8/13/2007

عن مهرجان البرمجيات الحرة. يوم جنو/لينوكس الرابع

من كام يوم حطيت بانر مهرجان جنو/لينوكس. والنهاردة فكرت احكيلكوا اكتر عن المهرجان ده، التفاصيل يعني.. من طأطأ لسلامو عليكو،عشان اللى مش متشجع ييجي،يتشجع،واللى مش متحمس.. يتحمس، واللى مش واخد في باله..ياخد فكرة ويشتري بكره

الحكاية من الاول ..من الاول خالص خالص، وبالبلدي كده وع البساط الأحمدي.. وحسب معلوماتي الغير متعمقة كمان، بس الكافية جدا:

احنا عارفين طبعا ان الكمبيوتر بيتكون من اجهزة صلبة وبرامج..الدرس ده اخدناه فى ثانوي كأول درس، طبعا على ايامنا، دلوقتي الدرس ده بياخدوه فى اولى ابتدائي،ما علينا.. البرامج بتتعمل بحاجة اسمها كود، واللى بيعمل البرامج دي بيبقى اسمه مطور برامج، في برامج "مغلقة -مشيها مغلقة" يعني الاكواد بتاعتها مشفرة ومحدش يقدر يلعب ولا يطور فيها غير اصحابها،وفي برامج "مفتوحة المصدر" يعني اكوادها مش مشفرة وبالتالي اي حد بيعرف في شغلانة تكويد البرامج دي يقدر يطور ويلعب فيها. بالطبع اغلب البرامج المغلقة دي بتكون بفلوس إلا ما رحم ربي، وبالطبع كمان اصحابها بيبيعوها بأسعار خيالية كبيرة، ملعبهم باه.. وبالتالي ظهور البرامج الحرة، او المفتوحة المصدر دي بتساعد الناس اللى ميقدروش يشتروا برامج غالية انهم يلاقوا برامج مجانية -في الغالب- وتؤدي نفس غرض البرامج اللى بفلوس بل كمان بتتاح قصاده الفرصة انه يلاقي برامج امكانياتها اجمد واحسن من غيرها، لأن زي ما قلنا الكود بتاع البرامج المفتوحة متاح لأى مطور برامج وبالتالي فى ناس كتير وامخاخ كتير تقعد تشتغل على الاكواد دي وتطورها.


طبعا كلنا عارفين ويندوز... العيل فى كي جي وان عارف ويندوز، واغلب الناس بتتصور ان الكمبيوتر يعني ويندوز وويندوز يعني الكومبيوتر، مع ان ويندوز مجرد برنامج بردو.. بس لأنه شامل شوية بيقولوا عليه "نظام تشغيل" ،وزي ما احنا عارفين ويندوز بفلوس... كمان هو برنامج - او خلينا نقول نظام تشغيل- مقفول المصدر، محدش في المطورين يقدر يلعب فيه غير اصحابه، ونظرا لمشكلات مختلفة كتيرة مع ويندوز منها مأساة الفيروسات اللى اكيد واجهت كل واحد فينا، ظهرت محاولات لعمل نظم تشغيل زيها زي ويندوز،وتشوفها تقول هي ويندوز.. بس المرة دي مش بغباوته، بالعكس خالص، نظام تشغيل مجاني.. ومستقر جدا - يعني ما بيهنجش ومابيقعش كل شوية زي ويندوز- وكمان مالوش فيروسات ابدا،ودي عبقرية اخينا.. الى هو مين اخينا ده؟؟ اللى هو لينوكس يا عم الحج

لينوكس نظام التشغيل الحر الموازي لويندوز.. وهو نجم نجوم البرامج الحرة المفتوحة المصدر،وفي ناس كتير حوالين العالم بيدعموا لينوكس وبيدعوا ليه بعد ما اثبت ليهم انه نظام تشغيل جدع جدا.. ومعاه طبعا كمية برامج خرافية ومتنوعة وكلها بردو حرة ومفتوحة المصدر، وعيش بأه

طيب ده مفيد فى ايه اصلا؟؟ يعني انت مثلا ليه تتشجع وتستخدم لينوكس؟ وليه الشركة اللى انت بتشتغل فيها تحول للينوكس؟

