4/03/2013

عن الحجاب واللي بيقلعوه

مبدأيا، دي محاولة للأمر بالمعروف والنهي عن المنكر.

كل أسبوعين تلاتة أسمع إن واحدة خلعت الحجاب، وفي أسبوع منهم سمعت عن ٣ خلعوا الحجاب.. وموضوع "البنات بقت تقلع الحجاب" ده بقى منتشر.

وابتدا يبقى في كلام واتهامات للبنات والمجتمع إن الدين بيقل، ومناقشات - أحيانا حادة - بين المؤيدين للحجاب والرافضين ليه

السؤال بقى، ليه الموضوع قالب دراما كده؟

أولا، هتكلم عنه بإسمه الدارج في عصرنا "الحجاب" ومش هدخل في مناقشة بيزنطية - محببة إلى نفسي الحقيقة - عن مسألة اللغة والمصطلحات في الزي الإسلامي

قبل ما أتحجب، كنت لبست وقلعت الحجاب ١٠٠ مرة.. بجد. يعني النهاردة برد ألبسه، النهارده حر أقلعه، النهاردة الإيشارب ده لايق على لبسي ألبسه، النهارده عندنا خروجة أقلعه، وكنت معتبرة نفسي "محجبة" خلاص، ما أنا "لبست الحجاب".. بشكل يومي وأسبوعي كنت أقلع وألبس الحجاب. ولا حد كان مركز معايا وبيراقب أنا بلبس إيه وبقلع إيه، ولا عمري سمعت كلمة "إنتي قلعتي الحجاب؟؟" ولا "إنتي لبستي الحجاب؟؟" ولا حاجة خالص. وحاليا عندي القدرة إني أقدر أفضل لبساه كل يوم :D

أهو الحجاب بالظبط هو ده حجمه، زي ما بنت صغيرة كانت بتلبسه وتقلعه من غير ما حد يعلق أو يستفسر أو يتصعب عليه أو يربطه بتصرفاتها وأخلاقها.

احنا بقى مابنعملش كده للأسف مع الحجاب. مع إن مثلا لو حد بيصلي قدامك ركعة ومابيصليش التانية انت ما بتعلقش عليها، وأقصى حاجة بتقول في سرك "ربنا يهديه".. ولو كدب مرة مابتقطعش علاقتك بيه، ولو غش حد قدامك بتنصحه وخلاص من غير ما يترتب على ده حكم عام على شخصيته.. مع إن ترك الصلاة والكدب والغش أسوأ ألف مرة من إخفاء الشعر..

ما احنا لو حطينا الحاجات في حجمها الحقيقي، من غير ما نبص لها عبر المكبر المجتمعي اللي بيساوي الحجاب بالصلاة، ويقول للستات مش هتدخلوا الجنة من غير الحجاب، وكل ما يتكلم في درس دين يقول للراجل يصلي ويصوم ويتزكى ويحج، ويقول للست إلبسي الحجاب.. لما بقت الست الكويسة هي الحجاب والحجاب هو الست الكويسة.. لحد ما بقينا مجتمع بيلخص كائن كامل بكل ميزاته وعيوبه وقدراته وهفواته وجرائمه في فعل واحد! 

اتعلمت أكون أهم من حجابي..

ما هو كمان، الحياة امتحان أصلا، واحنا هنا بطول عمرنا في اختبار، وشد وجذب.. وقوة وضعف، ولين وشدة، وتراخي وعزم.. دي العلاقة بين العبد وربه، سيبوا الناس بقى تعيش العلاقة دي زي ما هي عايزة وزي ما هي قادرة، الطرف التاني - ربنا - أكبر وأعلم مني ومنك بالعلاقة اللي بينهم وبتفاصيلها ومبرراتها ومرجعياتها، ربنا أعلم بقلوب وعقول الناس وطريقة تفكيرهم وخلفياتهم الاجتماعية والثقافية وقدراتهم وميولهم، ربنا خلقنا مختلفين ودي سنته وحكمته، ربنا عارف القلوب وانت مش عارف، ربنا عارف فلانة اللي محجبة دي أقرب له من فلانة اللي مش محجبة وللا العكس، إنت مش عارف.. بجد يعني، احساسك إيه لما تبص لواحدة مش محجبة من فوق لتحت وهي عند الله أحب وأقرب منك؟

في بنات بتقلع الحجاب عشان بعد قرايتها واطلاعها اقتنعت إن الحجاب مش فرض. تفتكر من المنطقي ساعتها إنها تلبسه عشان المجتمع بتاعها مقتنع إن الحجاب فرض، وتعصي قلبها وقناعتها اللي ربنا أصلا هيحاسبها عليهم وعلى نيتها؟ يرضيك تلعب دور المرائية عشان ترضي المجتمع؟؟ حلو الغش والخداع!!

لما واحدة تقرر تكدب على المجتمع عشان ترضيه فهي بتكدب على نفسها والأهم هي بتكدب على ربنا، وفي الآخر بنلاقي نفسنا عايشين في مجتمع مريض بأخلاقه مش بمظهره.

بلاش، في بنات بتقلع الحجاب وهي مقتنعة بإنه فرض بس مش قادرة حاليا تلتزم بهذا الفرض، ليه حضرتك تيجي تنكد عليها وتكسر في مقاديفها وتسمعها كلام يؤلمها؟ وتحسسها إنها خرجت من الملة وإن مالوش لزمة الصلاة اللي بتصليها والمعاملة الحلوة اللي بتعاملها للناس لأن مابقاش منها رجا وربنا مش هيتقبلها في عباده الصالحين؟!! أرجع وأقول ليه أصلا تتدخل في علاقتها بربنا؟

مع الأسف، في بنات غير محجبات بشعر أحيانا إنهم بيحاولوا يظهروا إلتزامهم الديني "صلاة - صوم - .." عشان الناس ماتعلمش عليهم لمجرد إنهم غير محجبات.. ما ده بردو بيحط عليهم ضغط ومجهود مافيش داعي منه، وبيأثر - إن لم يكن يشوه - العلاقة بينها وبين ربها للي بتصلي له وبتصوم له.

