5/19/2006

لقيت حاجات حلوة.. كتير

so Ghada tagged me!
ايه اللى بيخلى الدنيا حلوة؟.. تحتمل يعنى يا غادة

التغيير
أحلام اليقظة
الورد الأصفر - ازاى ماكتبتش عنك تدوينة فى بتكون؟
شم النسيم
البحر -هادى او متنرفز
السكر ومرادفاته
الأيس كريم -شيكولاته بس لو سمحت
القهوة -مش من ايدى
كوباية بلح بتاعة رمضان
السفر على الطريق السريع بالليل
النهار
شنط الخروج والسفر
الكوتشى
الكعب العالى
التمشية فى الشوارع الطويلة اللى كل محلاتها مفتوحة على الصفين وعواميدها منورة والناس كتير وتيار الهوا فيها يسطل
بيت جدو
بلكونة بيت رشا القديم - ارجع يا زمان- ه
الشبابيك المفتوحة
الموسيقى الصعيدى اللى بجد (ربابة ومزمار وطبلة)ه
كلامى مع نفسى
الهدايا -لحظة ما أهديها ولما تجينى
أعياد الميلاد -طبعا
الدعاء -وخصوصا لما يتحقق
السينما.. سحرها وسحرتها واللى بتسحر لهم
التدوين -ربنا ما يحرمنى منه
الموبايل
الكاميرا -لما انا اللى اصور
الكى بورد بتاعتى -بقالها خمس سنين عمل متواصل اللهم لا حسد- ه
google
dsl
sms
notepad
back space
f5
photoshop
أداة فى الفوتوشوب clone stamp
كشكول بسلك
الأقلام الحبر
الرحلات
السفر
الامارتيه عن نفسها one اعلانات قناة
الناس
الخروج مع اصحابى نشترى لبس جديد او اى حاجة جديدة محتاجة ذوقى :) ه
القعدة مع اصحابى ونتلسع فى دماغنا والمود يضرب رقم عالى
مكالمة من حد بحبه تيجى فى وقت انا محتاجاها فيه
لما اقعد مع ماما ونسمع فايزة أحمد -الاغانى الطويلة -مزاج
القلوب الصافية اللى بتخلينا أصحاب بجد حتى لو كنا مختلفين فى كل شىء
الأيام اللى بتقع تحت تأثير فيلم جميل -ببقى فيها عايشة دور الشخصية اللى اتأثرت بيها او على الاقل بفكر فيها - دا سر (كان يعنى)ه
لما اقدر انفذ حاجة انا مؤمنة بيها
لما اتوقف عن الاستمرار فى شىء مبقتش مقتنعة بيه
لما اعمل حاجة لحد وتعجبه
لما اسمع لحد بيتكلم عن ربنا - حد يكون عرفه بالحب مش بالكتب
لما الخاتم يوسع فى ايدى
لما اسمع اغنية مبهجة ومفرحة ومفرفشة ومنعكشة ومجنونة نونة نونة نونة نونة نونة
انى بنوتة مش مخلوق تانى
ان جوايا منظومة قيم ممكن توفق بين ما يعتبره البعض متناقضات - مش هعرف اشرح


:so now, i'm tagging
كل المدونين اللى فى المعتقل وخاصة مالك -هتجاوب عليه اول ماتخرج من المعتقل وتنور التدوين تانى، دى فترة من حياتك وحياة كل اللى معاك.. هتخلى دنيا المصريين حلوة بجد فى يوم من الايام

وكل اللى عايز يقضى وقت ممتع يكتشف فيه اللى بيحبه وبيخلى دنيته حلوة


11 comments:

  1. في القران اية جديرة بالتأمل عن الذين "نسوا الله فأنساهم أنفسهم"، ومثل هذا الحصر لما يحب الإنسان إحدى هو مما يقرب الإنسان من نفسه، فوجود فجوة بين الانسان وذاته ظلمة وعناء

    وقد قمت مؤخراً بعمل شيء أعرضه في هذا المقام، فقد قررت عمل واجب يومي لي هو تكملة هذه الجمل مرة يوميا، وهي
    أنا بحب
    أنا عاوز
    أنا مش عاوز
    أنا المفروض
    أنا مش المفروض
    أنا دايما بنسى
    أنا محتاج

    ولقد فعلت ذلك كمحاولة يسيرة لاستكشاف الذات، فالانسان أحيانا كثيرة ما تبهم عليه ذاته ونفسه التي بين جنبيه، فلا يعرف تماما ما يريد وما يحب ولا يحب، ولو عرف ذلك أكثر لاستطاع توجيه سلوكه وإدارة وقته بشكل أكثر توافقاً مع حقيقته

