شم النسيم.. وكفى

بمناسبة شم النسيم احب اقولكوا كل سنة وانتو طيبين وكمان دعاء العدل بتبلغكوا سلاماتها وبتقولكوا كل سنة وانتو طيبين، والبوست المرة دى مطعم برسمتين كاريكتير من بتوع دعاء عن شم النسيم.. ميرسي اوى يا دودو

----------

لو قعدنا نفكر لمصر فى عيد قومي.. لو ضرورى ضرورى يكون لمصر عيد قومي، يبقى مش هنلاقى غير شم النسيم يكون العيد القومي لمصر

سيبوكوا من حكاية ان العيد القومي لازم يكون عيد ثورة او تحرير او جلاء او انتصار فى حرب.. مش لازم ابدا يكون العيد القومى ليه علاقة بالكيان السياسى لمصر -او سموه زى ما تسموه- انما المفروض انه يكون اقرب لروح مصر

واذا كان لمصر روح - على اساس انها بسبع ارواح و لم تزهق بعد تحت وطأة الاحتلال الـوطني - فهى روح الناس البسيطة اللى بتطلع لسه فى شم النسيم للجناين -على اساس ان مصر فيها لسه مساحات خضراء - وهى مبسوطة ومتحمسة تقضى يوم جميل، تشم فيه النسيم وتاكل فسيخ وسردين ورنجة

شم النسيم ، يوم اجتماعى - بالاحرى- ملوش علاقة لا بسياسة ولا بدين - مع احترامى لكل الاديان- يعنى كلنا بنحتفل بيه، و"كلنا" تعود على عنصري الأمة مسلمين ومسيحيين، حلوة عنصري دى.. بسمع سيد درويش كتير انا

شم النسيم مدعوم بقوى الشعب العاملة، يعنى اللى بيحييه الشعب والمجتمع والناس. من كام ألف سنة والمصريين بيحتفلوا بيه منهم لنفسهم كده، من غير ما تطلع شركة سردين تلف السردين فى علبة حمرا وتلفها فى ورق احمر وتربطها بشريط احمر ومعاها هدية قلب احمر وتبيع الكيلو بخمسين جنيه، ولا يكون فى شركة ترمس، تنزل عرض فى شم النسيم الاتنين كيلو عليهم هدية كوباية حمص شام، من غير اى شركة استهلاكية تعمل اعلانات فى الشوارع والفضائيات وتعمل حملة دعائية تحت اسم "هتعزم مين! على ايه! فى شم النسيم؟" وتقنع الناس بضرورة الاحتفال بشم النسيم وتدبسهم فى مصاريف بايخة لزوم الوجاهة الاجتماعية او تفاديا لزعل الرفقاء والعائلة

الاجمل من كل ده، ان شم النسيم هو عيد الطبيعة.. احنا بنحتفل بالربيع فيه، باللون الاخضر الللى بيرجع يفرد ع الشجر، الورد اللى بيفتح، وريحته والوانه، فواكهة الصيف اللى بتظهر بشايرها فى الوقت ده، الحياة الجديدة اللى بتطلع فى كل شىء حوالينا - على اساس اننا عايشين فى وسط جناين مش ابنية مسلحة وارصفة ودخان عربيات - يعنى عيد بيرجع لنا الامل.. بيقول ان كل شىء ممكن يتولد من جديد، وان مفيش حاجة اسمها مستحيل، وان البيات الشتوى، مش موات.. دا مجرد طبقة -سميكة حبتين- بس بتسيح مع اول شمس للربيع

كل سنة فى الاوقات دى تلاقينى انا واصحابى نسأل بعض: ها شميتوا النسيم؟
وغالبا واحدة بترد -فتقول مثلا- : ايوه انا شميته امبارح، طلعت فوق السطوح فلقيت الريحة هاللة عليا..

يعنى ايه!!

