4/30/2007

أصلاً إحنا عبيد

المحروس كتب كتابه خلاص كخطوة فى طريق التوريث السلس والحمد لله الحياة ماشية حلاوة وكل قائم بدوره على أكمل وجه

الحكومة جوزت الواد ومن قبلها مسكته امانات المش عارف ايه فى الحزب ومن هنا بقت اخباره تنزل بصفته الحزبية وليست بصفته الأسرية مما يضمن استقلالا عن جلباب الوالد أمد الله فى عمره لحد 2011

والمعارضة هتقوم تهلل وتطبل وتشتم وتقوم بدورها الوطني لتكمل الصورة الطبيعية في حياة المصريين، ذلك ان دور المعارضة المصرية يتلخص في فتح مضخات تنفيس جماعية ضرورية لتسكين آلام المواطن ورفع الحرج عنه

والشعب طبعا هيهيئ نفسه لاستقبال رئيس الغفلة الجديد ومن غير ما تتعب الحكومة نفسها، والنبى ما انتو قايمين ... احنا فرحانين اوى اوى اوى بسي جمال بيه والست خديجة هانم

والحقيقة ان دى الحقيقة، واللى الجماعة المفكرين والمثقفين مش قادرين يستوعبوه عشان سمموا دماغهم بشوية كتب قروها ففصلوا خالص عن طبيعة الشعب المصري.. اللى هي ايه طبيعة الشعب المصري.. اللي هى "أصلاً إحنا عبيد"

ولا ينفع مع العبد غير ان ملكيته تتنقل من مالك لمالك ويفضل هو يخدم أسياده بعنيه

حد يقدر يفسر تفسير تانى للى بيحصل؟ لما نكون ايام الفراعنة بلد بتحكمها أسر ، تنام أسرة وتقوم أسرة واحنا كشعب مش فى الصورة أصلا. .أو مش فى الأسرة أصلاً.. بردو كانت تحصل انقلابات وحاجات من دى، بس اللي بيقوم بيها بيقلبها أسرة بردو وتبقى البلد بلده والشعب فى جزمته.. عادى خالص

راح الفراعنة وحكمنا يونان ورومان وعرب وأكراد ومماليك وآخر الغُرب الأسرة الألبانى بتاعة محمد علي وبعد هُليلة 52 مسكتها أسرة العسكر ويمكن جمال وأنور كان حظهم وحش ما عمروش فى الدنيا كتير عشان يلحقوا يظبطوها.. أصل ما تجيش تقولي انهم هيختلفوا عن النظام الاسري المصري.. وللا يبقوا مش مصريين بقى

حد يقدر يقول امتى فى تاريخ السبع تلاف سنة ده حصل ان كام واحد يرشحوا نفسهم والشعب يروح ينتخب ويفوز واحد بس يبقى هو خدام الشعب الأول بدرجة رئيس جمهورية وتعدى أربع خمس ست سنين وينتخبوا حد تانى ويطلع هو من غير ما يكون سرق ولا نهب وثروته ما زادتش مليم حرام.. المشكلة ان دا بيحصل عند ناس تانية.. متحقق عند أمم تانية، يبقى الفكرة مش هلامية

انما عندنا ماحصلش.. فى تاريخنا ما حصلش

وحد يقدر يفسر ليه واحد من عامة الشعب -اللى هو مبارك - اللى هو مش ابن ملك ولا ابن خليفة ولا ابن طبقة الكريمة اللى على وش الشعب حتى، انما فلاح ابن فلاحين -اللى هما العبيد الأصليون لمصر - لما هو يتفرعن بعد ما يحكم مصر يبقى ليه؟

أبصم بالعشرة ان عرابي لو كان اخدها كان عمل أسرة، ولا ولدتكم امهاتكم احرارا ولا بتاع باه.. ساعتها كان عرق الفرعنة هينطر عليه والهسهس بتاع الأسر كان هيمسكه

وادينا من حظنا كجيل اتولد فى عهد مبارك.. اننا نشهد على حياة عنينا تكون الأسرة المباركية لنكون لها عبيداً كما اعتدنا ولتسقط كل الشعارات والتوصيفات من نوع مواطن، حر، إنسان.. والأصل أنا عبد وإنت كمان

40 comments:

  1. المصريين كشعب زي النيل طيبين
    وهيفضلوا ماشيين مش هيحودوا لا شمال ولا يمين زي ماالكبير عاوز يوافقوا علي طول
    النيل برده من 7000 سنه لسه بيجري في ارض مصر متفرقش معاه مين هيحكم مين مسك مين مات مين ورث الحكم الحياه ماشيه واهي ماشيه وبتعدي ومفيش فايده
    المصريين من زماااااااااان قوي وهما عايشين بعيد عن الحكم وعمرهم ما فكروا او حلموا مجرد حلم انهم يحاسبوا فرعون من فراعنه مصر علي مدار الزمان
    من7000 لغايه دلوقت
    عمركوا سمعتوا عن فرعون اتنازل عن الحكم قولولي عليه
    ويا فرعون ايش فرعنك .

