يوم جميل جدا

يااااه.. أكتر حاجة بكرهها - اكيد مش اكتر حاجة اوى يعنى بس فعلا بكرهها جدا- انى اتأخر عن اى معاد.. وخصوصا معاد الشغل
المفروض ان معادى الساعة تسعة وعادة بوصل قبل كده بعشر دقايق او اكتر كمان، دا لأنى بعمل حسابى فى نص ساعة زيادة عن الوقت المقدر للمواصلات، يعنى شوية عطلة من هنا على وقوف وانتظار للعربيات من هنا وكده

بس من كام يوم بأه كانت مأساه فعلا.. خرجت فى معادى الساعة سبعة عادى جدا.. ورحت اركب والاقي عربية بسهولة جدا... وانا عارفة انى لو كنت اتأخرت ربع ساعة بس مكنتش هلاقى عربية الا بطلوع الروح. لما ركبنا السواق قال بعد شوية ان فى حادثة على الطريق.. انا بالمناسبة المفروض دلوقتى انى مسافرة على الطريق السريع بتاع مصر اسكندرية الزراعى، الحادثة عند منطقة اسمها ميت حلفا وموقفة الطريق.. فهو اقترح اننا ناخد طريق تانى كده، فى واحد اعترض لأن الطريق ده مش هيعدى على قليوب وهو عايز ينزل قليوب.. وقليوب قبل ميت حلفا، فهو والركاب اختلفوا، وفى الاخر السواق زرجن وقال مش هغير الطريق وخلينا زى ما احنا

المهم العربية ماشية ولمينا الاجرة واديناها للسواق والحمد لله على كده.. إلا وبعد تلاتاشر كيلو العربية وقفت.. والسواق نزل يشوفها وبعدين جاب شوية ادوات وفتح العربية وقعد يلعب فيها شوية، انا والناس زهقنا.. فاتت خمس دقايق.. طيب واخرتها؟ الناس سألوا.. قام هو جاب الاجرة من جيبه واداهلنا وقالنا اجرتكو اهيه، ادينى بحاول اصلح العربية، واللى مستعجل منكم يوقف عربية

يوقف عربية مين يا عم؟ الطريق دلوقتى كل العربيات عليه مليانة، لسه مافيش ولا محطة جت يكون فيها احتمال ان الناس تنزل ويبقى فى مكان.. ازمة

بعد حوالى عشر دقايق كده.. المشهد كان: اتنين فعلا نزلوا وقدروا يلاقوا عربيات وركبوا.. تمانية تانيين واقفين على الطريق بيشاوروا للعربيات.. واحد بس ما نزلش من العربية خالص.. بنت نزلت بس واقفة تتفرج على السواق وهو بيصلح العربية.. وانا بأه، واقفة مدية ضهرى للطريق السريع وبتفرج على المساحات الخضرا المزروعة وعلى العصفور اللى كل شوية ييجى جمبى ويبعد.. وعماله اتمرجح على حته طوبة كده وقفت عليها.. دى مش رومانسية، دا هبل بعيد عنك، او تقدر تقول كان عندى امل فى العربية تتصلح، او كمان انا عينى بتخطفها المساحات الخضرا جدا وبحس وانا ببصلها ان عنيا كانت جعانه جمال.. وافضل اتفرج كده على الاخضر الجميل اللى بيجلى العين ده.. هما بيقولوها كده

الجو كان ساقعة اوى، بارد جدا، وانا مش فارق معايا الوقت ولسه جوايا امل ان السواق يصلح العربية.. بس الوقت بقى يمر جامد ، فاتت تلت ساعة كده، ودا معناه انى بادوبك لو ركبت دلوقتى اوصل قبل معادى بكام دقيقة .. المسألة لا تحتمل تأخر تانى.. دا وترنى.. الناس ابتدت تلاقى عربيات وتركب.. طبعا اللى بيركبوا رجالة بس. لأنه كالعادة بيجروا هما على العربية ويزاحموا والبنات مش بيعرفوا يعلموا كده. مش بقى فاضل غير الراجل اللى مانزلش من العربية، وانا والبنت وواحد كمان اخد فى وشه ومشى عكس الاتجاه اللى كنا ماشيين فيه، وانا استغربت جدا.. رايح فين الراجل ده؟ كنت وقتها اتعرفت خلاص على البنت اللى كانت واقفة.. ماتعرفناش على اسامى بعضنا لكن ابتدينا نتكلم فى حكاية اننا اتأخرنا، فقالت لى ما تيجى نمشى زى الراجل دا ما مشى، فى محطة هنااااك عند الكوبرى اللى هناك ده... دا يا جماعة كان كوبرى مشاه على بعد 700 او الف كيلو كده. انا زمزأت.. هى قالت لى تعالى احنا مش خسرانين حاجة. ومشينا

