3/21/2007

تراجيديا بطعم التردد

الحكاية ببساطة ان بعد الكشف اللى تم على ايد عمرو، وبعد ما الموضوع انتشر على المدونات واتعلق حوالى تلاتة اربع اسابيع على بوابات ومداخل ومخارج العمرانية ليراها القاصى والداني.. راح عمنا ورفع قضية على الحكومة - ضدها يعنى - مختصما فيها رئيس الوزراء وكام حد تانى، بيطالب فيها بحجب عدد واحد وعشرين موقع ومدونة من ضمنهم - الفقيرة لله -مدونتى، بكام تهمة كده م اللى قلبك يحبهم

ايشى اساءة سمعة مصر
ايشى اهانة الرئيس
وقال كمان ارهابيين وحرامية ملكية فكرية وشوية تحابيش بقى من بتوع سب وقذف وكده

أول ما قرأت خبر القضية دى.. لم أملك امام هذا الموقف إلا فاه فاغرة من كثرة الاندهاش.

الاندهاش.. هذا الفعل الذى ظننت انى تخطيته وما عدت أتمتع به -و فى قول آخر لم أعد مصابة به- الحقيقة أننى فى حالة دهشة قائمة من يوم وصلنى ايميل عمرو غربية بخصوص المستشار عبد الفتاح مراد وهو المستشار الذى كشف عمرو فى تدوينة له قيامه بأخذ جزء كبير من شرحى لكيفية عمل مدونة فى كتاب له ودون أخذ إذن منى طبعا، كما كشف تكرار نفس الحادثة مع الشبكة العربية لحقوق الانسان.

قلت فى البداية يمكن تكون روزاليوسف - اللى نزلت الخبر - أخطأت - وما أكثر ذلك فى الصحافة المصرية- وادرجت اسم مدونتى خطأ

لكن الخبر كان صح والعريضة اللى رفعها القاضى والى انتشرت على النت مذكور فيها بنت مصرية (ايوه يا فندم اخر القائمة، مجرد اسم المدونة بدون تعريف لها او لصاحبتها مع ذكر عنوان التدوينة اللى جت فيها سيرة حضرته)

مفكرتش ساعتها المدونة ممكن تتحجب وللا لأ، انا شايفة ان اللى يعمل مدونة يعمل عشرة، خلاص عرفنا السكة ومحدش يقدر يرجعنا منها -كلام كبير ده :)- ومفكرتش كمان فى ان القاضى اللى هينظر فى القضية دى ممكن يدخل عليه الكلام الغريب اللى جاى فى العريضة، يعنى بشىء من الفحص والبحث والتدقيق قى الكلام ده هتتضح قصاد القاضى اللى المفروض تنظر القضية محكمته حقيقة الموضوع وخصوصا لو قرر انه يسمع من اصحاب المواقع والمدونات دى نفسها، وساعتها هيعرف الحقيقة المثبتة ويا سلام لو طلب شهود مثلا

انا عن نفسى حكاية ان القاضى اخذ من الشرح بتاعى وحط فى كتاب من غير استئذانى او ذكر المصدر، فسهل جدا اثبت اسبقيتى فى النشر، وبوقت اطول بكتير من النشر بتاعه، يعنى هو مثلا رقم ايداع الكتاب بتاعه فى 2007 انما عندى ادلة تثبت نشرى للشرح فى مايو 200.. والاهم من كل ده، عندى شهود

ولو قلت يا شهود.. هلاقى الف من يشهد من المدونين وعابرى المدونات يقولوا لسيادة القاضى ان الدليل بتاعى ده بنفس المحتوى الموجود دلوقتى ده هو نفسه المحتوى الللى اتنشر فى مايو 2006.. وانا عارفة انى يوم ما اقول تعالوا اشهدوا هتيجوا وتقولوا الحق

وامبارح لما حضرت الاجتماع اللى عقدته الشبكة بخصوص القضية والحجب قررنا كلنا نقف فى وش الموضوع ده.. حكاية الحجب دى وبنوعية التهم دى اقل ما يقال عنها انها تعسفية جدا ان لم تكن سب وقذف فى حد ذاتها.. قال ارهابيين قال

انما اللى حصل ده نفسه كان شىء من الدراما العالية بالنسبة لى، واحدة لسه كان عيد ميلادها بتحتفل بيه وفرحانة ما تعرفش ليه ، بتعيش حياتها البسيطة والخفيفة واللى مافيهاش دراما تقريبا.. كله لايت كوميدي كده :)) وتيجى بعد عيد ميلادها بيوم واحد تتحط فى موضوع فيه محاكم وقواضى وحقوق وانتهاكات وحرية رأى وارهاب -ولكم ان تتصوروا التهمة دى فى ظل التعديلات الدستورية الجديدة - وسياسة واهانة رئيس - كله طبعا الا اهانة سيادة الرئيس - دى بقت لعبة جامدة اوى
اوعى، سيبى اللعبة بتاعتى
لأ دى بتاعتى..
يا سلام يا اختى

ما تشدش..
طب يالا سبيها..
ماتشدش..
ماتشديش انتى..
ما تشديش ما تشديش انتى



اه.. بس اللعبة دى صعب تتكسر، ومش هتتتطلع منها نيللى وتقول:"ما هو انا اصل اللعبة"
وانا اصلي بحب نيللى ;(

اهو بالظبط كده حاسة ان الدنيا بتقولى
welcome to the real world ya shabba!

والمفروض عليا دلوقتى انى اقرر اعمل ايه.. واتصرف ازاى..
ماتيجوا تلعبوا معايا؟؟ ماقصدش طبعا ادبسكوا ، حتى معرفش ازاى.. انما ليفترض كل واحد انه مكانى.. وبكل واقعية وحق يقولى اللى يعمله لو كان مكانى..