يعنى من اول اواخر مارس كده او اوائل ابريل بتهل علي مدينتنا ريحة النسيم.. وتملا شوراعها وحارتها وبيوتها.. اغلبها يعنى، وخصوصا اللى مطرفة مش وسط البلد.. ريحة النسيم دى بأه هى ريحة زهر البرتقان، فى الوقت ده بيكون البرتقان استوى على الشجر، ولأن بلدنا حواليها قرى اغلبها مزروع برتقان طبعا عشان "وتشتهر محافظة القليوبية بزراعة الموالح البرتقال واليوسفى والفراولة والمشمش"، فالطبيعى ان النسيم عندنا يكون نسيم زهر البرتقان. ريحته حلوة جدا ومنعشة، تخيل بأه لما بلد بحالها تكون ريحة نسيمها حلوة ومنعشة كده

المهم باه، اتفقنا خلاص ان شم النسيم هو العيد القومى لجمهورية مصر العربية طيب الله ثراها وحفظها من كل سوء - على اساس ان مصر هيجيلها يوم تتولد من جديد فلازم تربتها من دلوقتى تكون طيبة عشان تلد ولد صالح ، فادعو له

ساعة الحظ ما تتعوضش

عارفين لعبة الازازة اللى بيدوروها فى النص بين شوية اصحاب متجمعين فى دايرة وكل واحد بيسأل اللى قصاده سؤال ولازم الاجابة تكون فى منتهى الصراحة.. انا مكنتش بحب اللعبة دى، خالص

امبارح كنت فى عيد ميلاد رشا، وكنا متجمعين بالتمام والكمال انا وهى ورشا التانية وولاء، بالاضافة الى آية اخت رشا ومها بنت خالة رشا التانية وبعد شوية كتير جت لبنى جارة رشا،

آية اقترحت نلعب اللعبة انا متحمستش اوى، اصلى بحس انها لعبة ماسخة وسخيفة ، انما هى ظبطت تربيزة الصالون فى النص وهى تربيزة ارتفاعها صغير ما يجيش نص متر، وحطيت على الحرف فواحة (اللى هى فى حجم كوباية وجواها شمعه، نورتها وقفلت نور الاودة، وجابت الازازة، وهى كل شوية تقول لنا : ياللا يا جماعة، دى ساعة الحظ ما تتعوضش وتضحك اوى

نزلنا قعدنا حوالين التربيزة، وابتدت اللعبة... اول سؤال اتوجهلى جاوبته وانا مش مهتمة ، واول سؤال طرحته قعدت افكر فيه كتير اصلا لأنى مكنتش لاقية اسئلة.. بس بعد شوية الموضوع اتبدا يبقى حامى، بتتوجهلى اسئلة جامدة من نوعية مثلا:
- ايه الحاجة اللى مش بتحبيها فى نفسك وعمرك ما اعترفتي بيها لأى حد
- اكتر حد حبيته مين
- ميزات وعيوب اللى قاعدين فى اللعبة دى
، وتفاعلت على المستوى ده بقيت ارد بإجابات صريحة واسأل أسئلة صريحة واسمع الاجابات والاسئلة والسؤال الواحد ممكن يتحول لمناقشة.. وتتولد اسئلة تبعا للفكرة اللى اطرحت فى اول سؤال وتلاقى الاسئلة موجهة ليك من الجميع، ونسينا الازازة، الاسئلة بقت بتدور من غير مساعدتها، كنا صرحا جدا.. كان فى لحظات ضحك، ولحظات صمت مفاجىء، ولحظات تقدير لصراحة كل واحدة فينا

وبعدين الساعة جت عشرة وكنا لازم نروح، نورنا النور.. حسيت انى كنت فى مكان غير المكان، انى افضل حالا، واكتر سعادة، واكتر تفهما لنفسى ولاصحابى.. وكمان حبيت اللعبة دى جدا

مكتبة القمة.. توجد لدينا جميع ملخصات تالتة آداب

كل سنة وانتو طيبين، اليومين دول موسم امتحانات، مش امتحاناتى طبعا انا خلصت من الموال ده من اربع سنين كده، انما اللى بيصعب عليا البنات فى المترو وهما ماسكين الورق أو الكتب اللى بيراجعوا منها، النهاردة كنت راكبة العربية وحظي كان حلو وقعدت، فكان انى قعدت وسط بنتين، البنت على شمالى كانت ماسكة ورق -تلخيص - وبتذاكر تقريبا حاجة فى التاريخ، اللى قريته كان كلام عن ظهور الحركات الاسلامية والاخوان المسلمين وحسن البنا، أنا قاعدة طبعا عينى على اللى البنت بتذاكره وهى مكنش عندها مانع بصراحة وهى ملاحظة اهتمامى ومتابعتى للى مكتوب واديتنى الفرصة دى بعد ابتسامتين كانوا بينا.. يعنى مثلا أول مرة أعرف ان حسن البنا استمر عشرين سنة متواصلة يبنى فى علاقات ويكون شبكة بشكل شخصى جدا وبمجهود فردى.. الشبكة دى تشعبت بشكل كبير قدر معاه يبنى جماعة الاخوان، وكمان الجماعة ليها قسم المفروض الواحد اللى بينضم ليها بيقوله، انا مش عارفة الحكاية دى موجودة لسه وللا لأ.. المهم قريت كمان ان الحركة كانت الافضل تنظيميا بالنسبة للحركات اللى جت قبلها او بعدها او اثناءها.. كلنا عارفين كده طبعا

