7/03/2006

تصويت فى مستوى الناخب المتوسط

تصوروا 38% قالوا على جثتهم لو اخدها جمال.. والنبى انا فرحانه وراضية وحامدة ربى من النهاردة ليوم القيامة.. لما 194 بنى أدم من مجمل 510 رافضين جمال يبقى فى امل يا مصر.. بس هتعملوا ايه بقى؟؟ مش دا السؤال المهم.. ايه اللى هتعملوه عشان جمال مايوصلش للحكم؟ غير الدعاء طبعا

ومما أحزننى وأثر فى نفسيتى الرقيقة ان 35% من الجمهور المصوت فضل الملوخية على ابداء رأيه فى مستقبل مصر.. زعلت كتير اوى ، اكتر من زعلى ع السبعة فى المية اللى عايزين جمال، لأن وجودهم طبيعى فى ظل قانون الطبيعة اللى بيقول ان مفيش حاجة اسمها اجماع

اما الـ 21% المستسلمين لحكم جمال فأمرهم هين نوعا لأن دول النوع اللى هيكون فى صف اللى يكسب وهيدعمه يعنى ال38% لو اشتغلوا صح وحركوا الميه الراكده ممكن يسكبوهم فى صفهم، وهما اذا كانوا 21% هنا فهما اكثر من كده بكتير فى الواقع




التصويت الجديد بأه عن الصمت الرهيب دا اللى بيغلف احساسنا تجاه احدث عدوان اسرائيلى.. يا ترى سببه ايه؟ التصويت على ايدك الشمال.. اليسرى يعنى

5 comments:

  1. أختى العزيزة بنت مصرية ...
    أنا عايز بس أقول تصويتى فى التصويت الجديد اللى عاملاه عن القضية الفلسطينية وأنا شايف إنه لافيه أمل فى مصر ولا فى فلسطين إنها تتصلح حالها ...!!!!
    أنا عارف إنها نظرة تشاؤمية شوية لكن الأوضاع حاليا هى اللى بتقول كام واحد مهتم وسط ال70 مليون مصرى ؟؟؟
    مليون؟؟!!
    ودى مستحيل حاليا الصراحة ... الناس فى وادى والدنيا فى وادى

    وأشكرك جدا على إهتمامك بالرد على أيميلاتى والحمد لله المشكلة إتجلت :)

    www.withoutway.info

    ReplyDelete
  2. يا خوفى يا مصريين يجى اليوم اللى نمسك فيه فى جلابيه جيمى ونقوله انت حاكمنا انت قائدنا وتتطلع المظاهرات بقى ولافلام الهندى اللى بتحصل فى كل بلد عربى واخيرها مملكه اليمن (الجمهوريه سابقا)

    ReplyDelete
  3. معلش يا زيزي اصلي بحب الملوخيه

    ReplyDelete
  4. فيه وجهة نظر جديدة وغريبة تستحق النقاش أيا كان رأيي ورأيكم فيها :

    ما دام تسليم السلطانية حيحصل حيحصل .. ليه ميحصلش من دلوقت ونخلص؟

    ReplyDelete
  5. والله الشعب المصرى هيعمل مع جمال زى ما عمل مع ابوه

    ---------------------------

    مرة الريس عايز يزود شعبيته فقال لرئيس الوزراء يعلي الأسعار
    فالناس تتضايق يقوم هو ينزلها، فعلا رئيس الوزراء زود الأسعار، بس
    الناس ما اتكلمتش، عادي خالص،


    الريس استغرب قوي، وقاله: طب خلي الضرايب على المرتبات خمسين
    للمية. زود رئيس الوزراء الضرايب خمسين فى المية، الناس هزت
    دماغها وسكتت.


    الريس اتجنن وقال لرئيس الوزرا بص، طلع أي قرار غشيم من عندك يخلي
    البلد تولع، رئيس الوزرا عمل ضريبة اللي يعدي كوبري يدفع عشرة
    جنيه، الناس نفخت و ضربت كف بكف ودفعوا،


    فقام رئيس الوزرا خلى اللي يعدي يدفع عشرة جنيه وهو طالع، وعشرة
    جنيه وهو نازل من الناحية التانية، الناس قالت اللهم طولك يا روح
    و أمرنا لله و دفعوا.
    رئيس الوزرا كبرت فى دماغه، وأمر إن اللي يعدي بعد ما يدفع عشرة
    جنيه، و هو خارج من الكوبري ياخد على قفاه، و نزل الريس بنفسه
    متنكر يتابع الموقف، الناس تدفع وهية طالعة الكوبري عشرة جنيه، و
    عشرة جنيه و هية نازلة و تاخد على قفاها وتمشي،





    "مالك؟" شوية و لقى واحد بيزعق و متضايق، وطى على ودنه قال له
    له "حاجة تقرف! أنا متعطل هنا بقالي خمس ساعات..ما ينفعش كدة قال:
    ..لازم يزودوا الناس اللي بتدينا على قفانا!!!!!!!!"

    ReplyDelete