بردو الجو ساقعة وانا وهى قررنا نوصل المحطة ده ونركب حاجة ترجعنا بلدنا ، اساسا انا اتأخرت على شغلى وهى اتأخرت على محاضراتها... كنت متضايقة انى لو روحت البيت هضطر اتصل بالمدير بتاعى واقوله انى اجازة.. وهو هيتضايق انى ماقلتلوش قبلها من بالليل.. وانا طبعا هعتذر عن كده.. وهسكت ومش هقول السبب يعنى مش هقوله انى اصلا خرجت واتأخرت ورجعت، لأن ببساطة دى حاجة مش فى صالحى ابدا وانا واحدة بتسافر من بلد لبلد عشان شغلها، اساسا القاهريين للأسف بيقلقوا من حكاية انهم يشغلوا معاهم ناس من محافظات تانية، عشان خايفين على المواعيد، مع ان الوضع بالنسبة لى انى انا غالبا باجى اول واحدة فى ايام كتير

اول ما وصلنا المحطة، لقينا اتوبيس.. ركبنا من غير ما نفكر. .او انا فى لحظة فكرت انى عندى شغل كتير وقلت لنفسى استحمل فكرة انى اتأخرت على الشغل وبلاش اعطل الشغل.. وخصوصا انى كده ممكن بالكتير اوصل بعد نص ساعة بس من المعاد.. مش ازمة ان شاء الله

قول ركبنا.. والاتوبيس اتحرك والشمس ابتدت تفرد لونها على الطريق.. والجو قرب يقلب رومانسية وخصوصا ان كان فى واحد من الركاب صوته جميل جدا جدا وهو بيقرا قرآن.. قعد يقرا، وخلانا كلنا فى حالة من الهدوء.. مش عارفة .. كنا مبسوطين .. بس الحياة مش بتديك كل حاجة.. اها... فعلا.. اديكو لسه فاكرين اهو.. الحادثة اللى عند ميت حلفا

فجأة بعد الجو ما كان ربيع، الطريق وقف والعربيات من كل حدب وصوب واقفة والحادثة فعلا شلت الطريق، واصلا الطريق دا مشلول لوحده كل يوم، كفاية كوبري قليوب معجزة هيئة الطرق والكباري المصرية، وايقونه الابهار فى فنون الزحاليق، كوبرى ازمة وكل اللى متعود يسافر كل يوم من عليه اسألوه هيقولكوا قصائد مؤلفة ومغناه فقط من اجل كوبرى قليوب.. باختصار الوقفة دى اخدت نص ساعة فى وشها

يعنى بعد الازمة ما اتحلت وعدينا من نقطة الحادثة كده اوصل بالظبط الساعة عشرة.. اعصابى خلاص انهارت.. وخصوصا لما ركبت المترو بعدين بأه اخدت تاكسى لحد الشغل ، بس انا كل يوم التاكسى بياخد دقيقتين بالظبط، انما المرة دى عشان اليوم جميل جدا كان المرور واقف فى الشارع واخدت حوالى عشر دقايق.. المهم وصلت عشرة وربع، فى خمس دقايق فرق عن الحساب، عادى بأه احتمالات الخطأ واردة

كان اول مرة اتأخر ساعة وربع بحالها.. وكنت متضايقة ومكتئبة، وفين بأه لما رقت شوية، بس عادى على اخر اليوم كنت فريش خالص واستعدت بهججتى وخصوصا لما عرفت من بنوتة زميلتنا انها مش هتسيبنا وتمشى من الشغل وانها هتقعد معانا، يومها فرحت جدا وقلت بجد الخبر دا يستاهل احداث يوم بالشكل ده

طيب المهم يعنى، انا اعرف ان فى شركات - وكتيرة - بتدى مساحة زمنية للناس اللى فى الشركة ييجوا فيها، يعنى مثلا قصادهم من تسعة لعشرة ييجوا.. وليهم تمن ساعات شغل، .. وخصوصا ان الشركات اغلبها بتكون مفتوحة طول اليوم.. طب دا انا اعرف شركة بتفتح اربعة وعشرين ساعة فى اليوم ومصرحة للموظفين فيها انهم ييجوا اى وقت من النهار او الليل، زى ما يعجبهم، وممكن يقسموا كمان التمن ساعات لأربعة واربعة.. المهم انهم يحضروا تمن ساعات وانهم ينجزوا فى شغلهم طبعا

هو طبعا الاحلى من دا ومن دا الشغل من البيت.. ما تيجوا نعمل حملة :))) ههههههههه

--

يييي التدوينة طولت منى بردو.. سورى يأه، الحبكة الدرامية تحكم .. بس انا حبيت احكيلكوا لأنى لما حكيت لماما هى اللى وصتنى احكيلكوا المرة دى.. تحيا ماما اللى بتشجعنى على التدوين