8/05/2006

إنت صدقت يا ميل.. دا مجرد تمثال

ميل جبسون، صاحب فيلم "القلب الشجاع" و "آلام المسيح" ولو تفتكروا كمان "نظرية المؤامرة" جيرونيموووو اللى محمد فؤاد سارق منه مشهد بالنص فى فيلم غاوى حب.. المهم يعنى، ميل جبسون اتقبض عليه وهو فى حالة سُكر تام ولما اتقبض عليه كان بيقول " اليهود مسئولين عن كل حروب العالم" وكلام من ده، وسأل الضابط اللى اعتقله "انت يهودى؟" بس دا كل اللى حصل ليلتها

الموضوع وصل للصحافة طبعا، والدنيا اتقلبت على جبسون.. جبسون معاد للسامية.. جبسون يكره اليهود.. وطلعوا يقروا فى دفاتر جبسون القديمة.. وقالوا ان فيلم "آلام المسيح" كان بشكل ما بيعلن من خلاله معاداته لليهود وللسامية.. وان والده كان بينكر الهولوكوست، لا وكمان عشان يقوموا عليه كل الناس بأه، ذكروا انه بينتمى لكنيسة كاثوليكية منشقة عن الكنيسة الكاثوليكية الأصلية.. بيتهيئلى كشفوا النقطة دى كمان عشان اللى مش هياخد موقف كراهية من ناحية جبسون عشان خاطر عيون اليهود، هياخد الموقف عشان خاطر عيون الكنيسة

الراجل لا بيه ولا عليه، قال كلمتين.. سواء كان بيعتقد فيهم فعلا، وللا هلوسة تحت تأثير الكحول.. انما كلمتين لا طلعوا ولا نزلوا.. يكونوا سبب فى اللى اتقال بعد كده، ان مستقبل جبسون المهنى كده انتهى.. بمجرد اعلانه معاداته للسامية، طبعا الهجوم الضارى خللى جببسون يعلن رسمياً تراجعه عن كل كلمة قالها، وقال انه خجلان جدا من كل الكلام اللى قاله وقتها، وانه لا يعتقد فى صحته.. اى لا يعتقد ان اليهود هما سبب الحروب فى العالم

اعتذار جبسون كان محاولة منه لنيل رضا أمريكا التى غضبت وانقاذ مستقبله المهنى، كمان المقربين منه حاولوا يساعدوا جبسون كمان ويقولوا انه بيعانى من إدمان الكحول، وان اللى حصل واللى قاله نتيجة إدمانه الكحول .. يعنى زى حالتنا بيطلعوا الواحد "مختل عقليا" هما بيطلعوه "مدمن كحول" ه

لنتصور ان جبسون مؤمن بكل كلمة قالها، وان دا اللى فى باله.. وانه مؤمن بإن اليهود هما سبب الحروب فى العالم، وانه زى والده بينكر الهولوكوست.. ايه المشكلة؟؟ هل هو ظلم اليهود فى تعاملاته معاهم لمجرد ايمانه بأفكار سلبية عنهم؟؟ هل تجنى على أحد؟ أو كان عنصرى فى تصرف ما؟؟ دول كلمتين يا عالم

هى دى بأه حرية الرأى الأمريكية؟ وهى دى امكانية ان الواحد يقول اللى عايزة من غير ما حد يهدده فى حياته ومستقبله وأكل عيشه؟؟ وهى دى الأرض اللى هتسمع عليها الرأى والرأى الآخر؟؟

نصيحة يا ميل يا بنى، روح افتح مدونة تحت اسم مستعار وقول اللى انت عايزه، وخد احتياطاتك الأمنية.. قد تجد فى العالم الافتراضى بعضا من حرية

20 comments:

  1. ايوا ماهو اللي يقول اي كلمتين محشورين في زورو يبقي يا مختل يا مدمن كحول وهيا دي قسمه العدل مش احنا بلد حلوه ومحترمه ومفيهاش الكحول الوحش دا يبقي احنا المختلين وعلشان امريكا هيا اللي صايعه وبتشرب كحول وبنزين وغاز طبيعي كمان

    انا شايفه انن مفروض ننزل كلنا في الشارع ونضرب نفسنا بالجزمه علشان خاطر عيون اليهود اللي اي كلمه بتتقال في الدنيا بتزعلهم

    ReplyDelete
  2. يا بنتي ده أقل مثل يوضحلك "ازدواجية المعايير " اللي العالم كله عايش فيها اليومين دولا بسبب اللي الله يكحمها أمريكا ..