    ReplyDelete
  2. انا صراحه باستغرب و في حالة عجب فعليه من طباعنا و لا ادري لماذا نحن بالذات دون باقي الامم تاريخنا كانه خالي من الثورات حتي الثورات التي قمنا بها كانت بايعاذ من رجال الدين كما حدث ضد اخناتون او بسبب الفقر الرهيب الذي لم يعد بعده الا الموت
    لماذا تتاخر ثورتنا دائما؟
    مينا موحد القطرين قام بجيشه ليس بناء علي مطلب شعبي و حتي ملك الشمال لم يقاوم الوحده بناء علي مطلب شعبي حارب الطرفان ثم اتحدا دون ان نسمع عن رفض الناس هنا او هناك للوحده التي حاربوا بعضهم للوقوف ضد اتمامها
    احيانا اقول هل هي حكمه للشعب المصري تميزه عن باقي الشعوب ام هي خيبه انفرد بها عن باقي الشعوب
    لا ادري
    تحياتي

    ReplyDelete
  3. العبوديه فى العقل والقلب حتى لو كان الكون كله له ، والحرية فىالعقل والقلب حتى ولو الأغلال تجمعه عنقه ويداه مع اقدامه

    ReplyDelete
  4. كنت بالفعل اتكلم صباح امس مع احد المدونيني المصريين

    على تعجبي الشديد من التركيبة الشخصية للمواطن المصري

    بصراحة حاجة ( تغيظ فعلا )

    تحياتي اختي على مقالك المؤثر

    واتمنى من الله ان نصبح احراراً يوماً ما

    ReplyDelete

  5. بصي أنا عندي مشكلة حقيقي مع التفسير بتاعك السابق اللي بيطابق بشكل ما مع جمال حمدان
    يازينب مصردولة طبيعيه جدا مرت بكل ظروف التطور التاريخي الطبيعي اللي كل الدول مرت بيه
    من أول الصورة البدائية مرورا بالاقطاع والملكية والتوريث الخ
    كان لها فترات قوة وكان لها فترات ضعف
    المشكلة اننا حصلنا زي إرتجاع للخلف احنا وكل الدول المحيطه بينا في الشرق الأوسط
    لو بصيتي حواليكي مش حتلاقي ولا ديمقراطية حقيقية حتى لبنان اللي فيها اسمه طائفيه وحصص لكل مذهب وطائفه ولازم تزكية البطريارك بتاع المذهب او الشيخ "ودا واضح لو شفتي كمية الزيارات اللي بتحصل للمرجعيات الدينيه في بكركي والجنوب الخ"
    كون اننا ليه متابعناش التطور الى الديمقراطية او حصلت عثرة ما ..
    فدا فيه كلام ياما
    يعني ممكن تبصي لحكومات ماقبل الثوره ودستور 23 وثورة 1919 الثورة الشعبية"من الجماهير من غير قيادة عسكرية او إنقلاب عسكري"الوحيدة في التاريخ الحديث
    حق الإنتخاب ,أه كان في بواقي إقطاع بس كان عندك نقابات مستقله وتعدديه كان عندك أحزاب على كل لون وشكل كان عندك ملك بدأ يفقد كل مزاياه الملكية ويتحول لخيال ماّته .
    هل كانت الأزمه في حركة يوليو؟
    أعتقد الأزمه بدأت من 1948 وصولا لإنقلاب يوليو العسكري بغض النظر عن كونه كان فيه مصلحه ضخمه للبشر بس في النهاية كان ديكتاتورية عسكرية سفكت الكثير من الدماء ودخلت المواطن اللي كان عرف معنى الديمقراطية الخ نفق الرعب الأزلي وطلعت عبارات ورا الشمس وأمشي جنب الحيطه وداريني يا حيطه يا حيطة داريني.
    ومع ذلك كان في مظاهرات في البلد وتحركات عماليه إنتهى كثير منها بإعدام رموز حركات عماليه ويسارية جه السادات وحصلت إنتفاضة الطلبه وإعتصاماتهم في سنة 1972 وإنتفاضة الخبز اللي عملها العمال والطلبه سنة 1977
    وإغتيال السادات ..
    الأزمه ان اللي حاكمنا دلؤتي بني خرا غريب جدا عارفه الصهاينة أقل وساخه منه قدر يخلي الشعب حمار يمتطيه وخلى الجزره قدامه وبعيده عنه كل ما يحاول يقرب للجزره يبعدها عنه شغل الناس في لقمة عيش مستحيل وجواز مستحيل خلى الناس تموت ع الهادي.
    ومع ذلك يا زينب عدي كام إعتصام وإضراب عمال حصل
    شوفي الناس اللي راحت إنتخب الإخوان في الإنتخابات اللي فاتت وشوفي الناس اللي إستشهدت في المرحلة التالته عشان ناس زي حمدين صباحي وغيره في كفر الشيخ.
    لا في أمل بس عايز شوية شغل مش عايز طريقة اللي ميتسماش إبراهيم عيسى من قبيل يا شعب ابن وسخه ثور أو موت
    صباحك ثوره يا عم

    ReplyDelete
  6. أغلاق مدونة مصرية من أجل ليبيا والتحقيق مع صاحبت المدونة نرجو نشر الخبر

    http://bahbmasr.blogspot.com/2007/04/blog-post_30.html

    ReplyDelete
  7. ما احنا بقينا في زمن البتاع
    العدل إتظلم والحق ضاع
    والأسرة إتفككت والشباب صاع
    والضمير فسد ولإبليس منصاع
    يارب قدرنا نعمل المستطاع
    دي الدنيا خربت والشر شاع
    أأه يا قلبي

