7/07/2007

مصر فيها جاسوس

يا ترى لو اكتشفت جاسوس.. تبلغ عنه؟
بما اننا بنسمع كل فترة والتانية عن مصريين جواسيس لصالح المدعوقة اسرائيل، وبقى الموضوع مش مجرد حكايات قديمة من الستينات والسبعينات بتحكي عن بطل زى رأفت او جمعة، لا دى بقت مانشيتات عريضة ومحاكم وللأسف ابطالها خونة وعملاء وجواسيس، سواء بالصدفة او عن عمد، سواء اتضغط عليهم او راحوا برجليهم

طيب بما ان فى جواسيس بأه، افرض اكتشفت واحد، هتعمل ايه.. وفكر كويس فى الاجابة، انا مش بسألك عن الاجابة النموذجية، مش بقولك ايه اللى المفروض يتعمل، انا بسأل، انت متخيل نفسك هتتصرف ازاى فى الموقف ده؟

هو دا السؤال اللى كان شاغل دماغي اليومين دول - بجانب طبعا استعدادات العائلة لفرح حمادة ابن خالتي - ، الاجابة النموذجية بتقول ان سيادتك هتروح تبلغ عن فلان اللى انت شاكك انه جاسوس، او اللى انت متأكد بالادلة والبراهين وبما لا يدع مجالا للشك لديك ان فلان دا جاسوس، جاسوس بيبع عرض بلدك من اجل حفنة يوروهات.

طيب هو ايه اللى يخليه يعمل كده اصلا؟ ايه اللى يخليه يخون؟

لأ لأ لأ، استنى، انا حاسة بشىء من السخرية المكتومة ، كأنك عايز تقول ايه فى بلدنا يخلي الواحد ما يكفرش وما يخونش... لا لا مش هو دا الكلام
الاصل اننا مش بنتاجر مع الوطن، مش لما يدينا نديلة ولما ياخد مننا نضربه على دماغه، الاصل اننا بدل ما نخون، نصلح، او نسلم امرنا لله ونمشي بالستر كأضعف الايمان، انما الخيانة، لا اسمحلي.. الخيانة قطم وسط، ووجع فى النخاع

هو ايه اصلا اللى يخلي الواحد يخون؟ اكيد فى تركيبة معينة ، صفات انسانية ما بتخلي واحد عن التاني ليه قابلية الخيانة.. زائد ظروف وشوية ضغوطات، والطبخة تتظبط.. طيب ما احنا محتاجين نعرف معلومات كويسة فى الموضوع ده، عشان نقدر نكشف لو فى حد خاين حوالينا، لو فى جاسوس ماشي جمبك، عايش جمبك، يعرفك وبيصبح عليك كل يوم، بينك وبينه شغل او نسب، او حتى من اهلك.

انا دورت ع النت ولقيت حاجة بتتكلم عن المخابرات بشكل عام وعن صفات الجاسوس تحديدا حاجات منها: الذكاء و حسن البديهة والشجاعة واللباقة و حسن التصرف والنشاط والجرأة وقوة الذاكرة ويعرف كيف يعامل الناس، وكيف تناقش الآراء و صبور وهادئ الطبع وموفور الصحة وأن يفهم نقاط الضعف، وان يعرف كيف يوجد في غيره روح التعاون، وان يكون قادراً على تنظيم وإدارة وقيادة الآخرين وان يكون راغباً في احتمال المسؤولية وان تتوافر له القدرة على ملاحظة كل شيء، وعلى دقة تذكر التفاصيل، وان يكون قادراً على إعداد التقارير بمهارة ودقة و ان يكون قادراً على الخداع، والتضليل.

