7/08/2007

ويكون لونها لموني وبشراشيب

انا عايزة اطير طايرة ورق. النهاردة شفت اربع خمس اولاد قاعدين يطيروا طايرات ورق، من فوق الكوبري اللى بعدى من عليه وانا مروحة البيت. فقررت انى لما انزل البلد هطلع فوق سطوح بيت جدو واطير طيارة ورق.

بس انا معرفش ازاى اعمل طيارة ورق، ومش عايزة اشتريها جاهزة، عايزة اطير واحدة من صنع ايديا وحياة عنيا، فيعنى لو حد يعرف ازاى اعمل طيارة ورق ابقى شاكرة اوى، ومن ناحيتى لو عرفت هقولكوا بردو

20 comments:

  1. سيادتك تجيبى اربع اعواد من اى قفص جريد ويكونوا مقاس بعض
    ( قفص خضار يعنى )

    وبعد كده تركبيهم الاربعة فوق بعضيهم
    يبقوا عاملين زى سلايز البيتزا
    وبعد كده تربطيهم من النص بدبارة تقيلة كتير
    ولفيهم كتير
    بحيس يمسكوا بعض

    وتعقدى كويس
    وفيه ناس بتغريهم قبل الربط بغرا ابيض من النص

    بعد كده تسيبى بقيت الدبارة علشان هتطيرى بيها الطيارة ولو قصيرة تلضميها مع خيط تانى
    بس دبارة تنجيد تقيلة
    وبعد كده
    وتجيبى ورق ملون شفاف و غرا ايض
    و تبدأى تلزقى كل مثلث لون او زى ما انت عايزة

    وبعد كده تجيبى فرخ شفاف ملون وتقصيه زى الديل اللى كانوا بيعملوا لبعض فى المدرسة زمان .. بجد مش هزار
    شرايح بس اخر حته مش مقطوعة للاخر
    وتلزقيهن فى الطيارة

    وبعد كده
    طيرى يا طيارة طيرى
    وابقى ادعيلى


    ملحوظة : من ذاكرة طفولتى
    عمرى ما عملتها
    بس كنت براقب الاولاد اللى فى شارعنا القديم وهما بيعملوها سنين طويلة

    بس لما تطير ابقى قوليلى بجد

    ReplyDelete
  2. زيزيييي
    كنت بعملهم وانا صغيره واقف علي السطوح واطيرها
    الله فكرتيني يايام الشقاوه والوقوف علي سور السطوح علشان اعرف اطيرها كويس ويجي عمي يشلني وهوا بيزعق علشان انا كده مفروض اني هقع
    مع اني كنت ببقي مبسوطه
    تيجي نعمل طيارات تاني ونقف نطيرها من ساعه المغرب كده من فوق الكوبري
    :-D

    ReplyDelete
  3. ايد ده انا كمان كنت بافكر فى الطيارات
    :)
    لما تيجوا تطيروا صفرولى

    ReplyDelete
  4. كنا بنستخدم بوص سنارة صيد ونشقه بالطول لعمل الطيارة الورق. وتستخدمى خيط تنجيد مش دوبار. عصيان البوص بعد شقها وتقطيعها بالتساوى بالطول اللي إنتى عايزه للطيارة تتربط ببعضها وتكون شكل دائرى. الربط يكون من السنتر وبعد كده الأطراف تتوصل ببعضها بخيط وتتشد كويس. الورق السوليفان بيكون أقوى وأشيك. ممكن طبعاً تمليها شراشيب زى مانتى عايزه وعلى كل لون. هى كمان مش ضرورى تكون شكلها دائرى... شوفى اللينك ده

    http://lamap.bibalex.org/
    ?Page_Id=6&Element_Id=
    207&DomainScienceType_Id=
    11&ThemeType_Id=22

