6/29/2006

الكلمة الحرام والعيشة الحرام.. وطلاب من أجل التعبير


زمااان، قبل ربنا ما ينعم عليا بمدونة أرغى فيها، واقول اللى ييجى على بالى، وارمى كلمتين واقفين فى زورى كنت، قبل كده بسنين، احب اوى اوى حصة التعبير، ودروس التعبير، وامتحان العربى عشان التعبير، ومع ذلك كنت فى ليلة اى امتحان عربى سواء فى سنين الاعدادى او الثانوى احلم حلم واحد مايتغيرش، قال ايه انا رايحة الامتحان وبفوت على رشا ورشا اصحابى.. متأخرة اوى، واروح مالقيهمش، يكونوا سبقونى على الامتحان، اجرى انا ع المدرسة، طريق اخضر طويل مزروع.. امشى فيه كتير وفين وفين لما اوصل لجنة الامتحان، واخد ورقة الاسئلة بعد ما وصلت متأخرة، والاقى الاسئلة طويلة اوى اوى، اقرا مواضيع التعبير اللى المفروض اختار واحد منها واكتبه، احس ان الاتنين صعبين، اسيبهم وابتدى احل بقية الاسئلة عشان ماضيعش وقت، على ما اخلص الاسئلة يبقى فاضل بس خمس دقايق على اخر الامتحان وابتدى اكتب موضوع اتعبير وانا قلبى بتتسارع دقاته وبسمعها كمان ومش قادرة اخد نفسى وايدى توجعنى من الكتابة، وفى الاخر ربنا بيستر وبسلم الورقة والمراقب ييجى يقف فوق راسى انا عايز ورقة الاجابة، وبعدين اسلمه الورقة فى اخر دقيقة بعد ما حليت كل الاسئلة وكتبت موضوع التعبير فى تلات اربع صفحات

اصحى من النوم، وانا - لا مش مبسوطة خالص - اقوم قلقانة - لا مش عشان الحلم - الاحلام مش بتفرق معايا، بقوم قلقانة طبيعى من الامتحان، ولما ادخل اللجنة اللى بوصلها قبل معادى، واخد الورقة اقلبها على ضهرها قبل ما ابص على الاسئلة واقرا شوية ادعية، ارتاح واهدى واثبت واقلب الورقة اقرا كل اسئلة الامتحان وارتب فى دماغى اجابة كل سؤال، واخد فى اللعبة دى قد تلت ساعة ، اصحابى بأه يمسكوا القلم ويبتدوا يحلوا اول سؤال من غير ما يتعرفوا على اى اسئلة بعده، يا قلبهم.. ازاى يصبروا كده. انا بعد التلت ساعة الاولانية بكون هديت خالص وتقريبا خلصت الامتحان بيبقى فاضل بس اكتبه فى الورقة ودا طبعا اللى بياخد الوقت وامسك موضوع التعبير فى الآخر امزمز فيه، مكنتش احب اكتب اكلاشيهات البداية، ولا احب اكتب عناصر الموضوع زى ما بيعلمونا اساتذة العربى، كان مزاجى اكتب واسيب القلم ياخدنى مكان ما يحب، والتفكير يسرح بيا زى ما هو عايز.. واكتب واكتب واكتب وافرح بيا اوى لو وقعت فى ايدى جملة حلوة وللا تعبير مميز.. وكنت دايما متأكده ان موضوع التعبير باخد درجاته كاملة.. وفعلا لما احسب درجاتى فى الامتحان بعد ما نسلم الورقة ونخرج واراجع مع اصحابى اللى بحسبه بلاقيه، وباخدها كاملة

بس بصراحة عمر ما جه فى بالى اجيب سيرة رئيس امريكى او رئيس مصرى، عمر ما جه فى بالى اكتب عن سياسة البلد ومين اللى بيحكم العالم، يمكن مكنش فى موضوع يشجع على كده، ولو ان دا مش مبرر طبعا، اى موضوع فى الدنيا تقدر تحود منه ع السياسة.. الكلام فى السياسة زى ما بيقولوا بيبتدى بالكلام عن رغيف العيش
آلاء فرج بأه.. كتبت موضوع تعبير، اعتبرته وزارته التربية والتعليم منشور سياسى.. سب وقذف فى حق اسم النبى حارسه بوش واسم النبى صاينهم الحكام العرب.. بل وتجرأت آلاء وجابت سيرة مبارك انه -قال ايه- بيستجيب لبوش. البنت تجاوزت كل الخطوط الحمرا والبينك كمان، فتحت النار على اسياد العالم وهددت عرش الراقدون فوق صدورنا، وكتبت منشورا لن يقرأه سوى المصحح والمراجع بتاعه.. ولهذا قررت الوزارة التى تنوط بالتربية قبل التعليم ان تلقن البنت درسا فى العدل وتسقطها فى المتحان وتحرمها من سنة دراسية كاملة وتعيد السنة، ثم قررت ان تلقنها درسا فى الرحمة وتكتفى بدخول البنت ملحق المادة.. ايها العالم اشهد بعدل نظامنا ورحمته

