الخبر، المصدر، الحقيقة.. مصطلحات فقدت معناها اليوم

الموضوع زاد عن حده أوي

مرة موقع اسرائيلي مشبوه ناطق بالعربية -مش هحط له لينك قصد - ينشر خبر ان مبارك مات، وبعدين يرجع ينفيه
ومرة يقولك ان روسيا اعلنت الخبر ورجعت نفته

وواحد يقولك دا دكتور ألماني قاللي!!!
ويرجع يقولك أنس الفقى بينفي

وأصلا أصلا الموضوع ابتدى بكدبة انه بيعمل المرارة بعدين "قالوا" ورم "حميد" .. الحقيقة فين الله أعلم، عمر ما كان الشعب عارف حاجة أصلاعن ريسه، يتعب أوي وللا على خفيف، يروح في رحلة علاج وللا يتفسح، محدش يعرف عنه حاجة غير اللي بيتم الاعلان عنها رسميا.. هذه هي الشفافية المصرية

ومبارك مختفي من ساعتها، بيحكوا عنه وعن حالته وتحسن صحته من غير صورة ولا منظر.. ودا خللا الزبادي والعسل يحللو محل التليفون والروب دِ شامبر.. طبعا انا ممكن اتفهم ده واستوعبه، عمليا واحد طالع من عملية وعناية مركزة مش هياخدوه يصوره عشان يأكدا للشعب بتاعه انه عايش، وخصوصا وإن الشعب عموما مايهمش مبارك في حاجة .. هذه هي الحكمة المصرية

لكن لأن المصداقية بين مبارك والناس مش موجودة الفار ابتدا يلعب في عب الناس.، ويحسوا انه في حاجة.. ومخببين علينا.. انا نفسي ابتديت اتوهم وأصدق ان ممكن مبارك يكون..... لأ لأ مش قادرة انطقها..