7/05/2006

صحيح، ما دايم إلا وجه الله

الحوار ده كان بينى وبين أختى حبيبتى.. كنت واقفة فى المطبخ بقلى سمك وهى فى الصالة بتتفرج على حفلة تخرج الدفعة الجديدة من الكلية البحرية، بصراحة الحفلة كانت حلوة والسمك كان بردو حلو، بس لا دا ولا دا كان موضوعنا

لقتنى فجأة بخرج م المطبخ ع الصالة واقولها: على فكرة النشيد الوطنى بتاعنا دا دمه تقيل وبايخ
أختى ماستوعبتش أوى أنا بتكلم عن إيه: نشيد إيه؟ ايه اللى مش عاجبك؟؟

بتاع بلادى بلادى.. مايع أوى
انتى مش عاجبك بلادى بلادى.. النشيد الوطنى؟
اصل بصى.. نشيد عاطفى أوى وماسخ.. مافيهوش قوة وشجاعة.. مافيهوش حماس من أى نوع.. سهوكة وبس

سبتها ودخلت أقلب السمك، صوتها عبر من الصالة للطرقة للمطبخ: اه.. انتى عايزة حاجة زى قوم يا مصرى مصر دايما بتناديك
وصوتى عالى أوى: عليكى نور
ونطيت ع الصالة بكمل الجملة: حاجة زى كده.. حاجة فيها حماسة وتذكير بالبتاع.. انتى عارفة أنا كل ما اسمع اى نشيد وطنى لأى بلد تانية بتقهر على نشيدنا.. كلمات النشيد بتاعنا هبلة أوى، ولا أغنية هابطة من أغانى الايامى دى.. بلادى بلادى لكى حبى وفؤادى.. دا كلام ده!.. وللا الحتة التانية بتاعة... استنى

وقعدت ندندن انا واختى عشان نجيب البيت التانى:... أه، مصر يا ام البلاد أنتى غايتى والمراد.. يا سلام فرقت ايه بقى عن البيت الأولانى، وللا الأدهى والأمر البيت الاخير.. وعلى كل العباد، كم لنيلك من أيادى، طب والنبى انا ما فاهمة الجملة أساسا، هو ايه اللى على العباد؟؟؟

المهم دمى فار، وعلى ما افتكرت السمك وجريت عليه ، كان وشه المقابل للزيت اتحرق "تقريبا"، و"تقريبا" معناها انه كان لسه قابل للأكل، رصيت دور تانى وخرجت لأختى نكمل كلام

قعدنا نفتكر فى كام اغنية وطنية م الجامدين اوى، وكلهم حماسة وحب فى نفس الوقت.. اختى أقتنعت
فقلت لها بكل جدية: كويس لما ابقى رئيسة جمهورية ابقى فكرينى اغير النشيد
ردت عليا بكل جدية بردو: وانا اوعدك لما اشتغل فى شارع الهرم هغني لك النشيد -(ماقلتلكوش انا عن اختى قبل كده، دمها أخف من دمى مية مرة، طبعا دا اعتراف ضمنى ان دمى خفيف :))
كملت بكل حماس: اه فكرينى كمان أغير العلم
ردت مستغربة تانى: انتى كمان مش عاجبك العلم
اصله شبه أعلام كتير.. هو احنا معندناش شخصية وللا ايه؟

-------------------------

للعلم أو للتفكير: زماااان وانا صغيرة كنت مفكرة ان النشيد الوطنى دا مقدس والعلم بتاعنا مقدس.. لحد ما ماما قالت لى ، وكنت صغيرة بردو -بس كنت كبرت شوية عن صغيرة الأولانية- ان كان عندنا نشيد تانى والسادات غيره لنشيد بلادى بلادى، وطبعا من أفلام زمان عرفت ان علمنا كان غير العلم الحالى، يعنى لا النشيد ولا العلم مقدسين، ومن حقى لما مايعجبونيش اغيرهم.. فكرونى بأه لما أبقى رئيسة جمهورية أغيرهم

36 comments:

  1. bsara7a 3andk 7a2 ..

    bas ya 3azezty balad betdfa3 5 million gneh f osbo3 3shan teshof D3ARET YA3QOBIAN .. 3yzaha tefakar f maya3et el 3alam

    ana ra2ye .. yedo forsa le said 7egab .. aw ahmab baha2 gahen yekteb nashed watany geded .. w yeshofo ad eh yakon raw3a ..

    bel monasba . yaret tekteby tadwena 3an ya3qobyan le2any aret ra2y wa2el 3abbas w gably e7bat :( f 3yz ashof ara2y okhra !!

    waiting ur post ..