والنبي، وحياة أبوكو، ابعدوا عن علاقة الناس بربها، سيبوهم يعبدوه على قد ما يقدروا، سيبوهم يبعدوا ويقربوا ويحتاروا ويرجعوا.. سيبوهم في كل لحظة يكونوا صادقين مع نفسهم وفي كل مرحلة من العلاقة أمناء غير مخادعين، عشان لو قبضت أرواحهم ربنا هيحاسبهم على نياتهم .. ساعدوهم تفضل نياتهم طيبة.

وكله كوم بقى، وإنك تقرر تشتغل أو تعين أو تساعد واحدة بناءا على هي محجبة وللا مش محجبة.. هتروح من ربنا فين وإنت قررت تحاسب مكان ربنا وتحكم على الناس وتجزي كمان.

وكمان الرجالة اللي معتبرين حجاب زوجاتهم مسئوليتهم الشخصية، ويقرر إنه "هيحجب" خطيبته لما يتجوزها، على أساس إنها رجل كرسي. "حبيبتي أنا عامل لك مفاجأة جوازنا دستة إيشاربات من تاي شوب"

نرجع لجزئية انتشار خلع الحجاب اليومين دول. عادي يعني، شىء متوقع، رد فعل إنساني وطبيعي في مجتمع مفتوح بعد ثورة - دي حاجة حلوة على فكرة - ابتدت ثقته تتهز في رموز إسلامية وحركات إسلامية - بسبب حركاتهم النص كم - وده طبعا هينعكس بشكل مباشر على شريحة من الناس الحجاب بالنسبة لها إلتزام اجتماعي، أو حتى رمز لتوجه ديني مابقوش مقتنعين بيه.. أيوة هي دي الحقيقة، تصرفات الحركات الإسلامية في مصر هتكون السبب في إما للأسف رفض ناس كتير للدين ككل، أو اللجوء لرفض الشكليات اللي في الدين لأنها بترتبط بالمظهر الشكلي للحركات الإسلامية المرفوضة دي والتعويض عنها باللجوء لكل ما هو ليس شكلي في الدين (ودي حاجة إيجابية - بس هتكون أندر من الفرض الأول لأننا مجتمع مشوه بالأساس)

من كل قلبي بتمنى المجتمع يفضل مفتوح ويزيد انفتاحا، ميبقاش فيه تيار مسيطر.. فرصتنا نتعلم تقبل الآخر، فرصتنا نراجع أفكارنا واللي اعتبرناه مسلمات، فرصتنا نتعلم احترام حكمة ربنا في اختلافنا، فرصتنا نرتبط بربنا عشان بنحبه مش عشان المجتمع عايز كده.

والخلاصة، المرأة كائن أجمل وأروع وأكثر عمقا وتعقيدا من إنه يتلخص في "أصلها مش محجبة!" أو "أصلها محجبة!".

69 comments:

  1. Well said and written ya Zei :)

    ReplyDelete
  2. البرنسيسة نهى بتقرا البلوج المتواضع بتاعي وبتعلق كمان! يا ألف نهار أبيض :P

    ReplyDelete
  3. Well I agree with the first part of your piece but would you take a look at this blogpost http://deppys.wordpress.com/2011/09/27/hijab-removed/ it has a narrower analyzing point.

    It's wrong that people judge, generalize the whole religious standpoint and scold who take it off but also being open minded about it is wrong. cause that's exactly how basics change, and we're talking about religion basics, if we wanna embrace it we should keep that in mind.

    «من رأى منكم منكراً فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان»

    ReplyDelete
  4. ده بس عشان انت مخك كبير وقلبك محب .. ياريت الناس كلها كده
    استمتعت بالقراية قوي ، حضن كبير
    :)
    دينا

    ReplyDelete
  5. منورة يا ديدو، حضن كبير قد الدنيا، وياللا نخرج سوا بقى :)

    ReplyDelete
  6. الله عليكي. بالمناسبة أنا قلعت الحجاب من يومين بعد تسع سنين. لكن فجأة حسيت اني كنت لابساه عشان المجتمع عايز كده وكنت حاسة اني منافقة. دلوقت بقالي يومين بس لكن قادة احمد لله اواجه المنتقدين واللي بيبصولي وهم بيمصمصوا شفايفهم. مش مهم انا حاسة ان ابواب الطاعة لربنا كتيرة اوي. دلوقت انا عندي ارادة في عبادة ربنا واخذت علي نفسي عهد اني انقي نفسي وضميري واجتهد في علاقتي بيه عشان اكون جديرة باني مسلمة من غير تقييد الايشارب اللي اصلا من جوايا كنت رافضاه. شكرا علي مقالك الرائع

    ReplyDelete
    Replies
    1. :( :( ربنا يهدينا يارب

      Delete
    2. طب هو سؤال بريء والله بس والنبي ما تفهمي كلامي غلط او انه تدخل في شئونك ياريت لو انتي شايفة تعليقي بجد هو انتي مكنتيش تعرفي تبقي مؤمنة صالحة ومسلمة بجد ومسلمة من غير رياء او نفاق ايام ما كنتي لابسة حجاب ؟؟؟ يبقى حاجة من الاتنين يا اما كنتي فاهمة الحجاب غلط يا اما مكنتيش مقتنعة به في الحالة الاولى المفروض تعرفي ان المحجبة لازم يتوافر فيها الشروط الحلوة والجميلة اللي انتي قولتي عليها دي كلها :) مينفعش تبقى محجبة ومش بتصلي او حتى محجبة وبتكدب مينفعش ده غلط وكان المفروض تقفي على ده انما لو انتي شايفة ان الحجاب مش من الاسلام او انه تقييد يبقى أنصح حضرتك تقري أكثر الحجاب مش مجرد ايشارب يا فندم او تقييد :) ياريت تتقبلي نصيحتي بصدر رحب يا فندم والناس اللي بيمصمصو شفايفهم دول متزعليش منهم لربما هم كمان زعلانين انك مقدرتيش تثبتي عليه بس لكن مش تدخل في حريتك يمكن الواحد فيهم نفسه يقولك او ينصحك بانك تلبسي الحجاب تاني ياريت بجد متزعليش من كلامي انا والله ما اقصد اضايقك او حتى اتدخل في شئونك في النهاية القرار ليكي :) وانتي اللي هتتحاسبي قدام ربنا لوحدك لو انتي مش مقتنعة يبقى خلاص اعتبري كلامي مش موجود اساسا :) تحياتي ليكي :)

      Delete
  7. يسلم فمك يا بنت الناس الطيبين!

