تلاتين ستة ده ابتدى يجي على أعصابي، الناس اتجننت. كل الناس. الكويسين والوحشين واللي في النص، إلا ما في عاقل مستهدي بالله كده يقول كلمة طيبة. بس أنا بردو كل شوية أقعد افتكر في دروس السنتين ونص اللي فاتوا:
أولا: ما تحطش إيدك غير في إيد المخلصين، المخلصين وبس. تحت أي سبب وتحت أي مسمى مفيش حاجة اسمها "أنا وأخويا على ابن عمي" ومفيش حاجة اسمها "نخلص من دول الأول وبعدين نفضى لدول".. بنتعك في الآخر.
ثانيا: الكدب خيانة. اللي يكدب على غيرك هيكدب عليك، والاخوان مهنتهم الكدب.. أو "التقية" بمعنى أوضح.
ثالثا: ابني على نضيف. البرادعي قالها حكمة "الدستور أولا"
رابعا: نقدر دايما نحقق أهدافنا بسلمية. غاندي مثال.
خامسا: لو قلبت دم، دافع عن نفسك.
سادسا: اعمل الصح يا حزلقوم حتى لو قالوا عليك عميل وخاين.. كله بيبان في آخر الفيلم.
سابعا: مافيش داعي لمعايرة الناس المخلصة اللي قدرت المواقف غلط أحيانا. أنا قدرتها غلط كتير، بس بتعلم بسرعة.
ثامنا: يسقط حكم العسكر،
تاسعا: تسقط أمريكا الاستعمارية، اللي يحط إيده في إيد إسرائيل خاين.
عاشرا: الله أولا وأخيرا.
لو افتكرت دروس تانية هقول، أنا اتعلمت ياما في الفترة الزمنية من ٢٥ يناير حتى يومنا هذا..
نموت نموت وتحيا مصر يا علي يا طه..
No comments:
Post a Comment