    ZanGooLa

    ReplyDelete
  2. اتفق معاكى قلبا وقالبا على حكايه انك تكونى ريسه خاصه انك خريجه مطابخ وسمك
    يعنى محدش هايبات جعان لانك بتقدرى قيمه الاكل
    اما بالنسبه للعلم والنشيد دول بقى شكليات
    لان لو مصر ليها حس قوى فى العالم وقتها الناس هاتعرف العلم بتاعها وليس العكس

    ReplyDelete
  3. يا خوفي يسمعوا كلامك
    ويغيروا و يخلوا النشيد الوطني
    اخترناه وعشان كده احنا اخترناه

    ReplyDelete
  4. عن نفسي أنا حاساعدك علي تغير النشيد و العلم
    و حانتخبك في انتخابات الرئاسة الجاية
    بس ادعي ربنا ما يعملوش معاكي زي اللي عملوه مع ايمن نور او ابراهيم ترك

    ReplyDelete
  5. فعلا محتاجيين تغيير زى ما حاجات كتيره محتاجه تغيير

    ReplyDelete
  6. انا من رايي تغيروا البلد بالمرة.......والناس كمان.كله في الأحلام.براحتك خالص

    ReplyDelete
  7. بناءا على توجيهات المواطنه الشريفه المحبه للوطن / بنت مصريه .. التي اقترحت تغيير النشيد الوطني الحالي
    فقد قرر الدكتور / أحمد لمعي شرشور .. رئيس مجلسي الشعب و الشورى .. تغيير النشيد الوطني الحالي .. و قد
    قرر تكليف الشاعر الهدّام / ننس حلمنتس ... بكتابه النشيد الوطني الجديد .. و اسند عمليه تلحينه الى الفنان و
    الملحن العالمي / دقدق انتيكا .. و اليكم النشيد الوطني الجديد

    مصر بدلنا و ست الكل
    تنزل جوه الحاره تطل
    يبقى الكل عنيه فالارض
    بلدي يا بلدي .. حبيبه الكل

    مصر بلدنا وليها تاريخ
    اسألوا عنها في المريخ
    بلد العلم و بلد الفن
    عملت من القرطاس صواريخ

    مصر بلدنا بلد الأمان
    سياحه و رقص في كل مكان
    يالا يا سايح سيب لبنان
    مصر الكنج في اي زمان

    مصر بلدنا جيشها معمر
    عمره في يوم ما يحب يدمّر
    في انتصاراتنا بيمشي يزمر
    يخدم سيده .. ولا بيتأمر

    مصر بلدنا عليها نيل
    تشرب منه كأنه سبيل
    والحبيبه عليه بتميل
    مالي الدنيا بحب جميل


    ZanGooLa
    masrena.blogspot.com

    ReplyDelete
  8. This comment has been removed by a blog administrator.

    ReplyDelete
  9. والله العظيم انتي بتدني في مالطا ولا حياه لمن تنادي
    لكن المهم هاتي حته من سمك بس تكون من غير شوك علشان احنا استوينا من الشوك ارجو التواصل معي

    ReplyDelete
  10. يا جماعة انتم فيكم حاجة غريبة قوي
    كل حاجة واخدينها تريقة
    مبتتكلموش جد خالص؟ >_<
    بالنسبة للنشيد أنا معاكي فيه
    بالنسبة للعلم فأنا عاجبني العلم ومعتز بيه جدا
    نسره فيه قوة .. ادخلي علي الدونة بتاعتي وانتي تشوفي حاطط نسر قد ايه فيها
    الصقر اللي كان قبل النسر كان أشد لكن يالله الاتنين النسر مش وحش برضه
    وبعدين المسألة مش مسألة شخصية .. البلاد العربية هي اللي قلدت علم بلدك مش العكس .. الألوان الأحمر والأبيض والأسود كانت علم القومية العربية الوليدة .. الأحمر كان لون دم الشهداء ممثل للحاضر والأسود حقبة الماضي المريرة والأبيض المستقبل المنشود