    ReplyDelete
  8. one of the best articles
    والنبي، وحياة أبوكو، ابعدوا عن علاقة الناس بربها، سيبوهم يعبدوه على قد ما يقدروا، سيبوهم يبعدوا ويقربوا ويحتاروا ويرجعوا.. سيبوهم في كل لحظة يكونوا صادقين مع نفسهم وفي كل مرحلة من العلاقة أمناء غير مخادعين، عشان لو قبضت أرواحهم ربنا هيحاسبهم على نياتهم .. ساعدوهم تفضل نياتهم طيبة.

    ReplyDelete
  9. كلام رائع وحقيقي وطالع من القلب وقلتي اللي عايزية اقوله. تحياتي :)

    ReplyDelete
  10. وكمان يا اخت زى ياما كان فى بنات محجبة ومنتقبة كمان بيعملوا حجات مشينة البنت اللى مش محجبة مش بتعملها. فالموضوع ملوش دعوه بحجاب وغيره, وبعدين زى ما حضرتك بتقولى ما كل واحد يخليه فى نفسه يعنى لو كل واحد انشغل بعيوبة اكيد مش هيعد يركز فى مشاكل الناس بس للاسف دى مشكلة المجتمع بتعنا اللت والعجن

    MoF:)

    ReplyDelete
  11. كلام رائع وحقيقي وطالع من القلب وقلتي اللي عايزية اقوله. تحياتي :)

    ReplyDelete
  12. حلوة أوى يا زى :)

    ReplyDelete
  13. كلام رائع وحقيقي وطالع من القلب وقلتي اللي عايزية اقوله. تحياتي :)
    Moushira Saleh

    ReplyDelete
  14. 1st time to read for you...very well said ...GOD bless u...hope people would understand and stop being judgemental

    ReplyDelete
  15. بس النصيحة شيء لابد منه يا يا زينب ومينفعش واحدة تقلع الحجاب لمجرد ن الحركات الاسلامية مخطئة في السياسة او لها مواقف مش بنتفق معاها ايه ده معناه ان المحجبة مكنتش لابسة الحجاب عن اقتناع اساسا وبتلاقي اي حجة لخلعه لا اكثر ولا اقل .... انا واحد مش بحكم عل البنت من خلال لبسها ولو اتجوزت بنت مش محجبة ولا اقدر افرض عليها تلبس ايه ومتلبسش ايه بس النصيحة شيء مهم في حياتنا يا زينب :) :) وبعدين المشكلة مش مع اللي ممكن تقلع الحجاب المشكلة الاكبر في ان اللي تقلع الحجاب تبرر ده دينيا هي عايزة تقلعه هي حرة وانا هحترمها مفيش شك بس ليه تبرره دينيا ما ممكن تخلعه وخلاص ملوش لازمة بقى نقول ان الحجاب مش فرض :) هي مش هتستفاد حاجة لما تقول كدة :) ولكن هي حرة مش هنمسك لسان حد ربنا يهدينا جميعا :)

    ReplyDelete
  16. LIKE sooooooooooooooo FREAKIN much :)

    ReplyDelete
  17. شوفي يا حبيبة قلبي
    بالنسبة لخلع الحجاب أو ارتدائه فهو مش مشكلة خالص لو حضرتك في دماغك نماذج من النساء اللي بتغذي عقلك بشكلها لو عندها شعر منكوش أو متسرح أو حالقة شعرهاأقرع أو حتى لفاه بكوعبيرة فوق راسها علشان شعرها وحش.

    لكن بقى لو حضرتك عندك القدوة والنموذج اللي بتتبعيه من أجل أن تنجي من مفاتن الدنيا اللي لازم تعرفيها برضو على حقيقتها بإنها بابان واحد دخلتِ منه والتاني هتخرجي منه إن قريبًا أو بعد عمر طويل
    لو عند حضرتك القدوة دي النساء المؤمنات أمهات المؤمنين رضوان الله عليهن أجمعين اللي ربنا أمرهن بالحجاب علشان كل بنات جنس حواء تستتر وترتديه يبقى هتسعي جاهدةً بكل ما أوتيتِ من قوة وعلم وبأس أن ترتديه وتطبقي هذا النموذج.

    الحياة صنفان من الناس
    واحد بيعمل لدنياه قوي قوي قوي ومرتب روحه على كدة وبيسعى لجمع المال والجمال والعلم والشهرة
    وواحد تاني بيعمل لدنياه مع إنه ينتظر الموت في أي لحظة يأتيه وبيتقي الله جدًا
    فيا إما تختاري تكوني مع اللي بياخد كل حاجة في الحياة الدنيا اللي بيبص تحت رجليه
    أو تختاري تكوني مع اللي بيفوزوا في الدنيا بإنهم يطيعوا ربنا وفي نفس الوقت يحاولوا يعيشوا بنفس المتع والقدر من التسلية الموجود في حياة الصحابة والأنبياء بصورة مشروعة ما فيهاش مخالفة لربنا برضو.
    أهم حاجة تنبهي نفسك قبل ما يأتيكِ الموت في أي وقت لا تدرينه.
    وتعملي حسابك إن ربنا خلقك علشانه حتى جسمك اللي هتغطيه أو لا ربنا خلقه من أجله: وما خلقت الجن والإنس إلا ليعبدون

    قل إن صلاتي ونسكي ومحيياي ومماتي لله رب العالمين وبذلك أمرت وأنا أول المؤمنين.