ارجوكم ردوا عليا وفكروا معايا بصوت عالى.. دى اكتر تدوينة انا محتاجة فيها تعليقاتكوا.. سواء كنتوا بتقروا لى دايما او ماهمكوش فى حاجة.. سواء حبتونى او كرهتونى او معدتش على تفكيركوا اصلا

38 comments:

  1. بصى يا زينب
    اللى يسكت عن حقه قيراط ، حيتاخد منه بكرة 24

    طبعا الكلام بتاع "ماتسكتيش " ده مش حيبقى لى وش اقوله لك !فهمانى اكيد، لكن بكل امانة
    انصحك ترفعى دعوى...

    طيب انتى دلوقتى سهل -باذن الله- تثبتى حقك، ،تفتكرى الراجل ده او غيره لو فضل يسرق افكار ومجهود الناس ، ضحاياه اللى بعدك حيقدروا يثبتوا زيك؟

    ReplyDelete
  2. فيه محامي معاكي الاول؟
    واللا عاوزة محامي؟
    انتي عاوزة حد فاهم قانون
    كلميني بعد اذنك وبسرعة

    ReplyDelete
  3. pepa
    ايه المفاجاة دى
    :)

    بن عبد العزيز
    محامى ؟ اشمعنى؟
    هو الحل محامى؟

    مممم.. اكلمك دلوقتى ماينفعش
    مش معايا رصيد فى الموبايل
    وابويا شال الزيرو من شهرين كده
    هو كان رايح يشيل زيرو الموبايل فقام شال كل الزيروهات

    ReplyDelete
  4. السلام عليكم ورحمة الله وبركاته
    انا بصراحة مش فاهم حاجة هو انتى عملتى ايه ؟ انا بصراحة لما قرات مدونتك انتى والاخت ميمو ومعاكو الجدع الطيب بتاع مصر هى امى قررت ان التعليق يكون معاكم انتم بس مع انى بقالى اكتر من شهرين بقرا كل المدونات ايه رديت عليكوا انتم بس لان مواضيعكم لها هدف وبدون اساءة ...طيب ليه الراجل ده عامل قضية ز
    بصى يا سيتى صلى على المصطفى ( عليه افضل الصلاة والسلام)
    الايام دى بعد خروج اكثر المدونات عن النص وتطاولهم واعطاء القرصة لليسوى واللى ما يسواش فى انه ينتقد ويمسك حاجة على المدونين الخارجين عن النص او بمعنى ادق فهموا موضوع الديموقراطية غلط ولما واحد يرفع قضية يقول فيها ان علاء ومنال عاملين سمعة وحشة لمصر يبقى عنده حق من وجهة نظره أو بيكتبوا حاجات ضد الاديان يبقى معقول . وعلى فكرة لما يطلب حجب مواقع بتتكلم فى السياسة بطريق فجة او فهمت الديموقراطية من القشرة ما خدتش العمق يبقى من حقه لكن انتى ؟؟؟؟؟؟ ليه ....
    أقولك ليه هو سرق منك موضوع
    وبعدين من كتاباتك
    انتى انسانة عادية جدا وعندك شغلك وبيتك واصدقاءك كل اللى فيها انك غاوية كتابة وكتابة جميلة لكن هو عرف يصدر كتاب و قاضى ومش قاضى وبس ده مش عاجبه المواقع والمدونات اللى بتدافع عن حقوق القضاه ده مش طبيعى
    خدى بالك انتى المقصودة لتغطية سرقة الموضوع بتاعك
    احسن وسيلة للدفاع ....... الهجوم ارفغى قضية وبسرعة الموضوع مش سهل
    واسف لانى بغيد مش حقدر اعمل حاجة غير انى ادعيلك وربنا يستجاب
    ربنا معاكى

    ReplyDelete

  5. بنقرألك و بنحبك وكلنا وراكي

    للأسف أنا برا في أمريكا

    قولي للناس الي معاكي و فكري انت لو في اي حاجة ممكن أعملها من أمريكا عشان أساعدك أنا جاهز

    ربنا لا يرضى بالظلم

    ربنا معاكي يا رب

    سلام من ماناساس البلد

    ReplyDelete
  6. حلوة أوى القضية اللى مرفوعة ضد الحكومة ورئيس الوزارء ووزير الأتصالات ووزير العدل ووزير الداخلية و و و !!!!!!!

    أعتقد أن محامى ويكون دايس فى حوارات الأنترنت بالأضافة لأنكم كلكم واقفين مع بعض زى ما البيان بيقول بالأضافة أن كل مدون فى مصر يشهد أن دليل بنت مصرية للتدوين بتاعها و نشرته قبل أى حد على وجه المجرة مش كوكب الأرض بس يوم Saturday, May 27, 2006
    ومن غير تحديد يوم النشر كمان , كل المدونين عارفين أن الدليل بتاعك وأنتشر قبل نشر الكتاب

    كل ده يعنى

    جوووو على بركة الله

    ReplyDelete
  7. بصى انا هاقلك حاجة

    في مثل هذه المواقف لايمكن ان ينفعك راي حد لازم تتصرفي لوحدك بالشئ اللى ينفع لمصلحتك انت

    بالمناسبة البلوجر بتاعك جميل و شعبيتو جامده اتمنى انك تحافظى عليخه و تكملي فيه كمان يا ريت لو تديني رايك في البلوجر بتاعي

    شكرا ليكي و خدي بالك من نفسك

    ReplyDelete
  8. زيزي

    أنا فكرت اكتب بوست جامد عن الموضوع ده ، اوضح فيه ابعاد القصة كلها يمكن لانها مش متعرفة بشكل كامل وواضح عن كتير

