كل لووك وانتو طيبين

أجلت نشر التصميم الجديد لبنت مصرية لاكتر من.. تصوروا كام؟ دعاء العدل رسمت البنوتة الى على البانر دى من شهر نوفمبر2005، وانا ابتديت اجهز التصميم ده من أبريل، اها.. فى الفترة اللى كنت موقفة تدوين فيها :) ، لأنى طبعا كنت عارفة انى راجعة وانها مجرد اجازة.. المهم بردو مكنتش عايزة انشره دلوقتى، مكنش ليا مزاج يعنى.. بس فوجئت امبارح ان بلوجسبوت الله يعمر بيته وقع التمبليت بتاعى الأخير، وكل ما افتح بنت مصرية القى اللون الفحلقى اللى انا كنت حطاه خلفية ، ومفيش اى حاجة تانية.. وطبعا لأنى انسانة كسولة درجة اولى فمكنتش محتفظة بباك اب للتيمليت القديمة، وعليه، قررت انزل التصميم الجديد

طبعا واولا وقبل اى شىء، البنوتة دى رمز للبنوتات المصريات، مش انا يعنى، ومش شبهى لا من بعيد ولا من قريب :) انا حتى معرفتش انفذ مقترحاتى بخصوص البنوتة دى، انا كنت عايزاها لابسه كاجوال ووشها مدور مش وش حبة الألماس، وبتضحك اوى زى الهبلة كمان.. دعاء قالت لى اوكى، هى كمان اللى اقترحت فكرة الرسم.. يعنى البانر دا هدية من دودو .. ميرسى اوى اوى اوى يا دودو، فكرونى اكتب عن دعاء، من يوم ما عرفتها من سنة واحنا بقينا اصحاب اوى.. انتيم بمعنى الكلمة وبكل ما تحتوية من حواديت ومواقف وتليفونات ومقابلات وضحك ودموع وفرح وامل وقرب وكله كله.. بس طبعا الكلام ده عايز تدوينة او ثلاثية كده على قدنا

المهم بقى قبل الكلام ما يتوه اكتر من كده، جت دعاء بالرسمة دى.. وقالت لى ان الموود بتاعها خلاها رسمت كده، وان مزاجها كان كده، ودى رؤيتها.. طبعا انا مكنش ليا كلام تانى لأن ببساطة الرسم عجبنى جدا.. وتسلم ايدك يا دودو

الخلفية بقى اللى ورا البنت دى اختيارى انا.. والصورة اللى منزلاها مع البوست ده انا اللى عملتها متربة وقديمة كده.. لوك يعنى.. رايقة انا مش كده
اه كمان انا قلت بقى جو الصيف عايز حاجة اورانج فخليت التصميم غرقان فى شوب عصير برتقان زى ما انتو شايفين