2/05/2010

حزن عام في عضلات القلب

مفيش حاجة اسمها كده
في ضعف عام، في ثانوية عامة.. انما ايه حزن عام دا كمان

انا اقولك..
الحزن العام هو اللي بتحسه محاوطك طول الوقت، لا بيراعي خصوصية او اختلاف مواقف.. بتتكلم وتضحك وتشتغل ويمكن تتوهم للحظات انك مبسوط، لكن الحالة العامة في الاخر هي الحزن

بتدور ع الانبساط بإبرة.. وبتعمل كل حاجة انت متصور انها هتبسطك من اول النسكافيه وطلبات الاكل اللي انت بتحبه ..والشيبسي اللي بيسليك طول الطريق وانت مروح وبتوعد نفسك تبتدي تعمل ريجيم من بكرة، وبتنسى او بتكسل، او بكرة مايجيش

بتغير الاودة اللي انت قاعد فيها وتحس الاودة الجديدة شرحة وبرحه وهادية وشمسها جميلة وتحس براحة - ماتنكرش انك بتحس براحة.. بس بردو حاسس الحزن لسه حواليك

بتلاغي الناس على تويتر وترتب كتبك على رفوف جود ريدز وتقلب في جوجل ريدر من غير نفس ولا تركيز.. وتقول لنفسك وكل يوم انك بتكره فيس بوك.. لا قادر تقفل فيس بوك ولا قادر تحبه

بتتلكك على خروجة سينما، عشان عارف ان السيما بتبسطك وبتخرج مع ناس ماتعرفهمش تلف على حاجات تعرفها وبردو انت حزين.. يخرب بيت كده يا اخي، يخرب بيت كده

وفي الاخر ما بتصدقش الناس لما تقولك انت مالك.. بتنكر على نفسك مع ان بجد باين عليك.

كل اللي انت عارفه ان اخر حاجة انت ممكن تكون محتاجها من الناس هو انهم يقولوا لك مالك ويكونوا يقصدوها.. مش عايز تتكلم مع حد، عشان انت مش متعود تتكلم مع اي حد عن حواديتك. انا عارفة انك من زمان صاحب نفسك، وسرك معاك.. بس الطريقة دي مابقتش تنفع انت كده هتموت كمدا وتروح فطيسا... مابهزرش..

15 comments:

  1. هذا عصر الحزن العام لغلبة العبث والظلم على سلوك البشر، يعني "ظهر الفساد في البر والبحر بما كسبت أيدي الناس" والحقيقة كمان انه ظهر "الاكتئاب" في البر والبحر. الجنس البشري ينتحر انتحاراً جماعياً غير واعي، من كتر ما بنغيب وعينا بالمخدرات كجنس بشري عموما ممكن نقتل نفسنا واحنا مش حاسين او بـ
    over dose
    !!

    ReplyDelete
  2. سلامة قلبك
    حالة و بتعدي

    ReplyDelete
  3. الآخت زينب ... كأنك بتكلميني عن نفسي
    كل الحاجت اللي انتي بتقولي عليها دي ماتشبعش ... لا الفيس بووك ولا السنيما ولا ولا ولا .. دي كلها مسكنات ... مؤقته ... و بعد شوية عاوزة تاني وتاني و تاني لحد ماتزهقي و مفيش اي تغير .. الحال في الآسوأ
    بس انت عرفتي تعبرعي عن اللي جواكي ده كده ازاااي ؟؟
    بس هي من رائيك ان اهتمام الناس بينا يشبع الفراغ ده ؟ ليه مايكونش زي الحاجات اللي التانية مجرد مسكن و بعد شوية هانحس انه اهتمام كاذب او غير مشبع

    طبعا الواحد مايقدرش يستغني عن احساسه بان الناس اللي حواليه مهتمه بيه ... لكن العلاقات الانسانية برضه انا مكانتش صادقة و امينه بتتقلب لادمان اخطر من ادمان الفيس بووك

    يارب تردي علي تعليقي المرة دي بقي

    Roky

    ReplyDelete
  4. Roky,

    اعلق اقول ايه بس :) ما اللي كنت عايزة اقوله كتبته في تدوينة

    تحياتي

    ReplyDelete
  5. كلنا هذا الرجل! .. تحياتي لاجمل بنوته مصريه بتعبر عننا كلنا :)

    ReplyDelete
  6. انا واثق ان اغلب اللى قروا البوست دة اعتبروة بيتكلم عنهم شخصيا

    على فكرة
    هما كمان عارفين ان دة اخرته الموت كمدا زى مابتقولى
    معتقدش ان حد عندة شك فى كدة

    بس المشكله

    ان دى مشكله مستعصيه
    ملهاش حل

    عندك انتى حل ؟؟

    ReplyDelete
  7. لن اندم على زيارتي لمدونتك

    ReplyDelete
  8. بعد تدوينة رائعة واسلوب مميز وطريقة في التعبير عن الحالات الانسانية والمشاعر بشكل رائع بعد كل الكلام ده
    ليه مافيش رواية ليكي؟ او تكتبي في صحيفة
    وسيناريو فيلم كمان

    حقيقي استمتعت بقراءة تدوينتك

    ReplyDelete
  9. yosry
    شكرا بجد على تعليقك :)
    اسعدني جدا

    ReplyDelete
  10. السلام عليكم اختي الكريمة سررت بقراءة مدونتك التي وان كانت تعبر عن شيء فهي تعبر عن مدى امامك وبعلم النفس ونوازع النفس البشرية تقبلي تحياتي

    ReplyDelete
  11. موضوع بجد شديد
    للامام دائما

    ReplyDelete
  12. حقاً استمتعت جداً بقراءة مدونتك و أكيد غيري قال:"حسيت إن أنا اللي بتكلم" رغم اختلاف ظروفنا و مشاكلنا
    بس إيه الحل ؟؟
    هل لو الواحد لقى حد يتكلم عنه و يعرفه أكتر ما بيعرف نفسه و لا إيه
    شكراً بجد ..

    ReplyDelete
  13. اول حاجه حسستني ان البوست ده بيتكلم عني زي ما كل الناس قالوا تقريبا ، شكل البلوج حسيت اني وسط البلد ماشيه لوحدي وعندي حاله الزهق والخنقه اللي مش بتفارقني تقريبا حتى لو حاولت اتغلب عليها بالضحك او الخروج او بالضحك على نفسي حتى
    بشكرك على تعبيرك الجميل والاسلوب القريب من القلب
    وبحييك على مدونتك الرائعه

    ReplyDelete