    ودخلت عندك اكتر من مرة مالقيتش لا حس ولاخبر اللهم إلا التنويه البسيط اللي كنتي كاتباه

    وبناء عليه اكبرت فيكي ترفعك عن هذا اللت والعجن والكلام الفارغ ومايعوي يعوي ودع القافلة تسير لذلك وجدت بوستاتك على هذا النوع "دع القافلة تسير"
    والكل يعلم ان الموضوع موضوعك من سنة ولينكاته في معظم المدونات
    وأفاد كثيرين لدخول عالم البلوجر
    والموضوع مكشوف ومسروق وواضح وضوح الشمس ، وماقام به غربية مجهود يشكر عليه ويحسد الجميع ذكائه في الكاتشا وإنتقاء مفردات الكلمات
    والأمر متروك لكي فأنتي صاحبة الشأن في إثارة القضية أو التعامل معها من منطلق كل شيئ واضح للجميع ودعنا من تلك السخافات
    ولو عايزة طرح القضية وأعني هنا قصية السرقة كل المدونين معاكي من يختلف معكي قبل من يتفق
    اما حكاية قفل المدونة فده هراء ومش بالساهل حاجة كده تحصل معاكي إنتي بالذات

    ReplyDelete
  9. This comment has been removed by the author.

    ReplyDelete
  10. الواحد يكون ماشى فى حاله لا بيه و لا عليه يلاقى نفسه بقى مسئ لسمعة بلده و بيهين رئيسه و كمان ارهابى، دى كوميديا سودا دى ولا ايه
    طبعا الدعوى اللى رفعها الشخص ده كلام فاضى، لكن اللى خايف عليكى منه ان حد يستخدمك و يستغل حماسك للدفاع عن نفسك و حقك المسلوب عشان يحقق اغراض شخصية

    خدى بالك من نفسك يا زينب و متثقيش فى حد

    ReplyDelete
  11. اى كلام يا عبد السلام ده موقف الراجل

    انت تشوفى محامى شاب كويس ومتفتح ويفهم قانون

    وتشرحى له كل التفاصيل وتطلبى منه قضيه مضاده لصالحك على الراجل ده وهياقى الف سبب يرفع بيه قضيه وفى نفس الوقت يقوض اركان القضيه اللى مرفوعه ضدك بعد التأكد من سلامه موقفك القانونى

    ده لو عاوزه تعملى

    ReplyDelete
  12. دة بيقودنا لموضوع مهم وهو لماذا نكتب؟ عشان نبقى مشهورين ولا عشان نزيد كمية المعرفة لننير بها طريق الاخرين المظلم انا راى انك تفرحى لان بسرقة افكارك ناس كتير اتعلمت ووالنبى متكلمنيش عن حقوق الملكية الفكرية
    لاننا فى وطن مازلنا نبحث فية عن حقوق الملكية الغذائية
    دعينا نفكر بمنطق اكثر تسامحا وافادة لوطن نتمنى ان نغيرة
    كفانا انانية

    ReplyDelete
  13. انا دخلت على مدونتك وباستأذنك انا اعمل مدونه اسمها بنت بورسعدية

    زى مدونتك كده
    وعلى فكرة ان خريجة حقوق

    انا معجبة بيكى جدا وانا على فكرة ليسانس حقوق عين شمس وفى
    الكلية كان ليا واحده صحبتى زيك بالظبط فى الصراحة والتلقائية
    وانتى حببتينى انى اعمل مدونه زى مدونتك وتكونى انتى استاذتى وبفكر
    اسميها بنت بورسعيدية لانى اصلا من بورسعيد وبالنسبة للموضوع اللى انت واقعه فيه ده
    انا قلبى معاكى لانه موضوع محير جدا بينى وبينك انا محامية من 8
    سنين فى استئناف دلوقتى وباحاول ابعد عن اى حاجة شخصية تدخلنى فى مشاكل او قضايا او حتى نزاعات مع حد ممكن اكسب او اخسر وبدل ما اطلع من المحكمة
    محامية اطلع بسابقة وقضية لاننا مهما كنا الامر مايسلمش
    ومن الاخر انا شايفة اللى متضامنين مع الموضوع ده كلهم مراكز و شبكات وانت البنت الوحيدة واخشى ان يكون واخدينك علشان تكونى ورقة فى النزاع ده لصالحهم
    خليكى حذرة من اى كلام تقوليه فى حد اكيد حايعتبر سب وقذف ممكن تتحاسبى عليه وتتحبسى كمان عشانه لان القضاه فى احكامهم بيطبقوا القانون بس ومالهمش دعوى انه ولد او بنت المهم انه غلط
    بس اللى فهمته من مدونتك وانا حاسأل اخويا برضه هل البرنامج ده مجانى ومالوش اى حماية وكل الحاجات ديه موجودة فى موقع بلوجر
    فبالتالى انتى متقدريش حتى لو قولتى اى حاجة عنه انك تتملكية وترفعى قضايا علشان تدافعى عن حاجة بتاعة غيرك
    وازاى حاتثبيتى ان الكلام اللى موجود ده كلامك ربما حد تانى يدعى ان هو اللى عمله ويتهمك انك انت اللى واخده منه وهذا امر وارد
    لان القانون بتاع الملكية الفكرية بيطلب ان اى برنامج او حتى صفحة تتعمل لازم تتسجل فى مجلس الوزراء ووزارة الثقافة هل انتى عملتى كده لو ماكنتيش عملتى كده نصيحتى ليك انك تخلعى من الناس دول واوعى تعملى ليهم توكيل حايجرجروكى فى كل المحاكم وحايشتموا بلسانك ويتخانقوا بلسانك وانتى فى البيت متعرفيش اية اللى جرى فى المحكمة وحاتعرفى لما يبقى لك قضية سب وقذف وتشهير فاكرة عبد الكريم
    متخافيش من غلق المدونه ده امر مستحيل وانتى عارفة تعملى غيرها بسهولة لكن حكاية ان القاضى يجيب شهود ده كلام عبيط كان حتى خلى عبد الكريم يجبوله تقرير فنى للموقع
    القانون اللى موجود فى حياة دلوقتى مش زى بتاع الافلام خدى بالك (انت براءة يلا نروح)
    اوعى تجرى ورا اللى بيقولوك عاوزة محامى المحامى هنا عاوز يتشهر على قفا اية قضية مش مشكلة اللى يحصلك خدى بالك ده حايبقى فى كلام فى الجرايد وكده وده هدف اى محامى
    لو كنتى عاوزة مشورة قانونية او حتى فى المطبخ بجد ابعتى لى على

