5/29/2006

يا مالكا وسط البلد.. امسك الكتاب

صبوحة اتصلت بيا مخصوص عشان اتضامن معاها ومع يحيى عياش فى توجيه نداء للأخ مالك.. عشان يركز فى مذاكرته وماينزلش مصر قبل ما يخلص امتحانات
مالك، أرجوك يا بنى.. اخلص بأه م الهم اللى اسمه الكلية والمذاكرة دى.. عشان تفضى للهم الأكبر.. وتفرح العيلة كمان.. مش هكتر فى الكلام، صباح قالت اللى فيه الخير وزيادة وعلى رأيها
يا مالك يا ابن مصطفى انت تعلم قول المصطفى عليه هافضل الصلاة والسلام عن الجهاد
الأكبر والأصغر ، ولست في حاجة لتذكيرك أن إذا كان التواجد في القاهرة للمشاركة
الشعبية في مساندة الحق ، هي جهاد فإن يا بطل الفتك بتلك الكتب الملعونة وتقطيعها
من المذاكرة هو أيضا جهاد بل و الجهاد الأكبر … فمافيهاش حاجة انك تكن شوية لحد
مامة الامتحانات تخلص وابقى يا عم الحاج استرد مكانك في المحكوم براحتك
بصراحة يعنى صباح عندها حق.. وختاما وعلى رأيها بردو
يا مالك يا اخانا إنبي تكن يخليهوم لك .. عشان خاطر سيدنا النبي
كن بقى يا اخى تعبت قلبنا .. يووووهوه


-----------
نداء على جمب: والنبى ترجعى التدوين تانى يا صبوحة وبلاش كسل

8 comments:

  1. هيه المذاكرة ورانا ورانا
    يا جماعه علشان خاطري سيبوا الراجل في حاله .. مفيش حاجه تخنق طالب العلم الغبان اكتر من ان حد يقوله ذاكر أو انه يكون عنده امتحان

    أكيد هوه عارف مصلحته فين .. بدون ضغوط او نداءات انسانيه :)))

    وربنا يوفق الجميع .. دعواتكم معانا هههههه

    ZanGooLa
    masrena.blogspot.com

    ReplyDelete
  2. و أنا من جهتي أطارده في القاهرة
    و احاول ان اوفر له كتبا
    لعله يذاكر

    لكن علي مين
    ده مالك
    دماغ انشف من خوذة بتوع الامن المركزي

    ReplyDelete
  3. معلش برضك
    ركز يا مالك وخلص في سنتك دي

    اخلص يا بني ادم

    ReplyDelete
  4. هو مالك ف كلية ايه يا جماعة ؟؟ علي ما اعتقد ان كل كليات المُجمع النظري قربت تخلص امتحانات و ان الهندسه بدأت يوم السبت اللي فات .. و اعتقد صيدله كمان بدأت و قربت تخلص ..

    بس عوما يا مالك .. خد المذاكرة حتي علي انها حاجه زي الدواء .. مُرة و مؤرفة و ليها اثار جانبيه هتعطلك عن هدفك .. بس لازم تاخد شهادتك و تنتهي من القصة دي .. يا رب تكون ف كلية لسه امتحاناتها ما ابتدتش و تحاول تلم حالك اليومين دولا .. من فضلك من فضلك تسمعلنا !!

    ReplyDelete
  5. وحياه النبي يا شيخ لا تقعد في بتكو وتتكن كده وتذاكر
    مش في كل الاوقات ينفع مبداء العلم في الراس مش في الكراس

    خلص امتحانات وبعدين ابقي ناضل الصيف طويل واحنا وراهم والزمن طويل

    ReplyDelete
  6. http://masreyhammney.blogspot.com
    شكرا جدا على المعلومات القيمة اللي موجودة عندك في برمجة البلوجر وارجو ان نكون على تواصل انا اسمي وائل الغزاوي صحفي وبحب اصور شغلي بنفسي ودي المدونة بتاعتي انا صحيح عملتها متأخر بس أن شاء الله هتكون مش متأخرة ايميلي موجود في البلوجر وشكرا والتوفيق لنا جميعا من الله

    ReplyDelete
  7. خارج الموضوع:

    كلنا نمر بحالات سدة نفس.. لكن دة مش معناه إني أبطل كتابة وأبتعد واكتفي بإعلانات ودعوات..

    أين كيبورد بنت مصرية؟ أستحلفك بالله ترجعي للكتابة لإننا افتقدنا مقالاتك بشدة..

    ReplyDelete
  8. قلم جاف

    والله مش سدة نفس اللى منعانى :)

    انا بس مشغولة فى حكاية التحضير للحفلة

    معنديش مخ اكتب حاجة

    هى حجة غبية بس والله دا اللى بجد،
    انا ممكن انزل حاجات عندى كنت مأجلاها.. بس بكرة الصبح باه، عشان هلكانه وعايزة انام
    والبوستات الجديدة بدور لها على صور وانسقها وبتاع.. يعنى بتاخد وقت

    شكرا على اهتمامك يا قلم جاف

    يا رب نشوفك فى الحفلة كمان

    ReplyDelete