بس الصفات دى هى الصفات اللى تؤهله للقيام بالدور والاستمرار فيه مش الصفات اللى هى السبب فى تحوله لدور الجاسوس.. بس مايضرش ابدا، الصفات دى ممكن تخليك تفصل بين واحد جاسوس وواحد مش كده، يعنى تخيل واحد عنده كل الصفات دى .. يالهوى دا نشك فيه اول واحد
ياريت يا جماعة لو حد يعرف عن الخلفية النفسية للجواسيس مثلا يقولنا،

طيب ولو فعلا اتأكدت؟ او حتى فضل الشك جواك، وعمال تجمع فى قرائن، وشواهد لا ترقى لمرتبة ادلة قاطعة.. هتعمل ايه ؟ هتروح تبلغ؟ ويمكن يكون هو حد قريب منك او يهمك او يصدمك انه يكون جاسوس وساعتها مش هتبقى عارف تعمل ايه.. تنصحه يروح وللا احتمال لما يعرف يقتلوك، فتفكر انك تبلغ على طول، او انك تحط لسانك فى بقك وتسكت خالص، وتسيب الايام تكشفه... ها؟

انما لو سألتنى عن رأيي، هاقولك: تبلغ.. طبعا تبلغ
مش عشان انا بحب الاجابات النموذجية، بالعكس انا افضل التعبير الحر :) ، انما دا اللى انا متأكدة انى هعمله لو اكتشفت جاسوس.. اصل حرام عليا، دي مسئولية وربنا مش هيرضى ابدا انى اشارك فى الجريمة بالسكوت

17 comments:

  1. امسك جاسووووس
    المهم انا هنا في المحروسة لو رحتي تبلغي عن اي حاجة
    90% انك هتروحي في الرجلين و الظابط النبطشي عشان ياخد ترقية هيقول مسكت جاسوسين بدل واحدة
    و طبعا التاني ده البني آدم اللي هيتجرأ و يبلغ
    او يكون الجاسوس ده من الروس الكبيرة في البلد
    و ساعتها ليلتك مش هتفوت
    :)

    ReplyDelete
  2. هابلغ عنه بس بشرط إنى أكتشفه بمعنى إن أكون متأكد وعندى دليل دامغ

    لأنه بيتساوى عندى السكوت على مجرم مع إتهام برىء

    يعنى لو إنه فى قانون وعدل ومافيش تعذيب ممكن أبلغ عنه بناءً على شكوك فقط وليس دليل دامغ

    اللهم أعفو عنا وعافنا من كل هذا

    ReplyDelete
  3. لكي يكون السؤال أكثر إثارة وأعمق إشكالية، أقترح أن تضيفي إليه فرضاً آخر، ماذا لو تجمعت لديك هذه الأدلة القاطعة، وكان الجاسوس صديق قريب لك، أو قريب، أو، والعياذ بالله، أخ أو أب
    ماذا تفعل؟
    والسؤال لك أيضاً يا زينب
    :)

    أما سيكولوجية الخيانة، فهي في رأيي ترجع أساسا لسمة شخصية واحدة، وهي القدرة النفسية على الكذب. دائماً ما يقابلني الكذب على طريق الرذائل حين أفكر في أصلها
    والكذب درجات
    فالخائن لزوجته أو الخائنة لزوجها
    لابد حتما وأن يكونوا قادرين نفسياً على الكذب
    لأن الخيانة في صميمها عبارة عن كذب متواصل مستمر
    وكأن الخائن لا يكتفي بالكذب في كلمة عابرة أو فعل له وقته، ولكنه يتخذ الكذب رفيقاً دائماً لا غنى عنه من أجل تحقيق شهواته
    وكل من يستطيع أن يفتري الكذب، عنده حتة خيانة
    وأنتي ولا شك تعرفين حديث الرسول المشهور عن الرذائل التي من الممكن أن يقع فيها المؤمن والتي قد تصل للسرقة والزنا
    لكن الإيمان لا يجتمع مع الكذب

    يعني إجابتي باختصار
    سيكولوجية الخيانة تتحدد حسب مدى قدرة الانسان النفسية على الكذب من حيث الكم والمدة الزمنية
    فالكذب حمل ثقيل لا تستطيع كل النفوس أن تحمله وتمشي به بين الناس