    ReplyDelete
  18. Ya ziiii... Wot I really like about dubai... No body is judging... U can see a fully covered women beside half naked women and nobody will notice or poibt it out... The only thing I really love her that u have the freedom to be wot u want to be and look the way u r convinced with with no judgment or even no body care to watch or look u out from head to toe... I dont agree with some parts of ur article... Bass over all u made a valid point :) luv it

    ReplyDelete
  19. روعة! كل الكلام اللي نفسي أنا وناس كتير نقوله. ربنا يهدي الجميع ويبعد عننا مفتشين النوايا ونواب ربنا

    ReplyDelete
    Replies
    1. ويارب نقرب اكتر من الدين

      Delete
  20. الفكرة جميلة وأسلوب بسيط وممتع كالعادة . تسلم إيدك .

    ReplyDelete
  21. انتي ببساطة عايزة الناس تبطل تأمر بالمعروف او تنهي عن المنكر... كون ان الانسان يعمل الحاجة عن اقتناع دا شئ جميل بس دا مش معناه اننا لازم نقتنع بامر ربنا الاول و الا مش حننفذه

    الدين مش بالعقل و الا زي ما سيدنا علي قال "لو كان الدين بالعقل لكان مسح أسفل الخف أولى من أعلاه"

    انا عارف ان نيتك خير :) بس ان الناس تحاول تساعد اللي مش محجبة و تقنعها بالحجاب دا مش شئ وحش ابدا
    النبي (صلي الله عليه و سلم) قال:
    (لا تزال أمتي بخير ما أمروا بالمعروف ونهوا عن المنكر" وتعاونوا على البر والتقوى، فإذا لم يفعلوا ذلك نزعت منهم البركات وسلَّط بعضهم على بعض"

    كمان مش احنا اللي بنقول الحجاب فرض و لا مش فرض .. الموضوع مش بالدماغ في ناس شغلتهاالدين و اكتر قدرة علي الافتاء في امور زي اي علم تاني

    دا كان التعليق اللي كنت حابب اقوله بعد ما قريت المقال :)

    ReplyDelete
    Replies
    1. متفقة معاك إن أمر ربنا ينفذ بدون اقتناع. الاقتناع اللي اقصده هي الأقتناع بالأدلة إن ده أمر من ربنا وللا لأ. زي حاجات كتير في الدين مختلف عليها بين العلماء. اعمال العقل هنا في اثبات الدليل وغيره.

      اتمنى تكون النقطة دي وضحت :)

      Delete
    2. بس الحجاب مفيش عليه خلاف ده على اساس ان الازهر هو المرجعيه الاسلاميه هندنا كمسلمين وسطيين

      Delete
    3. لأ طبعاً هو رأي الأغلبية لكن فيه ناس حتى في الأزهر نفسه مختلفين، و فيه ناس و أنا منهم مش معترفين أصلاً بفكرة المرجعية - ، ممكن يكون مرجعيتك إنت لكن ده مش معناه إنه مرجعيتي أنا.

      Delete
    4. سيبوكو من الاغلبية بجد والرمجعية هو سؤال بسيط انتو شايفين ان الحجاب مش فرض غلط يا جماعة التفكير ده الاختلاف اللي كان في الازهر هو في شكل الحجاب فقط يعني هل هو النقاب ولا غطاء الرأس واللبس الواسع عموما دي الفكرة يا جماعة بس :( لكن محدش قاريء في علوم الدين ومتوسع في تفسير القران يقدر يقول ان الحجاب مش فرض طب زوجات الرسول والصحابا كانو بيرتدوه ليه ليه ربنا امرنا به في مناسك الحج والعمرة مينفعش يا زينب نقول ان الانفتاح شيء كويس ونشجع دا اولا اللبس ومظاهرة ملهاش علاقة بالانفتاح كان نفسنا بعد ثورتنا نلاقي ناس تفكر في الانفتاح باسلوب تاني باسلوب مختلف بعيد عن موضوع اللبس وثوابت الدين ايه المشكلة لو بناتنا كان مظهرهم زي جوهرهم :( هو انا مينفعش اشوف الحاجتين في بنت واحدة اساسا من شروط الحجاب ان المحجبة تبقى محجبة حتى في اخلاقها :) ربنا ينجينا من الفتن

      Delete
  22. chapeau :) I so agree with you ..it was never about that extra 1.5m of cloth ! bravo Zee

    ReplyDelete
  23. I've always said that Hijab in our socities is overrated because of the general look to women in the society.

    Glad to see someone addressing the issue from this point of view away from "girls wearing hijab sometimes do horrible things bla bla bla ..."

    ReplyDelete
  24. طيب 1- كلام جميل لكن الله عز و جل قال"الرحمن علم القران" فهو وضع لنا منهج نمشى عليه زى مفية الصلاه و الصوم و الزكاة فيه الحجاب و الجهاد و الامر بالمعروف و النهى عن المنكر و لو سلمنا ان دول كلهم كده من الاسلام يبقى كلام زينب جانبها الصواب لان هى بتقول للمجتمع ملكوش دعوه باللى بتقلع الحجاب ممكن تكون اقرب عند ربنا و هى بتقول كده من باب الامر و النهى ... صح؟ فى حين ان بردوا انا من دينى انى لما اشوف واحد بيشرب سجاير اقولة حرام و محدش ساعتها هيقولى سيبه يمكن يكون عند ربنا احسن منك

    هو احسن منى فى كل حاجه ماعدا دى لانها معصيه معلومة و بما انها معصية معلومه يبقى انا وجب عليا الانكار لقول النبى صلى الله عليه و سلم "من رأى منكم منكرا ...."

    2- مين قال و حصر التزام الست بدينها فى الحجاب، يمكن بس بيفهم كده مش شده التأكيد على الموضوع ده لان الموضوع ده فى انتشارة افساد للغير يعنى ذنب متعدى للغير مش لازم بالنفس. و اللى بيحصر التدين للست بالحجاب غلطاااااااان.