على ايدي اليمين كانت بنت بتذاكر من كتاب ، كالعادة الكتاب ورقه غامق وردىء، وكان عنوان الصفحة "حركات رقصة الفرح" او حاجة زى كده يعنى، وبطول الصفحتين اللى قصاد بعض فى الكتاب بيوصف ازاى مجموعة من الراقصين بيأدوا رقصة الفرح دى.. وكان مرسوم كمان رموز للمجموعات وازاى تتحرك، سألت البنت.. انتى بتدرسى فى كلية ايه؟ ، قالت لى تربية رياضية، جميل، بتدرسوا رقص فى الكلية؟ قالت اه ووريتنى اسم الكتاب كان مكتوب عليه الباليه والرقص"...." مش فاكرة الشعبى وللا ايه كده، المهم ابتسمت لها وقلت لها وياترى بتاخدوا الرقص عملى وللا نظرى بس، ردت عليا لأ طبعا بندرسه عملى، قلت لها.. ربنا معاكى فى الامتحان.. ابتسمت لى وهى بتقف عشان تستعد للاتجاه للباب والنزول، ابتسامتها القلقانة فكرتنى بالأيام اللى راحت ومكنتش اعرف انها قد كده جميلة.. وقد كده فاتت بسرعة.. ياللا

بث مباشر.. ومذيع خصوصي لحضرتى

المذيع: و.. دلوقتى مع اغنية طلبتها زيزي، باربرة سترايسند
the way we were
انا- كتابة - : اه والنبى كمان عايزة اسمع اغنية بون جوفى
it's my life
المذيع:معنديش دى، عندى النسخة بتاعة ألبا
أنا - كتابة - :لا.. أنا عايزة بون جوفى

من يومين كده، كنت اونلاين بشات - وفى قول اخر بندردش- مع مجموعة أصحاب، وبعدين واحد منهم فتح لنا الاذاعة الخاصة بتاعته :) اها الاذاعة بتاعته
عنده سيرفر وبرنامج يبث من خلاله اى مادة صوتيه يحبها.. موضوع جامد شوية ، وكل الحكاية ادانا لينك الاذاعة بتاعته وابتدا يتكلم هو ويشغل لنا مجموعة أغانى م اللى قلبك يحبها بصراحة.. ويا سلام بأه عمل دور المذيع وبصوت هادى وجميل ولا اجدع مذيع محترف يلبى رغبات المستمعين اللى هما كانوا تلاتة بس.. وطبعا يسمعنا أغانى على مزاجه كمان، منها اغانى كده لناس قديمة معرفهاش، وناس جديدة بردو معرفهاش، عادى يعنى

ممممم أنا من زمان علاقتى بالراديو حلوة جدا، كنت أنا الكائن الغريب فى عيلتنا اللى مدمن راديو، من سن حداشر سنة تقريبا، وليا خالتى هى كمان بتحب الراديو، بس دا يمكن بحكم كونها ربة بيت وأغلب وقتها فى المطبخ والراديو طبعا صديقها هنا.. - خلينى احلل نفسى، يمكن انا كنت بحب الراديو عشان كنت انطوائية وهادية الى حد ما، وكانت لما تيجى اجازة الصيف ، ازهق من اصحابى بتوع المدرسة ومحبش اشوفهم ومش عارفة ايه السر بصراحه - كنت لما اقعد ويا خالتى نتكلم، نتناقش فى البرامج والحلقات واللى سمعناه واللى حصل.. والحلو والوحش.. وخصوصا أيام رمضان، لا أنا ولا هى كنا نغير المؤشر عن محطة الشرق الأوسط طول فترة قبل الفطار، الحمد لله دلوقتى الواحد عارف ان نهار رمضان زى ليله لا يقدر بثمن

