الشعب
    ولكن اذا كانت المشاركة قليله جداً فهذا يبين ويبين لاطفالنا في المستقبل بان هذا القانون هو جاء رغم عن شعب ومن خلال هذا الكلام سوف يكثر عدد الاشخاص المعارضين لتلك السياسية الغاشمة

    هذا راي قد نختلف أو نتفق ولكن في نهاية لا نفقد الود


    صحيح قبل إن اختم هذه الكتابة الركيكه
    اود إن اشكرك أختي الكريمة على هذه القوة
    التي اتصفت بنوع من الحذر او الاصح من المجاملة للمديرةوصديقة أمك الكريمة الله يخليها




    تحيات أخوكم الصغير حمزة لاجئ
    محب للحرية:)

    ReplyDelete
  22. انك تروحى وتقولى لأ احسن ألف مره من مقاطعة غير منطقيه

    ReplyDelete
  23. شوفتى يازينب
    الحرميه زورو الانتخابات برضو زى كل مره
    الشعب القوى رفض وقاطع وهما برضو مفهموش كا الانعام بل اضل
    ولا البقره الحلوب المسؤل الاعلامى بتعهم ليله الاستخراب جه فى البيت بيتك علشان يقول ان الشعب المصر يا ام مسكين او ارهابى مؤمن بفكر الشهيد سيد قطب هذا السفيه الى فكرو مبنى على الطماطم والبطيخ بيتكلم عن سيد قطب
    وهو واعوانه دعاء السلام والاصلاح بعد ما سرقو وسرطنو البلد هما برضو الى هيصلحوها
    طب حد عمرو سمع عن حرامى رجع الى سرقو
    حسبيا الله ونعم الوكيل

    ReplyDelete

  24. اللهم انتقم

    بارك الله فيك على شجاعتك

    مقولتيش برضو ممكن اساعدك ازاي

    سلام

    ReplyDelete
  25. انت عبيطة و اللا ايه هم محتاجين سيادتك تروحى لجنة تانية علشان تحطى صوت تانى و بعدين معنى كده انهم ماكنوش بقفلوا اللجان (بيسودوها يعنى) العملية لم تستغرق فى لجان النصورة مثلا اكتر من نصف ساعة علشان الصناديق تتملأ
    عن اخرها و يبقى كله تمام
    مسكوا الحرامى مفتاح الخزنة
    هو ده حال مصر النهاردة

    ReplyDelete
  26. علي فكره موضوع السلبيه ده مش صح
    الصح هو ان الناس جالها ياس واحباط
    ممكن نتكلم ونقول زي ما احنا عاوزين علي الناس والشعب
    لكن كلنا
    من جوانا مكسورين
    كلنا يئسنا
    حتي فكره اننا ممكن نحاول نغير
    مبقتش فكره منطقيه
    الناس فقدت الامل
    وهي ده المشكله
    المشكله بقت جوانا
    معششه من سنين
    اليأس سيطر علي كل الناس

    احبطكوا بس هي ده الحقيقه

    زيزو

    ReplyDelete
  27. عشان كده كنا مقاطعين، عشان منبقاش بندي الموضوع شرعية وهو أساسا مسرحية بايخة واحنا المطلوب مننا نبقى كومبارس تحت دعوى الإيجابية، عن نفسي شايف المقاطعة موقف ايجابي برضو يعبر عن رفضنا للمهزلة ككل

    على العموم اهو يوم وعدى، خلونا في اللي جاي

    بالمناسبة، واحد صاحبي والده مسئول برضو عن لجنة انتخابية زي السيدة صاحبة والدتك بالظبط، صاحبي بيحكي لي انه اتخانق مع ابوه عشان ابوه لوحده عامل 500 صوت

    أي خدمة :D

    ReplyDelete
  28. Hey Bent Marya , i really like your Blog , you are really one of the few true ppl in our society nowadays , anyways , about the plebiscite (The Poll) You and me and everyone knows that they will do what they want without any plebiscite , its just 2 show the world that we are a democratic country , and we are free to choose .. BUT THE WILL DO WHAT THEY WANT .

