4/30/2010

المعاشات والعمال والعيشة واللي عايشنها

في خبر بيقول أن «وزارة المالية» تعلن زيادة المعاشات الأقل من 350 جنيهاً بدءاً من يوليو. لو اديت نفسك فرصة تقرا تفاصيل الخبر هتلاقي أرقام غريبة جدا

أولا: يوجد 2.7 مليون من أصحاب المعاشات يحصلون على أقل من ٣٥٠ جنيه في الشهر. في ناس بتقبض من الحكومة في الشهر ٥٠ جنيه وفي ٧٠ وفي ١٢٠ وفي ١٧٠

ثانيا: اللي بيقبضوا ٥٠ جنيه هياخدوا -ما شاء الله ما شاء الله - ١٣٥
واللي بيقبضوا ٧٠ جنيه هياخدوا ١٥٠
واللي بيقبضوا ١٢٠ حنيه هياخدوا ١٨٥
لحد ما نوصل للي بياخدوا ٣٤٠ جنيه هياخدوا ٣٥٠ جنيه - بزيادة عشر جنيه، جنيه ينطح جنيه

والنتيجة النهائية ان هيفضل عندنا ناس فاتحة بيوت وبتاكل وبتشرب وبتصرف ع المرض ١٣٥ جنيه

١٣٥ جنيه هو أقل معاش بيحصل عليه المصريين
ولا أقل من ١٣٥ جنيه تقبل الحكومة ان مواطنين مصرين الكرام المكرمين يعيشوا

وكل الحسبة دي بأه هتكلف خزانة الدولة ٦٥٠ مليون جنيه
مش كان أولى ياخدها رجل أعمال يعمل قرية سياحية جديدة؟ وللا منطقة جولف جديدة؟ وللا ياخدها يستثمرها في بلاد ما وراء البحر المتوسط بدل ما نديها مفرطة كده على اتنين مليون وسبع مئة ألف مصري؟

طب قولي انت يا مؤمن وانت موحد بربنا وبتصلي الفرض بفرضه في الزواية اللي جمبكو وبتحمده -ولا سواه- على المكروه قولي بتعمل ايه ب١٣٥ جنيه في الشهر، اتفضل قسم لي ١٣٥ جنيه على الميه والكهربا والايجار -مشيها قديم- والفطار والغدا والعشا - بص بلاش عشا، نام خفيف - ولما يجيلك شوية برد - بلاش نقول ازمة قلبية وللا ذبحة صدرية وللا ركبك ناقحة عليك لزوم الشيخوخة - وخليني اعتبرك قاعد بطولك كأن ولادك كلهم اتجوزوا وفتحوا بيوت والمدام كانت بتشتغل وعندها معاشها هي كمان

قوللي هتقسمها ازاي؟

انا كنت بحكي مع ماما وبابا بخصوص الخبر ده ورغم ان الاتنين محاسبين والاتنين طلعوا معاش وفاتحين بيتنا ده من تلاتين سنة لكن كلنا اصبنا بالعجز من تقسيم المعاش ابو ١٣٥ وللا حتى ٣٥٠ وقررنا نعتبر ان كل اصحاب المعاشات عندهم مصادر اخرى، يا اما حتة ارض صغيرة وللا بيت ايجار وللا طبعا واقعين تحت عين أصحاب القلوب الرحيمة وأهل الخير طالما الحكومة نظرها على قدها

يحرقك حكومة بنت كلب

قصره، مرة تانية وتالتة وعاشرة العمال هيبدأوا اعتصام مفتوح عشان يطالبوا الحكومة بتنفيذ حكم المحكمة بوضع حد أدني للأجر ١٢٠٠ جنيه، طبعا دا هيأثر على المعاشات كمان - لو مش هتقدر تعتصم مع العمال لظروفك الخاصة وكده، على الاقل تضامن معاهم، احكي للناس وقولهم لأن طبعا الاعلام مش هيغطي وهيحاول يشوشر عشان الملايين مايعرفوش -تابع اخبارهم - ولو قدرت تطل عليهم تبتسم في وشهم وتاخد لهم صورة بموبايلك ابو كامرتين وتفرج عليهم اهلك واصحابك واحبابك يبقى كتر خيرك

وربنا وربنا انا مش عارفة الحكومة دي بتنام ازاي؟ انا اعرف واحد مسك دولة عرضها عشرين تلاتين مرة من بلدنا، مسكها سنتين ومات بعدها على سريره، في السنتين دول كفى الشعب بتاعه لدرجة ان بيت المال بقى فيه فلوس مش عارفين يصرفوها على ايه.. فاقترح انهم يشتروا حبوب يرموها للطيور الحرة اللي بتعدي على سما بلاده العريضة واعتبرهم رعاياه.. والمنيلين دول مش عارفين يكفوا بلد صغيرة بيعيش اهلها في خمسة في الميه منها والباقي صحرا

دا الموقع اللي هينقلنا اخبار الاعتصام اول باول

7 comments:

  1. يحرقك حكومة بنت كلب????
    مش متعود اقرأ منك على كده

    أرجو انك تحذفيها

    ReplyDelete
  2. ارجوك ادخل على هذا الرابط انا قسمتها من زمان
    حكايه اب يقبض 200 ج
    http://qalbfars.blogspot.com/2010/03/200.html

    ________________
    وياريت تشيلى تدقيق الكلمات فى التعليق

    ReplyDelete
  3. متهيألي تعبير (حكومة بنت كلب )اكثر تعبير مهذب ممكن توصف بيه الحكومة دي

    ReplyDelete
  4. مجدي

    انا بعتذر لكل قراء بنت مصرية عن الشتيمة دي، واسفة اذا كانت جرحت حد، ولكن لم تخرج مني إلا من شدة انفعالي

    ReplyDelete
  5. ردا على اﻻبن مجدى متعودناش منك على هذه الكلمات . وﻻكن سوف التمسلك العذر ﻻنه فاض الكيل . . بالنسبة للمعشات بداية من 35 جنيه ضمان اجتماعى يصل بعضه الى 100 جنيه ﻻ يصل لمستحقيه اﻻصليين بسبب البحث اﻻجتماعى الكاذب من مكتب التضامن ولكنهم بذلك قضوا على اصحاب المعاش الحقيقيين الذين ﻻيملكون قوت يومهم فعلاوطبعاكلام حقىقى ليس اختلاق .. المفروض الزيادة فى المرتبات والمعاشات والتضامن الجتماعى تكون بالتساوى ﻻن الغلاءعلى الجميع. ربنا يصبرنا ويجعله فى ميزان حسناتنا

    ليلى

    ReplyDelete
  6. مش موضوع الأجور بس
    و المعاشات كمان!

    تخيلوا؟
    بابا مات من سنة تقريباً و مش عارفين نصرف معاش ليه لحد دلوقتي؟
    الحمدلله الحالة كويسة جداً
    لكن لو المعاش اتأخر في أسرة فقيرة لمدة سنة ايه اللي ممكن يحصل ؟

    ReplyDelete
  7. يعني أكثر الدول العربية بتعاني من نفس المشكلة.. الله يعين الجميع

    ReplyDelete