2/19/2011

النظام لسه بيلعب

فاكرين المصريين كانوا حلوين ازاي في الميدان؟ مسلم ومسيحي؟ إخوان ويسار وليبراليين وسلفيين وناس مالهمش فيها؟؟ ستات ورجاله؟ كبار وصغيرين؟

مش عايزين حد يفرقنا.. مش عايزين حد يوقع بينا

المؤامرة القذرة شغالة دلوقتي ودي ملامحها:

1- الكلام اللي ظهر اليومين دول على المادة التانية من الدستور، واللي مش وقته خالص، ومش من ضمن أولوياتنا نهائي نهايئ.. لكن الخلاف فيه دلوقتي بيخلق جو مشحون وتفرقة ماينفعش... أسامة سرايا لعنه الله ورد كيده عامل النهاردة في الأهرام استفتاء على المادة الثانية... دا وقته يا ابن الكلب؟؟؟؟؟؟

2- خروج مظاهرات لأخوة سلفيين ينادون بـ "إسلامية" "إسلامية"... بالذمة دا وقت الكلام دلوقتي؟؟؟ مين ورا الناس دي طلع في الوقت الحرج ده؟

3- إشاعات عن تجميد أرصدة "نجيب ساويرس" وطبعا كلنا عارفين غن نجيب مسيحي وكان مع الثورة إلى حد كبير

4- استمرار الكلام عن الإخوان كفزاعة ونوايايهم وخططهم، ولا كأنهم جزء من الشعب ده ولهم نفس حقوقه، لكن الكلام دلوقتي بصيغ التشكيك والتخوين دي لعبة قذرة جدا

لو ظهرت خطط أخرى هكتبها هنا... عشان خاطري خللوا بالكو.. الديول لسه بتلعب، والراجل الكبير والصغير في شرم الشيخ والصهاينة رايحين جايين عليهم زي ما هيكل بيقول، وشفيق لسه ماسك الحكومة وهو صديق مقرب لمبارك وعمر سليمان لسه في القصر الجمهوري وأسامة سرايا لسه رئيس تحرير الأهرام.. وخطة التفرقة وبث الفتن شغالة.... مش لازم نسيبهم يفرقونا أبدا.. الثورة حت عشان تسقط النظام بالكامل وتبني مصر جديدة

4 comments:

  1. يا زينب، إسمحيلي أعلق هنا عشان فجاة حسيت إن الناس كلها بقت عاقلة و أنا الوحيد المجنون.

    بغض النظر عن رأيي في المادة الثانية أو غيرها، أنا بس مش فاهم ليه فجأة الناس قررت إن مناقشة أشياء معينة مضرة بالثورة، هو مش إحنا أصلا عاملين الثورة ديه عشان الرئيس المخلوع كان مش سامح للناس تناقش و تعبر عن رأيها بحرية، طب ليه بقى نعمل إحنا زيه في الأخر و نقلده في قمع حرية التعبير؟
    و بعدين فكرة إن ده مش وقته دلوقتي، مش ديه برده كانت حجة الرئيس البليد و تابعة، لما كانوا بيقولو كل شوية الشعب المصري لسة عليه شوية على ما يتعود عالديموقراطية، و لازم نديله حريته على جرعات، ليه برده نعمل زيهم و نعتبر إن الشعب المصر مش متعود عالمناقشة لسة، و فيه حاجات لسة بدري عليه لما يناقشها و يقول رأيه فيها بحرية؟

    ReplyDelete
  2. يا طارق، تفتكر حد من اللي بيقول بلاش نتكلم دلوقتي يقصد يبقى ديكتاتور ويمنع الكلام؟

    الفكرة باختصار، نشوف مين اللي بيحرك الموضوعات دي عشان نعرف إذا دا بيصب في مصلحته هو وللا مصلحة الثورة. والكلام الكتير عن الثورة المضادة وتحركات مريبة من شخصيات في النظام القديم لسه موجودة مركبنا كلنا عفاريت :(

    ReplyDelete
  3. أولا يا طارق فعلا زي مانتا بتقول احنا عملنا الثورة علشان يبقي في ديمقراطية لكن زينب قصدها ان لازم يبقي في زكاء فالديمقراطية. الديمقراطية مش معناها ان أي حاجة ينفع تتقال فأي وقت. وبعدين في فرق كبير ما بين الديمقراطية و التخطيط لمناقشة أشياء معينة في وقت معين توءدي لرد فعل معين زي ما زينب حكت. وبعدين هيا متكلمتش علي مناقشة المادة التانية بس. هي اتكلمت علي حجات أهم و أخطر وهي اننا سيبين شلة العصابة لسة مسكه البلد. ياريت أسمع ردك علي ده.
    ثانيا انت مش مجنون ولا حاجة ولا احنا كلنا عاقلين البلد فيها مجانين كتير و عاقلين قليلين و افتكر انك واحد من القليلين..

    ReplyDelete
  4. معاكى حق يازينب لازم يخلوا بالهم من الثورة وميسمعوش كلام واحد زى حسانين هيكل وهو بيصفى حساباته ويقلول ان شرم الشيخ بؤرة وقدكذبه الجيش وقال فى العاشرة مساء لا يوجد فى مصر اى بؤرة ولابد ان يثقوا فى الجيش لانه مؤمن بالثورةويعمل من اجلها بارك الله فى جيشنا وحماه ليساندالثورة

    ليلى

    ReplyDelete