    ReplyDelete
  5. اللهى رجعتينى لايام الشقاوه والجمال

    ReplyDelete
  6. فكره حلوه وجميله انك تطيري طياره
    لكن عاوزه تعرفي

    شوفي رد عدى النهار
    وطبقي عملي
    تحياتي

    ReplyDelete

  7. شوفي يا أختي

    في في اللينك ده موسوعة لتعليم كيفية صنع طائرة ورقية

    http://www.hct-muscat.net/hct/showthread.php?t=11230

    تحياتي لك من ماناساس البلد

    ReplyDelete
  8. انت ممكن تعملى بلوج باسم كيف تعمل طياره ورق

    أه صحيح انت ماقولتيش حاجه عن التاجز بتتعمل ازاى إيه ظروفها

    تحياتى

    ReplyDelete
  9. سيبك من كل الناس اللي بيدولك معلومات مضروبة و قديمة من أيام بوصة الصيد وورق السوليفان و دوبارة التنجيد !! ياخونا كدة تضحكو علي البنت و الطيارة كدة هاتوئع ..
    بصي .. إحنا دلوقتي في عصر العولمة و التاكنولوجيا الحديسة لامؤخذة .. يعني .. إنسي بوص الصيد .. في دلوقتي Plastic Sticks .. بتاعت ماكيتات الهندسة وكدة .. دي خفيفة و قوية .. وبرضة إنسي ورق السوليفان والكلام البلدي ده .. من ميدان الجامع .. إشتري متر قماش مشمع .. بتاع ستاير الحمام .. و إلا اللي بيقولك علي دوبارة تنجيد !! إية الكلام ده .. إشتري لفة خيط من بتاع الصيد .. وده بقي مقاسات .. كل مالخيط يتخن .. يبقي أقوي ويستحمل طيارة أكبر .. تعرفي إن بالحاجات دي ممكن تعملي طيارة ترفعك من علي الأرض !!
    هاقولك إزاي تعملي الطيارة المرة الجاية ..
    تحياتي

    ReplyDelete
  10. موضوعك اوحى لي بشيء واحد .. طيري يا طياره طيري يا ورق و خيطان...بدر ارجع بنت زغيري..على سطح الجيران..و ينساني الزمان ..على سطح الجيرااااان...تاااراا...ترراا رااا ... راا راا تراا ....

    ReplyDelete
  11. انا طول عمرى لما كنت بحاول اعملها كنت بفشل فيها
    اصل انا ماكونتش مختلط بالاولاد اللى فى شارعنا وماكونتش احب اسال حد فى حاجه
    بس لما ربنا يعينك وتعمليها لازم ترخصيها عند شركة مصر للطيران احسن تقابلك حمله وياخدوها منك ويقولواا طيارة تجسس
    وامسكك واقول جاسوسه زى البوست اللى فات واخد عليكى مكافئه خمسه وسبعين قرش واتنين مليم
    سلام

    ReplyDelete
  12. كل الأخوة "الصبيان" أو بمعني أخر "الذكور" اللي حكولك ازاي تعملي طيارة ورق قالوا طرق صحيحة .. بس نسيوا أهم مرحلة في صناعتها .. عمل "الميزان" اللي بيوازن الطيارة و هي طايرة و ما يخليهاش تقلب و تتكسر لما تاخد "مقص" أو "مقلب" ف الهواء و رأسا علي الأرض ..

    يا ريت بقي يكملوا جميلهم و يشرحوا المرحله دي بالتفصيل ..

    :)

    ReplyDelete
  13. هما قالولك الطريقة خلاص و شكلك طيرتيها كمان

    بس حبيت بس اقول انى طيرت واحدة قريب ..... احساس جميل اوى

    ReplyDelete
  14. شيماء
    دي وصفة سهلة، دي وصفة هايلة
    انتى بتوصفي وانا بفتكر فعلا كل الحاجات دى، بس بيتهئيلى انها ساعة التنفيذ مابتبقاش سهلة ابدا
    ربنا يسهل واعرف اعملها وهدعيلك

    ---
    شوشو
    انا مكنتش بعملها بأه، كانوا بيعملوهالى وامسكها شوية وازهق :)
    بس المرة دى مش هزهق ابدا
    انا موافقة نطير طيارات سوا
    ايه رأيك نخرج نطيرهم بجد سوا، بس فى كباري فى القاهرة تنفع؟

    ----
    دنانير
    دا توارد افكار على العالي اوى هههههه
    بس حاضر اول ما نحضر الطيارات ونيجي نخرج هنقولك
    انا بعرف اصفر شوية على قدى كده، بس ابقى فطرانه كويس

    ------
    عدى النهار
    كويس، طريقة رقم اتنين :)
    بس اللينك ما اشتغلش معايا
    ---

    فى القلب
    جميل جدا، حلو انا نستعيد ذكرياتنا، بس كويس انك ما قولتش ايام الطفولة والبراءة عشان ما تحسسنيش انى كبرت على الطيارات الورق وللا حاجة، انا لسه صغيرة وعايزة اتشاقى بالطيارات الورق
    ----

    اسكندرانى اوى
    ماشي :))
    ---

    The Groom
    ميرسي جدا ع اللينك انا نزلت الملف وهقراه
    ---

    أسامة يوسف
    التاجز؟ مالها؟ ازاى تعملها ازاى يعنى؟
    انا مش عارفة انا بلاقى حد بيقعد يجاوب على شوية اسئلة وفى الاخر يقول انه بيمرر التاج ده لفلان وفلان وفلان
    فالفلانيين دول يقوموا كل واحد يجاوب على الاسئلة ويمرروا بدورهم لفلانيين تانيين وهكذا
    ---
    GlimmerMan
    استني يا فندم يا بتاع طيارات الهندسة، مرة جاية ايه
    لا والنبى اشرح دلوقتى، انا عايزة اعرف كل اسرار وخبايا صناعة الطيارات الورق، وانت شكلك بتقول كلام تكنولوجاوى اوى :)) الواحد بردو يحب يعمل طيارة ديجيتال
    وياريييت ترفعني من على الارض، هدعيلك دعوة جامد ساعتها
    بس قول بس

