تعب

الحياة متعبة. البشر متعبين. الشغل متعب. الأمل متعب. الزمن متعب. المدن متعبة. أوقات بتجيلي رغبة فظيعة إني "أسيب كل حاجة.. كل حاجة بعملها وبجري وراها، كل ناس أعرفهم وكل مجهود ببذله، وكل فكرة بفكر فيها.. أسيب كل حاجة وأقعد في البيت، أستخبى، بعيد... بعيد أوي. بتمنى أفقد الاهتمام والإحساس بالمسئولية والاستمتاع اللحظي بوجودي مع حد بحبه... أفقد كل ده وأبعد. وأموت بقى وماصحاش تاني. مش عايزة. مش عايزة حاجة من دي، ولا كل التفاصيل ولا أي حاجة

هو إيه الهدف يعني من كل ده؟ إيه الهدف من حياتي؟ موجودة بعمل إيه يعني؟

مؤخرا الأفكار دي بقت بتقعد وقت أطول معايا.. بتخلي حتى القدرة ع التواصل مع الناس صعبة أوي. دايرة الأحبة بتضيق أوي.. خايفة أصحى في يوم مالقيش في حياتي حد.. أفكاري الضلمة بتقول لي "وإيه يعني؟" ...بس أنا عارفة إنه هم المعنى، كل المعنى