ألو، أنا الريس يا آلاء
آلاء: أهلا.. يا فندم
الريس: اكتبى واقرئى، وقولى رأيك بحرية.. وماتخفيش من حد
آلاء: ربنا يخليك لينا يا سيادة الريس
الريس: عايزة حاجة يا بنتى؟
آلاء: نتمنى أن تزورنا فى شربين
الريس: عندما أزور المنصورة هجلكم فى شربين
هذا ما نشر بالأمس فى الأهرام حرفيا، لنفترض انه حصل فعلا، ونفترض كمان ان دا بالظبط نص الحوار، وفكروا معايا.. ليه وعشان ايه؟
ايه اللى يخلى الموقف يتحول فجأة كده، وتتدخل العناية المباركية لإنقاذ مستقبل آلاء؟ من امبارح وانا بفكر.. طيب ما إبراهيم عيسى اخد سنة سجن.. وهو بأه صحفى ومبارك وعدهم من سنين بحرية النشر، حتى اغنية "اخترناه.. اخترناه" تشهد. مخى عمال يودى ويجيب. ما هو مش معقول يكون الانتشار الاعلامى لموضوع آلاء هو بس السبب.. وللا هو؟ ما هو لو هو دا السبب، يبقى ياللا نعمل حملات اعلامية جامدة لصالح كل سجناء الرأى، صحيح معرفش ازاى نعملها جامدة، اقصد معرفش ازاى ممكن نخلى كل الصحف وكل وكالات الأنباء تكتب عنها.. بس.. طيب استنوا، يمكن الموضوع انتشر اوى لأنه جديد؟ مش صحفى ولا مناضل.. دى بنت فى ثانوى
انا كده تهت.. ايه اللى يخلى موضوع آلاء يتحول كده؟
:لو عندك تصور ما للموضوع اكتب عنه، بس الأول اقرا
مقال فى الجارديان قبل تدخل مبارك
How to pass your exams in Egypt
تحليل البى بى سى لتحقيق الأهرام
Mubarak 'solves girl's exam problem'
وطبعا شكرا لأسد على مجهوده فى اعداد صفحة تضامن مع آلاء، واللى مالحقتش تشوف النور للتدخل "الفورى" - اه والله الأخبار كتبت "فور علم الريس"، اللى تم بعد اكتر من اسبوع على انتشار القضية
أولا ألف مبروك اللوك الجديد
ReplyDeleteثانيا : النظام في حاجة كل فترة إلى تجميل صورته ، أو قمة صورته ، ولكن في الجزء الذي يرغب هو فيه ، وليس نحن ، لذا مهما قمنا بحملات فالنظام لن يستيب إلا لما يريده هو ، ثالثا ، أليس المدرس والناظر ومدير المديرية التعليمية ، وكل طاقم المسئولين الذين حكموا على آلاء بالرسوب جزءا من النظام ، هم كذلك بالفعل ، وما قاموا به ليس مستغربا ، بل هو تفصيلة أساسية ، وبديهية أيضا من تفصيلات عملهم ، وصدقيني لو تكرر الأمر مرة أخرى سيتكرر بحذافيره ن وصدقيني مرة أخرى هناك ملايين من آلاء في مصر لا يجدون من يسأل عنه أو يقولهم آلو ، لكن السؤال ألأأكثر سخرية ، هو كيف عرفت الجرائد القومية تفاصيل المكالمة ، همه كانوا رافعين السماعة التانية ولا إيه ؟؟؟
قرأت أيضاً الأهرام أمس, ولم أتعجب من تلك الحركة الفاضية, فالنظام يحاول إيهامنا أن الوحشين هما اللي حوالين الريس أما الريس فيا حبة عيني طيب وابن حلال وميهونش عليه حد يخش السجن ولا يتبهدل ولا يضيع عمره ولا يسقط سنة
ReplyDelete\
فيه من خمسين سنة نفس الناس شغالين بالطريقة دي لإيهام الناس فكرة ان ان الريس ميعرفش ولو يعرف هيعمل الصح على طول, لأنه ميرضهوش الظلم