    ReplyDelete
  11. انا باتفق معاك في حكاية النشيد القومي فعلا دمه تقيل وحتى لحنه رخم وطول عمري وانا صغير باتمنى يتغير ويبقى حاجة تليق بكفاح ومعاناة الشعب المصري
    اما العلم فعاجبني جدا واذا كان يشبه اعلام تانية فهي اعلام دول عربية ودي حاجة تحسب ليه لاننا امة عربية ما يجمعنا اكتر بكتير مما يفرقنا
    واسمحيلي اسجل اعجابي بمدونتك وخفة دمك

    http://egyknight.blogspot.com/

    ReplyDelete
  12. واللة فعلا عنك حق نشيد دمة تقيل ورخم وما عدش يناسب العصر اللي احنا فية
    جيبي نانسي عجرم وتغني واحنا نغني وراها
    لو سألتك انت مصري تول لي ايةةةةةة
    انا مصري وابن مصري وابن مصر اللة عليةةةة
    قول ها بأعلي صوتك وارفع راسك لفوق انا مصري وابويا مصري

    ReplyDelete
  13. انا والله كان من زمان نفسي اغير العلم بحس انه اهبل وغير معبر

    اما موضوع النشيد مش مشكله نغيره بس الاهم ابقي وحياه والدك تغيري الدستور الاول

    علي فكره كم لنيلك من ايادي

    ايادي يعني نعم جمع نعمه وفلان له يد علي اي له فضل علي هذا وبالله التوفيق والسلام عليكم ورحمهالله والي لقاء اخر ان شاء الله في برنامج لغتنا الجميله

    ReplyDelete
  14. شفتي نسيت اسالك كلتو السمك ولا اترمي ...........لو فايض شويه اديهم لاخوانك الغلابه

    ReplyDelete
  15. لما يتغير هوة الاول يبقى يغيروا النشيد ولو انتى بقيتى الريسة لمصر اقترح اغنية نانسى عجرم انا مصرى وابويا مصرى تكون هيا النشيد الوطنى لمصر

    ReplyDelete
  16. اللي يشوف أناشيد الناس، يهون عليه نشيده..
    شوفي بقى يابنت الناس..
    يوم ما الملك حسين مات، سألت صديق أردني عن نشيدهم الوطني عشان مراسم الجنازة وكدة..
    قال لي:
    عــــــــاش المليــــــك!
    عــــــــاش المليــــــك!
    ســـاميا ما قالوا له قاتل في المعارك..
    عــــــــاش اسمــــه!
    الشباب الأمجد، جندك المجند!
    عزمه لا ينفد..

    عموما النشيد معجبنيش فمقعدتش احفظ وراه!
    آل عاش المليك آل!!..آل قاتل في المعارك!
    بس يا شيخة بلاش حركات!

    ReplyDelete
  17. شوبش
    اخ.. انت جيت على علم ليبيا.. القذافى دا ملك التجريدية
    D:
    بقولك عايزة نشيد حماسى، تقولى ايمنيم
    --------------

    شغف
    اممم، لا طلعتى صاحية للون يا شغف :) اكيد طبعا هعمل استفتاء، استفتاء على التغيير وترشيح لاناشيد كتيرة، وانتخاب افضلها بالأغلبية، يعنى بعيدا عن مجلس الشعب، احنا هنسأل الشعب نااافر ناااااافرررر.. ديمقراطية اللى الابد
    -----------

    زانجولا
    والنبى ماتكتبش فرانكو جمل طويلة اوى كده يا زانجولا، لسه هقعد افك كل ده ، مشيهم كلمتين تلاتة بس، واقلب عربى

    بالنسبة ليعقوبيان، باه مش مكفيك كل دى كتابات عن الفيلم.. دا تقريبا كل يوم حد بيكتب بوست جديد عن الفيلم لما بقيت نظرية المؤامرة بترمى بظلالها عليا وبقيت حاسة ان عماد اديب دافع حاجة للمدونين عشان يعملوا بروبجاندا جامدة اوى كده
    ومع ذلك اوعدك اكتب عنه بشرط تجيب سبعة تانيين عايزنى اكتب عنه بالاضافة لمكالمة شخصية من الريس، يقولى : اكتبى براحتك يا زيزي
    ---------