    3- النفس ربنا فطرها على حب الشهوات، و من شهوات النساء الانطلاق و الحرية و التزين، لكن ربنا شرّع شرع لاختبار النساء خاصة زى موضوع الحجاب و الجهاد للرجال و باقى الشرع للناس على السواء فمن البديهى ان كل واحد يميل للشهوه اللى نفسة تقوله عليها و يبقى هنا دور الانسان فى الانقياد للشرع، قال تعالى"وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم ومن يعص الله ورسوله فقد ضل ضلالا مبينا"

    4- الحرية للمسلم مقيدة بضوابط العبودية، يعنى انا حر على اتخن تخين فى الكون ده وزير كان ام غفير او ملك او مرسى حتى، لكن مع الله انا عبد فقير، يمين يبقى يمين، شمال يبقى شمال. ممكن يبقى يمين و اروح شمال بس فى الاخر ابقى عارف انى بعمل غلط مش اقول لا انا حر امشى شمال براحتى

    معلش طولت عليك :)

    ReplyDelete
  25. أنا بتفق معاكي ان الواحد ما ينفعش يدخل في علاقة ربنا بالخلق دي علاقة خاصة اوي بين كل واحد فينا و بين ربه بس عندي نقطة خلاف صغيرة... هو ليه اصلا الواحدة تلبس حجاب عشان تبقي متماشية مع المجتمع و تعقيداته و كأن المجتمع فرض عليها الحجاب؟ علي فكرة المجتمع ما فرضش حاجة علي حد اللي عايزة تتحجب بتتحجب و اللي مش عايزة بلاش مصر فيها المحجبة و الغير محجبة، اللي بيصلي و اللي ما بيصليش، المؤمن بدين و المؤمن باللا دين و اللي بيلبس جينز و اللي بيلبس بدلة كل الاختيارات موجودةو كل واحد حر في اختياره... اللي عايزة تقلع الحجاب تقلعه بس ما تعلقش المسئولية علي المجتمع... و برضه اللي عايزة تلبسه ما تقولش عشان ارضي مجتمعي و طنط فلانة و طنط علانة

    و متفقة معاكي ألف مرة ان التدين و القرب الي الله ما يتلخصش في حتة قماشة علي الشعر العلاقة مع ربنا اكتر من كده بكتير بس السؤال: هي لو كانت لبسته عشان المجتمع فالمجتمع يعيش فيه ناس من كل الاطياف و في اماكن غنية و فقيرة و ناس كتير مش محجبة ما فرضش حاجة علي حد

    و لو اتحجبت عشان ترضي ربنا و كخطوة لتوطيد علاقتها بربنا فهتعمل كده سواء فريضة او مش فريضة يكفيها انه احد اوامر ربنا ليها حتي لو ماكانتش شايفة منطق وراه اوي (ما حدش عشان يصلي بيسأل اشمعني العصر أربع ركعات و المغرب تلاتة) المؤمن ربنا اداله حق اعمال عقله (أولوا الالباب) لكن فيه حجات من حبك لربنا هتنفذيها حبا فيه و زهدا و تقربا ليه

    اخر نقطة انا متفقة معاكي برضه ان الاسلاميين لا يمثلوا الاسلام بنكلة و خلوا ناس كتير ينفروا من الدين و لكن ده ما يخليش النفور ده حاجة حلوة زي ما بتقولي... الحلو ان الواحد يفكر و يحلل باسلوب موضوعي يوصله للصواب بعقله و قلبه... مش يرفض كل ثوابت و مبادئ و يكفر بيها عشان شوية ناس تانيين بيشوهوها و هم اجهل الناس بالدين

    ReplyDelete
    Replies
    1. you said it all, excellent point

      Delete
    2. هو فعلا بنات كتير لبست الحجاب علشان مقتنعه بيه ومش شايفة المجتمع فرضه
      يمكن بس خلعه الي الناس بتعلق عليه
      ازاي كلامك يبقي صحيح في اطار '' الامر بالمعروف واالنهي عن المنكر ''
      انا عارفة ان الطريقة بتكون مش حلوة بس نوقف خالص؟

      Delete
  26. فكره ان كل واحد حر في المعصيه التي لا تؤذي الاخرين

    لا اعلم ولكن لا يجب غلى كل حال التشجيع على الخطأ الواضح والا لم يكن الحساب على الجهر بالمعصيه اغلظ

    ومع ذلك فانا مع عدم الحكم بالمظهر دون تشجيع على الجهر بما يخالف الشرع

    ReplyDelete
  27. This comment has been removed by a blog administrator.

    ReplyDelete
  28. ( يا أيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفوراً رحيماً ) - الأحزاب: 59

    ReplyDelete
  29. ( قل للمؤمنين يغضوا من أبصارهم ويحفظوا فروجهم ذلك أزكى لهم إن الله خبير بما يصنعون . وقل للمؤمنات يغضضن من أبصارهن ويحفظن فروجهن ولا يبدن زينتهن إلا ما ظهر منها وليضربن بخمرهن على جيوبهن ولا يبدين زينتهن إلا لبعولتهن أو آبائهن أو آباء بعولتهن أو أبنائهن أو أبناء بعولتهن أو إخوانهن أو بني إخوانهن أو بني أخواتهن أو نسائهن أو ما ملكت أيمانهن أو التابعين غير أولي الإربة من الرجال أو الطفل الذين لم يظهروا على عورات النساء ولا يضربن بأرجلهن ليعلم ما يخفين من زينتهن وتوبوا إلى الله جميعاً أيها المؤمنون لعلكم تفلحون ) - النور: 30/31

    ReplyDelete
    Replies
    1. تفسيرك للأية غير تفسيري، أنا شخصياً شايفة أمر بتغطية الصدر و مش شايفة سيرة الشعر خالص، ممكن إنت تكون شايف إن ربنا لما أمر الستات يغطوا صدرهم كان قصده و شعرهم كمان، بس دة رأيك إنت و أنا رأيي مختلف.