اولا انت لما تستخدم لينوكس، او اقولك، انا هتكلم عن نفسي..لما انا استخدمت لينوكس استفدت ايه.. طبعا اتخلصت من صداع الفيروسات وقرفه، لينوكس ما بيوقعش زي ويندوز، يا مؤمن انا جه عليا زمن كنت بعيد تستيب ويندوز كل تلات ايام لما جاب لي الهارد ارض الله يرحمه ويبشبش السكتور اللى تحت راسه :). ثانيا انت مش هتحتاج تلات اربع ساعات فى التعرف على لينوكس - بجد والله- بما انك اصلا حريف ويندوز، فبمجرد ما تعرف اماكن الحاجات فى لينوكس هتبقى في التمام اوي، ومع الوقت تتعمق اكتر وتعرف اكتر عن حاجات موجوده فى لينوكس ولسه مش موجوده عند ويندوز، اذا كان اكتر استخدامك للكمبيوتر هو انك تتصفح النت هتلاقي فايرفوكس طبعا - هو كمان ليه نسخة على ويندوز- وكمان هتلاقي برامج مكتبية زي اوفيس، بس اسمها اوبن اوفيس، المجموعة كلها باه، كتابة وقواعد بيانات وعروض تقديمية وجداول حسابية والافلام دي كلها،

في برامج جرافيك كمان، بس بالنسبة لي انا شايفة انها كويسة بس لسه مش جامده جدا زي برامج الجرافيك المشهورة زي فوتوشوب، انما اهى بتتطور والزمن سيد الموقف وكل ما زاد الدعم للبرامج الحرة وكل ما العالم اتجه نحو عدم الاحتكار واتاحة المعرفة للجميع - ايه الكلام الكبير ده؟- كل ما قدرنا نحصل النهاية على برامج احترافية عالية.

بصراحة فى تفاصيل كتيرة هي اللى بتخليني انا كمستخدمة عادية - مش مطورة برامج ولا بتاع- انى اتعلق بلينوكس، صعب اسرد التفاصيل دي هنا، فليس الشيطان وحده الذي يكمن فى التفاصيل.. اللآلىء أيضاً -هو انا كده كتبت اللآلىء صح؟-

النقطة التانية، هي الشركات.. الشركات ممكن تستفيد ازاى من لينوكس؟
طبعا اي شركة دلوقتي بتحتاج للكمبيوتر واى كمبيوتر بيحتاج لنظام شغيل، وشركات كتيرة متوسطة الحجم وصغيرة الحجم مش هتكون مستعدة ابدا انها تدفع قد كده لكل نسخة ويندوز تستعملها مثلا، دا غير البرامج بأه، وخصوصا مجموعة اوفيس وكده.. طيب اذا كانت الشركة تقدر توفر المبالغ دي، وتستخدم لينوكس والبرامج الحرة عموما يبقى ليه لأ؟

دا طبعا تساؤل يلقي بظلاله على الدول النامية، لما الدول الفقيرة زي مصر تستخدم لينوكس والبرامج المفتوحة يبقى اكيد افيد لها، اقتصاديا يعني... ليه تستخدم اللى بفلوس لما ممكن تلاقي البديل المجاني. والنبي مش المفروض لو حكومتنا بتفهم انها تدعم البرامج الحرة؟ يبقى بدل ما تعلم العيال ويندوز فى المدارس تعلمهم لينوكس، تخليهم يكتبوا باوبن اوفيس ويتصفحوا النت بفاير فوكس ويقروا الايميل بثندر بيرد ويرسموا بجيمب- احم لا غنى حتى الان عن فوتوشوب بصراحة- ،المهم... اين ثقافة التوفير - بقدر الامكان-

انا سرحت بيكو جامد، وانا اصلا عايزة اتكلم عن المهرجان. لما ظهرت فى مصر ناس بتستخدم لينوكس، في مجموعة منهم قرروا يدعموا لينوكس بشكل مركز، ينشروا البرنامج، يعرفوا الناس، يعلموهم ويقدمولهم الدعم على قد ما يقدروا وعلى قد ما الظروف تسمح.. والمجموعة دي.. اسم الله عليك، اللى هي مجموعة مستخدمي لينوكس، بيعملوا مهرجانات كوسيلة لنشر لينوكس على الاراضي المصرية المقدسة، ودا المهرجان الرابع

الفكرة روشة جدا بصراحة.. مهرجان على مدار يوم كامل من حداشر الصبح لتسعة بالليل، هتكون فيه هناك محاضرات بتشرح لينوكس، وبتشرح برامج ومفاهيم وحاجات تانية.. هتشرح بالقدر الكافي اللى تخليك تقدر تبتدي.. هتحطك ع الطريق يعني