    ----
    brastos
    هههههههههه
    هو صحيح انا ممكن اطير طيارة، بس مش هتهور واغني لفيروز، احسن اتضرب فى الاخر
    :)
    ----
    محمد جادو
    لا انا همشي بيها من غير رخص، اما اشوف هيسحبوها مني ازاى
    :D

    ----
    Romantic Rose
    كوكي حبيبي، انى بتعملى هنا ايه يا عروسة هانم، انتى مش مشغولة يا استاذه لشوشتك، ووراكي مية الف حاجة قبل الفرح؟ وللا عايزة تيجي تطيري طيارات معايا؟

    بس عندك حق فى حكاية الميزان، انا بردو كنت مستنية حد يجيب سيرة او يشرح

    انتو يا اساتذه يا محترفي الطيارات، افيدونا فى مشكلة الميزان افادكم الله
    ---
    عمر
    لا لسه ماعملتهاش والله، انا لسه هاجاو اتصرف فى المونات الاول واجيبها، بس اما استقر الاول اعملها بالجريد وللا بالبوص وللا البلاستيك ستيكس دى

    طيب بما انك مطيرها قريب، اكتبلنا بوست كده اوصف فيه احساسك، مهمة اوى اللحظات الجميلة دى نسجلها ونفتكرها دايما

    ReplyDelete
  15. هو اللينك بيتكون من الأربع سطور مع بعض يعنى إفتحى ملف وكوبى الأربع أسطر فيه وبعدين إجمعيهم فى سطر واحد... هو ده اللينك
    :)

    الطيارة اللي فى اللينك ده سهلة فى عملها وعمل الميزان كمان

    ReplyDelete
  16. أنا كنت بكتب الكومنت ده و اللي فات وأنا في الشغل .. ذنبي في رقبيتك لو إترفدت .. لو عندك الحاجات اللي قولتلك عليها .. الباقي سهل جدا .. ربع ساعة شغل و علي السطوح دوغري ..

    في عشرات الطرق لعمل ال (كايت) .. لكن بما إنك مبتدئة .. لقيت أحسن طريقة إنك تبتدي بحاجة سهله و بعدين تدخلي في الغمييق و تعملي واحدة كبيرة تطيري بيها في جولة حرة في سماء القاهرة ..

    اللينك ده فية أسهل حاجة لقيتها .. بدلي الورق بالبلاستيك ( ممكن تستعملي كيس لامؤخذه زباله لو الميزانية مخرمه أو مالكيش نفس تتعكي في زحمة ميدان الجامع ) .. لكن العصيان البلاستيك مهمة (هي شبه الشفاطة بتاعة الكولا لكن جامدة مش بتنثني ) .. و الخيط بتاع الصيد كمان مهم عشان وزنة خفيف و هايخليكي تطيريها عالي جدا لحد ما هيئة الطيران المدني ماتعملك محضر ..

    اللينك أهوه .. إبقي قولي لي عملت إية ..

    http://www.things2make.com/Things2make_files/Instructions%20over%205/Kite.htm

    ReplyDelete
  17. إيه العكننه دي .. اللينك مش عيايز يظبط .. أهوه تاني .. إلزقي السطور في بعضها تعمل سطر واحد ..

    http://www.things
    2make.com/
    Things2make_files/
    Instructions
    %20over%205/
    Kite.htm

    ReplyDelete
  18. فى حاجات مش ممكن هتعرفى تعميليها الا بمتخصصين
    عشان كده انصحك تشوفى ولد من المتخصصين وتخليه يعمل واحده قدامك انت ممكن تدفعيله تمن بتاعته عشان يرضى يعلمك وبعدين تبقى تعملى بتاعتك بنفسك
    انا فاكر زمان ايام ما كنت بطير طيارت من فوق السطوح بس عمرى ما عملت طيارة وطارت
    لكن كنت اما اشترى طياره جاهزه كانت بتطير وتطير
    جايز لأنى مكنتش بعرف اعمل طيارات
    نورتينى بالزياره
    ابقى كرريها

    ReplyDelete
  19. هاى زينب

    أحنا جبنا سيرتك هنا

    http://bloggers-times.blogspot.com/

    بس بكل خير والله

    ياريت تشرفينا بالزيارة ولو حطيتى اعلاننا عندك تبقى بجد قدمتيلنا اكبر خدمه

    سلام

    ReplyDelete
  20. الاةل عايزة اقولك انك دمك خفيف وعاجبنى اوى البلوج بتاعك
    ثانيا بقى انتى جيبتى سيرة حلم من احلامى المستحيلة
    انا نفسى برضة اطير طيارة ورق بس ولا اعرف اعملها ولا اطيرها
    يارب تنفذى حلمك
    وتطيريها

    ReplyDelete