ولكن هذه الطريقة أثببت فشلها وعدم قناعة الناس بتلك التمثيلة السخيفة وتذكروا ما يحدث مع أيمن نور من اتجداء البعض للعفو كي يقولوا أن الريس ميرضاش بهدلة الراجل العيان ولو كان مزو
=
الله يحرقهم هما ومسلسلات رمضان الفاشلة
=
مبروك على الشكل الجديد جداً
=
سلام
=
الموضوع و ما فيه فى راى
ReplyDeleteان عملية استغلال كل مايقدروا عليه بدون خسائر
ايه يعنى لما يطلع ويقولك ده هم غلطوا واحنا اسفين اكتبى يا بنتى اللى انت عاوزاه
البنت رسبت او نجحت كتبت موضوع تعبير او مكتبتش موش هيأثر عليهم
البنت بره السجن جوه السجن ولا ليها اى قيمة او خطر يذكر عليهم
الهدف الاساسى احنا موش خسرانين حاجة
واهى منها حركة دعائية بحته
عنوانها " فى امل يا شعب"
والظريف كمان ربوا الرعب جوه الطلبة
استحالة بعد كده الموضوع هتكرر
من الاخر كل اب و ام هيقولوا لولدهم
"اوعى يابنى تتكلم فى السياسة فى الامتحان اكتب الموضوع اللى المستر حفظهولك"
وكسبوا نقطة عند "الشعب العاتفى"
بالتاء موش بالطاء
يعنى من النهاية الريس ابو قلب طيب و حنين حل المشكلة
ahap
ReplyDeleteطبيعي ان شوفو من وراها
نحن نعيش في دوله مرعوبه
ثانيا
هناك من يظن انه اوصياء
علي النظام
ملكيون اكثر من الملك
الو
ReplyDelete....
لأ
....
لالالأ
....
لالالألألأ
.....
احيييه
دا الحال من بعضه
طول عمري بقول عليه انه حونين قوووووووووي
ReplyDeleteالله عليك يا باشا
من الاخر كدا الموضوع دا اشتغاله كله فى بعضة يا جماعة ودى بروبجادة للرئيس ابو قلب خصايه ودا الكلام الى عندى
ReplyDeleteربنا يهدة زى ما هدوا السلم لملم لملم
أشكرك يا زي على التنويه عن الصفحة اللي مبقاش ليها لازمة بسبب الريس ,
ReplyDeleteالمهم همتك معانا في الموضوع التاني ده , هو اللي يستاهل :
دعوة للتظاهر أمام السفارة الصهيونية - اضغط هنا
الطالبة ألاء.. أغلب الناس تعاطفوا معاها.
ReplyDeleteانما ابراهيم عيسى مش كل الناس متعاطفة معاه .
انتم عارفين لما العبد يلحس حذاء سيده اكثر مما سيده يعوز؟
ReplyDeleteمين اللي بلغ عن الاء اصلا؟
مدرس بيصحح الامتحان
والمدرس يعمل فيها " وطني " ليه اصلا؟ ويروح يبلغ السلطات ؟
يا خايف ..ياعاوز ياخد شريطة
النظام الامني هو اللي بيحكم مصر
الامن مبيفكرش بعقل
لا بيهبل
وساعات بتتقلب عليه
لا فيه مؤامرة ولا يحزنون
مدرس حمار
بلغ الامن
الامن عاش في دور حماية الدولة من الارهاب
الموضوع كبر علي ما فيش
بقي الاعلام بيكيتب
فضيحة
يجي جدو مبارك
يقول
يا عبد منك ليه حد قالوكم تلحسوا الجزمة بتاعتي الا لما احتاجكم ؟
بت يا الاء
اكتبي يا بت
والعبي براحتك يا بت
البت الاء ...والرئيس
يا لهوي
بابا مبارك
انت بابا وانت ماما وانت انور وجدي
يا ريتني مكتبيت اللي كتبته عنك
انت مظلوم
وحواليك ناس وحشة ديابة
حتزورنا امتي يا بابا؟
وهكذا في محاولة لخلق حرة جديدة
تحول الموضوع الي مهزلة
وعاد الحر عبدا
مبارك ذكي
بت صغيرة تعمله فضيحة
خلص الموضوع
شوية صيع بيقولوا يسقط مبارك محدش بيتعاطف معاهم