    ReplyDelete
  29. هو إنتى مذبهله ليه من اللى حصل؟
    إنتى كنت فاكره نفسك رايحه إستفتاء فى موريتانيا يا بنتى؟
    دى مصر.

    هوه سلو بلدنا كده.
    و عجبى

    ReplyDelete
  30. انتخابات ايه
    وتعديلات ايه
    الدستور ده كان زمان ايام خالتي لما كانت تدخل البيت تروح قايلة دستور قال عشان لو فيه حد من الحريم قالع راسه يغطيها
    دلوقت فيه جرس والرجالة قصدي الحريم كلهم مأمنين نفسهم ولابسين طُرح والحمد لله

    ReplyDelete
  31. أشترى دماغك أهو أستفتاء يفوت ولا حد يموت(مع العلم أن أنا كنت ضد الذهاب للأستفتاء وذلك لإثبات أنعدام شعبية الوطنى بأدلة دامغة).ولما تشوفى طنط دى تانى سلمى عليها وبوسيها من هنا ومن هنا لأن ده أقل عقاب ليها ...خليها تصدق نفسها(أحسن عقاب للكذاب أنه يصدق كذبته لحد مايقع على جذور رقبته)

    تحياتى

    ReplyDelete
  32. مدونه عظيمه جداااا ابهرني مجهودك و طريقة الكتابه العظيمه واحساسك في الكتابه ادعوك لرؤية موقعي المتواضع الذى لا يرقي لمستوى مدونتك واتشرف بمعرفتك كصديقه

    www.nourhetler2006.jeeran.com

    ReplyDelete
  33. نفس فكرة الدايرة السودة والخضراء جت في بالي
    بيلعبونا لعبة نفسية
    نعم هتبأى الحياة خضرا
    لا هتبأى سودة ومهببة
    وكلاللي خدناه من الاستفتاء حرقة الدم

    ReplyDelete
  34. أعجبتني هذة الأبيات أحسستها معبرة ومعانيها نارية وهي تعبر الى حد ما فهي تتحدث عن تشريع وتعديل القانون وكيف ان يمكن للمشرع ان يلعب بالقوانين كما يشاء (يعزف).. القصيدة للشاعر العراقي أحمد مطر

    يشتمني ويدعي أن سكوتي معلن عن ضعفه،
    يلطمني ويدعي أن فمي قام بلطم كفه،
    يطعنني ويدعي أن دمي لوث حد سيفه،
    فأخرج القانون من متحفه،
    وأمسح الغبار عن جبينه،
    أطلب بعض عطفه،
    لكنه يهرب نحو قاتلي وينحني في صفه،
    يقول حبري ودمي: "لا تندهش،
    من يملك القانون في أوطاننا،هو الذي يملك حق عزفه!"

    عزف على القانون لشاعر الحرية أحمد مطر

    ReplyDelete
  35. أعتقد ان هذة الأبيات لها صلة ما بالأوضاع الحالية

    قلة أدب
    قرأت في القرآن: "تبت يدا أبي لهب"،
    فأعلنت وسائل الإذعان:
    "إن السكوت من ذهب"
    أحببت فقري، لم أزل أتلو: "وتب"،
    "ما أغنى عنه ماله وما كسب"
    فصودرت حنجرتي بجرم قلة الأدب،
    وصودر القرآن، لأنه حرضني على الشغب.

    من ديوان للشاعر أحمد مطر

    ReplyDelete
  36. مرحبًا سيدتي : )

    أنا أيضًا ذهبت لكن الوضع كان مختلف فكوني من مواليد 88 جعلهم قبل أن يتقبلوا مشاركتي يستفسرون عن إن كان سن 18 سنة يستطيع المشاركة أم لا.

    كما أني أقر أن لم يحدث أن نوع من الضغط لأدلي بنعم بل أدليت بصوتي بلا دون أي مشاكل ..

    النقطة التي أثارتني و أخشى أنها أثارت الكثيريين غيري ، أن الإقبال كان جد ضعيف و مع ذلك الصندوق الذي رأيته كان مُمتلأ للنصف !

    بالمناسبة إن ظلت عقلياتنا ترتضي المقاطعة و السلبية فنحن بذلك نتحمل أكثر المسئولية عن تدهور الأوضاع !
    ولا ملام إلا نحن و لا مسئولية تقع إلا علينا ما دمنا نرتضي ونسلم خاضعين ..