الاكتر من كده انك هتاخد سي دي عليه نسخة لينوكس كاملة.. هما السنة دي هينزلوا "أوبونتو" ولنااااااا هناااااا وقفة.. اصل حضرتك لو تفتكر احنا قلنا لينوكس برنامج مفتوح، يعني اي مطور يقدر يلعب فيه ويطوره، وبالتالي مع الوقت ظهرت نسخ - او بيسموها توزيعات- للينوكس، من ضمن التوزيعات الجامده جدا، اوبونتو.. ممكن تقرا تدوينة كان كتبها ألف عن اوبونتو، التدوينة لذيذة جدا مهم تقراها.

المهم زي ما قلنا انك هتاخد نسخة لينوكس، فلازم يا فندم تسأل عن نسختك وماتنساش تاخدها، وياريت تبدر وتيجي م الصبح عشان تلحق نسختك، انا بقولك اهو وقد اعذر من انذر

كمان لو عندك لاب توب او تقدر تجيب "الكيسة" بتاعتك ومستغني عن بارتيشن فى الهارد يحطولك عليه لينوكس وانت واقف، هينزلولك عليه لينوكس بنفسهم وتبقى دخل عالم لينوكس من اوسع ابوابه، يا سلام يا معلم هتترحم على التلاتين جنيه اللي كنت بتدفعها للواد بتاع السايبر اللى جمبكوا لما كنت تنزل له عشان يركبلك ويندوز.. طبعا فى المهرجان هتتركبلك النسخة مجانا، لان اصلا العمل كله مجاني فى مجاني.. ادعولهم بالخير باه

تعرف كمان، غير لينوكس والسي دي المجاني والدخول المجاني والمحاضرات المجانية اللى هتكون شغالة فى اليوم ده اعتقد انها تجربة تستحق الدعم والاهتما، دا المهرجان الرابع اللي بيعملوه وكل مهرجان بيزيد عدد مستخدمي لينوكس فى مصر.. يعني بيزيد عدد الاحرار يا علي :)))))

ها.. مين قال انا جاي؟

----
اه على فكرة، انا مش هقدر ادخل نت لمدة عشر ايام جايين كده، فاي تساؤل عن المهرجان او حاجة اكتبوه عادي خالص بس ما تنتظروش اجابة قبل عشر ايام مثلا. متشكرة جدا

26 comments:

  1. هشوف ظروفي ومواعيدي
    ;-p

    ReplyDelete
  2. لينوكس فعلا رائع وسهل الاستخدام ..
    اتمنى انى اقدر احضر .. واسمحيلي حطيت البانر عندى ومعاه لينك الموضوع هنا ..

    تحياتى :]

    ReplyDelete
  3. الليونكس نظام التشغيل المفضل للهاكرز فى العالم لو معى اسطوانة كنت جربته

    ReplyDelete
  4. الموضوع شكله حلو ودخل مزاجى
    بس يعملوا واحد ف لمنصوره

    ReplyDelete
  5. @ Arab engineer
    دا لينك اخر نسخه من لينوكس يوبونتو 7.04
    http://www.ubuntu.com/getubuntu/download

    ReplyDelete
  6. عزيزتى
    بصراحه نصيحة جامده اوووى منك
    لو لينوكس نفسه نصحنى مكنتش اقتنعت بكلامه زى اقتناعى بكلامك السلس ده
    متشكرين يا جميل
    سلام

    ReplyDelete
  7. This comment has been removed by a blog administrator.

    ReplyDelete
  8. عقبال ما نشوف برنامج تشغيل محلي بينافس و احنا ندعمه أما دلوقتي فالموجود شغال و أهي ماشية

    ReplyDelete
  9. اختى الكريمة بنت مصرية ..

    انا عاوزة اتعرف عليكى ضرورى لانى محتاسة حبتين ..