ارميهم في المعتقلات
دي عالم عاملالنا صداع
الشعب المصري يبدو انه متاصل في مسالة العبودية
بل وفي نسيان ظلم الظالم بمجرد ميبطبطب عليه
فيه سؤال
مين اللي سرب الخبر اصلا للاعلام؟
بيتهيالي واحد غبي من بتوع الامن كان فاكر انه حياخد شريطة بيها هو كمان
بمعني
العبيد بيلحسوا جزمة السيد زيادة علي اللزوم
والسيد بس بيحدد كمية اللحس
وبيصحح الاخطاء اللي ناتجة عن اللحس الزيادة
ويظل العبد عبدا
والله اعلم
تحيا آلاء و يسقط الأعداء
ReplyDeleteانا متفائل خير بشباب مصر والله و اياك بس اهلها ميخلوهاش تتراجع و تخاف
آلاء رمز لمصر و سمعتها بتتكلم في البيت بيتك ..محمود سعد بيقولها كنتي طبعاً سعيدة و مش مصدقة نفسك لما كلمك الريس
ردت رد لم أكن متوقعه علي الأطلاق
قالت: عادي خالص محصليش حاجة
ربنا يحميكي يا آلاء
و مبروك علي اللوك يا بنت مصرية
عايزه أفهم حاجه .. يعني كل مشكلات قمع الرأي و أشكال ل التعنت و الفساد ف مصر سحلها قطر و ما نجيش الا مشكلة ألاء ؟؟
ReplyDeleteمبارك ما سمعش الا عن مشكلة الاء ؟؟ ما سمعش عن شرقاوي ؟؟ ما سمعش عن سراندو ؟؟ ما سمعش عن اطفال التطعيمات الفاسدة ؟؟ طيب يعني اشمعني ؟؟ ده القضاة هينتحروا و الصحفيين هيلبسوا حله و يجروا ف الشوارع بعد القانون الاهبل اللي مرروه ف مجلس الشعب .. و هروا الدنيا كلام ولا حد قالهم بتقولوا ايه ..
بجد سؤال ف قمة الاهمية .. يعني اشمعني المشكله دي ؟؟ و هل المطلوب دلوقتي ان كل مشكله لازم تتفاقم لحد ما سيادته يتنازل و يتعطف و يحن و يحلها ؟؟ طيب ما تيجي نحل مجلس الوزرا و مجلس الشعب و المجلس الاعلي للقضاء و نقضيها تليفونات مع سيادته بقي !!
بجد حاجه تفلق ..
كتبت عن المدرس في هذا الموضوع :
ReplyDeletehttp://egyptian-ta3leem.blogspot.com/2006/06/blog-post_27.html
في 9\4\2002
ReplyDeleteكنت موجود في مظاهرات الاسكندرية اللي اتقتل فيها كذا واحد و اتعمي فيها كذا واحد من صحابي
المهم, الإمن يويميها لمله 100أو 200 طالب و راح راميهم في المدرعات بتاعته
و ضحكوا علي العيال و قالولهم احنا حنمشيكم بعد ما المظاهرة تنفض
و فجاة العيال لقوا العربيات بتمشي
و فجأة لقوا نفسهم في الغربانيات
و فجأة لقوا نفسهم في النيابة
واحنا اللي ما اتمساكناش يعني ما بطالناش تنطيط و مظاهرات و اعتصامات
و رحنا سبينا لرئيس الجامعة
و ما اكدبش عليكوا عيطنا لوه شوية ..كله يهون علشان صحابنا
و أهالي صحابنا راحوا اعتصموا ادام النيابة
الشيئ الجميل إن النيابة كانت كمان معتصمة معانا
الموظفات كانوا بيدخلوا أكل لأصحابنا
و يسربولهم الموبايلات علشان يكلمونا
المهم قعدنا متزاولين في الحوار ده بتاع اسبوعين
و فجأة لقينا الأب الرئيس بيعلن العفو عن ابنائه المتظاهرين
فهتفنا كلنا:يلعن ديك أمك انت كنت نايم كل ده
حكاية الاء فكرتني بالقصة القديمة دي
ربنا يخليكي يا الاء
مش ملاحظين إن كل البنات الجدعان إسمهم في "اء"في الاخر
ReplyDeleteيعني اديك مثال...
