7/04/2006

البحث عن نصيحة

خدوها حطوها حلقة فى ودانكم أو خاتم فى صباعكم أو يافطه بالنيون بين عنيكم: الشجاع من ينصح الآخرين، العاقل من يمتنع عن ذلك

قد تكون هواية لدى البعض، أو موقفا اضطراريا لدى البعض الآخر لكنها فى النهاية قد تتسبب فى علاقات متوترة

كيف يمكنك إسداء النصيحة دون أن تخسر الطرف الآخر؟

حسنا قبل أن أجيب عن هذا السؤال أظن أنه من الأفضل طرح سؤال أولى.. لماذا من الأصل لا يتقبل الآخرون النصيحة؟. إذا ادركنا لماذا، فسوف يوفر علينا طريقا طويلا ومجهودا مكثفا لا يلبث أن يتحول لوسيلة تنفير وقطع علاقات و و و

:قد لا يتقبل الطرف الآخر النصيحة لأنك تقولها
بطريقة تهكمية
أو فى وسط خلق الله كلهم (فضيحة يعنى)ه
أو بشكل تربوى سقيم
أو بشكل متكرر (كل ما تشوفه تنصحه)ه
أو بصيغة النهى (لا تفعل) أو بصيغة الأمر (افعل)ه
أو باستخدام ألفاظ مفتاحية تسلطية مثل (المفروض انك..) (الواجب عليك..) (لازم تعمل..)ه
أو تردد النصيحة وانت على غير استعداد للدخول فى نقاش قد يفتحه الطرف الآخر (يعنى نظام "هو كده" "ماتجادلش")ه


قد يبدو أنى أغلقت الباب فى وجه محبى إسداء النصائح :).. لأن هذه هى الأساليب المستخدمة غالبا

ومع ذلك - ورغم أنى من مؤيدى عدم النصح بشكل عام- فعلى أن أجيب عن السؤال المطروح فى أول التدوينة: كيف يمكنك إسداء النصيحة بدون أن تخسر الطرف الآخر؟

إذا وجدت النصيحة تلح عليك بشدة وواقفة على طرف لسانك ولن تستطيع ابتلاعها فيمكنك أن تقولها بعد توافر الشروط التالية

أولا: يجب أن يكون المسدى إليه النصيحة صديق لك، وأقصد الصداقة الحقيقية التى تجعله يبلع الظلط ويغفر الأخطاء ويتهاون عند ارتكابك مثل تلك الفعلة بل ويفهم مغزاها الحقيقى وهى خوفك عليه واهتمامك بأن يكون فى افضل حال. تخيل مثلا انك قابلت وجوها جديدة فى تعارف ما، جرب كده تقوله أى نصيحة. طبعا هيقلب وشه أو يبتلع إهانتك له ( طبعا هيعتبرها إهانه لأنه مايعرفكش ومفيش بينكو قبل كده سابق معرفة تخليه يثق فى إن قلبك عليه)ه

ثانيا: لا تكرر النصيحة، لا تكرر النصيحة، لا تكرر النصيحة، فعندما لا ينفذ صديقك النصيحة معناه انه لم يقتنع بها أو أن ظروفا تمنعه فلا تجازف بصداقتك وتضعها على شفا حفرة الانفصال عندما تلح وتكرر النصيحة فى كل مناسبة وكل موضوع وكل فرصة تراه فيها.. خدها نصيحة اللى ياكل على ضرسه ينفع نفسه، وكل واحد مسئول عن تصرفاته.. فاهمها دى كويس؟ كل واحد مسئول عن تصرفاته... وانت عملت اللى عليك مرة

ثالثا: يمكنك أن تقول النصيحة فى صيغة اقتراح وليس فى صيغة أمر أو نهى، ومن المهم أن تذكر السبب الذى جعلك تقول النصيحة (وباختصار) ولكن لا يكون مثلا (أصل انا قلبى عليك) وللا (انا خايف عليك) دا امر منتهى، لكن مثلا عندما تنصح صديقك بعدم ارتداء تي شيرت بخطوط رأسية فقل له لانه نحيف والخطوط الرأسية تزيد الاحساس بالنحافة