طيب يا آلاء يمكن يكون مش قصدهم حرية رأى؟ يمكن عايزين يربوكى عشان قلتى على بوش كلام جامد.. يعنى اللى انتى اعتبرتيه وصف هما اعتبروه شتيمة واللى اعتبرتيه حقائق اعتبروه تجاوز.. كلمتين حبر على ورق، عقابهم يسقطوكى فى العربى، طيب ايه ذنب النحو والبلاغة والنصوص فى تجاوزات التعبير؟؟؟

معلش يا بنوتة انى ماكتبتش عنك طول الاسبوع اللى فات لظروف سفرى، بس يعنى انتى تحمدى ربنا غيرك اخد سنة حبس عشان مقالة فى جريدة.. عمك وائل الابراشى مبهدلينه وعمك ابراهيم عيسى هيكلبشوه ويحبسوه وشكلهم واقفين مستنيين على تلكيكه عشان يقفلوا الدستور.. يقفلوها على صوابعهم وتدوحس يارب، على بال ما تدوحس بأه يا آلاء اديكى عرفتى طريقك ومستقبلك ماتخليش حد ياخد منك كلمتك، ويحبسك ورا قضبانها، وماتخليش حد يخوفك بحرمانك من سنة تعليم، اساسا تعليمنا بايظ وانتى وحياتك طلعتى بتفهمى اكتر من اللى بيحطولك مناهج العربى

اما حكاية انهم اخدوكى واستجوبوكى وحاولوا يعرفوا لأى تنظيم سرى تنتمين، فيا لؤلؤ بصى فى عين اللى استجوبك وابتسمى ابتسامة من الودن دى للودن دى وقوليله: طلاب من أجل التعبير، وزيادة فى فقع مرارته قوليله انك رئيسة التنظيم.. بعدها احتسبى اللى عملتيه عند ربنا وما تخافايش من مخلوق

كلمة أخيرة، انا نفسى اعرف وجهة نظر سعادة المدرس الغلبان اللى كان قاعد يصحح مواضيع التعبير ووقع فى ايده موضوع آلاء.. وابتدا يقراه لحد ما وصل لما قض مضجعه واقلقه على حكامه -رغم ان اغلب مدرسين العربى لا يقرأون ابعد من الثلاثة اسطر الاولى والثلاثة اسطر الاخيرة وذلك حسب وصفات وأوامر المدرسين لنا زمان للاهتمام بتنسيق تلك الأسطر الستة- المهم يعنى المدرس ده، لما قرا الكلام بتاع آلاء وقرر يسلمه للمراجع يبقى ابن مين فى مصر؟ ابن مين عشان لما يقرا الكلام بتاعها ضد بوش يتضايق ولما يقرا الكلام بتاعها ضد مبارك يتحمق... يا راجل دا احنا ماحليتناش غير الكلام، دا المواطن الفقير البسيط اللى بيدور على قوته يوم بيوم بيلعن العيشة واللى معيشينهاله.. انت بقى ابن مين عشان تكون عيشتك عجباك واللى معيشنهالك عجبينك؟



---------------
بكرة ان شاء الله هكتب ردودى المتاخرة على التعليقات سواء فى بنت مصرية او أ، ب.. ي: تدوين

13 comments:

  1. ايه ده هو انا اول واحد هرد.. اوكي نفتتح..
    الاء بتفكرني بالدكتورة نوال السعداوي عندما اعتقلوها في السبعينات قالت ( السادات قال حرية تعبير .. وانا كنت عبيطة صدقت ان فيه حرية تعبير ) والنتيجة اعتقال
    الاء قرت جرايد وسمعت فضائيات وصدقت زي مناس كتير مصدقة ان فيه حرية ( تعبير )
    اهي الاء بتقلوكوا ياللي لسه مفهمتوش مفيش حاجه اسمها حرية ( تعبير ) فيه حاجه اسمها انشا
    والانشا دي عند علماء اللغة كلام منمق ومرتب حسب هوى القارئ ( والمصحح )
    وعلى فكرة دايما لما يكون فيه ( تعبير ) يكون فيه ( مصحح )حتى لما تعبروا كده في المدونات فيه بردو مصحح بيتابعنا علشان يصححلنا في يوم ما زي ماصحح لالاء
    مع خالص عزائي لحرية ... التعبير

    ReplyDelete
  2. مبروك التصميم الجديد للمدونة :)

    اللي يلفت النظر هو المصحح .
    كان ممكن يديها درجة سيئة لو كان اسلوبها سيء أو خرجت عن الموضوع .
    ربنا يبعد عنكم المصححين والمدرسين يا رب .