    طيب اللي يهلك من الضحك .. فنزويلا استدعت سفيرها من اسرائيل احتجاجا علي استمرار قصف لبنان .. ما طلعتش من كوع حاكم عربي .. نقول ايه طيب ؟؟ و الله الواحد هيطرشء يا جدعاااااااااااااان !!!

    ReplyDelete
  3. انت زعلانه علشان فى امريكا عملوا كده فى ميل جيبسون طب واللى حصل فى الازهر يوم الجمعه مش زيه برضه طب واللى عمله النظام السعودى فى رايه فى الحرب الدايره مش برضه زيه الشكال ان الهولوكوست بقت دين الحكام العرب وعليه العوض

    ReplyDelete
  4. شيماء

    انا موافقة على اقتراحك يا شيماء، واهى يمكن تقلب ثورة وتبقى ثورة الجزم
    --------------

    رومانتيك روز
    الف سلامة عليكى م الطرشئة يا حبى، سيبك منهم، هما هينفعونا لما يزيد الضغط

    -------------
    gfs02
    وانا ازعل على ميل جبسون ليه هو كان من بقية عيلتى.. بس بردو يعنى الراجل اكيد اتحض من الى حصل ده، وفاق على الزيف اللى بتجمل بيه امريكا وججها القبيح
    انما الوضع عندنا طبيعى واتعودنا عليه

    ReplyDelete
  5. ودة يثبت قد اية اليهود بيتمتعوا بنفوذ رهيب جدا. حادثة اخرى كمان- في مدرسة اميركية في ولدين امريكيين اقتبسوا كلام من هتلر المدرسة على طول قدمت اعتذار رسمي لليهود!
    عشان بس نعرف قد اية الناس دي مسيطرة على كل حاجة سيطرة تامة

    ReplyDelete
  6. مش بس ميل جبسون الللي بيشتم اليهود
    اي امريكي ابيض مسيحي لما يسكر ويرفع عنه القلم بيشتم فيهم

    عادي
    بسمعها كل شوية
    من ناس كثيرة

    فكرة معاداة السامية هو امر تم ادراجه واصبح سهل اي حد يخسر فلوسه كلها لو اترفع عليه قضية

    كراهية اليهود امر طبيعي في العقل الباطن لكثير من الامريكان
    مبيتكلموش عليها قدام الناس

    الا في لحظات " الانس " او تحت الطرابيزة

    ميل جبسون حمار كبير وهو ممثل محترم
    بس حمار

    شخصية عادية جدا وبيهبل
    وهو نفسه معندوش مبادئ قوي كدة يعني
    ده هو انسان مليان مشاكل

    امريكا مش زي مصر يا جماعة
    امريكا فيها قوانين وقوانين مضادة
    وبعضها معقد جدا
    وهي نتيجة تراكم التراث القضائي الرهيب
    فمنقدرِش نقول ان " امريييييييييكا" كلها منافقة عشان الاعلام هاج علي ميل جبسون عشان شتم اليهود بينما بيغنوا حرية راي حرية راي حرية راي

    الهجوم علي اسرائيل في الاعلام الامريكي مثلا علي غير العادة اصبح واضح
    والناس مضايقة من اسرائيل بشكل كبير
    وانا شفت الكلام ده بعيني
    وسمعته بودني

    يعني الدنيا مش ابيض واسود
    نسبة الجهل عالية
    والناس لسة بتقول ياهادي هنا
    ولسة بيتعرفوا علي العالم من غير غسيل مخ
    وكثير منهم بيفوق بالراحة

    موضوع معاداة السامية ده سببه الرئيسي
    هو جماعات الكوكلوكس كلان اللي كانت بتقتل السود واليهود
    وبتشيع خطاب كراهية ضدهم زائد اسباب اخري طبعا

    المهم اليهود اشتغلوا علي قانون زي ده
    عشان يحموا نفسهم من الاضطهاد وده شئ طبيعي

    المشكلة ان معاداة السامية اصبحت غطاء لاسرائيل وجرايمها وحرية الراي ان كان الراي فيه انتقاد لسياسات اليهود

    انا شخصيا
    اري ان شتيمة اليهودي مثل شتمية المسلم كلاهما خطاب كراهية

    وان انتقاد اسرائيل مثل انتقاد السعودية كلاهما امر سياسي وليس فيه كراهية انما انتقاد لافعال وسياسات
    وليس اجناس واديان والوان