رابعا: بلاش اسلوب جر الرجل. يعنى مش معقول تصاحب حد وتروح وتيجى معاه عشان تقنعه بمذهبك فى الحياة وتجر رجله لأفكارك.. اذا اقتنع النهاردة فهو هيفوق بكرة لانك بالتأكيد لن تستمر فى جر رجله بل ستنتقل لضحية اخرى، وفى النهاية لن يصبح ضحية إلا افكارك نفسها لأنك اهنتها

خامسا: لابد أن تعد نفسك للدخول فى مناقشة قد يفتحها صديقك لتفهم النصيحة أو حتى إعلان الإختلاف معاها وإبداء مبررات. لأن فى الغالب صديقك تخطى مرحلة الطفولة ويقدر يزن الأمور وبالتالى بعد أن تنصحه ستنير فى عقله عدة علامات استفهام يهمه جدا أن يناقشك فيها

سادسا: مهم جدا أن تكون النصيحة مجرد جملة عابرة وسط الحوار، يعنى لا يجب أن تعد زيارة مخصوصة لصديقك كى تقولها له، ومش لازم ابدا تجيبه على ملى وشه عشان تقول له وقبلها تكون كدبت عليه وفهمته ان الموضوع كبير كبير كبير

سابعا: بلاش فضيحة، اقصد بلاش نصيحة فى وسط ناس كتير.. دى بجد قضم وسط وتدمير علاقة وخسارة انسانية لن تجنى منها غير درس مهم جدا انك مش هتنصح حد تانى

أخيراً يفضل أن تعطى النصيحة لمن يطلبها فهو فى تلك اللحظة على اتم الاستعداد لتلقيها سواء كان صديقا لك أم غير ذلك.. وساعتها بأه يا عم مارس هوايتك براحتك وادعيلى

15 comments:

  1. وأنا تبع مبن فيهم بأة؟
    :)))

    النوع اللي فيه امل ؟ واللا النوع اللي يترمي طوبته؟ واللا النوع اللي محتاج قنبلة ذرية علي نافوخه وهو يبقي مية مية ويخف ان شاء الله
    :))
    ؟؟
    ايه الاخبار ؟؟

    ReplyDelete
  2. ممكن اللى قدامك يكون غلطان وانت بتنصحه بطريقه مفهاش تجريح بس هوه تاخده العزه بالاثم ولا يتقبل النصيحه

    قال رسول الله صلى الله عليه وسلم الدين النصيحه قالوا لمن يارسول الله قال لعامه الناس وخاصتهم

    ReplyDelete
  3. تدوينة جميلة بس انت بتنصحي بعدم تكرار النصيحة وألا تكون بصيغة النهي ومع ذلك بتيجي بعد كده وتقولي لا تكرر النصيحة لا تكرر النصيحة لا تكرر النصيحة ... حلو الأسلوب ده لأنه بيوصل الفكرة للقارئ بسهولة أنا مش عارف انت تقصديها ولا لأ بس في كتاب قرأته قبل كده عن تحسين أسلوب الكتابة وكان بيستخدم نفس الأسلوب وهو وضع القاعدة في شكل مناقض لما تدعو اليه وده بيخلي القارئ ينتبه أكثر علي ما أعتقد

    ReplyDelete
  4. فكرني البوست بدرس كنت اخدته في كورس كان بيتكلم عن الأسلوب السيء في التعامل مع الآخرين والحديث معهم .

    مخبيش عليكي إني اسلوبي في النصح ممكن يكون تربوي، وده ممكن يضايق.. بس أكيد حيضايق حد مش بيحب يسمع النصح (عن تجربة) .
    فكرة البوست راقية جدا .. احييكي عليها .

    من ضمن المشكل في النصح، إن الكلام يبقى شخصي، ومش منصب على قضية .

    ReplyDelete
  5. والله عندك حق في كل كلمه قلتيها

    اللوك الجديد زي السكر على فكره

    ReplyDelete
  6. البوست حلو قوي قوي قوي .. ما شاء الله .. أكتر حاجه عجبتني فيه تنظيم طريقة التفكير و العرض .. فعلا طريقته تخلي اي حد يستوعبه بسهوله .. و لما يحب يركز ف نقطه يقدر يعمل كده بكل بساطه و يرجع يكمل بعد كده بقية النقط ..

