7/13/2007

شاركوني انبساطي.. قالوا عليا كلام حلو

احم
انا مكسوفة، وشي احمر خجلا وحياءا وكسوفا.. جدا جدا جدا
اصلهم قالوا عليا كلام حلو :)
هما مين دول؟

Bloggers Times
جريدة إلكترونية مهتمة باخبار المدونين
انا فوجئت بصراحة، فوجئت بالجريدة أصلا، وفوجئت انهم كتبوا تقرير عن بنت مصرية، وفرحانة.. ماخبيش ولا انكر يعنى :)

فى التدوينة اللى فاتت حد منهم ساب لى تعليق وقاللى اروح ابص هناك، الكلام ده من شوية صغيرين.. روحت وقريت. لفت نظري فى الاول شريط الاخبار التحفة اللى بيعرفني اخبار المدونين، ودى حاجة اعتقد انى كنت محتاجاها جدا لانى مش بقيت بقدر اتابع بنفسي وعايزة مصدر يجمع الااخبار على قد ما يقدر

عندهم مجمع وكمان ابواب مميزة، يمكن عشان اول عدد فالموضوع مش زحمة اوى ودا كويس جدا في رأيي، البداية الهادية واللى بتركز على كام باب صغيرين وبعدين الموضوع يكبر واحدة واحدة

بس انا مبسوطة
ومتشكرة فى نفس الوقت انهم خللونى اتبسط كده، فعلا يا ولاد الكلام الحلو حلو :))) بيبسط ويشرح القلب ويخللي الواحد افضل حالا

ليه؟؟

اه ما هو وقته الاسئلة من نوعية ليه وعشان ايه... لو مسألتش نفسي انا مبسوطة ليه مابقاش زيزي.. ومع ذلك هجاوب، مبسوطة عشان فى ناس عيونها شايفاني كده، ان فى ناس وصلهم اللى انا اقصد اوصله، ودى حاجة احمد ربنا عليها
ومخليانى كمان متحمسة انى ماقفلش المدونة، وانى اخلص تصميم المدونة الجديدة عشان انقل بأه على السيرفر الخاص بيا

هو انا ماقلتلكوش، اى حجزت مساحة ودومين وبقالي بتاع شهرين عايزة انقل بس مش لاقية وقت :)

المهم، دا لينك المقالة :
إذا شممت رائحة البتنجان والطبيخ المصري لا تتعجب.. بنت فعلا.. مصرية
احم، عنوان لاذع شوية :)

طيب خليني اتلامض شوية واقول، يا جماعة هو كله شكر شكر مافيش نقد؟ كشف لسلبياتي؟ تخلوني اخد بالى من عيوبي اللى مش شايفاها، او اللى شايفاها ومطنشة اغيرها،
عموما دى نصيحة للاعداد اللى بعد كده، انما خلاص المقالة دى اتصادرت خلاص
:D


صحيح، انا مش اسكندرانية، ولو انى كنت اتمنى

19 comments:

  1. بجد انا مش مصدق نفسى يا زينب
    أولا انتى يمكن مكونيش عارفانى اوى .. انا محمد حمدى .. انتى نشرتى قبل كدة تدوينه عن موضوع تعليم التدوين بالفيديو .. وكنت انا برضو الى عامله .. وانتى ساندتينى جدا يوميها وكنتى سبب ان ناس كتيرة تابعت الفيديوهات بتاعتى واستفادت ولحد النهردة بتبعت تقولى أن أحسن قسم عندى هو تعليم التدوين بالفيديو

    والنهردة انتى برضو بتساندينى بكلامك عن مجله بلوجرز تايمز .. انا الديزاينر والكاتب الوحيد فيها لحد دلوقتى , وفعلا كلامك صح .. انا تبع مدرسه انى ابدا باقسام قليله يكون فيها الشغل قوى ومنفرد احسن مبدا بحاجات كتيرة ضعيفه

