7/22/2007

ولكن الله سلم

يعني دلوقتي لو حصل لا قدر الله تفجيرات ارهابية فى المترو، هتطلعوا فى التلفزيون تقولوا انكوا عملتوا اللى عليكو، بس سهم الله نافد؟؟

انا بركب كل يوم المترو.. كل يوم يعني كل يوم.. من محطة كلية الزراعة لمحطة البحوث، عساكر موجودين قصاد سلالم/ابواب المترو كل يوم، عند محطة كلية الزراعة في بوابة كهربية - اللى بتصفر دي لما تعدي منها بحاجة معدن - والبوابة بتشتغل، شنطتي بتتفتش كل يوم مرتين،

حلو كده؟ جميل؟ الجميع يعمل.. التأمين جيد.. والصورة مثالية؟

طيب قرب كده شوية، زووم ان، بص ع التفاصيل

فى محطة كلية الزراعة، شنطتي اللى بتتفتش كل يوم، بيحسسوا عليها من بره ويبصوا بصة عابرة كده لما بفتحها، اصلا بفتحها نص فتحة وهى غامقة من جوه مايبانش اى حاجة منها،
مرة واحد شايل شنطة ضخمة كده وجه عشان يفتحها، العسكري قال له، عدي، باين عليك مالكش فى حاجة - دا على اساس ان الارهابي الى هيفجر المترو المفروض يكون باين عليه انه هيفجر المترو؟ يكون شكله ازاى مثلا؟؟ لابس تيشرت الحرامي المخطط زي افلام انور وجدي؟ وللا لابس لبس الافغان زي ابيه اسامة بن لادن؟

البوابة اللى بتصفر، المفروض يعني اللى يعدي منها يعدي وهو مش معاه اى معدن عشان البوابة متصفرش، بس اللى بيحصل ان كل الناس بتعدي بكامل متعلقاتها، والبوابة بتصفر طول الوقت، ولا كأن ليها لزمة

في محطة البحوث، بلاقي واحد او اتنين واقفين على باب المترو، احيانا يكونوا عساكر او يكونوا لابسين مدني، طبعا بتشكك لما يكون لابس مدني، بيفتشوا الشنط بنفس الطريقة ، بس لو عدد الناس كتير يسيبوهم يعدوا، واحيانا مش بلاقي حد واقف على باب المترو اصلا

طيب ليه الاهمال؟ انتو قررتوا تعتبروا ان التهديدات دى جادة وقررتوا تأمنوا المترو بالطريقة دي.. طيب ليه باه دا مابيحصلش بضمير؟ وللا اصلا انتو مش مصدقين ان التهديدات دى ممكن تحصل، بس بتعملوا شوية حركات عشان الرأي العام او المنظر العام؟ وللا انتو اتعودتوا ما تعملوش شغلكوا صح؟

18 comments:

  1. تقصدي ان فيه تفتيش يومي للشنط في مترو الانفاق دلوقتي؟
    !!

    ReplyDelete
  2. انا بصراحه لو جيت اركب المترو وحد جه يفتشنى ممكن اعمل معاه خناقه هو ايه اللى يفتشنى دا هى هيصه ولا ايه هيعدوا بقى يتلككوا على خلق الله ويقرفوا فى الناس والواحد بيكون اصلا اما مستعجل او حران
    دا فى السودان يا عالم لما كنت فى السودان السنه اللى فاتت كانت الاماكن اللى عليها قلق بيجيبوا فيها جهاز تعدى منه ويظهر على الكمبيوتر كل محتويات اللى فى جيبك وشنطتك ونوعية المعادن وسمكها ونوعية الميديليات وهل فى متعلقات ممكن تجرح وكل حاجه حتى كيس المناديل كان بيظهر
    تخيلوا دا فى السودان
    ومن غير ما يقولى افتح الشنطه واقلع الحزام

    تحياتى

    ReplyDelete
  3. يبقي انت اكيد في مصر
    وتحيا مصر يا عم

    ReplyDelete
  4. هتعملوا إيه في موضوع طارق كامل الحرامي اللي هيسرق الإنترنت بتاعنا