وفاء الفلسطينية اللي عملت عملية استشهادية من خمس سنين
سناء اللي خطفت الطيارة الاسرائيلية
الاء الطفلة المصري الحرة
دعاء العدل اللي صممت اللوك الجديد
بتاع بنت مصرية
www.mashrabya.blogspot.com
والله أنا دايما إعتدت افترض الأحسن بغض النظر عن الاحداث
ReplyDeleteوجهة نظري غن الرئيس حسني مبارك.. مش بيتابع اللي بيحصل زي ما إحنا بنتابعه كده لإلتزاماته و أعتقد إن المسألة كانت محجوبة عنه بشكل ما.. و الموقف الخاص بوزير التربية و التعليم و مديرية التربية و التعليم هناك أعتقد إنه كان نتيجة إجتهاد شخصي و بما إن شخصيات الناس دي بيروقراطية قوي زي ما قلت قبل كده (عبة الروتين) فبالتالي رد فعلهم كان بالشكل الغبي ده... مجرد تطبيق من وجهة نظرهم للقانون و بكل غباء
أما عن حسني ميارك فزي ما ذكرت إنه لا يرى إلا ما يريد الآخرون أن يراه
لي قريب وكان بيشتغل في وظيفة حكومية هامة و كل الجرايد كانت بتروحلة البيت وبالرغم من كده كنت انا اللي بقرأها لأنه هو شخصيا مكانش عنده وقت يقراها ومكانش يفتحها إلا لو لقى مذكرة بخصوص موضوع في نشر أو مشكلة نشرت ووردت ليه في البوسطة.. يعني ده كان موظف.. فما بالك برئيس دولة. صحيح الحركة اللي ذكرتها الجرايد واضح قوي إنها حركة مسرحية.. لكن الحقيقة بردو إن كل حاجة بيعملها بناء على برنامج موضوع مفيش خطوة فعلية بياخدها من غير متكون متحدداله.. يعني لازم نفهم إن حسني مبارك رمز لمصر زي العلم و ليس فعليا العقل المفكر و المدبر لكل ما يحدث.. و لو جيتوا للحق إن عملية إخفاء كل ما يحدث لصالحهم لأن مفيش رئيس دولة يحب إنه يكون مصب لغضب شعبه وبالتالي كل المحتجزين دول غالبا لو كان وصل موضوعهم للرئيس فأكيد وصل بشكل مغلوط بحيث إنه ميغلطش الجهاز الأمني و بالتالي محدش منهم يخسر شغلانته أو منصبه.. كل اللي بيحصل ده نتيجة تنفيذ غبي للقوانين من ناحية الأمن و قلة منهم مريضة نفسيا والموضوع لما خرج من إيديهم ساؤا فيها زي ما واحد بكدب كدبة و يعيش فيها علشان الناس متكتشفش كدبه... يعني المشكلة الأساسية في ضمائر الناس اللي بتوصل الكلام بشكل مغلوط .. علشان على رأيكم تاخد شريطة
اولا احب احييكيعلي النيولوك الجديد للسيت
ReplyDeleteثانيا فهذه هي اتجاهاتالحكومه في الفترهالاخيره
اذا كانت الاءبنت عاديه رلم تستطيع ان تتجه الي من يسمعصوتهااو شكواهافكان مصيرها الفشل
لني اجد ان العيب في النظام من اوله لاخره ولابد من حل جزري
اود ان تكوني علي اتصال بي
الحقيقة انا تخيلت ان الريس اتصل بيه انا كمان :) والموضوع كان فعلا يضحك لدرجه كبيره .. لأني مش متخيل ان واحد يكلمني يقولي انا الريس اقوله قشطه يا باشا عامل ايه و اخبار الكليه ايه و نازل القهوه بليل ولا لأ :) الموضوع كبير و عايز تحضير كتير
ReplyDeleteالحمد لله ان الريس مش بيكلمنا في البيت ههههه
ZanGooLa
masrena.blogspot.com
حلو اوى اللوك الجديد والف مبروك عليه ،بالنسبه الاء فالموضوع بمنتهى البساطه حسنى مبارك حب بيعمل فيها شو عشان يكب بنط على حسا ب الغلابه ولانه شاف الموضوع كبر اوى وكمان فيه لجنه اتكونت عشان حقوق الاء فقال الموضوع واصفى بعد كده حسابى بعدين واعمل فيها الاب الحنون واكتبى يا حببيتى اللى انتى عاوزه والافلام الهندى ده لكن انا اراهن ان البنت ده هاتشوف اللى عمرها ماشفته قبل كده هى واهلها وللعلم لها اخ فى تجاره يعنى مممكن يصفوا الحساب بتاعهم معاه
ReplyDelete