بس زى ما كل حاجة بتتغير، وزى ما الزمن بياخد ويدينا ومايبقيش حال على حاله.. بقى الراديو صاحبى الى بشتاق إليه بس ما بقعدش معاه كتير.. ولما أجرب اقعد معاه، ألاقينى غريبة عنه، ومحتاجة وقت طويل عشان استوعبة ويستوعبنى تانى، فابعد ونفضل اصحاب لبعض من بعيد لبعيد لأننا لو قربنا يمكن نشد مع بعض ونخسر بعض . كمان وانا صغيرة، يعنى من ضمن مهن كتيرة فكرت أشتغلها، كانت بتعدى عليا ايام اتمنى اشتغل مذيعة فى الاذاعة، وكنت وانا فى المدرسة لما أجى فى حصة القراءة أقرى حلو اوى لدرجة ان ممكن مدرس العربى يدبسنى فى قراية فصل من القصة كله، والمفروض أساسا ان القراءة تتوزع كل واحدة صفحتين صفحتين.. اممم ومرة كنت فى درس انجليزى وقريت للمستر الترجمة اللى عملتها، ولما خلصت ضحك وقاللى: ايه ده انا بدرس لقارئة نشرة .. احم، مش بنسى ابدا الحكاية دى

مش بس اتمنيت اشتغل مذيعة، لا دا انا اتمنيت اشتغل صحفية ومخرجة سينما وسائقة عربية ميكروباص - اوكى دى كان ليها اسبابها هههههههه - ولما كنت فى ثانوى مكنش هاممنى ايه الكلية اللى ادخلها قد ما كان نفسى ادخل كليه بعيدة واقعد فى مدينة جامعية :) بس اللى حصل انى رحت كلية بينى وبينها تلت ساعة بالعربية

ياللا ايام وراحت.. المهم انى دلوقتى وقبل كده كمان، عمرى ما اشتغلت حاجة مابحبهاش.. وعمرى ما اتمنى كده ابدا.. بجد نعمة كبيرة من ربنا انك تشتغل اللى بتحبه، مش مشكلة بعد كده انك تمله وتبدا تحب حاجة تانية، ابقى غير الكريير يا اخى .. انت مش ملزم تشتغل شغلانه واحدة طول عمرك، دا حتى دا بيفقدك كتير من متعة اكتساب الخبرات المختلفة.. خليك بنى ادم متعدد الانظمة ههههههههههههه
شفتوا الكلام اخدنا لبعيد اوى


المذيع: طيب.. دى اغنية يا زيزى.. حلوة, اسمعيها.. سيلين ديون وباربره استرايسند
tell him

انا- كتابة - : اه بموت فيها
love will be the gift u give urself
بس انا عايزة بون جوفي
it's my life

يا مالكا وسط البلد.. امسك الكتاب

صبوحة اتصلت بيا مخصوص عشان اتضامن معاها ومع يحيى عياش فى توجيه نداء للأخ مالك.. عشان يركز فى مذاكرته وماينزلش مصر قبل ما يخلص امتحانات

مالك، أرجوك يا بنى.. اخلص بأه م الهم اللى اسمه الكلية والمذاكرة دى.. عشان تفضى للهم الأكبر.. وتفرح العيلة كمان.. مش هكتر فى الكلام، صباح قالت اللى فيه الخير وزيادة وعلى رأيها

يا مالك يا ابن مصطفى انت تعلم قول المصطفى عليه هافضل الصلاة والسلام عن الجهاد
الأكبر والأصغر ، ولست في حاجة لتذكيرك أن إذا كان التواجد في القاهرة للمشاركة
الشعبية في مساندة الحق ، هي جهاد فإن يا بطل الفتك بتلك الكتب الملعونة وتقطيعها
من المذاكرة هو أيضا جهاد بل و الجهاد الأكبر … فمافيهاش حاجة انك تكن شوية لحد
مامة الامتحانات تخلص وابقى يا عم الحاج استرد مكانك في المحكوم براحتك

بصراحة يعنى صباح عندها حق.. وختاما وعلى رأيها بردو

يا مالك يا اخانا إنبي تكن يخليهوم لك .. عشان خاطر سيدنا النبي
كن بقى يا اخى تعبت قلبنا .. يووووهوه

-----------
نداء على جمب: والنبى ترجعى التدوين تانى يا صبوحة وبلاش كسل