    الاميل عقبال مااعمل مدونه
    انا عموما اخويا مهندس وحاسأله فى الموضوع بتاع المدونه ده
    وان شاء الله قريب وحاعزمك عندنا مرة فى بورسعيد
    واسيبك بالعافية

    ReplyDelete
  14. حاجة حلوة اوى اى حد يطلع كده مش عاجبه بلوج و لا موقع يقوم يطالب بقفله
    و بعدين رافع قضية على الحكومة عشان الحكومة معنى كده هو شايف ان الوزرا دول مش شايفين شغلهم كويس و اللى مختارهم مييييين اصلا؟؟؟
    معنى كده انه شايف ان الاختيار كان سئ و مش على المستوى المطلوب معنى كده ان هو-القاضى يعنى- اللى ممكن يتسبب فى مشاكل لنفسه
    رأى انه حاجة كده زى خدوهم بالصوت قبل ما يغلبوكوا , حاجة كده فرقعه
    الناس ديه مش عايزة تفهم ان الدنيا اتغيرت هم فاكرنها جريدة ممكن يقفلوها و لاكتاب ممكن يمنعوا نشره , لسه عايشين فى وهم الستينات و احنا احسن ناس و مفيش زيينا و بعدين ايه المعيار هنا ؟؟ المفروض يحطوا واحد اتنين تلاته و داه الى متتكلموش فيه , على فرض ان حد كتب و اللى كتبه داه مش عاجبهم مش احسن ما يروح ينضم لجماعة و لا يفجر نفسه ولا يروح يتخابر مع دولة اجنبيه و يتجسس علينا
    عندى اقتراح للى مش عاجبهم دول, هما اللى ييجوا هنا و يعملوا حكومة افتراضيه على النت و كله يبقى افتراضى فى افتراضى و المحكمه تبقى افتراضية و نشوف ايه الى حيحصل
    انت موقفك سليم و متعدتيش حدودك خسارة الفلوس اللى حاتدفعيها عشان ترفعى قضيه
    ده معناه ان بعد كده ممكن اتفتش و انا داخله البلوج بتاعك؟؟؟
    :)روقى

    ReplyDelete
  15. اول بوست ليا قلت انى مقلقة و خايفة
    مش عارفة ليه مش خايفه دلوقت
    اجمدى كده امال

    ReplyDelete
  16. انا اسفة معلش قصدت متضيعش فلوسك على محامى لان موقفك سليم و موضوع الملكية الفكرية در حاجة ترجع لك بس داه حقك و اتمنى متتنزليش عنه

    ReplyDelete
  17. الموضوع دا غريب اوي بس بعد حكم كريم بقي اي شئ متوقع
    بس متقلقيش ربنــــــــــــــا طبعا معاكي
    وكلنا معـــــــــــــــــاكي وحوليكي طبعا

    ReplyDelete
  18. أنا قلتلك رأيي .. و عاوزاكي تركزي قوي قوي ف قراءة كل التعليقات اللي جاتلك و هتقدري توصلي للحل السليم ان شاء الله .. بس طمنينا كلنا لما توصلي لقرار .. و غالبا ايميلاتك مش بتوصلني فخلينا علي موبايلات .. أوكي ؟

    زيزي .. حكمي عقلك قوي قوي قوي ..

    ReplyDelete
  19. بصى يا شابة انا بقريالك تقريبا من سنة ومستعد اروح اشهد فى اى حاجة لو رفعتى دعوة وبيتهيائلى ناس كتير زى
    المهم
    انا من رايى ان الاخ القاضى عمل كدة لما لقى نفسه اتزنق قالك اتغدى بيهم قبل لما يتعشوا بيا وزى مانتى قلتى محدش اساسا حيقتنع باكلام دا حتى القاضى الى حينظر فى كلامه فاحسن حاجة تعمليها انك تتبعى الى بيحصل خطوة بخطوة ولما تلاقى ان فى فرصة ليكون هناك وجود للطرف التانى والتكلم الى هو انتى ادخلى وطبعا حتلاقى زى ما قلت فى الاول كتييييييييييير اوى من الناس واقف جنبك بس مبيتهيئليش ان الدخول فى اللعبة دلوقتى حيفيد بحاجة