    ReplyDelete
  7. سؤال أهبل : ماذا يفعل البهوات العرب من أصحاب المال والأعمال والمصالح في بلاد عمو سام؟.. أليس العرب أيضاً من حقهم أن يكون لهم لوبي؟ ولا إيه؟

    ReplyDelete
  8. طب ده يعنى ان حرية الرأى دى حريه مزعومه فى امريكا
    أمال احنا فى البلدان بتاعتنا نعمل ايه؟
    انا اعتقد ان حركة الكحول دى حركه تبريريه لا أكثر و لا أقل


    ممكن أصلا اسم ميل جبسون يكون اسم مستعار
    غير الاسم اللى هايختاره حسب اقتراحك

    ReplyDelete
  9. يعني ان ما كانش يضايق حد هو احنا خيبيتنا دي مالهاش اخر .....خايبين في كل حاجه يعني العرب بيتنعل سنسفيل جدودهم في اليوم مليون مره في امريكا مافيش حلوف عربي من اللي مكومين مليارات في بنوك امريكا قال لو معاملتوناش زي ما بتعاملو اليهود هاسحب فلوسي من امريكا ...وعلي فكره انا سمعت راي خبير اقتصادي امريكي قال ان لو السعوديين بس اللي حاطين فلوسهم في امريكا سحبوها مره واحده الاقتصاد الامريكي يقع (الكلام ده كان ايام 11 سبتمبر)ة

    ReplyDelete
  10. اوعى يا ميل تسمع كلامها وتفتح مدونة
    انت مش عارف ان المدونات متراقبة
    طيب لو على شتيمة اليهود جت سليمة وعملوا عليك حرب اعلامية والسلام
    الخوف انك تغلط فى مبارك ولا جمال ساعتهاهينفخوك و مش هينفعك اسم مستعار هتتجاب هتتجاب

    ReplyDelete
  11. بنت مصريه إنتي ميه ميه بجد
    ماشاء الله عليكي
    احنا في زمن ديموقراطي جداً " والعكس صحيح"

    وحرام بلاش اقول الزمن
    احنا وسط دول متعرفش يعني ايه حريه
    عايزين يمسكونا من لسانا
    ويمسكونا من عقولنا واللي يقول الحق يموت
    واللي على راسه طحه بقى وسلام قبل ما اتمسكـ ,,
    وفي انتظار جديدكـ

    ReplyDelete
  12. دا من زمان واليهود مسيطرين على صناعة السينما واكيد هما ال دبروا موضوع سكر ميل جيبسون دا علشان الفيلم

    ReplyDelete
  13. ميل جيبسون ممثل وما فعله كان تمثيل لكن فعله
    اياتي علينا اليوم الذي يفعل الحكام العرب ما فعله في القلب الشجاع
    زي ما قلتي احنا تماثيل

    ReplyDelete
  14. للاخت صاحبة المدونة يرجى ارسال رابط المدونة الى بريدى

    ilovemuhammad@gmail.com

    حيث اننى فى سيبر ولا احفظ الروابط بسهولة واعجبتنى مدونتك

    اخوك د/احمد
    www.allteb.com


    v

    ReplyDelete
  15. سياسة الكيل بمكيالين بتتضح في مواقف زي دي
    بس ده يثبتلكوا إن العالم كله بيعاني من الفساد و الزيف و الكدب و النفاق... مش مصر لوحدها
    لأن ده بكل بساطة طبع في البشر

    ReplyDelete
  16. أختى العزيزه المصريه حتى النخاع
    لا تةجد أى أحتياطات يمكن بها أن نبتعد عن المتاعب فأعدائنا فى الداخل مثل الخارج ورغم عن الرقابه فأنى أكره أسرائيل ومعادى لهم وليكن مايكون
    لن نموت فى تلك الأرض مرتين

    ReplyDelete
  17. انا مع shaimaa
    احنا لازم نضرب نفسنا ميت جزمه
    مش جزمه واحد بس
    وبجد بوست جامد اوووووووى

    ReplyDelete
  18. Let us imagine that Mil Gibson said that Arabs or muslims are the main reason for all wars and for Terrorism in the world, and that arabs donot have a right in Israel. How would Arabs feel about such statments? Wouldnot we all feel the same angry an wouldnot all Writers ask Fans of Mil Gibson to boycott his films? I think the only 2 differences between this imaginative Situation and what happend are: 1. That jews have louder voice in USA than muslims and Arabs have no voice even in the own countries. 2. We only feel bad about negative statements about us but we cannot say how bad saying negative statments about the others. Thats why we cannot see sometimes that even arabs could be racistic for real!

    ReplyDelete