فين أيام المعارك اللي كان ضحاياها يتعدوا ع الأصابع والحروب اللي لو وصل عدد ضحاياها ل 300 تعد مأساة بشرية..
فين أيام لما كان القتل صعب، وإنهاء حياة إنسان أمر مش سهل.. فين لما كان الإنسان بيحتاج لسيف ولياقة جسمانية وشجاعة حقيقية عشان يقف قدام محارب آخر بسيف ولياقة وشجاعة وفوق ده قناعة تصل لدرجة العقيدة وإيمان يقيني بقضيته، وغالبا بينتصر بإصابة الخصم وليس بقتله، وممكن ينتصر لمجرد إنه نجح في إسقاط السلاح عنه. طبعا في حالات قتل وقصف رقبة بس كانت مسألة أصعب من ضغطة زناد.
فين لما كان الإنتصار في حرب مش مقابله إزهاق ألاف وملايين الأرواح.. فين لما كانت الحرب لها ميدان، وقتل العزل عار. مش أي دولة تتقمص شوية تروح تقصف مدن عدوتها. مش واحد يدوس على زرار تنطلق صواريخ، وياخد أرواح المئات بقنبلة واحدة.
منه لله اللي اخترع البندقية والقنبلة والصاروخ. منه لله اللي سهل على الجبناء إدارة الحروب وخلى أرواح الملايين سلعة رخيصة في سوق الحروب الحديثة.
مش المفروض يكون "الموت" سهل.. مش المفروض نتنازل عن "الحياة" و "رحلة البحث عن الحقيقة" بسهولة.
No comments:
Post a Comment