2/20/2013

كلام كتير

كأني لأول مرة بكتب في مدونة.. اتفاجئت إن ريتا وميساء قروا اللي بكتبه بقالي كام يوم.. اتفاجئت وانبسطت..

خسارة المساحة دي من التعبير سيبناها طواعية وانشغلنا بتويتر وفيس بوك لحد ما بقى الكلام القليل ماسخ ومتكرر ومجرد صراخ بيتكرر ويتردد في كل حدث ومصيبة وهوجة بنفس الطريقة ونفس التعبيرات ونفس قلة الحيلة..

مفيش هناك مساحة التفكير المتاحة هنا.. مفيش مساحة التحليل - مهما كان متواضع وبسيط أو ساذج - مفيش مساحة للتعبير بكلام كتير عن اللي جواك، من إمتى الكلام الكتير وحش؟ من إمتى الصورة بتغني عن الحروف والتفاصيل؟ عن الحدوتة؟

مثلا النهارده كان يوم حلو، أنا وريتا - صاحبة مدونة شموسة - رحنا قابلنا ميساء صديقتنا الأردنية صاحبة مدونة مياسي - اتمشينا في الزمالك واتكلمنا عن الشغل والسياسة والكتب والمزيكا والجواز والحب والسفر والرحلات والأكل.. جيبنا في سيرة سوبرماما والمصري اليوم والسينما دوت كوم والبوابة ومصر والأردن وفلسطين وسوريا وقطر والسعودية ومرسي وبشار ومبارك والإخوان وأحلام مستغانمي وإبراهيم عبد المجيد ومريد البرغوثي ورضوى عاشور والكب كيكس والوافلز والبيتزا والفول والطعمية والكشري واللاجئين والبنزين والدولار والتحرير والتحرش والإنفلات الأمني والشوارع والناس وساقية الصاوي والسجاير والشيشة وإليسا وهيفا وغادة عبد الرازق والولد بتاع كايروكي - اللي كلنا مابنحبوش - ومحمد محسن - أجمل صوت سمعته في حياتي - وديوان وألف والشروق وإزاي العلاقات معقدة بين الراجل والست وازاي حاجات كتير حوالينا اسمها فرعوني بس احنا مش بناخد بالنا وإزاي بيتزا توماس أحلى بيتزا في مصر كلها وازاي أسعار الأدوات المكتبية فيي قرطاسية غالية فحت وماتستهلش تمنها ده وإزاي السياحة مضروبة والناس حالتها صعبة رغم إننا بنتمشى في الزمالك اللي مش باين عليها حاجة.. موضوع واحد نسينا نتكلم عنه، الزمالك والتيشيرت الفوشيا.

المهم يعني، كل الكلام ده كله كنت أحكي إزاي عنه في مكان غير هنا؟

7 comments:

  1. طب الحمد لله ما جبتوش في سيرتي............ انتم مسبتوش حد ماجبتوش في سيرته ....
    طبعا سيبقي التدوين وستبقي المدونات مساحة للتعبير عن الراي وفضفضة أفضل بكثير من الفيس بوك وتويتر اللي بحس انه باقة زحمة أوي من كثر الاخبار والتعليقات اللي ليها لازمة واللي ملهاش لازمة ..

    بالتوفيق إن شاء الله

    ReplyDelete
  2. ايه هو التيشيرت الفوشيا هادا؟؟؟؟

    ReplyDelete
  3. والله معاكى حق كلامك جميل (y)

    ReplyDelete
  4. ما شا الله يازوبه احلي لمة كاني اتمشيت معاكم سلمي لي علي ميساء وتحياتي لك كمان ولشموس :)
    انا كمان رجعت ادون
    امكن يوم ارجع اندم علي اللي بكتبه بس حالاُ مستمتعه بيه
    كوني بخير
    علا

    ReplyDelete
  5. وهو الغطس يبقى غطس غير لما ننزل للعمق؟ عمر ما الغطاس بيقف عند الحاجات الكتير ال على السطح .. بيفضل ينزل ينزل عشان عارف إن العمق فيه الشعاب الفريدة ال مافيش زيها ..

    يارب ما تحرمنا من الأعماق ال بنحب نزورها :)

    شكراً على التدوينة الحلوة .. شكراً عشان أخذتينا معكِ لأعماق أروع

    ReplyDelete
  6. Btw ya Zei, I read it too. I just visit the reader less frequently :)

    ReplyDelete