    اعتقد اني من النوع الشجاع .. صح ؟؟

    ReplyDelete
  7. العصفور ابو ديل هزّاز

    حب يغيّر زقزق جاز

    واللى يقلد غيره تمللى

    يطلع صوته خشن و نشاز

    ReplyDelete
  8. بن عبدالعزيز
    العفو يا مولانا، دا انت الى بتعلمنا
    -------------

    يحيى
    اللهم صلى عليه.. الدين النصيحة طبعا، بس الطريقة عليها عامل كبير فى التقبل او الرفض
    --------------

    مختار العزيزى
    كويس انك لقت اللى اقصده من ورا استخدامى لما نهيت عنه :D
    ---------


    عبده باشا
    ومين بيحب يسمع النصح
    صدقنى محدش يحب ادبا
    لأن محدش يحب يكتشف انه لطان فى حاجة او عنده قصور فى شىء
    -------------------

    بسبس
    نورتينى يا قمر :) ميرسى
    ------------
    رومانتيك روز
    مش انا اللى احكم يا كوكى، انتى صديقتى واقبل منك الظلط :D
    ومع ذلك اكاد اجزم انك شجاعة جدا بناءا على مواقف حكيتيلى عليها ومواقف انا شفتها
    ---------------
    المنادى
    امتى هنشوف ليك مدونة تجمع أشعارك؟

    ReplyDelete
  9. أعتقد ان في ناس ماينفعش معاهم اي نصيحةو لو عملتله أرجوز........التصميم رائع وأمنى ألا يطغى الشكل على المضمون

    ReplyDelete
  10. انا جديد في التدوين واتمنى ان تزوريني
    وتلقي بنصائحك

    ReplyDelete
  11. أنا برة السايبر سبيس بأحتك بناس بيدوا نصايح لأنهم بيحبوا يسمعوا صوتهم من بعييييييييييد.. وياريتهم بيدو نصايح ، خطب عاملة زي بتوع محمد حسين يعقوب!

    العالم برة السايبر سبيس سيرك يغري أي مدون في العالم بالكتابة عنه ..

    ReplyDelete
  12. الظاهر اني طلعت من النوع بتاع النصايح التربويه و الانيل اني بقولها علي الملأ وبستغرب لما الاقي الواد زعل الصراحه ده انا طلعت اخي اخي خالص