    جبلاوى
    هههههههههههه، الحكاية مش محتاجة حد يقدر قيمة الاكل
    دى محتاجة حد يقدر قيمة الرحمة
    ----------

    محمد ابوزيد
    انا موت على نفسى م الضحك على تعليقك، يبقى بجد اكبر مقلب ليا فى حياتى، يا ساتر يا رب.. اخترناه
    وللا لو اتحفونا بالدرة المكنونة: الله معاك ومعاك قلوبنا، الروح فداك دا انت حبيبنا، وانت الشراع فى بحرناااااا، الله معاك ومعاك قلوبناااا
    ----------

    كورتكس
    يعنى كده ضمنت اول صوت انتخابى ليا :)
    ----------

    littilemo
    الهم اللى عايز يتغير اكبر بكتير من مأساة واحدة مرفهة زى حالاتى معترض على النشيد والعلم
    -----------

    احمد حسين
    نسيييييييييييييييييييييييييييييييت
    ----------

    هيومان
    وهى البداية مش دايما حلم :)
    -------

    زانجولا
    انتو كده اخدتونى تريقة، طب انا هرفض النشيد بتاعك بالذات ومش هنزله فى الاستفتاء
    ----------

    محمد مفيد
    سمك مين باه، بالهنا والشفا على اللى كلوا
    ------------

    المصرى
    اوكى هنخلى النسر، بس بلاش والنبى الشرايط التلاتة دول
    بس انا اول مرة اعرف ان الدول اخدت مننا نظام التلات الوان.. انت متأكد من المعلومة دى؟
    ------------

    الفارس المصرى
    شكرا يا فارس يا مصرى، ونتمنى حضوركم الدائم للمدونة المتواضعة :)
    ----------

    مكسوفة
    ناااانسى.. نحطها فى بالنا دى .. اوكى
    ------------

    نور
    لا انا فاهمة كم لنيلك من ايادى، بس مش فاهمة "وعلى كل العباد" ايه بالظبط اللى على كل العباد؟

    معلش يا نور معملتش حسابك فى السمك، انت عارف السمك المحروق له طعم تانى :)
    ------------

    شاب اسكندرانى
    طيب ادعى ورايا
    يارب نغيره
    يارب نغيره
    يارب نغيره
    ... ايه اللى الخطوة الىل بعد كده.. نغيره ازاى؟
    ------------

    يحيى عياش
    حركات!!.. انا بتاعة حركات.. انت صحيح صدمتنى بعاش المليك دى.. بس اوكى خلينا نوسع الحلم شوية، لما ابقى رئيسة الجمهورية، هبقى اخلى عبدالله يغير نشيد الاردن، او اوصى عليه رانيا تقنعه
    :)

    ReplyDelete
  18. ان شاء الله ان شاء الله اول واحد يفكرك
    وهافكرك كمان تغيرلنا مترو الانفاس اللى غير صالح للبنى ادامين ده الله يخليكى
    ربنا يديكى الصحة يا ريسة
    :D

    ReplyDelete
  19. يا أختي يا أختي يا أختي
    الله يخليكي انتي واختك الأمورة اللي دمها اخف من دمك دي ـ وانا عموما يعني لو انتي بقيتي ريسه ـ هاكون اسعد مواطن ـ انا طبعا كلامي دا رياء عشان حاجه واحده ـــ السسسسمك طبعا ..

    ReplyDelete
  20. أرى تغيير النشيد الوطني ليكون واقعياً ..

    قوم اقف وانت بتكلمني مثلاً .. بابا قول لماما دح .. بابا أوبح!

    ReplyDelete
  21. بلادي بلادي جميل، فيه ميلودي على عكس الأناشيد اللي كلها زعيق.