    ReplyDelete
  3. ايه يا عم الحاجات الحلوه دي

    مبروك التصميم الحلو قوي دا

    رجعتي من بلد الاحرار ولا لسه يا زيزي عاوزين نشوفك
    وحشتينا والله

    ReplyDelete
  4. وجه جديد لمدونة عريقه ...مبروك التصميم الجديد ممتاز .....بالمناسبة هل من الممكن عمل أرشيف لواجهة مدونتك والتى تعبر عن مراحل إنتقالية فى نظرى حتى تبقى شاهد عيان للأجيال القادمة ؟؟
    موضوع آلاء موضوع شرحه يطول .. وأنا الليلة مشغول
    ولكن لو تركت نفسى للكتابة سأكتب حتى طلوع الفجر !!.....يا ترى متى سيطلع الفجر ؟؟... وهل يمكن أن تشرق الشمس مرة أخرى فى بلادى ؟؟؟؟
    حقا لقد طال الليل و إذدادت ظلمته ... وكلما حاولت أحد الشموع أن تعطينا بصيص من نور ..أطفأها الظلم والقهر والإستبداد .... هل آلاء شمعة إحترقت قبل أن تضىء ؟؟؟؟
    أما أنها تحولت إلى طاقة كامنة ستنشطر فى يوم ما إنشطارا نوويا يحرق جميع الطغاة ... وتشرق بعدها الشمس من جديد

    ReplyDelete
  5. مصحح الورقة-الشخصية الفكاهية اللي اسمها حسن البياع كان وجهة نظرة ان البنت كتبت حاجات غير لائقة مينفعش تتقال...قال كدة في برنامجالقاهرة اليوم. ومن بجاحتة منسيش سختم خطبتة العصماء بالجملة الجميلة"الاء دي بنتي!!!!!"


    الخبر الحلو ان وزارة التربية والتعليم تراجعت عن قرارها وقررت تدي الاء درجة 11 من 14 في التعبير وتكرموا ووافقوا انها تنجح!!
    ربنا يخلي الحكومة

    ReplyDelete
  6. الله يباركو فيكو :)) يا رب يكون تصميم حلو

    شيماء.. رجعت يا بنتى، ونزلت التدوينة دى ووقع التمبليت بتاعى ونزلت التمبليت الجديد :) وبلد الأحرار بتسلم عليكى بيت بيت ورملة ورملة
    انتى وحشاااانى جدا، وعايزة اعرف تفاصيل يوم الاربعاء دقيقة بدقيقة

    سعدنى.. ارشيف للتصميمات دى مش ممكن عشان انا مش محتفظة بيهم خالص


    شوبش.. لسه قاريه الخبر فى الاهرام والاخبار، النكتة انهم كاتبين "فور علم الرئيس"، يعنى الموضوع بقاله عشر ايام وهو لسه متصل بيها، ويقولوا "فور"ه

    ReplyDelete
  7. سؤال أهبل :
    ليه ما قامتش الدنيا وقعدت على المدرسين اللي استغلوا قطعة النحو للمطالبة بكادرهم الخاص ، زي ما قامت على طالبة ضعيفة غلبانة؟

    السبب : لإن الطالبة ما بتنتميش لكوكب البيروقراط في مصر ..

    دي حاجة ..

    حاجة تانية .. بمناسبة البتاع اللي كان في برنامج منى الشاذلي وقال ان البنت كانت مشبعة بكلام ، وهو نفسه اللي قال ان اللي بيحصل في فرنسا وانجلترا دة ثقافة تانية وتأثير العولمة ومهمتنا نحمي أولادنا من آثار العولمة..

    وبيقول آل إيه : هوة الإسلام علمك تكلمي أبوكي كدة؟

    يعني يا بيروقراطي لما أسأل في مدونة رابسو بيه إيه استراتيجيتك لحل أزمة الدروس الخصوصية أبقى ما اتربيتش؟..