    ReplyDelete
  20. يا بنتى شاكلك كده وقعتى فى الناس اللى بيستغلوا هباله الشباب
    اللى بيفهم فى القانون صح حيلاقى ان الدعوى المرفوعة من القاضى ده فى اللى مطلوبين اساسا حتلاقيم منحصرين فى اربع او ثلاث اشخاص انتى مش فيهم
    انتى مجرد طلب لحجب ولن يتحقق على ارض الواقع اوعى حد يضحك عليكى ويقوللك ملكية فكرية وكلام فارغ هو احنا فى مصر عندنا ملكية فكرية
    لحد دلوقتى انتى مش فى الاشخاص اللى موجه ليهم الدعوى
    اللى موجه ليهم الدعوى اساسا بيضحوا بالشباب اللى زيكوا
    وياخدوا الشهرة هما على اساس الدفاع عنكوا
    انا يا بنتى انا قديم فى اللعبة ديه وعارف اللى بيحصل
    الناس اللى وقعتى معاهم دول دايما بيدوروا على كبش فدا يحطوا صورته ويكتبوا عنه ويدافعوا عنه والكل كسبان
    الا اللى بيدافعوا عنه
    الموضوع بالنسبة لط لحد دلوقتى مجرد عنوان مدونه
    وكل ما حاتتضامنى اكثر حايبقى اسم وعنوان ومكان واستدعاء
    خدى بالك وربنا يرحمنا من المستغلين
    انا فى القاهرة وعلاقاتى بالمحامين الشرفاء فى مصر على اعلى مستوى لو عوزتى اى استشارة مجانية تواصلى معى
    انا لمجرد انا حاسس انك ملكيش دعوى بالموضوع ده ماكنتش عبرتك لان من الواضح انك بتستخدمى الانترنت والمدونات بحريةشخصية تقف عند حدود حرية الاخرين وانا احى فيكى هذا الموقف اللى قلما اجده على الشبكة
    واعيد دعوتى اليكى ارسل لى اميل بسؤالك وانا على استعداد للرد
    الاميل ده ليكى انتى بس
    eskanderm@gmail.com

    ReplyDelete
  21. طيب ما تجربى تتصلى بالراجل ده وتشوفى موقفه اية من ناحيتك ولا انتى خلاص قررتى تكونى خصم ليه
    جربى وشوفى اية الموضوع حتى من باب المعرفة
    وحاولى تعرفى اية النظام منه
    الراجل ده كل وسائل الاتصال بيه موجوده على كتبة وموقعه
    ده انسب وافضل حل ليكى
    ركزى فى افكارك

    ReplyDelete
  22. عزيزتي
    انا مش ححاول اطمنك و اقولك مجرد كلام لا يودي و لا يجيب و لا حقول ان فيه اصحاب مدونات اتقبض عليهم لان ده اللي انا بسمعه دايما
    كل اللي حقدر اقوله ان المدونه بالنسبه ليكي زي المدونه بالنسبه ليا مكان بنقدر نطلع يه كل اللي جوانا و نتشارك بالرأي مع ناس ممكن يفهمونا و ممكن مايفهموناش و احنا مانقصدش اننا نعمل قلبان و لا مظاهرات و لا اي حاجه مجرد افكارنا بنطلعها في مدونتنا و اظن التنفيس عن اللي جوانا مش جريمه و عمره ماحيكون جريمه
    بتنمالك انك تواصلي دايما الكتابه و تاخدي بالك من نفسك و ربنا يحفظك دايما و يحفظ كل المدونيين و المدونات

    ReplyDelete
  23. أعتقد أن الذي يطلق كلمة "إرهابي" على المواقع بهذا الشكل الجزافي والكوميدي لا يستحق مجرد الالتفات إليه أياً كانت درجته وحيثيته..

    هذا أولاً..

    ثانياً .. ما أراه هو أن سيادته قد حول الخصومة الشخصية المتمثلة في رد فعلك الغاضب (والطبيعي جداً) إزاء الاستيلاء على مواد من مصدر إلكتروني (مدونتك) (وبالطبع فإن أي شخص لن يكون منشكحاً عندما نجد شخصاً آخر يستولي على أفكاره وينسبها لنفسه) إلى خصومة مبدأ ومسألة أمن قومي ومنتخب قومي أيضاً..

    أعتقد أننا فعلاً نحتاج لتشريع يحمي الأفكار من السرقة ، وأصحابها من تصفية الحسابات الشخصية على هذا النحو المخزي والمشين..

    ReplyDelete
  24. اهانة رئيس اية اللى بتتكلمى عنها


    ادخلى على الموقع ده و اتفرجى

    ReplyDelete
  25. شيء غريب جدا
    انا حاسس ان كلمة عادل امام في عمارة يعقوبيان بتردد في اذني
    احنا في زمن المسخ!!!!!؟
    قاضي بيسرق و كمان رافع قضيه علي اللي سرقهم
    انا حاسس انه اتعلم علي يد بوش او شارون
    بيعملوا معنا نفس ما يفعله
    بيسرقونا و يدمرونا و بعدين بندفع لهم تكاليف الاعمار
    انا شايف انك مترفعيش قضيه و لا حاجه
    و لو طلبوكي للقضاء عندك موقعك كدليل علي سلامة موقفك و انه هو الحرامي
    تحياتي

    ReplyDelete
  26. المشكلة حاليا إن كل حاجة بقت بتتحول لنفس الموضوع وهو تشويه سمعة مصر
    أو
    اهانة الرئيس
    علشان كدة لازم ترجعى الموضوع لاصله وهو إن فى واحد سرق منك حاجة
    فلازم تحاولى تثبتى حقك بكل الطرق المتاحة
    وربنا يعينك ويكرمك

    ReplyDelete
  27. الصراحه لا اجد ما اقوله علي هذا الكلام حتي الكلام يريدوان يحجبوا هذا شيء فظيع فعلا
    تحياتي

    ReplyDelete
  28. والله انتي قولتيها
    لو حجبوا مدونه هيطلع الف
    بس في الاول والاخر احنا مش بنسيب حقنا
    والقاضي ده بصراحه حرامي بجح

    ReplyDelete
  29. لما الناس بتكبر فى السن بتبدأ تحس بالحقد على الشباب, دى مرحلة متقدمة على التخريف, وبيحطو نفسهم فى مواقف بايخة..