    ReplyDelete
  4. بتفق مع علاء فى موضوع الأخدان فلا الرجلين ده....وده من اسباب سلبية شعبنا المحروس اذا طلع منه جاسوس
    او اذا لقى حرامى بيخاف من الجمع المبهم وعدم التفريق بين المبلغ والجانى
    المهم...بالنسبة للجاسوسية عموما فموضوع الذكاء وسرعة البديهة والكلام ده كله تمام مطلوب بس ساعات متلاقيش كل ده فى شخص ويتحول جاسوس برضه....يعنى واحد فى مكان معين موقعه حيديلوا فرصة انه يكون عنده معلومات تهم الدولة الصديقة اللى عايزة تجسس وكده بس برضه منكرش ضرورة حبه نباهة والا حيوديهم فى داهية
    دوافع واسباب الجاسوس مبتختلفش كتير عن الحرامى بل بالعكس فيه بيعتبروها اقل وطأة..ازاى؟؟؟
    يعنى الحرامى اللى رايح يسرق بيفكر فى اخلاق ولا مبادىء ماهو رايح يخرب بيت عيلة وممكن يقتل حد فيهم كمان وارد...بس بعد مايتقبض عليه ويجيبوه فى التلفزيون ويغطى وشه ممكن تلاقيه بيعيط ويقولك عااا انا حسيت بغلطتى وان شردت اسرة..الخ الخ...والله ساعات ممكن يكون ضميرهم صحى وفى ساعات بيعمل كده عشان يخففوا الحكم..سذاجه
    طب نيجى للجاسوس...الجاسوس بقى حيقولك ايه انا ولا رايح اسرق بيت ولا اشرد عيال ولا الحوارات دى نا رايح ادى معلومت عن البلد والحكومة...طب مانتا بتأذي بلد بحالها يا كابتن؟؟؟ يقولك لا انا مبأذيش الشعب انا بدى معلومات عن الحكومة والنظام اللى هما ******* وكده كده مطلعين عين الشعب فيستاهلوا...وبعدين مفيش حرب طول ماحنا مطاطين البصلة وبنسمع الكلام...فانا ياعم شغال بدى معلومات عن ناس زبالة لناس ازبل...ملحوظة هنا فكره قاصر انه افعاله تأثيرها على الحكومة والنظام بس....وبعدين يقولك ماريس كان مع ريسهم ومسلمين على بعض وزى العسل هما صحاب بس التانيين بيبعتوا جواسيس كده بيهزروا مع بعض...وبعدين انا باخد فلوس على كده ومتظبط..
    تصدقى انا اقتنعت بفكرة الجاسوس دى.. D:

    ReplyDelete
  5. صح
    معاكي حق جداااا

    ReplyDelete
  6. اعتقد انه لازم يكون عنده شجاعة مفرطة .. ويأس واحباط شديدين جدا .. يعني لازم يحس انه خلاص معندوش حاجة يخاف عليها ..
    مسألة الانتماء دي مش قصة كبيرة افتكر 80% على الاقل من المصريين احساسهم بالانتماء ضعيف قوي ..
    في الغالب مش بيقولوه في الأول انه هيشتغل جاسوس .. يعني بينضحك عليهم على الاقل في الأول بكلام من عينة احنا شركة اجنبية وعايزينك تجيب لنا اخبار السوق المصري عشان المنافسة .. وساعتها اي حد هيعمل كده لاننا اصلا ماعندناش اقتصاد وطني ولا احنا خايفين عليه .. والموضوع بيبقى تجارة مش اكتر ..

    مش عارفة لو عرفت جاسوس هعمل ايه؟؟
    مش متأكده اصلا اذا كنت هبلغ .. لاني اكيد هتشد معاه وسين وجيم .. وهوسة على الفاضي وممكن الواحد يروح في الرجلين بتهمة انه وطني .. بتحصل اليومين دول يا زينب ..

    وبعدين هيبقى فيه هاجس اني مكنش متأكده ودي تبقى مصيبة .. لان الراجل ممكن يتشيع بسهولة واعيش انا بذنبه ..