    أما عن الكلام الى انا كتبتو عنك فا مفيش اى داعى للشكر عشان دى الحقيقه .. انا واحد من الناس الى بدأم حياتهم فى قراءة المدونات ليكى انتى ومنال وعلاء وكدة ... ومع التوسع فى القراءة حسيت انك بجد واخدة خط وسط .. لا انتى مدونه متشددة دينيا ولا انتى مدونه فاتحاها على البحرى ... وبجد حسيت انك احسن تعبير عن البنت المصريه العاديه المعتدله .. عشان كدة يوم مبدات بالكتابه عن مدونين ملقتش أحسن منك أبدأ بيه عشان أحدد ان أنا كمان أتجاهى وسطى ...

    وكل الى قلته كان بعيد عن اى تحيز شخصى عشان ببساطه انا معرفكيش شخصيا ومجمعناش أى ماسنجر قبل كدة , وكل محاولات التواصل الشخصى معاكى فشلت , ودة كان سبب تانى انى اكتب عنك انى مكتبش عن صحابى عشان محسش أنى منافق ...

    أتمنى فى النهايه تكون المجله الى عملتها حاجه تغير فى الوسط التدوينى وتقدم للمدونين او حتى الصحفيين صورة حقيقيه وكامله عن المدونين .. وكل دة فى مكان واحد بدل ميروحو كذا سايت ..

    وشكرا ليكى على دعمك .. وياريت تكملى جميلك تحطى البانر بتاعنا عندك عشان تبقى دعايا علطول فى واحدة من اكبر المدونات الى تقريبا الكل متابعها

    سلام

    محمد حمدى

    mohamedhamdyonline@gmail.com
    mohamedhamdyonline@yahoo.com
    specialist_man@hotmail.com

    ReplyDelete
  2. الف مبروك يا ستى
    ومبروك كمان مره على المساحة والدومين
    السلام عليكم

    ReplyDelete
  3. لو عالسلبيات استني بوستي الجاي عشان مرور سنة عالتدوين هاكتب كل واحد بسطني في ايه ودايقني في ايه
    بس والله وحشني بلوجك اوي بقالي كتير ماجيتش
    او انتي اللي بقيتي تكتبي اسرع

    ReplyDelete
  4. الف الف بركه
    اجمل احساس فى الدنيا ان الانسان يشعر بالنجاح وانه وصل لحاجه هو عايزها
    ربنا يوفقك وتكونى دايما ناجحه فى كل مجالات الحياه
    وتحياتى

    ReplyDelete
  5. انا من فترة كنت اتمنيت لكي انك يبقى عندك اسم النطاق الخاص بيكي
    أفتكر في عيد ميلادك
    يبقى ربنا استجاب لأمنياتي
    ومقابل تحقق الامنية دي بقى مطلوب منك تعلميني ازاي اعمل مدونة على اسم النطاق الخاص بيا
    :)

    ReplyDelete
  6. ايتها البنت المصرية الشقية شئ طبيعى بعد كل المشاغبات وبتاعتك تبقى رائدة فى عالم التدوين مبروك كلنا فرحنا ليكى ويكفى انك اول من علمنى ما هو التدوين وهذا جميل احمله لكَ فى رقبتى . أختى و استاذتى ...أتمنى منك زيارة مدونتى المتواضعة والتى كان لك شرف المساعدة فى ظهورها
    haneeni.blogspot.com
    احلام صغيرة - مبروك مرة تانية و فى انتظار زيارتك و رأيك
    حازم شلبى

    ReplyDelete
  7. الف الف مبروووووووك
    بقيتى مشهورة والجرايد بتكتب عنك

    بجد كلام كويس وليكى حق تنبسطى

    نسأل الله الاخلاص بقى

    ReplyDelete
  8. و الله انا سعدت جدا بهذا الخبر
    انا قريت لك مره ان الميدان سرقت منك مقال و نشرته دون اشاره لمصدره
    اليوم انا فرحت لك
    انا غايب عن المدونه بقالي كام بوست و فرحت اني جيت علي هذا الخبر
    الف مبروك