    أي خطوة لتغيير النشيد حنوقف الدعم للحملة الانتخابية بتاعت بنت مصرية، وحنوجه الدعم لجمال مبارك :)
    الا اذا كان هو كمان حيغير النشيد )-:

    ReplyDelete
  22. علي فكرة السادات ماغيرش النشيد ولا حاجةهو غير بس العلم لأن ايم زمان الملكية يعني كان لونة اخضر ودة ظاهر في الأفلام ولما قامت الثورة عملوة 3 الوان وحطوا فية نجمتين وكانوا بيقولوا نكت علي الموضوع دة ماما برضة قالتها لي ان عبد الناصر لما سألوة عن النجمتين اللي في العلم قال انا وعبد الحكيم عامر
    وبعدين كان علمنا دة هو نفس علم سوريا بعد الوحدة في 1958وبعدين غيرة السادت وشال النجمتين وحط صقر قريش علشان شوية نصب علي العرب، وبعدين غيرة لما قلبوا علينا العرب في معاهدة السلام ورايح شايل صقر قريش وحط النسر

    يعني غيري زي ما نت عايزة اعملية حتي دانتيلا مافيش مشكلة موش حا نختلف

    ReplyDelete
  23. هههههههههههههههههههههههه
    دانتيلا
    حلووووووووة

    ReplyDelete
  24. انا هصوتلكعلشان السمك ده اولا وعلشان هتغيري النشيد اللي اتعذبت ع ايده طول سنوات الدراسه:(

    ينفع منخليش شكل العلم مربع بس هنخليه شكله ايه بس هتكون سابقة من نوعها صح ولا ايه رايك

    ReplyDelete
  25. انا بحب اوي نشيد قوم يامصري كان بيحسسني بقشعريرة الوطنية بس برده بحب بلادي اوي لكن لو غيروه يبقي قوم يامصري لانه بجد جميل وكان بيحسسني اني عايزه اقوم اولع في المدرسه بحالها لانهم مش فاهمين من النشيد حاجه اما العلم فانا بعشقه صحيح في واحده صاحبتي كل ما تشوفه تقولي ان النسر شبه مبارك لما بيرسموه من قفاه في الدستور لكن ان بحبه اوي وكان بيحسسني في المدرسة ان في امل اكيد في ان اصلح منظومة التعليم الفاشلة وكان كمان بيطير جنبه عصافير وانا كنت بقعد احقد عليهم بقي ان انا متنيله محبوسه في الفصل وهما بيطروا وقدامي كمان يعني معندهمش مراعاة لشعوري وكنت دايما بدندن يا طير ياعالي فالسما طظ فيك يا رب تقع فوق نفوخك بصي غيري النشيد وسيبي العلم عشان انا بحبه وما تعمليش زي العصافير وتحلقيلي

    ReplyDelete
  26. انا من زمان بأفكر فعلا في معاني النشيد ،
    لا طعم ولا لون ولا ريحة ، ولا مطابق للواقع
    العالم وصل لفين واحنا لسه أم البلاد

    يا اخوانا اخروجا شوفوا البلاد اللي احنا بنتدعي أمومتها بالباطل
    البلاد المتخلفة عنا بسنوات سبقتنا دلوقت
    واحنا عالمين زي الام العجوزة اللي بتنتظر الابن العاق

    تحياتي فعلا على البوست

    وتعالوا نألف نشيد جديد
    !!

    ReplyDelete
  27. انا من زمان بأفكر فعلا في معاني النشيد ،
    لا طعم ولا لون ولا ريحة ، ولا مطابق للواقع
    العالم وصل لفين واحنا لسه أم البلاد

    يا اخوانا اخروجا شوفوا البلاد اللي احنا بنتدعي أمومتها بالباطل
    البلاد المتخلفة عنا بسنوات سبقتنا دلوقت
    واحنا عالمين زي الام العجوزة اللي بتنتظر الابن العاق

    تحياتي فعلا على البوست

    وتعالوا نألف نشيد جديد
    !!

    ReplyDelete
  28. غيرى يا شيخه غيرى
    وبعدين اللى مضايقنى اكتر حكاية ام البلاد ديه كل واحد ظريف يتريق عليها وهات يا مصخره0

    يا خوفى النشيد بتاعنا يكون من اول طلعه جويه فتحت باب الحريه

    يا سلام لو تكون حته لسعد الصغير ولا لشعبولا يبقى نشيد يعبر عن الواقع فعلا

    ReplyDelete
  29. اخترناه اخترناه هو ده الكلام اللي يبقي نشيد وطني بجد بس لازم نزود هو وابنه الي ماشاء الله :)

    ReplyDelete
  30. شوفي بقي نشيد اسرائيل الوطني كله عودة الي الجذور ازاي

    As long as deep in the heart,
    The soul of a Jew yearns,
    And forward to the East
    To Zion, an eye looks
    Our hope will not be lost,
    The hope of two thousand years,
    To be a free nation in our land,
    The land of Zion and Jerusalem.