      Delete
    2. هو الموضوع برايي و رايك ولا رايه ...احنا اصلا مش مؤهلين اننا نفسر أية واحدة ..فيه ناس هي اللي عليها الكلام ده و لو مختلفين في حاجة فيه دار افتاء ....لكن غير كده محدش يفتي من نفسه

      Delete
  30. اقرب حاجة بالنسبة لرايى فى الحجاب خصوصا جزء تحوله لفرض اجتماعى مش دينى

    ReplyDelete
  31. احييكى...كلام لازم الناس تتمعن فيه من غير تشنج ...مبسوطه جدا انى دخلت على البلوج ده واكتشفت امخاخ حلوه تحياتى

    ReplyDelete
  32. سلام عليكم

    مبدأيا متفق مع إن ربنا وحده أعلم مين الأقرب له ، المحجبة وللا اللي كاشفة شعرها، كل واحد بينه وبين ربنا حاجات محدش يعرفها..
    ومتفق إن مينفعش أقيم الناس بناء على تصرف واحد أو فعل واحد بيعملها أو مبيعملهاش

    ومينفعش أقرر أنا هاحترم بني آدم أو أقرر إني أساعده وللا لأ بناء على لبسه أو تدينه أو دينه أصلا

    فيه كذا حاجة بيتهيألي لازم تحصل عشان الموضوع ده يتحل.
    أولا كده كده هيفضل فيه ناس مش مقتنعة إنه فرض، زي اللي بييجي يقول يا عم الشيخ فلان قال السجاير متفطرش في رمضان ، خلاص إذا هو مقتنع وضميره مرتاح خلاص

    بالنسبة للبيت والمجتمع، كلمة "حجاب< بيحصلها أبيوز.. . ممكن نستخدم كلمة إيشارب، غطاء الرأس ، أي حاجة .. بس مجرد تغطية الشعر مش حجاب
    لما نيجي نفهم بناتنا يعني ايه (حجاب) نقولهم انه الحشمة وستر الجسد وشروطه، كل واحد بقى ومذهبه في الشروط دي .. مش لازم تبقى عاملة كل حاجة بيرفكت وصح 100% بس عالأقل عاملة الأساسيات
    يعني اللي بيصلي مش هيعرف يجيب شوط وأركان وسنن الصلاة كلها من جلسة معينة ودعاء كامل وصيغة معينة وهكذا بس عالأقل يقول الفاتحة عشان الصلاة تتقبل!!
    الحجاب يعني الستر والحشمة، ده الأساس لو مجاش الشعر دلوقتي مش مشكلة ممكن ييجي بعدين بس نبدأ بالحشمة مش بالشعر.. نبدأ بالحشمة وباحترام البني آدم لنفسه سواء في أخلاقه ، كلامه، مشيته ، لبسه، وهكذا
    مش أبقى مغطي الشعر والباقي ربنا أعلم بيه
    مش أبقى مغطي الشعر وتصرفاتي يندى لها الجبين

    واحترم النفس والبعد عن الابتذال مبدأ للرجل والمرأة مش للمرأة بس، وإنه الحشمة هي اللي بتقوي فكرة إن الإنسانة دي عندها عقل وروح مش مجرد جسد (وليس العكس، زي ما بعض المتحررن بيقولو)

    للأسف كل الكلام السابق ده لما بيتقال بيتفهم غلط وهيتقالك بالذات لو انت ولد: انت بتكفرنا، يعني احنا مش محجبات، يعني مش عاجبك حجابنا، نعمل ايه يعني، ده اللي موجود في السوق، إلخ
    وكله بينسى إن القضية مش موضوع (يعجب) حد وللا رأي حد أصلا ، الفكرة كلها في أمر ربنا اللي معناه متلخص في الحشمة وإن كون إن المجتمع فرغ كلمة حجاب من معناها الحقيقي ده مش معناه إننا مضطرين نجامل المجتمع والستات

    بيتهيألي لو علمنا الناس وولادنا الدين صح وسيبنالهم حرية الاختيار هنرتاح من حاجات كتير ، هنرتاح من ضغط الأهل على البنات عشان يلبسوهم الحجاب (صحيح أقل بس لسه بيحصل) لأن في الآخر الجيل الأصغر مش هيغلب في إيجاد طرق للمقاومة وإن هي تتفنن في اللبس وتحول الحجاب اللي هي لابساه لقماشة على نص الشعر لا تستر

    مختلف في موضوع أهمية الحجاب ومقارنة الفرائض ببعضها، عمري ما سمعت حد بيقارن الحج بالزكاة مثلا مين اهم من التانية، هو فرض يكفي أن الله أمرنا به لأن الكلام ممكن يتفهم إنه تقليل من شأن الحجاب (باتكلم عن الحجاب اللي بجد)

    شكرا

    ReplyDelete
  33. اسمحي لي اعلق علي المقال:

    1- الحجاب فريضة. و كما جاء في هذه الفتوي http://www.islamqa.com/ar/ref/69432
    "ولا بد أن نعلم أن الحجاب فريضة من الله تعالى على المسلمة، ثبتت فرضيتها بمحكم القرآن ، وصحيح السنة ، وإجماع الأمة بمختلف مذاهبها ومدارسها . لم يشذّ عن ذلك مذهب ، ولم يخالف فيه فقيه ، واستقر عليه العمل فيما مضى من قرون الأمة ، قال تعالى : ( يَاأَيُّهَا النَّبِيُّ قُلْ لأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ ذَلِكَ أَدْنَى أَنْ يُعْرَفْنَ فَلا يُؤْذَيْنَ وَكَانَ اللَّهُ غَفُورًا رَحِيمًا ) الأحزاب/59 . وقال تعالى : ( وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلا يُبْدِينَ زِينَتَهُنَّ ) النور/31 ."ا.ه

    2- نعم نحن لا نعلم من أقرب إلي الله. و لا نعلم بم يختم لنا او هل نحن من اهل الجنة أم من أهل النار و لعياذ بالله. و لكن هذا لا يعني أن نترك الأمر بالمعروف و النهي عن المنكر. بل أن من تمام حبك لأختك المسلمة أن تحزني لنقصيرها و أن تحبي أن يهديها الله.

    3- و السؤال هنا هل إذا أحس أحدنا التقصير في عبادة من العبادات هل يتركها بالكلية؟ أم يصبر عليها حتي يفتح الله له. بمعني هل إذا كنت لا تحس بحلاوة الصلاة و لا تكون خاشع القلب فيها هل تتركها بالكلية حتي لا تكون منافقا و تكون متسق مع ذاتك؟ أم تصطبر عليها؟ كذلك الحجاب.