    افتكر هلجأ للصحافة على افتراض طبعا اني معايا أدلة ..ودي حاجة نادرة جدا .. وهستخدم الرموز والاشارات .. وبتوع الأمن يبقوا يدوروا براحتهم ويثبتوا بنفسهم ..
    وكل واحد يعمل الواجب اللي عليه :)

    ReplyDelete
  7. فكرة التبليغ عن الجاسوس فكرة تعتبر تقليدية وحصلت أكتر من مرة إن مواطن شك-مجرد شك مش اتاكد-راح مبنى المخابرات وقابل أحد الضباط وقاله على شكوكه وبعد كده حققوا في الموضوع00
    وبالطبع الموضوع مش زمبليطة يعني كل واحد يروح جهاز المخابرات بقى وهيييه
    ده كان زمان أيام النكسة,أصلا في كتير من الأحيان المخابرات بتبقى عارفه بوجود عدد من الحواسيس وسايباهم تديهم معلومات غلط أو تكشفهم وتضغط عليهم عشان يبقوا عملاء مزدوجين00
    مفيش أحسن من المخابرات الحاجة الوحيدة النضيفة في البلد او أحد الحاجات القليلة النضيفة0
    مع تحياتي00
    والسلام عليكم0

    ReplyDelete
  8. زى ما قلتى أختى انا لازم ابلغ عنه
    بس برده أفرضى ان فلان ده انا بعزة قوى
    هنا بقى لو عندى الدليل القاطع ويكون اكتشفته بنفسى يبقى لازم أبلغ انما لو كان مجرد شكوك
    يبقى حسكت لغاية ما ربنه يفضحه أو يثبت انه شريف
    السلام عليكم

    ReplyDelete
  9. عزيزتي بنت مصريه
    احب اوضح لحضرتك ان كل اللي بتقري عنهم دول مش جواسيس بالمعني المفهوم..دول اطفال ..بيسموهم عملاء تحت الاختبار
    في اكتر من نوع للعميل..في الكشاف..وده وظيفته انه يكتشف مين يصلح لانه يكون جاسوس سواء من ناحية تركيبته النفسيه او من ناحية موقعه اللي بيسهل له الحصول علي مغلومات ما
    والكشافين دول لما بيقعو بتكون حاجه كبيره لان الكشاف غالبا مابيكون بيحمل رتبه في الجهاز المعادي
    وفي الاغلب بردو بيتم التكتم عليه عشان استغلاله مستقبلا في عمليات زي تبادل الاسري او استخلاص ماعنده من معلومات وترك الجهاز اللي مشغله في حيره من امره بيدور عليه عشان الموضوع ميدخلش لقنوات دبلوماسيه معقدة ممكن تفرج عنه ف الاخر تحت الضغط زي ماحصل في موضوع عزام عزام
    وفي العميل النائم ..ده شخص غلبا بيكون صغير في السن تم ابتعاثه للخارج وهناك تم رصده والتعرف علي امكانيه انه يبقي ذو حيثية في المستقبل في بلده وعليه بيتم التعامل معاه وتجنيده باستخدام الثالوث المعروف(مال-جنس-مخدرات) وغالبا بتكون جنس ولاحقا بعد سنييين ممكن تتجاوز العشر او عشرين سنه بيتم ابتزازه بيها عشان ينفذ مهام لصالح المبتز وعشان كده تلاحظي ان اي بعثة تدريب عسكرية لبره بيكونمعاها فريق من المخابرات عشان يؤمن الطلبه ضد النوع ده من المحاولات..واي بعثه دبلوماسبه في واحد او اكتر من ممثليها في جهاز المخابرات ..فاروق حسني في السبعينات كان الملحق الثقافي للسفاره المصرية في باريس والمسؤول المخابراتي عن متابعه النشاط الطلابي هناك لرصد اي محاوله من النوع ده واحباطها بدري..ده منتشر جدا خصوصا لو عرفنا ان المخابرات المصرية والموساد كانو بيديرو بيوت متعه في طول اوروبا وعرضها لاصطياد هذا النوع من العملاء
    في العيون..ودول اخطر مليون مره من اللي فاتو..لأن العيون دول بيكونو من جنسيه البلد المعادي ومتخفيين في جنسيه اخري او مزروعين لسنوات في وسط مجتمع معادي..زي ايلي كوهين في سوريا ورأفت الهجان في اسرائيل
    في جواسيس ميعرفوش انهم جواسيس اصلا..بيكون فام انو شغال في اعداد مواد اعلامية مثلا لصالح قناه اجنبية ويلاقي نفسه بيجمع معلومات من عينه اسعار الخضار واسعار ايجارات الشقق وكثافه القطارات في محطة مصر وكلها معلومات تافهة لكن لو اتربطت ببعضها البعض ممكن تكشف مثلا مدي استعداد الدولة للحرب او تخزينها لسلع ومواد تموينيه هتحارب بيها..ودول نادرا مابيتكشفو لان مهمتهم علي تفاهتها مش قابله للاكتشاف بسهولة..زي دول في الاول كان ابراهيم شاهين وزوجته واللي محدش اكتشفهم الا بعد ماتطور عملهم من جواسيس لايعرفون انهم جواسيس لعملاء محترفين في فتره السبيعنات..
    القصه طويلة..وبتعتمد في الاخر انتي بتبلغي مين
    ممكن تبلغي بجواب بريدي مكتوب علي الكمبيوتر من محافظة غير محافظتك وطابع بوسته وتبقي ارضيتي ضميرك وف نفس الوقت حافظتي علي سريه شخصيتك..كل ده الناس دي بتاخده ف الحسبان..
    ربنا يحفظنا ويحفظك يافندم