    يا ترى هل عند أحد اقتراحات أخرى تقرب الإنسان من نفسه وتكشف له ذاته بشكل أوضح؟

    ReplyDelete
  2. مئات الأشياء تجعل الدنيا حلوة ومحتملة من الممكن أن تمر بالذهن ولكن حينما تكون محل التقاط يسقط الكثير منها، ولكن ما التقطه الآن
    - صنع فيلم أيا كان نوعه سواء كان تسجيلي أو روائي وذلك بكل مراحله ابتداء من العثور على الفكرة وتطويرها مرورا بكتابة السيناريو والتصوير والمونتاج ووصولا إلى النسخة النهائية
    - لحظة العرض الأول لفيلم صنعته
    - مشاهدة فيلم تكتشف أنه على الدرجة من الجودة كان بقدر توقعك
    - قراءة رواية لماركيز
    - سماع أغنية لفيروز أو زياد رحباني
    - القهوة المظبوط
    - الواين الأحمر
    - لقاء صديق حميم لم أراه منذ سنوات
    - المشي ليلا في شوارع برشلونة وبالذات في منطقة الميناء
    - أفلام شون بين و وودي آلان
    - رؤية سعاد حسني على الشاشة
    - قراءة رباعيات صلاح جاهين
    - المشي في شوارع الزمالك يوم الجمعة صباحا
    - شراء الإكسسوارات و تيمات الديكور المختلفة وبخاصة الشموع
    - DVD
    وبخاصة لأفلام تحبها أو تبحث عنها منذ زمن
    - قراءة الأعمال الكاملة لأمل دنقل وبخاصة أوراق الغرفة 8
    - قراءة رواية لخيري شلبي
    - شرب عصير البرتقال الفريش
    - مشاهدة فيلم ليسري نصر الله
    - الوصول لمطار ما بعد رحلة طويلة بالطائرة ومتعة إشعال أول سيجارة بعد عذاب المنع لساعات
    - مشاهدة شاب وفتاة تتشبكان إيديهما ومشاعر الحب على وجههما
    - ركوب مركب في النيل
    - أكل السمك عند أبو أشرف و الجلوس بجوار قلعة قايتباي ليلا
    - مشاهدة الصور الفوتوغرافية العائلية وبخاصة الصور القديمة
    - لحظة الإنتهاء من إصلاح السيارة ومحاسبة الميكانيكي والتحرك بالسيارة لبضعة أمتار
    - مشاهدة طفل يطير طيارة ورق
    - السفر وبخاصة لدولة من دول أمريكا اللاتينية
    كفاييييييييييييييييييييييية

    ReplyDelete
  3. heeeeey ezayek ya rayesa .. fakrani? hehe
    i like :
    Gothica
    metal music
    trance parties
    fight club (the movie)
    drinkin and smokin :D
    blogging
    playin with ma photoshop
    childrens smiles
    playing with Rokkie (gothica's kittie)
    demonstrations
    and lots ana msa2at no w3andi exam bokra ed3ely

    ReplyDelete
  4. فيه حاجات كتير حلوة آه.. لكن الحلو عادةً ما بيكملش..
    حلو أوي البحر.. بس إيه الحلو في إنك تروحه لوحدك!
    حلوة قوي الفضفضة.. بس مش للحيطان!
    حلو قوي الاستقرار .. بس مع اللي بيفهمك!
    حلو قوي الشغل .. بس في المجال اللي تحبه وتقدر تدي فيه وتثبت فيه وجودك..

    ReplyDelete
  5. بلكونة بيت رشا القديم
    ياااااااااه أنا بعشق البيوت القديمه وبلكونتها اللي بتبص علي مصر اللي بجد

    ReplyDelete
  6. أجمل حاجه ساعة هدوء مع النفس وانت ماشي في وسط البلد الساعه 4 الفجر

    ReplyDelete
  7. ايه اللى بيخلى الدنيا حلوة؟
    It is good to think positive..an uplifting post.

    ReplyDelete
  8. :)))

    كنت فاكره إنك لسه بتلمي الورد
    إيه يا بنتي ده.. إنتِ كمان بتحبي الـ
    clone stamp?
    بيستر والله :) ;)

    ReplyDelete
  9. حاجة بتخلى الدنبا حلوة بالنسبة لى و هى انى اقرا مدونتك
    تعرفى انى بعد ما قريت االلى كتبتيه عملت حاجة حلوة اوى
    شكرا
    وليد

    ReplyDelete
  10. أشياء حلوة ممكنة عموماً وبعضها بيحصل:

    1-إن الأهلي يكسب الزمالك بسكور كبير..
    2-تمشية في بورفؤاد مع أصدقاء أحبهم في الطريق للشاطئ..
    3-سماع التيمة الموسيقية لأغنية "معاك بجد" في طريق العودة من نفس الشاطئ!
    4-ترتيل المنشاوي ، والحصري ، وقراءات الشيخ رفعت ، والشيخ منصور الشامي الدمنهوري (من قدامى قراء القرآن المصريين) وكذلك الراحل الكبير الشيخ كامل يوسف البهتيمي..
    5-ابتهال "إلهي" للشيخ محمد عمران..
    6-أغنية "شجر الليمون" لمنير بتوزيعها الجديد..
    7-البحر وأنا صغير..
    8-الشيبسي..
    9-العيش في منطقة ساحلية بالقرب من البحر مع أناس أحبهم وفي وسط أحبه..

    ReplyDelete