    فلو تتكرمى ده ايميلى على الياهو او الهوت ميل برضه اللى يعجبك .. desertroza1

    وميرسي ليكى مقدما

    ReplyDelete

  10. بكره اللينكس رغم انه مجاني وسهل

    لكن انا ولد نظامي ويندوز تبع مايكروزفت

    عموما ربنا يصلح الحال

    شكرا لك على المعلومة

    تحياتي لك من كايرو البلد

    ReplyDelete
  11. rjyalugcهاحاول أروح بجد بس يارب افتكر لأنى مسطولة
    بس دة كدة مينزلش عليه فوتوشوب وان ديزاين؟؟؟ هازعل منه أوى :(
    انا مقدرش اعيش من غير الفوتوشوب والبطاطس المحمرة

    ReplyDelete
  12. السلام عليكم اولا
    اولا يا ستي مافيش حاجه اسمها برنامج كبير و نقدر نقول عاليه نظام تشغيل
    هو تصنيفه علميا وعمليا نظام تشغيل ... اوكي كده
    ثانيا : مافيش حاجه اسمها الندوز حلو ولا كخه واللينكس جامد و اوفار
    لان ببساطه في حاجه اسمها ده مناسب لكذه وده مناسب لكذه
    ثالثا يا بشمهندس : الللنكس ليه فيروسات كتير ولو سمعتي حد قاليك غير كدهيبقي يبقي بيهيس عاليكي لامؤاخذه
    لان انا مبرمج قبل كده فيرس للنكس بس
    فالحوار انه جميل ومفتوح المصدر ده حضرتيك كلام جرايد ... لان عمرهم ماهديونا احنا المبرمجين الكود بتاع الللنكس ....اوك فهمتي ولا اييييييييه
    عموما انا ايميلي اهو لو حبيتي تسالي في اي حاجه
    eslammmohamed41@hotmail.com
    اسلام محمد
    مطور عام
    حاسبات ومعلومات . المودرن اكاديمي

    ReplyDelete
  13. This comment has been removed by a blog administrator.

    ReplyDelete
  14. ايه يا عم اسلام بالراحة شوية
    وبعدين ايه المشكلة يعنى كلامها صح
    وفعلا اللينكس فيروساته اصعب من الوندوز
    ولحد دلوقتى اللى هاجم اللينكس حوالى 40
    فيرس بس مقابل 60.000 فيرس للويندوز
    ودى حقيقة ولو عايزهم بالأسامى والأرقام اجيبهوملك
    وحتى لو لليكنس نفس انتشار الوندوز برده فيرسواته هتكون أقل
    وشوف المقال ده وقولى ايه رأيك

    http://www.theregister.co.uk/2003/10/06/linux_vs_windows_viruses/

    Java Developer

    ReplyDelete
  15. Hi there,

    You are chosen to represent your country in the first international blog
    WUB (World United Bloggers)

    The aim of this blog is to prove to the world that differences in language, religion,race and nationality do not make us hate each other and we can make this world better if we express our opinions with respect to others.

    If you agree to join us please send e-mail with your nick name , age , country and your blog address to sharm_lover@hotmail.com where you will be sent an activation mail which makes you entitled to contribute in WUB, your name as one of the contributor will automatically be updated.Please read the rules before you start any posting in WUB where you will also find the aims of this WUB.

    Thanks
    Chief WUB,


    Sharm .

    www.worlub.blogspot.com

    ReplyDelete
  16. طبعا طبعا طبعا طبعا جاي إن شاء الله

    أنا بأعشق لينوكس وبأعشق المصادر المفتوحة بضراوة

    وأول لما قريت عن المهرجان حطيته في كل الـreminders اللي عني علشان ما يبقاش في أي فرضة أنسى

    إن شاء الله جاي

    كتب هذا التعليق من جهاز عليه debian GNU/Linux
    ولا شئ غيره

    من جهاز ما شافش الويندوز غير وهو جاي بيه جديد وما طلعش عليه نهار تاني يوم :)

    ReplyDelete
  17. > فالحوار انه جميل ومفتوح المصدر ده حضرتيك كلام جرايد ... لان عمرهم ماهديونا احنا المبرمجين الكود بتاع الللنكس ....اوك فهمتي ولا اييييييييه

    انهى جرايد اللى تقصدها ;)

    ادخل هنا http://www.kernel.org/pub/linux/kernel/v2.6/

    نزل الملفات المصدريه لنواة لينكس وتصفح الكود واعمل مابدالك فيه . شوفت بقى انه مش كلام جرايد والعمليه بسيطه جدا

    أرجو انك تبذل مجهود شويه وتحاول تعرف ايه هيا البرمجيات الحره وايه الهدف منها قبل
    ماتقول كلام مغلوط وتفضل تايه وتتوه غيرك معاك :). واظن دا هدف من الاهداف الاساسيه للمهرجان فياريت لو تقدر تيجى اعتقد انها هتبقى بدايه كويسه جدا على الطريق الصحيح