    ReplyDelete
  31. كل شئ في مصر قابل للتغيير فيما عدا رئيس الجمهورية ده حتى كمان ممكن رئيس الدولة يغير اتجاه سريان النيل لو يحب وده عن طريق تغيير مواد الدستور يحط مادة عن نهر النيل وبادواته الاعلامية يقول ان اتجاه نهر النيل غلط ومش في صالح البلد

    ReplyDelete
  32. سويدى
    وايه كمان؟ هو دا بس اللى مضليقك.. المترو :)
    -----------

    شوبش
    هدعليلك، بس بردو من غير لا ايمنيم ولا اى ميتيل، الواحد مش ناقص صداع
    ----------

    يا مصر أكتب إليكى رسائلى
    :)) شكلى كده هشتغل فى مطبخ الرئاسة بس
    ---------

    قلم جاف
    طب والله يا قلم بتلكم جد، انتو ليه واخدين الموضوع هزار
    -------------

    عبده باشا
    يعنى انت مع نشيد بلادى بلادى، انا معاك الرتم جميل.. هادى وواثق كمان، بس الكلام اضعف بكتير من الميلودى
    -------------

    مكسوفة
    تؤتؤ، هو كمان غير النشيد، كان النشيد اللى قبله "الله اكبر فوق كيد المعتدى" اللى اخدته ليبيا بعد كده
    ----------

    نوران
    اى حاجة يا نوران :) بس يكون علم مميز لمصر، ومحبوب
    ----------

    احمد
    ما هو يا احمد مش عشان انا جبت سيرة النشيد والعلم، يبقى انا لابسة نضارة كعب كباية ومش شايفة حاجة تانية غيرهم، اكيد فى حاجات كتير عايزة تتغير كمان
    ------------

    نوران
    لا مش حقلقلك، بس لو عملنا مسابقة تصميم علم لمصر، ساعتها هاجة واقولك ها العلم الجديد احلى وللا العلم القديم، وعموما انا كمان بب النسر، نعمل تصويت على بقائه ونغير كل حاجة تانية حوالية
    --------------

    دكتور سبورت
    اولا، ممكن تكلمنى بنبرة اهدى من كده شوية، ومفيش داعى لاتهامات هايفة من نوع "بحب مصر وللا مش بحبها" ، مش عشان يا فندم انا فى حاجة مش عجبانى وعايزة اغيرها فى بلدى، ابقى مبحبهاش
    ثانيا ، مش عشان النشيد مش عاجبنى، ابقى عايزة نشيد امريكا وللا اسرائيل وللا فنزويلا حتى، واعتقد انى جبت مثال للى بحبه من تراثنا بردو، سيد درويش هو اللى عمل "قوم يا مصر" وكمان لمعلوماتك هو اللى عمل "بلادى بلادى"
    ثالثا، بلادى بلادى مش جديد، دا اتلحن على ايد سيد درويش عشان يتغنى بمناسبة رجوع سعد زغلول، والفكرة الساذجة بتاعة الجديد والقديم مش انا اللى اتأثر بيها
    رابعا، غريبة ان حضرتك بتدينى درس فى الوطنية، وانت لخصت الوطنية فى كاس العالم واللعيبة والجمهور، انا مليش تعليق على ده.. الظاهر ان هى دى الوطنية بتاعتك
    وبمناسبة السمك، يشرفنى طبعا افضل اقلى سمك لأهلى.. ويشرفنى افضل اقول على كل حاجة مابحبهاش واكتب عنها فى مدونتى، حتى لو كانت الحاجة دى.. هى النشيد والعلم المصري..