    الراجل دة ، واللي أنا شايف إنه كذاب في أصل وشه ، مبيتكلمش في اعتقادي عن عبارات آلاء وأسلوبها الحاد -لو خدناه على قد عقله-دة بيتكلم على الحرية نفسها ، على الأفكار نفسها ، يعني لو الكاتب هاجم رأي العقاد في قصيدة في كتاب مدرسي وأنا شفت رأي العقاد صح واتسألت في الامتحان عن الرأي الصح في المسألة وقلت رأي العقاد أبقى بكدة مخالف.. طب اتشطروا على اللي بيكتبوا في الأماكن الفاضية من الورق ألفاظ نابية بحق وحقيق وشتائم بسيطة ومركبة ..

    اشمعنى انت شايف إن الله حليم ستار مع اللي بيكتبوا شتايم بالأب والأم في ورق الامتحانات ، وماشفتش كدة مع آلاء؟ لإنك عايز الشو ، عايز تظهر نفسك بمظهر البطل!

    دول اللي بيعلموا الناس دلوقت؟.. لما بيكون اللي بيعلمني انتهازي ووصولي بشكل مسرحي وهستيري أخلاقي أنا تبقى إيه بعد كدة ؟ مش انتو بتقولوا المعلم قدوة .. لما يكون المعلم القدوة انتهازي ومهرج ومنافق وبيتستر على الغش والغشاشين في لجان الامتحان وبيسود قسايم الطلبة الغلابة في الحكومة الإلكترونية .. تستبعدوا على الجيل الجاي انه يبقى فيه حرامية ومهربين وتجار مخدرات؟


    دول مش خطر على النظام اللي بيقولوا انهم بيحموه ، دول خطر على البلد بحالهم .. ولو اتسابوا من غير التجريس اللي يستاهلوه فإن هذا البلد المسكين مهدد بالصعود إلى الهاوية!

    عذراً للإطالة..

    ReplyDelete
  8. التصميم هاااااااااااايل يا زيزي .. بسم الله ما شاء الله .. زي العسل و يفتح النفس ..

    بس عُرض الموضوع نفسه اضيق قوي .. صح ؟؟

    بس انتي عارفه رأيي ف البنوته من زمان و طبعا التصميم اللي اتبني معاها أقل ما يُقال فيه انه تحفه .. تسلم ايديكي يا زيزي ..

    موضوع الاء ده بقي بجد اقل ما يُقال عليه فعلا هو "طلاب من أجل التغيير" .. أصدق تعبير سمعته عنه لحد دلوقتي ..

    ReplyDelete
  9. ماتخاف ان قلت و خفت ما تنطق كلمه زعقت فى وش الضلمه يا هوه و لا حدش رد .. اتخض الحرف ف بطن الارض و شد القامه و شب جريت .. عديت الشوك السلك السور شرقان للنور يا بحور نايمانة الموج ما تهيجى و تيجى بانوه ياساكنه وساكنه زمان و مكان ... وسفاين خير قناطير العرق الدم العمر تشبل و تصب الفايض جيب الديب رساميل الناب مسنون .. فى اذاعه و تليفزيون جرنان و كتاب طليت بصيت مالقيت ولا وش اصيل .. ولا شفت النيل

    ReplyDelete
  10. المشكلة كلها سببها واحد تافه هو حسن البياع .

    البياع ابن البياع ده عمل مشكلة كبيرة لأسياده وهو فاكر إنه كدة بيخدمهم , وأكتر حاجة غاظتني نفس الواطي اللي اتكلم عليه قلم جاف , إنسان واطي قوي ومنافق وكذاب ومطبلاتي ورقاص و عنده استعداد يفلسف أي جريمة يرتكبها أسياده, وآل إيه البعيد أستاذ علم نفس تربوي !

    المهم إني قعدت يومين أجمع في صور آلاء و أجهز موقع لحملة إلكترونية للتضامن معاها , وقبل ما أطلق الحملة بدقايق قريت في موقع الوفد خبر العفو الرئاسي عنها !!

    طبعا كدة اللي أنا عملته خلاص راح هدر , بس عشان مش هاين عليا التعب والحوار الكبير اللي كنت متخيل إننا ممكن نعمله على النت , اتفضلوا الموقع أهه :

    http://alaa.blogsome.com

    وكمان هتلاقوا هنا صور لآلاء لو حد عايزها :

    http://www.flickr.com/photos/15478804@N00/

    ReplyDelete
  11. ahap

    اشكرك من كل قلبي علي الشرح الجميل
    لكيف تنشئ مدونه
    كل الشكر

    ReplyDelete
  12. بصراحه اكثر بفكر بعد شرحك اني
    انقل

    مهما اتكلمت

    مش هقدر اوفي حقك

    ReplyDelete
  13. that is because we lost our directions

    ReplyDelete