    ReplyDelete
  8. هل نحن شعب أكثر قابلية للعبودية على غرار الشعوب الأكثر قابلية للأستعمار
    لا اعتقد لكن المرور بالكثير من عهود القهر والدكتاتورية يولد نوع من الأنكفاء على الذات والرغبة فى الهروب
    لكن تلك الأرض وبدون كلام كبير لم تعقم بعد والدليل فيضان الشباب الراغب فى التغير والمنفتح على الكثير من الثقافات
    جمال لا يصلح أكثر من موظف فى الحزب الوطنى وكتير عليه كمان
    لأبراهيم عيسى م}خرا مقال جميل أسمه سندوتش مكرونه
    يجزم فيه أن من لا يحس بأوجاع الناس لا يصلح أن يحكمهم

    ReplyDelete
  9. فعلا حضارة السبع تلاف سنة ماشفتش لحظة حرية

    بس زمان كان فيه ديمقراطية اه مش سياسية بس كان فيه
    يعني مثلا لما الناس سابت عبادة امون وبداوا يعبدوا اتون
    كان بمزاجهم ولما كانوا عبيد لملك كان بصفته اله
    بس مبارك مش اله
    ليه بقي سايبينه كده


    هول لازم اتحايل عليكي علشان تعدي
    ماتيجي بقي يا ظيظي

    ReplyDelete
  10. ودين أمى انا خلاص منكوا بقى ومرارتى اتفقعت منكوا كلوا لوكشة واحدة كده

    يعنى الناس الواعية -بروح طنطها-
    نازلين سب ولعن فى خضوع الشعب وخنوع الشعب ومش عارف إيه الشعب والشعب الشعب الشعب وأجدع سلام للشعب وكإنهم مثلا من كوكب تانى
    ما هم جايين من قلب بطن الشعب ولا إحنا دمنا مش بيبقى واحد وقت ما بنعرف لنا كلمتين فى أى حته عن تاريخنا ؟
    علاوة على كده الشعب أساسا بالنسبة لهم كائن خرافى بيتكلموا عنه طول الوقت ولا هم يعرفوا حرف عنه ولا طبيعته الإجتماعية ولا تاريخه ولا أى حاجه عنه

    يعنى حضرتك كلفتى خاطرك وفى لحظة غضب على العائلة المباركية سبيتى للشعب المصرى ألف ملة ودين وأتتى فى التحليلات الإجتماعية عننا مالم تأتى به الأوائلُ

    "حد يقدر يقول امتى فى تاريخ السبع تلاف سنة ده حصل ان كام واحد يرشحوا نفسهم والشعب يروح ينتخب ويفوز واحد بس "
    نفسى أسئلك سؤال بذمتك يا شيخة هى فكرة الديموقراطية الحديثة والإنتخاب والترشيح بقالها قد إيه فى تاريخ الفكر الحديث
    واضح إنك مش عارفة تفرقى بين ماضى أو حاضر وبتقيسى الماضى بمقاييس الحاضر ودى مصيبة فى حد ذاتها

    سيبك من أن كلامك مرفوض جملة وتفصيل
    أنصحك تقرى كتاب فهمى هويدى الجديد "عن خيولنا التى لا تصهل"

    طبعا أنا مش عاجبنى الحال دلوقت برضه جملة وتفصيل من أى جهة لكن أنا فعلا اتفقعت من كل واحد طالع يسب ويلعن فينا بإعتبارنا حمير وأغبيا ومش عارف إيه كده
    ارحمونا يرحمكم الله
    ده حتى فى علم النفس معروف أن كتر الضغط على الإنسان المذنب بيجعله فاسد أكتر منه صالح


    طبعا انا بتأسف لو حسيتى بإساءه فى الكلام ومكنتش عايز أخلى أول تعليق ليا عندك يبقى بالشكل ده
    صباحك ورد
    :)

    ReplyDelete
  11. انا عندى راى يمكن تعارضوا ايه رايكم نوافق بان مبارك يورث الحكم ويبقى الحكم فى عيلته على شرط انه يفكها عننا شويه
    ايه رايكو

    ReplyDelete
  12. مالك
    انا مش مختلفة مع تعليقك نهائي، وبالنسبة لى التدوينة مكنتش شتيمة فى المصريين اللى انا واحدة منهم انما زى ما تقول كده زهق وقرف وطهقان واحساس قاتل بالعجز، خلانى اقعد افكر فاكتشفت حكاية اننا عمليا ما مارسناش ديمقراطية حقيقى، حتى ما قبل الثورة اللى بتقول عليها دى، ماكنتش على الراس الكبيرة، اقصد اقصاها كانت انتخابات برلمانية،ومع ذلك انا معاك انها كانت افضل حالا
    انما انا حسيت فى لحظة اننا كمصريين ماعشناش عمليا حياة ديمقراطية وانتخابية على مستوى رئيس الجمهورية زى اللى بتعيشها فرنسا مثلا دلوقتى، اهو شيراك "خارج" منها وكل مليم هو يملكه "معلن" واصغر رجل اعمال حرامي عندنا اغنى منه
    واحنا ماحدش بيسبها الا بموته، ودلوقتى بنتفرج على التوريث واحنا ساكتين، يمكن انت مش ساكت ويمكن بتحاول تعمل حاجة، بس انا بشتكى من نفسى انا، انا اللى مش عارفة ومتضايقة ومش عايزة افضل كده