    4- و مسألة أن اهتزاز ثقة الناس بالتيارات الإسلامية سبب كافي لخلع الخجاب فهذا يكون مقبولا إذا كنا نعبدهم. أما و أننا نعبد الله و أن الحجاب فريضة من الله فالواجب طاعة الله. أما التيارات الإسلامية ليست طرفا في المسألة أصلا. فالعلاقة بين العبد و ربه.

    5- و أما بالنسبة لتقبل الاخر. فلقد صدعت رؤوسنا تلك العبارة. هل معني وجود الاخر و تعايشنا معه هل هذا معناه أن نتقبله؟ الشيطان و الشر موجودان و سيظلا بيننا حتي يرث الله الأرض و من عليها فهل هذا يعني تقبل وجودهما؟ و هل المسلمون بينهم آخر أصلا؟ ما لا نتقبله من خلع الحجاب إنما هو من إنكار المنكر.

    6- مثل هذا الكلام إنما يبرر الخطأ.

    7- و ختاما كل ما سبق لا يعني أن نؤذي من خلعت الحجاب بنظرة أو كلمة. و لكن الدين النصيحة.

    و أسفة علي الإطالة :)

    ReplyDelete
  34. بالبلدى .. يسلم فمك :)))))

    تحياتى !

    ليال أنور عبد الرحمن

    ReplyDelete
  35. Well said I can't agree more

    ReplyDelete
  36. Very Well said! proud of you 3ala fekra :)

    ReplyDelete
  37. معلش الناس اللى بتسال على ليه كان زوجات الرسول بيلبسو الحجاب و ده معنى انه فرض .. احنا مش زى زوجات الرسول يعنى مثلا زوجات الرسول ماكنش ينفع بعد موته انهم يتجوزا تانى يعنى هما كان لهم وضع خاص غير كل النساء

    ReplyDelete
    Replies
    1. اللي كانو بيلبسوه كان عشان ميبينش حتى وجههم انما ابن تيمية وغيره من الائمة الاربعة قالو ان الحجاب فرض وكان الاختلاف هل ف صورة النقاب ولا الحجاب العادي اللي هو ملبس واسع غير شفاف طبعا هم كانو بيتكلمو عن المظهر الخارجي لان المحجبة عموما المفروض يعني المفروض من شروط كمال حجابها هو اخلاقها المحترمة اللي هتتعلمه من الدين :) فاغلب جمهور العلماء أثبت ان الحجاب فريضة اسلامية شوفي هم كل واحد حر بس ياريت منبررش خلع الحجاب بطريقة دينية :)

      Delete
  38. انا فى لندن بئالى 7 شهوور. و انا محجبة من 16 سنة و كان قرارى انا ..حتى والدى اتفاجيئ لما شافنى اول مرة.
    جزء من ترددى انى بفكر فى الناس حتقول اية .كلامك جة فى وئت غرييب لانى بفكر اخلع الحجاب لانى مش قادرة التزم بكل القواعد الى بتيجى معا الحجاب

    ReplyDelete
  39. ربنا رب قلوب!
    لا, آسف جدا.. ربنا رب قلوب وأيدي وأرجل وأعين وآذان وجوارح وأرواح. ربنا لن يحاسبك فقط على ما وقر في قلبك دون أن تعمل به!!!

    في القرآن, يقرن الله العمل الصالح بالإيمان في عدة مواقع:
    ((إِلَّا مَن تَابَ وَآمَنَ وَعَمِلَ عَمَلًا صَالِحًا فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَّحِيمًا)) [الفرقان:70]
    ... ((وَالَّذِينَ آمَنُوا وَعَمِلُوا الصَّالِحَاتِ لَنُكَفِّرَنَّ عَنْهُمْ سَيِّئَاتِهِمْ وَلَنَجْزِيَنَّهُمْ أَحْسَنَ الَّذِي كَانُوا يَعْمَلُونَ))

    قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " الإِيمَانُ مَعْرِفَةٌ بِالْقَلْبِ , وَإِقْرَارٌ بِاللِّسَانِ , وَعَمَلٌ بِالأَبْدَانِ "

    ReplyDelete
  40. مقال رائع

    ReplyDelete
  41. أولا من الخطأ إن أنا لما أشوف حد بيعمل حاجة غلط إني أسيبه كده!!!
    يعني لما ألاقي واحد أو واحدة مابيصليش أنصحه إنه يصلي. لما ألاقي واحد بيشرب سجاير, أنصحه إنه يسيبها. لما ألاقي واحدة مش لابسة الحجاب, أنصحها إنها تلبسه!
    وذلك لأمرين من صحيح الدين, وهما الأمر بالمعروف والنهي عن المنكر, وأن الدين النصيحة.
    يعني, أنا مأمور أني أؤمر الناس بالمعروف عن طريق النصيحة الحسنة.

    أما بالنسبة لفرضية الحجاب, فهذا إجماع علماء الأمة, من الأوائل والأواخر. أما من تريد أن تبحث عن الأراء الشاذة فهذا شأنها. بالضبط كما يبحث أحدنا عن رأي شيخ أو داعية يحلل له تدخين السجائر, وهو يعلم إجماع العلماء على حرمتها.
    أما عن أهمية الفرض بالنسبة لفرض آخر, فهذا كلام عجيب! فهل أستطيع أن أقول أن الصلاة أهم من الصيام, فلا شأن لكم بتركي للصيام طالما أصلي!!
    طالما أن الفرض, فرض عين على كل مسلم ومسلمة, فمن تركه فهو آثم.

    أما بالنسبة لمن تعرف فرضيته, ولا تقدر عليه, فنقول لها أن تحاول, فإن فشلت وخلعته, فلتحاول مرة أخرى ويكون الله في عونها إن شاء الله, ويسهل عليها ذلك إن شاء الله.