    ReplyDelete
  10. عزيزتي بنت مصريه
    احب اوضح لحضرتك ان كل اللي بتقري عنهم دول مش جواسيس بالمعني المفهوم..دول اطفال ..بيسموهم عملاء تحت الاختبار
    في اكتر من نوع للعميل..في الكشاف..وده وظيفته انه يكتشف مين يصلح لانه يكون جاسوس سواء من ناحية تركيبته النفسيه او من ناحية موقعه اللي بيسهل له الحصول علي مغلومات ما
    والكشافين دول لما بيقعو بتكون حاجه كبيره لان الكشاف غالبا مابيكون بيحمل رتبه في الجهاز المعادي
    وفي الاغلب بردو بيتم التكتم عليه عشان استغلاله مستقبلا في عمليات زي تبادل الاسري او استخلاص ماعنده من معلومات وترك الجهاز اللي مشغله في حيره من امره بيدور عليه عشان الموضوع ميدخلش لقنوات دبلوماسيه معقدة ممكن تفرج عنه ف الاخر تحت الضغط زي ماحصل في موضوع عزام عزام
    وفي العميل النائم ..ده شخص غلبا بيكون صغير في السن تم ابتعاثه للخارج وهناك تم رصده والتعرف علي امكانيه انه يبقي ذو حيثية في المستقبل في بلده وعليه بيتم التعامل معاه وتجنيده باستخدام الثالوث المعروف(مال-جنس-مخدرات) وغالبا بتكون جنس ولاحقا بعد سنييين ممكن تتجاوز العشر او عشرين سنه بيتم ابتزازه بيها عشان ينفذ مهام لصالح المبتز وعشان كده تلاحظي ان اي بعثة تدريب عسكرية لبره بيكونمعاها فريق من المخابرات عشان يؤمن الطلبه ضد النوع ده من المحاولات..واي بعثه دبلوماسبه في واحد او اكتر من ممثليها في جهاز المخابرات ..فاروق حسني في السبعينات كان الملحق الثقافي للسفاره المصرية في باريس والمسؤول المخابراتي عن متابعه النشاط الطلابي هناك لرصد اي محاوله من النوع ده واحباطها بدري..ده منتشر جدا خصوصا لو عرفنا ان المخابرات المصرية والموساد كانو بيديرو بيوت متعه في طول اوروبا وعرضها لاصطياد هذا النوع من العملاء
    في العيون..ودول اخطر مليون مره من اللي فاتو..لأن العيون دول بيكونو من جنسيه البلد المعادي ومتخفيين في جنسيه اخري او مزروعين لسنوات في وسط مجتمع معادي..زي ايلي كوهين في سوريا ورأفت الهجان في اسرائيل
    في جواسيس ميعرفوش انهم جواسيس اصلا..بيكون فام انو شغال في اعداد مواد اعلامية مثلا لصالح قناه اجنبية ويلاقي نفسه بيجمع معلومات من عينه اسعار الخضار واسعار ايجارات الشقق وكثافه القطارات في محطة مصر وكلها معلومات تافهة لكن لو اتربطت ببعضها البعض ممكن تكشف مثلا مدي استعداد الدولة للحرب او تخزينها لسلع ومواد تموينيه هتحارب بيها..ودول نادرا مابيتكشفو لان مهمتهم علي تفاهتها مش قابله للاكتشاف بسهولة..زي دول في الاول كان ابراهيم شاهين وزوجته واللي محدش اكتشفهم الا بعد ماتطور عملهم من جواسيس لايعرفون انهم جواسيس لعملاء محترفين في فتره السبيعنات..
    القصه طويلة..وبتعتمد في الاخر انتي بتبلغي مين
    ممكن تبلغي بجواب بريدي مكتوب علي الكمبيوتر من محافظة غير محافظتك وطابع بوسته وتبقي ارضيتي ضميرك وف نفس الوقت حافظتي علي سريه شخصيتك..كل ده الناس دي بتاخده ف الحسبان..
    ربنا يحفظنا ويحفظك يافندم