    ---

    وجع دماغ
    ابراهيم عيسى بيحس باوجاع الناس.. ضحكتنى
    ضحكتنى اوى

    ----

    السهرودى
    بس بالراحة علينا شوية، داخل شمال كده ليه
    انا بفضفض مع نفسى، مخنوقة حبتين ودماغى حودت ع الفكرة دى ضايقتنى اكتر.. يبقى قوام تخلينى زى اللى بيلعن ويسب فى خضوع الشعب وبتاع، انا بس اتفاجأت اننا عمرنا ما كان عندنا انتخابات بجد وان كل واحد يمسك البلد يعتبرها بيت ابوه اللى ورثهوله، انا مش هعيد وازيد فى التدوينة بس انا عايزة ابدا من النقطة دى، من شوية حقايق بنعيشها كمصريين، اننا عمليا مش بيبقى فارق معانا مين اللى ماسك الحكم، مع ان دا اللى بيفرق فى حياتنا كلها
    وكمان اللى انت بتسميه غضب من العائلة المباركية هو مثلا غضب شخصي!، ولا بينى وبينهم تار، الغضب ده هو غضبك وهو غضب الناس بردو.. بس الغضب فى مصر مش هو اللى بيحرك بردو.. للأسف

    اما فكرة الديمقراطية بقالها قد ايه فى الفكر الحديث..فكون ان فى امم قدرت تمارس الحكاية دى فى عصرها الحديث وتتحول من اشكال الحكم القديمة للحديثة، فدا ادعى اننا نقول ان عندنا مصيبة ،احنا حتى ماقدرناش كمسلمين نطبق مبدا الشورى فى تولية الحاكم، وظلت الخلافة بالتوريث هى اللى بتحكمنا، ولا اثر فينا الدين نفسه


    بس انا معاك فى نقطة
    نفسى أسئلك سؤال بذمتك يا شيخة هى فكرة الديموقراطية الحديثة والإنتخاب والترشيح بقالها قد إيه فى تاريخ الفكر الحديث
    واضح إنك مش عارفة تفرقى بين ماضى أو حاضر وبتقيسى الماضى بمقاييس الحاضر ودى مصيبة فى حد ذاتها

    نفسى أسئلك سؤال بذمتك يا شيخة هى فكرة الديموقراطية الحديثة والإنتخاب والترشيح بقالها قد إيه فى تاريخ الفكر الحديث
    واضح إنك مش عارفة تفرقى بين ماضى أو حاضر وبتقيسى الماضى بمقاييس الحاضر ودى مصيبة فى حد ذاتها

    انا غلطانة هنا، عديها دى :(

    بس انا بردو ماشتمش فى الشعب ولا اعتبرت اننا حمير ولا اغبيا، ما تقولش على لسانى كلام ماقولتش، وماطحتنيش فى زمرة الناس اللى بيترفعوا عن الشعب ويخلصوا ضميرهم باتهام الشعب وخلاص.. فى فرق بين اللى بيشتم الشعب واللى بيدور على العيوب عشان يصلحها، حتى لو فوجىء ان العيوب دى عيوب عمرها من عمر النيل

    عموما صباحك فل :)

    ---
    واحد مجهول
    يا سلام!!!!

    ReplyDelete
  13. أنا بتأسف تانى يا ستى والله
    أنا قريت كلامى تانى وحسيت إنى غلطت فى كلام كتير قولته
    فأرجو أن تقبلى اسفى

    التجربة الديموقراطية أساسا موجودة من قبل زمااان لأن الديموقراطية فى الأصل كلمة يونانية -مش فاكر بالظبط-
    وظهرت على لسان أرسطو على ما أظن
    بالإضافة إلى تجربة مجلس الشيوخ فى الإمبراطورية الرومانية كشكل من أشكال الديموقراطية
    وأنا بأرد على نفسى هنا
    لكن برضه الديموقراطية ماكانش ليها معنى فى عصور كتيرة بعد كده -وحتى كمان قبلها- حتى فى أوروبا وفى قلب الدولة الرومانية ذاتها ولحد بعد عصر النهضة
    لدرجة إن الليبراليين الأوائل كانوا بيسثتنوا فكرة الديموقراطية من الفلسفة الليبرالية
    يعنى إحنا كعرب وكمصريين موقعناش من قعر القفة ولا حاجة
    إحنا محتاجين وقت ومساحة بس عشان نقدر نتغير للطريق الصحيح

    المشكلة كلها إن أنا فعلا بقى عندى أرتيكاريا من الناس اللى ذكرتهم لك بس عموما أنا حجزت عند دكتور نفساوى عشان أحل المشكلة دى
    :)

    ReplyDelete
  14. هو اية علاقة زواج جمال مبارك بقضية التوريث اصلا؟
    يعني لية الكل بيلمح ان الزواج دة خطوة الى التوريث؟ اية علاقة دة بدة؟
    يعني لو متجوزش مش هيورث العرش مثلا؟ لان الدستور مقلش ان الرئيس لازم يكون متزوج
    فاية الحكاية؟