    ReplyDelete
  18. بصررحة انا شغوف جدا لاستعمال لينكس واصداراته وكان ليا تجربة مع redhat
    بس للاسف عملى مشاكل مع الويندوزز فآثرت السلامة ومصطبتوش تانى كمان التعامل بامتدادات لينكي مش منتشر او ي بيني وبين اصحابي
    الخلاصة انى مقدرش اعتمد على لينكس بشكل كامل

    ممكن طلب صغير تانى
    ياريت توصفيلي العنوان تاني
    انا ساكن في لنها خايف اتوه في البندر
    :D

    ReplyDelete
  19. agmd-blog.blogspot.com msh 3rf a3ml comment bsra7 msh 3yz a2ra 7d y5osh 3ndy b2a ana zeh2t

    ReplyDelete
  20. ميرسي للناس الى ردوا على الناس :))

    وسوري علي الغياب ده، بس والله كنت مسافرة واجازة وصيف وكده

    بس ليا تعليق واحد على حكاية نظام التشغيل برنامج شامل، دي مجرد محاولة لتقريب الصورة، معتقدش يعني اني نا مش هبقى فاهمة يعني ايه نظام تشغيل وانا بقالي اكتر من اتناشر سنة بتعامل مع البتاع اللى اسمه كمبيوتر
    انما انا كنت بشرح، يعني بفهم،يعني بضطر استخدم ألفاظ تقريبية توضح الصورة

    ReplyDelete
  21. allah-slave
    انا اعرف اروح بس مش بعرف اوصف هسال ناس عن الوصف بدقة واقولك
    :)

    انت بتوقل من لنها وللا من بنها ودا خطأ مطبعي؟

    ReplyDelete
  22. > فالحوار انه جميل ومفتوح المصدر ده حضرتيك كلام جرايد ... لان عمرهم ماهديونا احنا المبرمجين الكود بتاع الللنكس ....اوك فهمتي ولا اييييييييه

    انهى جرايد اللى تقصدها ;)

    ادخل هنا http://www.kernel.org/pub/linux/kernel/v2.6/

    نزل الملفات المصدريه لنواة لينكس وتصفح الكود واعمل مابدالك فيه . شوفت بقى انه مش كلام جرايد والعمليه بسيطه جدا

    أرجو انك تبذل مجهود شويه وتحاول تعرف ايه هيا البرمجيات الحره وايه الهدف منها قبل
    ماتقول كلام مغلوط وتفضل تايه وتتوه غيرك معاك :). واظن دا هدف من الاهداف الاساسيه للمهرجان فياريت لو تقدر تيجى اعتقد انها هتبقى بدايه كويسه جدا على الطريق الصحيح

    ---------------------------------
    يارت تبقي فاهم انت بتتكلم في ايه قبل ماتدي معلومات غلط للناس
    وعلي فكره الكلام غير الشغل
    انت بتتكلم انما احنا بنشتغل في التطوير ... واناا بقولك تاني ان كلام المصدر المفتوح ده كلام دعايه بس
    فهمت ولا اقول تاني

    ReplyDelete
  23. انا قصدى من بنها

    هوا في حاجة اسمها لنها اصلا
    :)

    ReplyDelete
  24. يارت تبقي فاهم انت بتتكلم في ايه قبل ماتدي معلومات غلط للناس
    وعلي فكره الكلام غير الشغل
    انت بتتكلم انما احنا بنشتغل في التطوير ... واناا بقولك تاني ان كلام المصدر المفتوح ده كلام دعايه بس
    فهمت ولا اقول تاني

    -----------------------------
    بجد انا مش عارف انت بتجيب الكلام ده منين
    المصدر مفتوح ولو مش مصدق جرب
    صطب اى لينكس وافتح الفولدر
    /usr/src
    وهتلاقى هناك السورس بتاع كيرنل اللينكس

    --------------------------
    انا بجد اتخنفت من الناس اللى بتفتى فى حاجات مش فاهماها

    __________________________

    ReplyDelete
  25. وليه اللفة دي كلها ممكن تخلي الشركة تبعت لك نسخة مجانية ابونتو زي اللي هتاخدها في المؤتمر بالضبط من هذا الرابط:
    https://shipit.ubuntu.com/

    والله بجد بس لازم يكون لك حساب علي موقع
    https://launchpad.net/

    ReplyDelete