    أرجو أن نستمر جميعًا بقو اللا لأن كما يقولون ( الزن على الودان ... )

    : ) فيضُ تحية

    ReplyDelete
  37. كنت دخلتي لجنه تانية وقلتي لأ

    ولا أقولك مالهاش لازمه بكيفنا أو رضانا نعم
    نعم
    نعم

    ReplyDelete
  38. استفتاء ايه يا جدعان

    انتوا بتصدقوا ؟

    ReplyDelete
  39. فيكى الخير والله

    فعلا أنتى مثال ناجح للمواطن الصالح

    بس أنتى متأكدة أن كان فيه خانتين نعم ولا
    ولا كانوا الاتنين نعم وانتى مااخدتيش بالك

    ReplyDelete
  40. لم يصوت على التعديلات الدستورية سوى أعضاء المحليات وموظفيها والعاملون بها . في الساعات الأولى من التصويت كانت اللجان خاوية من أي فرد يقون بعملية التصويت سوى أعضاء المجالس المحليه وبعض الموظفين والعاملين الذين تم أجبارهم من مديريهم على الأدلاء بصوتهم لصالح الاِنقلاب الدستوري . اللجان كانت خاوية تماما والمشرفين على الاِستفتاء كانوا اِما جالسين على الكراسي في الشمس أو يتحدثوا مع بعضهم البعض عن أحوال الدنيا والناس والتعديلات ونواتجها وبأنهم جميعا (عبد المأمور ) وبأن الناس لن تأتي كما حدث قبل سابق وسابق وسابق منذ خمس سنوات وأكثر قبل المرحوم الملقب بالأشراف القضائي السابق على نزاهة الانتخابات والاستفتاءات . الشئ الملفت للنظر والكيان هو الهدوء الشديد الذي كان يكسو البلاد أو بعض البلاد فالله أعلم بالباقي كذلك مارس الاعلام دوره بان الامور تسير على قدم وساق والمصريون يصوتون لمستقبلهم مع أن الشعب من الأصل لم يخرج من بيته لكي يقول نعم أو لا بأستثناء موظفي الاِدرات التابعة للحكومه والذين طبعا سيقولون نعم لأجل أي شئ في المقابل حتى لو كان بضع من الجنيهات وعلبة كشري . لقد استطاع الشعب المصري ان يؤكد على رفضه لما يحدث أو على لا مبالاته أو ان الامر ليس له أهمية عنده نظرا لأن الحكومه ستفعل ما تريده سواء برأيه أو رغم أنفه . هكذا كان حال شعب مصر يوم الاِستفتاء على الدستور والمؤشرات على ذلك انه في عشية ليلة الاِستفتاء كان الناس مشغولين بشراء حلوى المولد النبوي الشريف واللحمة والله أعلم هل سيجدوا ذلك العام القادم أم لا ؟؟؟
    عمــوما كــــــل سنــــــــــــة وأحنا طـيـبـيـن
    وحــــلاوة المـــولـــد يـــــــا دســــتــــور

    ReplyDelete
  41. عجبتنى اوغنيه حلوه اوى اسمعهلكم
    هركب الدستور اها اها ودستر
    واخد الشعب بتاعى يقعد جنبى قدام وكلمو انتو بقه

    ReplyDelete
  42. Hi, Keifek,
    I liked your post, and translated it for an English Language website.you can find it at http://www.theviewpoint.org/2007/04/constitutional-reforms-in-egypt.html
    I hope you don't mind. But the website tries to put blogger posts that reflect the lives of ordinary people. If you have a problem with that please email me at nedalz@gmail.com.

    ReplyDelete
  43. تحياتي واحتراماتي

    ReplyDelete
  44. شكرا لكل المدونين الهادفين وشكرا لكل المعلقين ..معكم ياسر مدني دينامو الإخوان..لا مش أنا ده أسم مدونتي الجديده ومحدش لسه بيخش عليها لأنها جديده ..وأدعوكم تدخلوا عليها وتقولوا رأيكو بصراحه

    ReplyDelete