    ReplyDelete
  15. ساعات بحس ان احنا لازم يحكمنا ديكتاتور
    مينفعش او بمعنى اصح مش لايق علينا المعاملة الأدمية

    ReplyDelete
  16. السلام عليكم

    مصرية

    على فكرة انا شايفة إن كلامك ده صح

    احنا شعب مسااااااااالم إلى اقصى حد

    ايام المدرسة
    المدرس بتاعنا كان دايما يقولنا ان احنا شعب مسالم و مابنحبش الثورات
    و الثورة الوحيدة اللي حصلت في تاريخ مصر الحديث هي ثورة عرابي
    و حتى ماعرفتش تحقق اهدافها كاملة
    إنما ثورة سعد زغلول دي كانت مظارهة بس كبرت منهم شوية : )

    كل ما افتكر كلامه ده احس إن كان عنده حق

    يعني ناقص إيه عشان الناس تتحرك
    لا اكل و لا شرب و لا تعليم و لا صحة

    لا و الادهى
    و لا حتى كرامة !!!
    ولادنا بيتاهنوا و يتبهدلوا و يتعذبوا كل يوم

    و كل واحد عايز يعيش جنب الحيط و يأكل عياله و ياخد باله منهم و خلاص


    واضح يا مصرية إن الشوية الاغراب دول اللي بيطلعوا مظاهرات و عايزين حرية و عدل و الكلام ده لو دورنا في اصول خرائطهم الوراثية حنلاقي أصلهم مش مصري
    : D
    إنما لو مصري صحيح و المجاري روياه و الدودة جواه
    لا ممكن يعمل كدة ابدا!!!

    ReplyDelete
  17. البيان المصرى
    http://albayanalmasry.com/
    على فكرة دة موقع أتمنى أنكم تشركونى فية وبالنسبة لموضوعك والمصريين والخضوع وكدة رأى إن أحنا منحملش عموم الناس بما لا يطيقون لأن علشان الناس تقدر تعمل حاجة لازم يكون فى قائد يمشوا وراة يجمعهم ويعرفوا يحديدوا الهدف ويسعوا لتحقيقوا ودة موجود فى الدول كلها وبيتمثل فى وجود حزب منافس يعنى بيكون فية حزبين داخل الدولة على نفس القوة ودة على الأقل فالشعب بيقدر يختار وبيجد فى الحزب القائد اليوجهة وطبعا" عندنا مفيش كدة وبالتالى الناس مش هتتفق على القهوة مثلا ويطلعوا يعترضوا ودة بالأضافة طبعا" لحالة القمع والجهل والحاجات الكلنا نعرفها لكن الموجود من تعليقات وأختلاف بيمثل حالة الديمقراطية فى التعبير والنتمنى أنها تكون موجودة فى الواقع مع رجاء الحفاظ على أدب الحوار وأتمنى لكم التوفيق موقع البيان المصرى البيستفيد كتير منكم ومن بنت مصرية بالأخص http://albayanalmasry.com/ وشكرا"

    ReplyDelete
  18. و ده بيأكد رأيي

    مفيش فرق مين اللى يحكم المهم يحكم ازاى

    عارفه لعبع استخرج الفرق

    ايه الفرق بين مصر ماقبل الثورة و ما بعد الثورة؟؟؟؟

    ReplyDelete
  19. المصريين شعب جوهرة ومتحضر والله بس اترمى علينا تراب وقيح من تراكم زبالة هذا النظام فوق أرواحنا
    الفقر الذى يجيدون انتاجه من خلال الانهيار الاقتصادى وتضييق الارزاق على الناس وتدمير صحتهم والاتجار بحياتهم والتشديد على معاشهم والتعليم الفارغ من مضمون حقيقى يحيى العقول أدى لهزال عقلى والسطحية والتدين الطقوسى الساذج المنعزل عن قيم حقه دعموا كل ذلك وانتجوه بل إننى أزعم أن عصر مبارك قد شهد تطهيرا عرقيا لجنس المصريين من خلال هذه الادوات الخبيثة
    كل هذا كان من نتاجه أن ران على القلوب شئ من عنف وسطحية وضيق أفق وتطرف وحساسية تافهة ولا تسامح وأشياء كثيرة استجدت على المصريين ونرى الكبار يقولون مابال الناس ايه اللى حصل ليه كده ماكانش على ايامنا كده
    هذا نتاج لعملية افقار متعمد للجيب والعقل والروح والبدن فى مصر مفمتحملوش الناس اكتر من طاقتها وراهنو على الجوهر النضيف
    اقعدوا على قهوة بلدى ولا اركبو جنب واحد عادى فى المترو ولا كلموا اصحابكم فى الشغل
    هو احنا كده
    زبالة وعبيد ومالناش لازمة
    طب الزبالة تعرف ازاى انها زبالة
    وهو العبيد سعداء بعبوديتهم لو فعلا كنا عبيد
    فيه حاجة غلط فى التحليل ده
    المصريين وباكررها جوهرة بس رمى مبارك واللى قبله عليها تراب فضاع لمعانها ومحدش قادر يشوف قيمتها
    دليلى من التاريخ
    دليلى اللى عمله محمد على باشا بالمصريين
    دليلى الفراعنة
    دليلى الازهر والجامعة والمقاومة الشعبية وملاحم الفلاحين والفن الاصيل اللى متلاقيش بلد حوالينا عارفه تنتج زيه
    احنا قدرنا كده نجرى ورا روحنا اللى تايهة وننفض عن ها التراب ونلمعها
    خلونا كجيل جديد نشوف نعمل ده ازاى ونسعى وراه ونحارب عشان نحصل عليه
    محدش خد حريته منحه ومحدش حصل على حقوقه هبة من المستغل اللى واكلها
    فيه اشياء اسمها التضامن والعملالجماعى والنقد والاحتشاد وتحريك الراى العام وميت الف حاجة الجيل الجديد ممكن يستخدمها
    بطريقتة ووفقا لروحه ومزاجه بعيد عن الاحجيال السابقة الى لازم مع احترامى ليهم نعمل معاهم قطيعة فعلا ونبعد عن كل اللى قدموه ممكن بس نستفيد من ما حدث لهم لكن محتاجين تجديد شامل فى الافكار والحركة