    أما عن كلام الناس للفتاة غير المحجبة, فذلك خطأ على الناس. لا أستطيع أن أدعو لسبيل الله, فأقول لإنسان أن كل عملك باطل لأنك تفعل إثما كالتدخين مثلا! ولكن يكون القول اللين, بأن أقول له مثلا, أراك على خلق حسن, وإلتزام بمعظم تعاليم الإسلام, وينقصك فقط أن تترك هذا الإثم, وأدعو له أن يتوب الله عليه من ذلك.

    آخر تعليق, بالنسبة للرجالة اللي معتبرين حجاب زوجاتهم مسئوليتهم الشخصية، هل ده شيء سيء؟؟ لو أنت شفتي زوجك لا يغض البصر, (وده فرض عليه طبعا), هل لن تحاولي أن تثنيه عن ذلك؟؟ ايه العيب أن الواحد يحاول يثني زوجته عن شيء خاطئ تفعله؟؟

    ReplyDelete
  42. Very well-said! Totally agree with you. Wish people were more tolerant & open-minded!

    ReplyDelete
  43. يا ترى سيبتي أي كومنت بينتقدك و بينتقد فكرة الحجاب و الوصاية الدينية من أساسه و لا مرضتيش تحطيهم؟

    ReplyDelete
  44. البوست مش بيجادل فقهيا أصلا بس الناس غاوية تقلبه كدا.

    طب من الآخر، أي فتوى هاتقولها أو هاتجيبها اللي أفتاها بشر يصيب و يخطئ و أي تفسير هاتجيب لأي آية برضه للي فسرها بشر يصيب و يخطئ.

    و أذكر قول الشعراوي: أنا لا أفسر القرآن فلو كان هناك من هو أهل لتفسير القرآن لكان رسول الله صلى الله عليه وسلم، إنما هي خواطر تأتيني عندما أقرأ هذه الآيات.

    ReplyDelete
  45. انتشرت الفترة الأخيرة اراء هى السم فى العسل الناس بدأت تحكم على الدين كلا حسب فهمه لأية قرأنية او حديث شريف و تناسوا تماما ان هناك قواعد فقهية و احكام شرعية لاجدال فيها ماينفعش ياجماعة ان كل واحد يتكلم فى الدين بدون علم ، الحجاب فريضة على المرأة لاجدال فى هذا و الناس اللى بتقول لاء علماء الأزهر اختلفوا ده كلام عارى تماماً من الصحة الخلاف على شكل الحجاب هل هو النقاب ام الحجاب الطويل الغير كاشف ، ببساطة شديدة تقدروا تبحثوا على النت عن الاراء الفقهية المجمع عليها عن الحجاب قبل ماكل واحدة نفسها بتميل ناحية ترك الحجاب تيجى تقول رايها و تشكك فى انه فرض ،موضوع الأراء الشخصية فى الدين و احكامه بدأ ينتشر فى امور كثير و كل واحد بيحاول يفسر لنفسه تفسيرات منطقية و فى اخرها يكتب ربنا هوا اللى هيحاسبنى و اصحابه و صحباته يسقفلوه عشان خطأهم مشترك و تفسيره كان مبرر كويس ليهم عشان يستمره على خطأهم ، الخلاصة ماينفعش كل واحد يفتى فى الاسلام بما تهوى نفسه، اهتزاز ثقتنا فى بعض الرموز الاسلامية لا يعنى مطلقا التشكيك فى ثوابت العقيدة لأن هناك كتب فقه و تفسير و حديث لا اختلاف فيها بس حاولوا تقرأوها الأول وعند الحيرة فى امر ما يمكن الرجوع للجنة الفتوى بالأزهر ، و ربنا يهدينا جميعاً

    ReplyDelete
  46. قال تعالى :أم تحسب أن أكثرهم يسمعون أو يعقلون إن هم إلا كالأنعام بل هم أضل سبيلا

    أنتى بتسنى سنة سيئة بمقالك ده .. وأعرفى أن كل شئ مكتوب عند ربنا ، وكل الناس اللى ردوا عليكى هنا وأضلتيهم فى ميزان سيئاتك، ان لم تستغفري وتتوبى..

    انتى عاملة زي الرجل الذي يهجر بالمعصية، فى الحديث: كل أمتي معافى إلا المجاهرين

    ربنا يهديكى ويكشف الغشاء عن قلبك وعقلك

    ولا تنسي قول الله تعالى: ونكتب ما قدموا وآثارهم وكل شيء أحصيناه في إمام مبين

    ReplyDelete
  47. وليه متكونش اجمل واجمل بحجابها
    (وبعدين حجم الحجاب اللي بتتكلمي عليه هو (انه زينة المرأه وجمالها
    وكمان اختي لو لم تعيني اخواتك على الحق فلا تشجعينهم على الباطل

    ReplyDelete
  48. http://www.yasminmogahed.com/2011/12/12/empowerment-of-women-speech/

    ReplyDelete
  49. المجد للمجتهدين اللى بيشغلوا مخهم! بوست رائع يا زي :)

    ReplyDelete
  50. انتي قلتي كل ال نفسي اقوله..نفس الآراء والمشاعر والإنطباعات..والآراء المتشددة ال بتخوفك او بترهبك بسسب رأيك وبيقولولك انك بتسني سنة سيئة او بتشجعي ع معصية،احب اقوللك انهم كدا بيخلوا الواحد ينفر اكترواكتر..ربنا كبير غفور رحيم،اقرب للعبد م حبل الوريد،وهما عاملين نفسهم حكم وجلاد،لو كل واحد "يتلهي"ف حاله مكنش دا يبئ حالنا!!

    ReplyDelete
  51. أول مره أدخل هنا اصلا لقيت لينك على تويتر وفتحته لقيت الموضوع ده بصراحه انا مش عارف اشكر ازاي في البوست ده فعلا برافوووووو على الرؤيه وسلاسة عرض الفكره واستخدام الفاظ بسيطه تاني وتالت ورابع برافوو

    ReplyDelete
  52. كلامك سليم يا صاحبة المقال، أنا سعيدة جداً إن فى ناس مصريين قلوبهم بيضة و عقولهم متفهمة و جميلة زيك كده يا زينب. وبعد ما قريت التعليقات زاد عندى التفائل فى تحضر العقلية المصرية

    ReplyDelete