    ReplyDelete
  9. مبرووووووووك
    انا فرحتلك جدا. الله لا يحرمنا منك ومن كلامك

    ReplyDelete
  10. هاى زوزو وخلى بالك من زوزو يمكن الناس عارفاكى اكتر ما انت عارفه نفسك وممكن المجهود اللى عملتيه فى ا ب ي تدوين ارشد ناس مبتدئه كتير حتى انا عملت بوست خاص عندى اشكر معلوماتك المفيده واشكرك بالاسم ابقى اتفضلى اشربى شاى واريه ومبروك يافمر

    ReplyDelete
  11. لولولولولولولولوي
    مبروك 3 تلاف مبروك
    ألف علشان المساحة والدومين
    وألف علشان الموضوع اللي اتكتب عنك
    وكمان ألف علشان انتي أول مدون يتكتب عنه (لاحظي صيغة المذكر)
    وعقبال كل المدونين لما يبقى عندهم مساحتهم ودومينهم والناس اللي بتتكلم عنهم.

    ReplyDelete
  12. فعلاً مدونتك مميزة

    ابقي زوري مدونتي

    http://cu.ueuo.com

    ReplyDelete
  13. ميرسي يا جماعة على تعليقاتكم الجميلة
    :)

    محمد
    ابعت لى بانر وانا احطه عندى فى السايد بار
    وموضوع التواصل معايا دى مش مشكلة يعنى،الي عايز يلاقينى هيلاقيني
    :)
    ----

    عربي
    انا كمان وحشني تواجدك يا احمد :)
    عملت ايه فى الثانوية يا زعيم؟
    ----


    شدو
    انا حجز مساحة من عمر زميلي فى الشغل،وهو بردو اللى حجز لى الدومين،والمفروض بحط نظام ادارة محتوى اسمه دروبال واعمل له ديزاين وابتدي ويبقى سايت :)
    ممكن تعرف عن دروبال هنا
    drupal.org

    يمكن فى المستقبل ان شاء الله لما انقل للمدونة الجديدة اعمل حاجة بتشرح الموضوع ده
    قول يا مسهل

    ReplyDelete
  14. bgad alf mabrooooook

    blogek gamed moot w isa el site hayb2a agmad

    ReplyDelete
  15. الف الف مبروك يا فندم على هذه المكانه
    وعقبال السايت يارب

    وادعيلنا كده نقدر نحسن من مدونتنا
    هي على قدها كده يعني بس زي مابيقولو اول السيل قطرة

    هو يمكن فكرة مدونة لأسرة جامعية دي غريبة الى حد ما بس يارب تنجح يارب

    من حمزه مدون أسرة النور بكلية
    الصيدلة جامعة القاهرة

    اه بالمناسبة نسيت اقول لحضرتك جزاكي الله خيرا على مدونة -ا ب تدوين - عايزين بقى السايت يكون فيه حاجات من دي كتيييير (:

    ReplyDelete
  16. انا قريت اللي اتكتب
    بالفعل يحق لكي انت تفخري بنفسك
    ففي وسط هذا الخضم الهائل
    من البلوجرز
    تلاقي بنت مصريه بتطل براسها وتقول انا اهه

    شيئ جميل


    مبرررررررررررررررروك



    على فكره جمهوريه اسكندريه عامله اليومين دول طلبات هجره الحقي روحي وخدي الجنسيه
    ههههههههههههههههه

    تحياتي

    ReplyDelete
  17. السلام عليكم

    اولا اود ان اقد لك جزيل شكر للمعلومات القيمة حول كيفية تصميم مدونة وعن كل التعليمات القيمة التي وضحتها

    ولكن هناك سؤال اتمنى ان اجد اجابته لديك وهو

    عند وضع اغنية اتمنى ان تعيد نفسها تلقائيا

    يعني انا حطيت اغنية بس للاسف لما تخلص لازم انا اشغلها من جديد انا عايزها تعيد نفسها تلقائيا

    ولك جزيل الشكر

    ReplyDelete