    ReplyDelete
  20. أنا لسة ما قريتش الموضوع .. بس قريت تويتر .. الف الف مبروك لرشا ام يوسف .. بس ما تقوليش تاني فلانة جابت كذا .. قولي فلانة ربنا عطاها "رزقها" ب كذا .. عقبالك يا حبي يا رب .. و الي اللقاء ف التعليق علي البوست لما اقراه علي رواقة !!
    :)

    ReplyDelete
  21. بصي يا زيزي .. انا مش هقولك الحكاية و الروايه .. و العبيد و الاسياد و التاريخ الحديث و القديم و الحوارات دي .. كل اللي اعرفه اني انا مش أمة ولا عبدة الا لله وحده .. و عمري ما هقبل اني احس مجرد الاحساس ده .. و ان شاء الله هربي عيالي علي كده .. اللي عليا بعمله .. انتخابات و بروحها .. حقوقي السياسيه باخدها بما يرضي الله و لو حد اعترضني ف يوم مش هسكت .. و صدقيني لو كل واحد عمل زيي كده قصة الاسياد هتنتهي بمنتهي البساطه اللي بدات فيها .. بس لان دايما احنا بنلعب لعبة ودنك منين يا جحا فعمرنا ما هنقدر نوصل .. طول ما السلبيه "اللي هي الديفولت بتاع الشعب" موقف سياسي عند البعض .. هيفضل ابوك عند اخوك و هيستمر السعي ف الحلقة المفرغه .. بس كده .. علي فكرة .. ابقي اقري رواية "عبث الاقدار" بتاعة نجيب محفوظ هتشوفي الطُرفة !!
    :)

    ReplyDelete
  22. كتير فعلا بحس ان
    احنا اصلا عبيد

    ReplyDelete
  23. نعم

    اوافقك

    نحن فعلاً

    عبيــــــــــــــــــد

    -------------

    لأن كل من يرى حال مصر أصبح هكذا وهو ساكت لا يتكلم

    فهو عبد ذليل لؤلاء الكلاب

    ReplyDelete
  24. شوفى يا سيدتى
    اولا يا ريت تتقبلى كلامى بصدر رحب
    أنا عايز اقولك حاجتين
    اولا طريقة تجريحك فى مبارك اللى هو رمز الامه بصر النظر هو على غلط ولا صح مرفوضة
    يعنى انا اتبنى وجه نظر العداء الشريف
    فملهاش لازمة الكلام بإسلوب الفلاح ابن الفلاح وحتى لو هو كذلك فهذا لا يعيبه مطلقا
    ولكنك أدرجتيها بإسلوب الإهان والحر لا يقبل على رمز أمته بين الأمم الإهانة مهما إختلفت وجهات النظر
    ولا أقبل مطلقا ان تعيبى فى رموز شرفاء كأحمد عرابى الذى أفنى نفسه لنعيش بكرامه فلا يستحق منك هذه الكلمات
    ولك انت تعلمى ان حكمك على الأسخاص أو رأيك فى أفعال الأفراد قد أصبح ضعيف المصداقية إن لم يكن مردودا عليك بعد تعميمك بالفساد على كل الأفراد بما فيهم من لا يختلف إثنين على شرفه وولائه

    ثانيا
    لو حق فعلا ما قلت أننا نحن المصريين كذلك فمعنىاه أنى وأنك وكل من هو على المدونات متظلما من الحكومة كان ليفعل مثل أفعالهم التى تنكرون
    فإذا كنت ستفعلين مثل فعلهم لو كنت فى مكانهم لما تنكرون عليهم ذلك
    قال الله تعالى لبنى إسرائيل
    أتأمرون الناس بالبر وتنسون أنفسكم وأنت تتلون الكتاب أفلا تعقلون

    سلام

    ReplyDelete
  25. في جمله في فيلم عمارة يعقوبيان قالها كمال الفولي (الراجل الكبير الي في الحزب) للحاج عزام
    قال ايه بقا

    احنا دارسيين نفسية الشعب المصري
    الشعب المصري كله ماسك في ديل الحكومه كأنها امه الي خلفته
    حتى لو الحكومه ماشيه على حل شعرها