    والموقف يؤكد أن الحياة اشتغالات و لازم نطبق مبدأ طنش تعش تنتعش .. كمان فيه اثبات ان الدهشة لازقة ولن نتخلص منها

    ReplyDelete
  30. كنت فاكرك سابقاه في النشر بكام سنة
    طلعتي سابقاه 1807 سنين

    وبعدين الدنيا مش عارفة تكمل جملة انكليزي

    فكك يا زيزي اشطه يعني
    الراجل اتشرد وخلاص بس ماتعقديش نفسك

    feel the rain on your geld

    لو عاوزة رايي انا كاتبه عندي
    اقلك هاقولهولك
    لما باتخانق مع حد من اخواتي ويقعد يألف حاجات ماحصلتش علشان اطلع غلطان
    باقوم ضارب نفسي واتبلي عليه قدام ابويا
    زي فيلم
    the fight club
    باقوم ناطط وضارب نفسي بالبوكس واقول كده بتضربني
    وقدام بابا كمان
    كده يعني اتبلي عليه في اي حاجة واعمليله مشكلة هايظبط عالطول

    ReplyDelete
  31. حسبي الله و نعم الوكيل


    أنا برضة قلت إن موضوع عبد الكريم لما حصل ، حصلت معاه كارثة مدوية - بصرف النظر عن موضوع إذدراء الأديان ده أو نوعية أفكار عبد الكريم نفسها - ، لكن تمرير السنة السجن لسب الرئيس دي هيه السابقة اللي بجد اللي نتوقع منها كتيييييير بعد كده

    ReplyDelete
  32. حاجة تانية تغيظ قوي

    يعني سيادته- صاحب الدعوى - ما قدرش يختصم الحكومة في حاجة إلا عشان كام مداونة ، حتى لو افترضنا فيهم - فرضا جدلا - أسؤأ الصفات ، و ما خدش باله م البلاوي التانية اللي بتحصل في البلد ؟
    يا عيني الحكومة أياديها نظيفة و بيضاء و لا يشوب سجلها الأبيض ناصع البياض المغسول بأومو إلا سماحها لبعض المداونات بالظهور دون حجب ليها ؟؟؟؟

    يا رب ---- حسبي الله و نعم الوكيل تاني

    ReplyDelete
  33. الأخت بنت مصرية
    بعد التحية أود لو أتمكن من مراسلتك عبر البريد الالكتروني إن كان لديك عنوان وذلك في خصوص "مرصد المدونين"الذي قد تكوني سمعت عنه. بامكانك مراسلتي عبر العنوان التالي
    لكي يتحقق ذلك.
    johacomo@hotmail.com

    مع تحياتي
    جُحَا.كُمْ

    ReplyDelete
  34. بصى يا بنتى، القضيه دى فاشوش، متقلقيش.
    بس لو قلقانه قوى، إستشيرى محامى و يا ريت يكون معرفه كويسه علشان ميحب يعمل بيزنيس عليكى، معلش دى مش شتيمه فى المحامين بس هى دى مصر.

    ReplyDelete
  35. بصى يا بنتى, انا قعدت بامانة افكر فى الحوار ده كانى مكانك لانى بحبك برغم انى معرفكيش ولو انا مكانك حفكر تفكير عقلانى واعمل الاتى:

    1- اللى رفع القضية دى رفعها ليه؟؟
    فى 3 احتمالات انا شايفهم:
    اولا انه يكون عايز يشهر بيكى او عايز يهاجمك علشان تبقى انتى الشيطانة وهو الملاك البرىء اللى مش ياخد شغل وملكية حد والموضوع شخصى بحت
    ثانيا انه يكون مجرد واحد عايز يقوى نفوذه لدى السلطة والنظام من نفسه كده فيقوم يعمل حاجة زى كده علشان يلمع نفسه او يكسب شىء معين بدل حد تانى
    ثالثا انه يكون مدفوع بواسطة السلطة او النظام وده مش بعيد اذا اخذنا فى الاعتبار ان اللى رفع قضية على الدستور وابراهيم عيسى بتهمة سب الرئيس والاساءة لسمعة مصر مواطنيين عاديين وفى الحالة دى يبقى ده جزء من حرب على المدونات بدات بكريم لانه اسهل واحد ممكن يقع لانه مش حيحظى بتعاطف الناس لانه بيهاجم الدين بشكل عنيف وبالتبعية السخط الشعبى وحشد الجماهير اكيد مش حيكون فى صالحك لانكو بتندرجوا تحت نفس التصنيف"مدونين"

    يبقى ممكن تكونى بتواجهى حركة ملهاش لازمة علشان تسكتى على موضوع الكتاب ده او بتواجهى قاضى او مستشار عايز يزود الرانك بتاعه على قفاكى او بتواجهى نظام وسلطة بتعمل اعادة تنظيم لادوات المجتمع- اللى من ضمنها المدونات- وبتحاول تضع ليها اطار معين

    2- مين معايا؟؟
    شوية مدونيين و الشبكة العربية لحقوق الانسان واعتقد الناس دى انتى عارفاهم اكتر منى وتقدرى تحكمى مين معاكى ومين ممكن يبيع وباى تمن -الحياة مش وردية-

    3- ايه مصادر القوة اللى فى ايدى؟؟
    او بمعنى اخر اقصى حاجة ممكن اعملها ايه؟؟ لان طبعا العالم المثالى مش موجود ولا عمره حيبقى موجود.. ووقت الجد السلاح هو اللى بيتكلم. ممكن استعمل اصحابى المدونيين واستثمر تعاطفهم معايا.. وايه كمان؟؟ ممكن استغل الناس اللى معايا فى نفس الخندق انى افرقع الموضوع واقلبه قضية راى عام.. ممكن اقدر اوصل للجرايد او محطات تلفزيون وانا شيخة المدونات و مش شوية فى البلد -بجد مش بهزر- طب وايه تانى ؟؟ طبعا انتى ادرى منى لانى معرفكيش معرفة شخصية