    مبروك النيو لوك معلش ما دخلتش عالنت من فتره

    ReplyDelete
  13. طبيعي أن نقدر سلوك مبارك في التعاطي مع الأزمة الحالية في لبنان .. الرجل لم يأت بجديد ، هو فقط ينفذ ما يأمره به من ولاه الحكم أصلاً وهم الأمريكان حسب مستندات ووثائق الإدارة الأمريكية التي بإمكان أي واحد الاطلاع عليها .. فقد عينه السادات رئيساً للوزراء في صبيحة يوم أسود من عام 1975 وعندما علم السفير الأمريكي بذلك عند الساعة الواحدة ظهراً أرسل إلى وزارة الخارجية الأمريكية فاكس يقول لهم أن السادات عين حسني مبارك رئيساً للوزراء وهذا الرجل نحتاج إليه في المرحلة القادمة بشدة وأخشى أن يحترق سياسياً في هذا الموقع التنفيذي ، وعليه أقترح أن يعين نائباً للرئيس السادات لكي يأتي من بعده رئيساً لمصر لضمان استمرار عملية السلام وكامب ديفيد .. وبالفعل جاء الرد فوراً بالموافقة وتفويض السفير بمخاطبة السادات أو أمره بذلك .. بالفعل ذهب السفير الأمريكي عند الساعة الثامنة مساء إلى السادات وأبلغه بقرار البيت الأسود في واشنطن بتعيين مبارك نائباً لرئيس الجمهورية ، وافق السادات فوراً وتم إلغاء قرار تعيينه مبارك رئيساً للوزراء وأصدر السادات قراره بتعيين حسني مبارك نائباً له في مساء ذات اليوم .. في ذات الليلة .. وإيه يعني حد شايف حاجه ؟؟؟ .. طبعاً الحكاية ممكن تكون جديدة على البعض لكن راجعوا التاريخ والمستندات وصور الفاكسات الموجودة بأرشيف وزارة الخارجية الأمريكية لتتأكدوا من كلامي .. يعني يا جماعة اللي بيحكمنا دلوقتي هو موظف أمريكاني .. طيب ليه زعلانين لما يلعب بينا الكوره ولا ينظر إلينا بطرف عينه ؟؟؟ مش المفروض إنه ينفذ أوامر من جاء به إلى الكرسي ولا عايزين الراجل يخالف المنطق ؟؟؟ الراجل معذور بيعمل اللي بيؤمر بيه .. طيب فين المشكلة بقى ؟؟؟ طبعاً نفس الكلام ينطبق حرفياً مع تحوير بسيط على حكام السعودية والأردن .. واللبيب الملاحظ للبيانات الصادرة عن الثلاثي القبيح سيعلم أنهم يقرأون ذات الرسالة القادمة من البيت الأسود .. لاحظوا بياناتهم كانت زي بعضها تمام .. وفي نفس الوقت بالضبط .. يعني تاني يوم الأزمة هما الثلاثة صرحوا .. وبعد أسبوع صدر تصريح جديد بنفس المعنى من الثلاثي القبيح وفي نفس اليوم .. طبعاً بياناتهم مجرد قراءة للفاكس القادم من البيت الأسود مع اختلاف بسيط جداً في الترجمة بين أسلوب الأردنيين والمصريين وبتوع السعودية لكن المعنى هو هو .. طيب لإمتى هيستنى الجيش بتاعنا ؟؟؟ لإمتى هيسكت عليهم ؟؟؟ والله أنا ما بقيت عارف إيه فايدة الجيش لو ما تحركش عشان يحمي الوطن في الداخل والخارج يبقى لازمته إيه بقى ؟؟؟ لا بيحمينا في الداخل ولا في الخارج .. عندنا ربع بلدنا منزوع السلاح من عندنا احنا بس لكن الصهاينة سلاحهم جاهز وممكن تصبحوا تلاقوهم في القاهرة .. وساعتها ادعوا للسادات وكارتر بالرحمة .. وقريباً جدا .. أقرب مما تتصورون ستجدون أن اليهود ممن اشتروا اليوم مصانعنا وشركاتنا ومزارعنا بأسماء وهمية عربية ولا حتى مصرية جم عندنا وكشفوا عن وجوههم القبيحة وقعدوا على قلبنا وقلب أولادنا وشوية شوية تنتقل انتفاضة الحجارة عندنا هنا في القاهرة وتلاقي العيال في شبرا ماسكين حجارة عشان يضربوا بيها عساكر بني صهيون .. مش لسه الخريطة متعلقة على الكنيست بتاعهم وبتقول كده ؟؟؟ طيب ليه احنا مش عايزين نصدق ؟؟؟ حلم الصهاينة اسرائيل الكبرى .. وحلمنا احنا الخلاص من الوكسة الكبرى أولاً لكي يمكننا التصدي لهم بقلوب وعقول وأيادي مصرية حقيقية من أولاد بهية المخلصين من مطروح لحلايب .. مش الأراجوزات اللي متعينيين بفاكسات من البيت الأسود ...
    إبن بهية
    http://ibnbahya.blogspot.com/