    الظاهر ان ليه حق

    http://1minelnas.blogspot.com

    ReplyDelete
  26. المواطن المصري يمكن تلخيصه في كلمتين : يخاف ما يختشيش

    ReplyDelete
  27. مرة أخرى تفجرت أزمة الأجور داخل صحيفة الدستور التي أصبحت جريدة يومية ، فقد فوجئت الغالبية العظمي من الصحفيين بالدستور بخصومات هائلة ورواتب متدنية للغاية ، وأن الشريحة العليا من المحررين لم يزيد مرتبها عن 500 جنيه شهريًا ، أما بقية المحررين وهم الغالبية فقد تراوحت أجورهم بين 100 إلى 400 جنيه ، واستقرت معظم أجور المحررين في حدود 200 إلى 300 جنيه ، وهو ما يعني أن الخبر أو التقرير أو الموضوع الصحفي الواحد لم يتخط مقابله عشرة جنيهات وأحيانًا أقل ، وذلك بالإضافة إلى بعض الصحفيين والكتاب الذين لم يتسلموا أي مرتبات إطلاقًا ، ولم يحاسب الصحفيون على مقالاتهم في الأعداد الأسبوعية ، علما بأن الأرقام الآنفة الذكر كان أغلب الصحفيين يحصلون عليها وعلى أفضل منها قبل أن تتحول الدستور إلى جريدة يومية .
    وقد أعلن صحفيو الدستور اليومي احتجاجهم وامتنع معظمهم عن استلام أجورهم منذ 3 أيام ، وطالبوا بتحسين الأجور ووضع حد أدنى للمرتبات بالجريدة ، وتجاهلتهم الإدارة في البداية ثم حاولت احتواء الموقف بعد ذلك من خلال وعد بزيادة الأجور بمبلغ 100 جنيه شهريًا فقط لا غير !، أما المصورون الصحفيون ورسامو الصفحات بالجريدة فقد اكتشفوا أن المصروف لهم لا يزيد عن نصف اجورهم المتفق عليها ، وهو ما أثار غضبهم خاصة أنهم والمحررين بالجريدة يدفعون مبالغ كبيرة للبوفيه ثمن مشروباتهم لأن إدارة الجريدة قامت بتأجير البوفيه مقابل إيجار شهري مما رفع من سعر المشروبات حيث يدفع الصحفيون أسعارا مماثلة لأسعار المشروبات في المقاهي العادية ، وهو ما يزيد من سخطهم حيث يعملون في ظروف شديدة الصعوبة ، ولم تقم الجريدة حتى الآن بتركيب أجهزة تكييف أو حتى مراوح للصحفيين في المكاتب مما يضعهم في معاناة شديدة مع اقتراب الصيف .
    يذكر أن الزيادات في الأجور اقتصرت على مجموعة ضيقة جدًا من الصحفيين في إدارة تحرير الجريدة وهم الذين زادت أجورهم بعد التحول إلى اليومي زيادات كبيرة تقدر بآلاف الجنيهات ومنهم المدير الفني للجريدة وطبعًا رئيس التحرير، وقد أعلن ابراهيم عيسى الذي يمتلك أسهما في جريدتي الدستور وصوت الأمة عن انزعاجه من الصحفيين الذين لم يتسلموا أجورهم خاصة وأن منهم رؤساء أقسام بالجريدة ، وتأتي تلك المشكلة على الرغم من المبيعات الجيدة التي يحققها الدستور اليومي .
    يذكر أن جريدة المصري اليوم المنافسة للدستور كانت قد أعلنت عن زيادة مرتبات محرريها قبل اصدار الدستور اليومي بأسابيع قليلة ، ووضعت حدًا أدنى لأجور المحررين 700 جنيه .

    ReplyDelete
  28. ليه احنا بنتكلم عن التوريث كانه وقع او احنا خلاص ارتضناه. ياناس توقفوا..هم عايزنا نتكلم فيه حتى نتقبله حته حته ذى الدواء المر. هم عيزنا نتعايش مع هذا الامر. المفروض اولا ان نكون اقوياء ونسال ماهو الوضع الدستوري للسيد جمال. ماهى صفته ليامر الوزراء والمحافظين ويجلس مع روساء دول. علينا ان نكون اكثر ثقه في ان انفسنا ونعلن راينا بكل قوة اننا ضد السيد جمال.. دوره الان او قادما. السيد جمال محسوب علي السيد مبارك الاب. ومن المستحيل ان يكون السيد جمال مختلفا جزئيا او كليا عن الاب. المشكله ان البلد فيها طفيليون وفاسدون كل همهم مصالحهم ومن مصلحتهم استمرار الاوضاع وان تكون مصر مبارك دائما!!!.

    ReplyDelete
  29. sorry Ya bent Masria;
    I don't agree ... the pharos were every just and we have the example of el Falah el fasih ... and his quest for his right ... and you gave examples of invasions that as Egyptian resisted and paid in blood to get our freedom. And another example of the lady that asked amr abn el katab for her house back … and got it … so I am guessing something happened to our gene poll and we lost defend your right gene … so our rights died ….