    4- لازم احط فى اعتبارى اسوا الاحتمالات واخطط على اساسها بحيث لو حصلت كارثة اكون متوقهعا ولو محصلش خير وبركة... وطبعا كريم ماتحاكمش محاكمة عادلة ولا ايمن نور ولا ابراهيم عيسى

    5-وقبل ما اعمل اى حاجة اسال نفسى انا عايز ايه بالضبط؟؟؟ عايز ابقى مدون واكتب براحتى فى اى حاجة وكل الناس تقرالى وتعرفنى وشوية شوية ابقى من الليدرز او الصفوة والنخبة فى المجتمع؟؟؟ اه
    طب عايز ادفع التمن؟؟؟ ايه فكرتى ليه؟؟
    لو مش عايز ادفع التمن يبقى اقفل بقفى احسن و معكش كتير.... طب ولو مصر على رايى وممكن ادفع يبقى ايه الحل؟؟؟
    6-اشوف محامى محايد ويكون بيفهم -محامى محايد يعنى حد غير الناس اللى علقت الان حاسس انهم كلهم بيستغلوا الموقف وعايزك تتصلى بيه علشان يقف معاكى واكيد مش لله-

    7- مبدايا لازم اوثق كل حاجة تتعلق بالموضوع ده من اول المدونة وكل كلمة كتبتها فيها لازم يكون فى برهان مادى على صحتها
    وتوثيق للجرائد و الحلقات التلفزيونية اللى حنغطى الموضوع... ده طبعا بخلاف اوراق القضية نفسها واعمل ارشيف خاص للحوار ده
    8- اتقل اتقل اتقل لحد ماعرف انا بتعامل مع اى احتمال من ال 3..يعنى استخبى واراقب الجو واجس نبض... وبعدين اتصرف على الاساس ده... بدل ما اكبر موضوع ممكن يكون مش كبير اساسا

    ReplyDelete
  36. This comment has been removed by a blog administrator.

    ReplyDelete
  37. عزيزيتي بنت مصرية،

    أكتب هذا التعليق للمرة الثانية بعد ما يبدو أنه غباء مني تسبب في فقده في المرة الأولى أول أمس (غير النسخة المحذوفة لأخطاء بها)، و أعتذر مقدما لطوله.

    أدرك أنك تعرفين معظم ما سأقوله، و أنك في تدوينتك هذه تسعين لاستطلاع آراء أخرى و للشد من أزرك في مواجهة هذه الأزمة الشخصية. و لا لوم عليك في هذا.

    واضح للجميع أن القضية المرفوعة حاليا المُدَّعى عليه فيها هو جهة الإدارة في الحكومة و لست أنت و لا أحد من المدونين طرفا مباشرا فيها.

    لكن الخطورة تكمن في أنه إذا ما حُكم فيها لصالح المُدَّعي فإن ذلك يؤسس سابقة يمكن أن تستغل في حجب مواقع كثيرة. و أظنك رأيت كيف أن مدونتك مطلوب حجبها و هي ليست مما يُنشر فيه تحريض على معارضة الحكومة و لا سُباب لأحد أو شيء و لا معارضة و لاشيء من هذا القبيل. دعك ممن يطبقون معاييرهم الذاتية في الحكم على ما هو جدير بالنشر و ما هو يستحق الحجب و ناشريه العقاب، لأن هؤلاء أنفسهم قد يغدون يوما ضحية من يدَّعي عليهم مطالبا بحجب ما ينشرون و بِعاقبهم. الموضوع دا ما فيهوش كبير و لا فيه مزايدة. صحيح أن دا كمان ممكن ينطبق عليه قول "و أنا مالي، الموضوع ما يمسنيش بشكل مباشر". هذه من مسائل الالتزام الأخلاقي التي ليس لي حُجَّة على حد فيها.

    لكن الخطورة المباشرة، و هو ما فات المعلقين أعلاه الرائين أنك "ما لكيش دعوة"، أن رأي القانونيين هو أن الحكم لصالح المُدَّعي بحجب تلك المدونات باعتبارها مواقع إرهابية و مشوهة لسمعة مصر و غيرها من التُهَم الواردة في عريضة الدعوى، سواء تم تنفيذ الحجب أو لم ينفذ، يفتح المجال لرفع دعاوى على ناشري تلك المواقع باعتبارهم مُشوِّهين لسمعة مصر و إرهابيين. أظن العلاقة واضحة و التَّبِعات واضحة.

    عن ما يخص الدعم القانوني، فالشبكة العربية لمعلومات حقوق الإنسان هي مؤسسة حقوقية مجال عملها هو الدفاع عن حرية التعبير عموما و على إنترنت بالتحديد. و العاملين فيها هم أصحاب أكبر خبرة عملية في هذا المجال، و لا أظن أنه يوجد من هو أقدر منهم على تناول هذا الموضوع تقنيا.

    بخصوص الملكية الفكرية: لمن سأل إن كانت توجد ملكية فكرية في مصر، فأقول نعم توجد ملكية فكرية يحميها القانون. ملكية المؤلفات (الأدبية و الفنية المكتوبة، و المسموعة و المرئية) لا تستوجب - على حد علمي - تسجيلا مسبقا، بل هي محمية تلقائيا بمجرد النشر، و هي في هذا تختلف عن براءات الاختراع التي تستوجب الفحص التقني.