    ReplyDelete
  11. علاء
    يا سلام؟ يعنى انا اروح ابلغ اتسئل انا؟
    لازم الواحد يفكر كويس على كده قبل ما ياخد الخطوة دى
    ----

    عدي النهارد
    انا معاك، اعتقد ان لام يكون تحت ايدك دليل، مش مجرد شكوك
    ----

    محمد شدو
    ما انا سألت فى كده بردو يا محمد لما قلت:
    ويمكن يكون هو حد قريب منك او يهمك
    ودى جملة تحتمل كل الاقاريب والاصحاب والاحباب

    بالنسبة لسيكولوجيا الخيانة المعتمدة على القدرة على الكذب، اعتقد انك لفت نظري لمعلومة مهمة جدا، عندك حق فى كل كلمة، الكذب فعلا مفتاح الرذائل
    وفعلا احنا حتى بالبلدى كده بنقول ان المسلم المتدين ممكن يغلط اى غلطه لكن ما يكدبش ابدا
    وتلاقي حتى الناس اللى بتاخد بالمظاهر لما تلاقى واحد بدقن طويلة مثلا تتصور انه على درجة من الدين جيدة وبالتالى ترتاح فى التعامل معاه وتطمئن ليه بسهولة على اساس انه مش هيكدب ولا هيغش

    --------
    AoLaAoL
    تفتكر ممكن جاسوس يفكر بالسذاجة دى؟ يبقى متصور ان الجاسوسية او العمالة على اشكالها ممكن تكون اهون من السرقة وتشريد العيال؟
    انا مش مقتنعة، هو ممكن يكون اتدبس فى الاول، او حتى طمع فى الفلوس الكتير وباع بله وهو مفتح وفايق من غير ما يبرر لنفسه ومن غير ما يحاول يجمل افعاله، صعب اوى ان الجاسوس والمفترض انه ذكي وبيزن الامور انه يفكر ان الجاسوسية جريمة خفيفة او هينة
    وبعدين بعد الشر عنك ، وعن السامعين
    :)

    ---
    بلو ستون
    حلوة فكرة تلجأى للصحافة، بس لو واحد مايعرفش صحفيين يعمل ايه؟