    ReplyDelete
  30. سودتيها بجد يا بنت يا مصريه
    حب التملك ده في اي حد يقعد علي كرسي من القطب الشمالي للجنوبي
    ممكن سلبيه الشعب بتشجعهم يعملوها وسيه
    بس صدقيني السلبيه دي بدات تختفي شويه بشويه ويظهر مكانها تفكير عاقل
    الشعب مش لاقي شخصيه قياديه في النور
    والايام الصعبه دي هتطلعها
    تحياتي وخلي عندك امل

    ReplyDelete
  31. This is a very nice post.. First, because of the astonishing continuity of the reality that is very much supressive.. Second because I keep wondering, wouldn't Mubarak's alternative be a thief, liar, careless, a**hole too?

    ReplyDelete
  32. يا ستي ما تزعليش نفسك أوي كدا ربنا أكبر من الجميع وقادر ياخدهم كلهم أمين

    ReplyDelete
  33. بنت مصرية
    تحياتى
    موضوع جامد
    بالمناسبة
    عارفة فستان الفرح بتاع ماما خديجة
    " على إعتبار ما سيكون "
    بكام ؟؟؟؟
    بحوالى 180.000 جنيه مصرى لا غير
    يعنى خمس شقق ماشيين ع الأرض
    العملية خلاص جابت جااااز

    ReplyDelete
  34. في دول عربية ، مش بأقول في فرنسا ، لرئيس الجمهورية مدة محددة ..

    السبب -ببساطة- إن الرئيس دة جاي من حزب ،والحزب له برنامج وله استراتيجية ، والراجل -غالباً رئيس الحزب -له هو الآخر مدة ، تخلص ييجي غيره .. يسير على نفس النهج والمنوال مع شوية تغييرات تكتيكية حسب الظروف السائدة..

    عندنا فيه ناس من اللي بينادوا بالديمقراطية والبتاع السياسي وتسألهم عن المادة 77 اللي لغت مدتين رئيس الجمهورية تلاقيهم احمروا واصفروا واخضروا وسمعوك بقين من بتوع شخصيات الكفار في المسلسلات التاريخية!

    كإن الفكر اللي ماشي بيه الرئيس قاصر عليه وحده ، وما حدش يعرفه ولا يقدر ينفذه إلا أهل بيته!

    ما دام ذلك كذلك ، ليه اتعملت الأحزاب أصلاً في بلادنا؟ وهل بالطريقة دي حتبقى انتخابات الرئاسة اختيار للعائلة المالكة اللي حتحكم مصر جيل ولا اتنين (في حالة لو الحاكم اتنازل وما عرفش يكون أسرة)؟

    ReplyDelete
  35. و انت كمان لو مسكتيها هتعملى اسرة حاكمة جديدة
    ما هو اصاه فى دمنا كلنا

    ReplyDelete
  36. لا يا بنت مصرية احنا مش عبيد والله احنا ساددددددة ورجال ومشايخ عرببب بس على بعض الرجل سيد على الست اللى متزوجها بيذل فيها فى البيت وسيد على ابناءه والمدير سيد على الموظفين لكن اننا نعمل اسياد فى الشارع مرة واحدة ونقف ونقول لا هو ده العبودية الحقيقية http://ensanyoufakre.blogspot.com/
    دى المدونة بتاعتى وعايز اتواصل مع عالم التدوين لانى لسة سنة اولى تدوين ممكن تساعدينى علشان اتواصل مع عالم التدوين؟ ولا هتبخلى علينا ؟

    ReplyDelete
  37. معاق مصر بصراحه انا مش عارف انتي متحامله علي مصر وشعب مصر ليه وبتقولي انهم عبيد طول عمرهم ومفيش اي حاجه عاجباكي من قبل الثورة ومن بعد الثوره .... ورغم كده فانتي لم توضحي ماذا تريدين او ماذا نريد نحن ... ولكن والله يجب اخراج الشعب من صراعكم ومن حلبة مبارياتكم فالشعب لايريد سوي الحياه في بساطه وسلاسه ولكن دائما نحن نتحامل علي اشياء لاننا غير راضين عنها ولن نرضي عنها مهما حدث ....فيجب علينا ان نواجه انفسنا حتي نصل للطريق الصحيح وصدقيني اذا واجهنا انفسنا فسنشعر كم نحن مشوهين من داخلنا فيجب ان نعالج انفسنا اولا ثم نعالج مجتمعنا .... طبعا بالتاكيد ان كلماتي لن تاتي علي هواكي ... فا اعذريني ولنا لقاء

    تمنياتي بالخير
    http://magdawai.blogspot.com/

    ReplyDelete
  38. الموضووووووووووووووووع شدييييييييييييد

    ReplyDelete
  39. المدونة جميلة ومتنوعة
    انا بصددانشاء مدونة واستعنت بما كتبته في انشاء مدونة في بلوجر ولدي سؤال ربما استطعت مساعدتي
    حاولت ان اضع في السيد بار روابط فيديو اخترتها من جوجل ولن تطهر اربعة فيديوهات وما اريده منها هو واحد كيغف ازيل ما تبى ام لديك اقتراحات اخرى
    نادين من فلسطين
    واسم المدونة
    naden-homomarbia.blogspot.com
    مع خالص شكري

    ReplyDelete
  40. بالتوفيق وربنا يحفظك
    www.new7ob.com
    www.new7ob.com/vb

    ReplyDelete