    ReplyDelete
  14. طبيعي أن نقدر سلوك مبارك في التعاطي مع الأزمة الحالية في لبنان .. الرجل لم يأت بجديد ، هو فقط ينفذ ما يأمره به من ولاه الحكم أصلاً وهم الأمريكان حسب مستندات ووثائق الإدارة الأمريكية التي بإمكان أي واحد الاطلاع عليها .. فقد عينه السادات رئيساً للوزراء في صبيحة يوم أسود من عام 1975 وعندما علم السفير الأمريكي بذلك عند الساعة الواحدة ظهراً أرسل إلى وزارة الخارجية الأمريكية فاكس يقول لهم أن السادات عين حسني مبارك رئيساً للوزراء وهذا الرجل نحتاج إليه في المرحلة القادمة بشدة وأخشى أن يحترق سياسياً في هذا الموقع التنفيذي ، وعليه أقترح أن يعين نائباً للرئيس السادات لكي يأتي من بعده رئيساً لمصر لضمان استمرار عملية السلام وكامب ديفيد .. وبالفعل جاء الرد فوراً بالموافقة وتفويض السفير بمخاطبة السادات أو أمره بذلك .. بالفعل ذهب السفير الأمريكي عند الساعة الثامنة مساء إلى السادات وأبلغه بقرار البيت الأسود في واشنطن بتعيين مبارك نائباً لرئيس الجمهورية ، وافق السادات فوراً وتم إلغاء قرار تعيينه مبارك رئيساً للوزراء وأصدر السادات قراره بتعيين حسني مبارك نائباً له في مساء ذات اليوم .. في ذات الليلة .. وإيه يعني حد شايف حاجه ؟؟؟ .. طبعاً الحكاية ممكن تكون جديدة على البعض لكن راجعوا التاريخ والمستندات وصور الفاكسات الموجودة بأرشيف وزارة الخارجية الأمريكية لتتأكدوا من كلامي .. يعني يا جماعة اللي بيحكمنا دلوقتي هو موظف أمريكاني .. طيب ليه زعلانين لما يلعب بينا الكوره ولا ينظر إلينا بطرف عينه ؟؟؟ مش المفروض إنه ينفذ أوامر من جاء به إلى الكرسي ولا عايزين الراجل يخالف المنطق ؟؟؟ الراجل معذور بيعمل اللي بيؤمر بيه .. طيب فين المشكلة بقى ؟؟؟ طبعاً نفس الكلام ينطبق حرفياً مع تحوير بسيط على حكام السعودية والأردن .. واللبيب الملاحظ للبيانات الصادرة عن الثلاثي القبيح سيعلم أنهم يقرأون ذات الرسالة القادمة من البيت الأسود .. لاحظوا بياناتهم كانت زي بعضها تمام .. وفي نفس الوقت بالضبط .. يعني تاني يوم الأزمة هما الثلاثة صرحوا .. وبعد أسبوع صدر تصريح جديد بنفس المعنى من الثلاثي القبيح وفي نفس اليوم .. طبعاً بياناتهم مجرد قراءة للفاكس القادم من البيت الأسود مع اختلاف بسيط جداً في الترجمة بين أسلوب الأردنيين والمصريين وبتوع السعودية لكن المعنى هو هو .. طيب لإمتى هيستنى الجيش بتاعنا ؟؟؟ لإمتى هيسكت عليهم ؟؟؟ والله أنا ما بقيت عارف إيه فايدة الجيش لو ما تحركش عشان يحمي الوطن في الداخل والخارج يبقى لازمته إيه بقى ؟؟؟ لا بيحمينا في الداخل ولا في الخارج .. عندنا ربع بلدنا منزوع السلاح من عندنا احنا بس لكن الصهاينة سلاحهم جاهز وممكن تصبحوا تلاقوهم في القاهرة .. وساعتها ادعوا للسادات وكارتر بالرحمة .. وقريباً جدا .. أقرب مما تتصورون ستجدون أن اليهود ممن اشتروا اليوم مصانعنا وشركاتنا ومزارعنا بأسماء وهمية عربية ولا حتى مصرية جم عندنا وكشفوا عن وجوههم القبيحة وقعدوا على قلبنا وقلب أولادنا وشوية شوية تنتقل انتفاضة الحجارة عندنا هنا في القاهرة وتلاقي العيال في شبرا ماسكين حجارة عشان يضربوا بيها عساكر بني صهيون .. مش لسه الخريطة متعلقة على الكنيست بتاعهم وبتقول كده ؟؟؟ طيب ليه احنا مش عايزين نصدق ؟؟؟ حلم الصهاينة اسرائيل الكبرى .. وحلمنا احنا الخلاص من الوكسة الكبرى أولاً لكي يمكننا التصدي لهم بقلوب وعقول وأيادي مصرية حقيقية من أولاد بهية المخلصين من مطروح لحلايب .. مش الأراجوزات اللي متعينيين بفاكسات من البيت الأسود ...
    إبن بهية
    http://ibnbahya.blogspot.com/

    ReplyDelete
  15. نصيحه اوعي تملي م النصيحه
    بجد تسلم مشاعرك وتسلم نصايحك الجميله ال بجد بنتعلم ونستفيد منها واستاذنك لما اضبط الاستايل بتاع البلوج بتاعي ال لسه مقولتليش اضبطه ازاي
    ابقي اعملك لنك عشان الناس تستفيد من الكلام الجميل دا
    ربنا يبارك فيكي

    ReplyDelete