    ReplyDelete
  33. itstoolate
    طب كويس، فى حد فكر فى الموضوع من زمان بردو
    ----------------------

    متكازى
    الاناشيد الوطنية مش بتتعلم عشان تعبر عن الواقع، دى بتتعمل عشان تحمس الناس تغير الواقع ده.. تديلهم أمل قصاد عنيهم وتقولهم اشتغلوا وحققوه.. وايييييييه
    -----------------

    مختار العزيزى
    يا خبر على دا نشيد
    اهو اتعلموا ياللى شايفين نشيدنا القومى حلو وهايل
    نشيد اسرائيل بيدعو لفكرتهم الاسطورية ويبروزهالهم قصاد عنيهم
    بيفكرهم بأمل عمره ألفين سنة وارض عايزين يحصلوا
    احنا بقى النشيد بتاعنا بيدعونا لإيه؟؟

    بصوا كده عليه
    بلادى بلادى بلادى
    لكى حبى و فؤادى
    مصر يا أم البلاد
    أنت غايتى والمراد
    وعلى كل العباد
    كم لنيلك من أياد

    شاورولى باه على حته فيه.. بتقول تعالوا نخلى مصر احلى، وللا تعالوا نرجع قيمة مصر بين البلاد، وللا بتقول ان جيشنا قوى ويبهدل اللى ييجى جمبنا، وللا شعبنا مناضل وهيبنى مستقبل لبكرة،
    حرااااام، نشيد ساااااااااااااذج... كنت احبه بس لو فضل بقيمته كنشيد ترحيب بعودة مناضل، انما مش نشيد وطنى
    الله يرحم سيد درويش لما لحنه ، لحنه عشان عودة سعد زغلول، لو كان يعرف انكم هتخلوه نشيد وطنى كان رفض وكان عمل واحد فيه حماس وامل
    ------------

    محسن
    اوعدك يا محسن انى هخلى مصر تنطق "مصر" مش "ايجيبت"، ودا ممكن نعمله لو احنا عايزين، السعودية اعترضت قبل كده على نطقهم لمكة وخلتها
    makka
    وليست
    mecca
    دى معلومة عرفتها من دكتور الترجمة فى الكلية.. والله اعلم
    ------------------

    مصريون بلا حدود
    هيتغير هيتغير
    ------------------

    pharoinlove
    اهلا بيك لاول مرة فى مدونتى :) وشكرا على تعليقك، وانا بحترم اختلافنا طبعا على النشيد
    ----------------

    رحاب
    مبروك المدونة الجديدة
    ---------------

    الغريب
    مين اللى كتب الكلام ده؟

    وطبعا مبروك مدونتك الجديدة

    ReplyDelete
  34. "اوكى هنخلى النسر، بس بلاش والنبى الشرايط التلاتة دول
    بس انا اول مرة اعرف ان الدول اخدت مننا نظام التلات الوان.. انت متأكد من المعلومة دى؟"
    الا متأكد
    طبعا متأكد
    تاريخ ايه ده اللي بتاخدوه في المدارس ^_^
    الجمهورية العربية المتحدة وسوريا والعراق واليمن وغيرها كتير كلها قلدت مصر بعد ثورة 52 وظهور مبادئ الثورة القومية الوحدوية فيها
    وبعدين ارتبطت الألوان التلاتة بالنجومفي أعلام بعض الدول .. يعني لما قامت الوحدة في مصر كان فيه نجمتين خضر بمعنيالاقليم المصري الجنوبي والاقليم السوري الشمالي
    والعراق فشلت اقامة الوحدة معاه لكنه كان متضامن بالعلم بتاعه ووجود النجمة التالتة فيه
    لكن لو الشرايط مش عاجباكي تقترحي نعملها كاروهات؟ (:
    ولو المشكلة في الالوان تقترحي ايه؟

    ReplyDelete
  35. في رايي الشخصي ان النشيد مش المشكله
    احنا يعني هنسيب كل المشاكل ونعد نشغل نفسنا في تغيير النشيد ما كدا كدا لما كنا في المدرسه كنا بنزوغ من الطابور ونقعد ف الفصل لحد ما الطابور يخلص عشان منغنيش النشيد
    دا لو رحنا بدري يعني
    المهم ان احنا نفكر ازاي نخلي مصر احلي واعلي باننا نبقي ايد واحده ونحب لبعض الخير بجد ولا ايه؟

    ReplyDelete
  36. انا ارى ان النشيد الحالى تعبان جدا وانو لو غيروا و خلوا نانسى او كاظم الساهر يعمل ناشيد و يكون مثلاا من كلمات احمد فؤاد نجم او الابنودى هيكون احسن من ال ى موجود

    للعلم ان فى ناس مش حافظين النشيدد و حافظين اغانى امنم و 50 سنت زى اسمهم

    لاازم يتم تغير النشيد
    www.lifeonnile.blogspot.com

    ReplyDelete