    ----
    احمد المصري
    والله اعلم بردو نضيفة وللا لا
    ما هو على ايدك سيرة صلاح نصر العطرة :))

    ------
    مؤمن محمد
    انا معاك اكيد فى ان تبقى معاك دلائل مش شكوك، يعنى اعتقد كمان ان لو فضل فى ايدك شكوك بس ومقدرتش تتحصل على دليل قاطع يبقى ربنا مش رايد له انه يتكشف دلوقتى، او ان الامور تتطور فى صالحه مثلا انه يعترف هو من نفسه وربنا يتوب عليه

    ----
    Sniper
    بصراحة افدتني جدا بالمعلومات القيمة
    :)
    ميرسي
    والجزء بتاع الجواب ده فكرة هايلة
    بس هو عنوان المخابرات ايه صحيح؟

    ----

    ReplyDelete
  12. للاسف انا اغبى من ان اكتشف جاسوس و
    لهذا لية ممكن تكونى انتى جاسوسة
    ممكن قوى الكلام اللى بنقولة دلوقتى يخدم اى جاسوس و نبقى كلنا جواسيس على بعض

    ويحيا الجاسوسية
    انصحك بقراة الزينى بركات لجمال الغيطانى
    الرواية مش المسلسل

    ReplyDelete
  13. عمل الجاسوسية لما يكون لمصلحة البلد لا غبار عليه زي جمعه الشوان ورأفت الهجان وغيره الواحد يسمي العمل من نوع مصلحة البلدد بطولة ولكن الخيانه هو العكس مقابل حفنة دولارات او بنت حلوه او الحصول علي جنسية العدو واسباب كثيرة تخللي ضعاف النفوس جواسيس وخونه ولو عرفت اي واحد من الصنف ده ابلغ عنه فورا ومش هاقول وانا مالي لان مصر فوق الجميع

    ReplyDelete
  14. السؤال ده مرة سألته لنفسى زمان ... لو اكتشفت أن حد بحبه جاسوس حعمل ايه ؟

    الكلام ده كان أيام رجل المستحيل و الكلام ده ..... ساعتها كنت بقول بالفم المليان ده أنا أسلمه بايديا ولو كان مين

    بس دلوقتى ممكن حد يقول لى يعنى ايه جاسوس أصلا ؟؟؟؟ .... يعنى اللى بيعد مع ضباط مخابرات اسرائيل و أمريكا ؟؟؟ و يقول لهم شوية معلومات مهمة عن مصر ؟؟؟؟؟؟؟؟؟؟

    طب ييقى بقى اللى يعرف يبلغ عن حسنى مبارك يبقى يورينى حيبلغ مين و ازاى

    ReplyDelete
  15. انتى عارفه لو حصل ولاقيتى جاسوس ورحتى تبلغى عنه
    هايقلولك احنا عارفينه بس سايبينه شويه عشان بنخططله
    وهيمسكوا مكانه واحد مظلوم
    او هيسلموه للمدعوقه
    او هيحطوكى مكانه ويقولوا مسكنا جاسوسايه خطيره
    بس لو حصل كده هتشتهرى وكل الجرايد والفضائيات هتتكلم عنك
    يالا يا بختك
    احسن حاجه تخيكى فى حالك عشان تحضرى فرح ابن خالتك
    سلام

    ReplyDelete
  16. طب انا مش هاجاوب انا هسال لو رحت تبلغ عن جاسوس تفتكر ايه هايحصلك..مثلا ممكن تفضل متراقب.. او يحبسوك على ذمه التحريات .. او يعزموك على عصير على طريقه محمود سعد ..

    ReplyDelete
  17. انا حجاوب عن نقطه الخلفيه النفسيه للجاسوس
    اعتقد ودا اعتقاد موضوع التجسس دا بيجي نتيجه لاحتياج معين
    يعني للفلوس
    للنساء
    وعن طريق فرض ضغوط معينه على الشخص بيرضخ

    اما ابلغ عنه دي
    في بلدنا محدش يبلغ عن حاجه

    ReplyDelete