تقريبا كده كل اللي أعرفهم ابتدوا يمارسوا هوايات معينة عشان تطلعهم من الاكتئاب أو يهربوا بيها من التوتر والقلق وضغط الحياة أو يستخبوا من الوقت أو يجبروه يعدي من غير ما يلحق يأذيهم.
هوايات زي التلوين..
والرسم
والتصوير
والسفر
والكتابة
والقراية
ببص لنفسي كده واسألها طيب هو أنا بعمل إيه عشان أحل عقدي أنا كمان؛ اكتشفت إني بكتب هنا باستمرار أكتر من زمان وكمان عملت بلوج جديد اتكلم فيه عن السينما بشكل مش سينمائي خالص إنما احساسي أنا ومعلوماتي أنا والأفلتم اللي بحبها أنا بشكل شخصي أكتر من كونها قصص عظيمة أو تجارب فنية فذة.
وبحاول أسافر.. بمعدل أقل من اللي في بالي صحيح بس أهو ربك بيرزق.
وعايزة اشتري عدسات جديدة للكاميرا. بس أنا بحب التصوير عموما بعيدا عن محاولات العلاج والهروب.
طبعا عديت مرحلة التلوين من سنتين، وبالنسبة للرسم فتخليت عن فكرة إني اتعلمه من خمس سنين مع إن والله كان يجي مني.
أه صحيح وحاجة تانية كمان بهرب بيها من التوتر وبقتل الوقت.. كاندي كراش واخواتها
No comments:
Post a Comment