    لكن الأهم من الملكية الفكرية هو الحق الأدبي؛ حق المؤلف في أن يرتبط اسمه بعمله، بغض النظر عن استحقاقه لمقابل مادي عند استغلاله من قبل آخرين أم لا. و على عكس الملكية الفكرية فالحق الأدبي غير محدد بمدة حماية، فالملكية الفكرية مرتبطة بالاستغلال الاقتصادي للأعمال المشورة، بينما الحق الأدبي مرتبط بالإبداع ذاته.

    كما أن الملكية الفكرية لا يعتمد بأي شكل من الأشكال على كون البرمجية أو الخدمة التي استخدمتيها في النشر (blogger.com أو غيره) مجانية أو غير ذلك. و عموما أظن رخصة استخدام blogger.com تتضمن ما يشير صراحة إلى أن المحتوى المنشور هو ملكية ناشريه من مستخدمي الخدمة.

    و أنا و إن كنت أتفق مع الرأي الداعي إلى أن النشر الهدف منه هو زيادة معرفتنا الجمعية و بالتالي فالتغاضي عن السرقة الأدبية هو مسلك محمود، فإن الأمر - و موقفي - يتغير عندما ندخل عاملا آخر هو أن قضية الحجب الهدف منها التغطية على السرقة الأدبية التي وقع فيها المدعي و ترهيب من ارتُكبت السرقة الأدبية في حقهم. كما أن الأمر يتخذ بعدا آخر عندما تأتي السرقة الأدبية ممن لا يكل و لا يمل في كل مؤلفاته، سواء الكتاب موضوع القضية التي بين أيدينا أو ما سبقه، من أهمية الأمانة العلمية و أخلاق النقل الأمين، و وجوب الإشادة بالمؤلف الأصلي، و يحذر و يتوعد مرارا و تكرارا من يتجاوز ما نقله بضع كلمات بالويل و الثبور في الدنيا و الآخرة مستشهدا بالقانون و العرف و الدين! فأن يأتي ما ينهى عنه…بعد كل هذا، هو أمر مستهجن. ولا بيتهيأ لي! و هي ليست المرة الأولى التي يأتي فيها المؤلف/القاضي بمثل هذه الفعلة على ما يبدو.

    هناك أيضا قضية أخرى شديدة الأهمية، تساوي في أهميتها في رأيي إتيان القاضي ما ينهى عنه، و هي أن هذا اللدد الفظيع في الخصومة و تعمد كيل اتهامات قاسية جدا و بشكل مبالغ فيه يعلم المُدعي أن أصحاب تلك المواقع أبرياء منها (في حالة المدونين الافراد)، أو أن يعضهم لا يجوز اتهامهم بمثلها أساسا لأن عملهم هو نقل للأخبار (مثل وكالة الأنباء)، و كذلك الجمع الجزافي بين أطراف مختلفين و تعمد طمس الحقائق و تشويه الوقائع في الدعوى لأجل التمويه على الهدف الأصلي للقضية و هو طمس السرقة الأدبية، هو سلوك لا ينبغي أن يصدر عن مواطن شريف و بالتأكيد لا ينبغي أن يصدر عن قاض.

    تزداد أهمية هذه النقطة إذا كنا من المنادين بسلطة قضائية مستقلة قادرة على مراقبة ذاتها و تطهير ذاتها ممن هم ليسوا فوق مستوى الشبهات في مسلكهم.

    تعلمين كذلك، ما لا يعلمه أي من المعلقين هنا، من أن النقاشات التي جرت للتفكير الجماعي لم تكن فيها ضغوط من أي طرف على أي طرف لاتخاذ مواقف، حتى الشبكة العربية ذاتها لم تكن قررت موقفها مسبقا. الحكاية مش أن أنت "بنت غلبانة" في وسط شبكات و مؤسسات جبارة ستبيعك عند اللزوم! ما فيش حاجة أساسا زي أنك "توكليهم فيشتموا باسمك". هناك أيضا أشخاص آخرون، شباب مثلك، مواقعهم مدعى عليها، و آخرون من المهتمين بالموضوع و ليسوا أطرافا فيه بأي شكل، و تعرفين بعضهم إلى حد يجعلك تثقين في أنهم لا يحاولون استغلالك.

    و تعلمين كذلك أن تلك النقاشات لم تُبحث فيها و حسب أخلاقية الخطوات المزمع اتخذاها لإدارة الموقف و لا كيفية تناوله، بل أيضا أخلاقية التشريعات التي سيُلجأ إليها، لأن جل أطراف هذا الموضوع هم من المؤمنين بالحريات عموما، و حرية التعبير خصوصا و يهمهم أن لا يلجأوا إلى قوانين سيئة السمعة هم أنفسهم يطالبون بتغييرها حتى لو كان في ذلك تفوقهم القانوني، و لن يخالفوا عقيدتهم في هذا الشأن لأجل كسب هذه القضية أو أي قضية غيرها.

    تحياتي، و أشكرك أنك بتدوينتك هذه أتحت لي الفرصة لأوضح رأيي في هذه القضية.

    ReplyDelete
  38. vbnبصي يا بنتي انتي واحدة مابتعمليش حاجة غلط انتي بتعبري عن رأيك(إلا اذا كان دة غلط)ومدونتك عمرها ما كان فية حاجات من الكبيرة دي (قال ارهاب قال، بنت مصرية سبحانك يارب)انتي كمان بتساعدي ناس كتيرة انها تعبر عن رأيهاو عن نفسها زي أنا مثلا اتعلمت منك .الكلام ده كلة محتاج قاضي بيفهم وعندة ضمير عشان يتأكد من الكلام دة وخلاص ويتحكم لك علطول بس لازم برضة يكون معاكي محامي عقر زي حسن سبانخ احتياطي بس
    وربنا يوفقك

    ReplyDelete