الشغل لفترات طويلة دون انقطاع بيخليك عارف كويس يعني إيه أجازة ومقدر قيمة الوقت ده جدا.
العيد ده، أول عيد أتبسط فيه من ساعة ما كبرت ومابقتش طفلة. العيد المرة دي حلو لأن العيلة قررت تستغله وتسافر فيه ونقضي كام يوم مع البحر.
بس هو الإنبساط بردو اللي على قد قدراتي اليومين. حتى الأجازة مش قادرة أصدق إنها أجازة ومش قادر دماغي يقف ويفصل ويعيش اللحظة والحاجات دي. أكتر حاجة بفكر فيها هي إن اللحظات دي هتعدي بسرعة وهتخلص ويمكن ما تتكررش تاني مع نفس الناس دي أو ما تتكررش أبدا فانزعج جدا واقلق واتضايق.. تصور النكد!
لسه عندي سلاح أخير. البحر، البرنس ده اللي بيقررك ويطبطب عليك وينسيك ويهديك ويطمنك. النهاردة مالحقتش أخد وأدي معاه يا دوبك ساعتين نزلناهم في المية لعب وهزار، بكرة عندي معاد أحكي له وأفضفض. أما نشوف أخرتها إيه معايا
No comments:
Post a Comment