أنا زمان

مطلوب مني شهادة ميلادي في موضوع كده، فقعدت أدور عليها في ورقي القديم في بيت بابا وماما.. الورق القديم ده لقيت فيه حاجات كتير فكرتني بنفسي من سنين كتير أوي فاتوا. اتغيرت كتير؟

لقيت قصيدة عن البحر - إحم - أصلي كنت وقتها بحب أكتب شعر.. قصيدة كلامها ساذج أوي ومعتمدة ع السجع تقريبا كتبتها وأنا عندي أربعتاشر سنة مثلا.. بس فكرتني ازاي كنت مهووسة بفكرة إن أنا والبحر حاجة واحدة :D 

لقيت ورقتين كتباهم بشرح فيهم القضية الفلسطينية، أول مقطع منها بتخيل عيلة في بيت وليهم أرض بيزرعوها .. الغريبة إن دي تقريبا أمنية حياتي دلوقتي، إن يبقى لي بيت وأرض أزرعها. مش أرض بمعنى حقول كبيرة وكده، إنما جنينة يعني أزرع فيها اللي أكله.. افتكرت قد إيه كنت متحمسة للقضية الفلسطينية، وقد إيه اصحابي مكنوش فاهمين أنا مرتبطة بيها كده ليه وبتحمق عليها أوي كده.. أنا فاكرة زمان إني كنت واثقة إننا هنرجع فلسطين، النهاردة معرفش، أصل مفيش "حد"عشان يرجع "حاجة"!

 

لقيت جواب متقطع كتباه لبنت خالتي اللي عايشة في اسكندرية. غالبا كان نسخة قطعتها وكتبت غيرها. كام ملحوظة بقى على الجواب ده: أولا، بنت خالتي كانت ال penpal بتاعتي، وكانت لحظة حلوة جدا لما البوسطجي يجيب لي جواب جديد. ثانيا، الجواب كان عن العريس فلان اللي اتقدم لي.. الحقيقة مش فاكراه خالص ولا فاكرة الحكاية ولا فكرة سبب رفضي بس في الجواب أنا قايلة إن "غريبة أوي إني أضطر أرفضه عشان سبب تاني غير التدين"، واضح إني وقتها كنت متصورة إن أي سبب ممكن يتقبل طالما العريس "متدين" ... طبعا النهاردة كلمة "متدين" دي ملهاش معنى عندي أساسا..

لقيت جواب تاني كنت بعتاه لواحدة صاحبتي اتجوزت وسافرت السعودية. أنا فاكرة البنت دي، كانت جميلة جدا اتجوزت بعد الكلية على طول من واحد كانت بتحبه وأكبر منها بعشرين سنة!

اتغيرت كتير؟ اه اتغيرت.. ببص ع الحاجات من زاوية مختلفة عن زمان، بقيت أنضج وأعقل وأكثر حيرة :)

----

المهم لقيت نسخة من شهادة ميلادي بس طلعت الشهادة القديمة، ومش عارفة هتتقبل وللا لازم أروح أطلع الشهادة الجديدة!