11/22/2015

اعترافات مهنية

تقريبا ده تاني أكبر اعتراف اعمله السنة دي بعد بوست people pleaser. الاعتراف ده بقى يخص حياتي المهنية. من يومين كده كنت بفكر في كل الشغل اللي اشتغلته في حياتي وازاي وصلت له.

الشىء المشترك بينهم حاجتين:
- اني عمري ماشتغلت حاجة مش بحبها. كان دايما واضح ليا ايه اللي مش بحب اعمله؛ فمش بعمله. يعني سبت التدريس. وجربت الترجمة فمحبتهاش فمكملتش فيها. حتى النهاردة مع كل الحاجات اللي بعملها؛ مش بعمل الحاجة اللي مش بحبها.. يعني مش بحب ال sales فمدخلتش فيه..
- الحاجة التانية؛ وده الاكتشاف - او الاعتراف - هو اني في الواقع ما استهدفتش بردو اني اشتغل حاجة بحبها.. دايما الشغل كان بيجيلي وانا بقرر انه اه لطيف وماله.. بس ما دروتش ابدا على اني امتهن حاجة بحبها. الحقيقة انا حتى معرفش هو ايه المهنة اللي ممكن احبها وأسعى وراها.

انا حبيت الوب ديزاين جدا وعملت فيه اسم وسمعة فخورة بيهم.. ومع سوبرماما عملت حاجات كتير لطيفة ومسلية وممتعة. المتعة عموما كانت دايما هدف واضح وصريح من شغلي. بس منال وعلاء اللي دلوني ع الوب ديزاين وياسمين اللي قالت لي تعالي نعمل شركة. انما انا ماكنتش صاحبة الفكرة ابدا. لأني عمري ما عرفت او عمري ما كنت واثقة اني بحب حاجة معينة وعايزة اسعى وراها.

بس بقى غالبا الفراغ قاتلني فخلاني اكتشف الموضوع ده عشان يضايقني. فالسؤال اللي بيلح عليا حاليا هو "يا ترى يا زيزي بعد سوبرماما لو قررتي تشتغلي حاجة بتحبيها هتكون ايه؟" ..

No comments:

Post a Comment