    هممم؟؟؟

    هنمصمص شفايفنا؟

    ولا هنتحرك؟

    فيه ناس بدأت تتحرك من النهاردة

    http://tozziyat.wordpress.com/

    لو ما قولناش لأ المرة دي عمرنا ما هنعرف نقولها تاني

    ReplyDelete
  5. شدو

    بالضبط يا صديقي
    :)
    ----

    حزين
    هاتتخانق..هتتشد
    وعيش بأه
    ----

    شيري
    اكيييييد

    ReplyDelete
  6. ياستى ماتشغليش بالك
    كل اللى انتى بتقوليه ده مجرد روتين
    احنا حكومتنا مابتتحركش الا بعد مايحصل كارثه
    لكن لا يمكن نامن على اى حاجه من بدرى ولوحصل كده يبقى انت اكيد مش فى مصر

    ReplyDelete
  7. والله انتو غريبين اوى
    يعني لو ماكنتش الثغرات دي موجوده .. اومال الانفجار يحصل ازاي ؟؟ و الوزير يطلع تاني يوم يقور تبريراته ازاي .. مينفعش كل حاجه تكون تمام و ميه ميه .. احنا معدناش في عصر الجريمه الكامله .. لابد من وجود خروم و رقع لزوم حدوث المصيبه

    ReplyDelete
  8. سيبك من ده كله، لو العسكور الأمور إللي بيفتش لقى القنبلة، أصلاً مش معاه القوة المناسبة لإتخاذ اللازم.. يعني بجد أنا مش عارفة هيعمل إيه مع إرهابي مدرب

    ReplyDelete
  9. يعنى انتم مش مكفيكوا انهم قاعدين فى الشمس
    كمان عايزينهم يشتغلوا بضمير
    دا حتى يبقى حرام

    انا مش عارف لحد امتى التهاون دا

    ReplyDelete
  10. الأخت المحترمة / بنت مصرية
    الموضوع قيم وحيوي مفيش شك
    طريقة تناولك تدل على قصر نظر - عفوا - دا رأيي الشخصي. أرجو أن يكون إختلاف وجهات النظر لا يفسد للود قضية. فأنا مصري وموحد بالله وعمري يقترب من الأربعين وعند العبد لله خبرة وفي نفس الوقت الموضوعية.
    ---
    التلفزيون تقولوا انكوا عملتوا اللى عليكو، بس سهم الله نافد؟؟
    - مش بعيد يقولوا كدة إذا لاقدر الله حصل.

    - الشنطة إنشاالله تتفتش عشرين مرة أحسن من التفويت لأن الأصل الأمان أولا والكلام دة في أوروبا والدول المتقدمة أيضا وراجعي ورايا لو عايزة.
    طبعا هناك التعامل مع المواطنين غير وحقوق الإنسان بل والحيوان أيضا في قمة أولوياتهم بل ومن ركائز حياتهم كالماء والهواء واحنا قدامنا طريق طويل عشان نحصلهم.
    - موضوع التفتيش بالتحسيس أو حتى بالنية يحتاج مواطنين في مستوى تدريبي وثقافي ونفسي معين صعب أن يتوفر لدينا مش عشان احنا حمير بس ولكن الأهم من كدة ان الحمار فاكر نفسه ذكي ولا نابليون ومتعلم ولا زويل وفنان ولا مارلون براندو وهذه يا أستاذة عين وكستنا اللي هية أكبر من المحيط الهندي.
    - أما موضوع الشبة والشكل أعتقد والله أعلم إن عندهم مواصفات ممكن يشكوا فيها غير اللي حضرتك إتفضلتى به مثل اللبس ولون البشرة وطريقة المشي وطريقة حط التذكرة والكلام وحاجات كتير ليست عشوائية ويمكن المخابرات أن تحددها. فمثلا مش معقول واحد شكله من بولاق ولابس جزمة شكلها من على العربيات في العتبة أن يتم تفتيشه.
    - البوابة اللي بتصفر ممكن استخدامها في ظروف معينة استثنائية مثلا مش على طول الخط وخليها تصفر يا ستي متضايقة من إية؟
    - موضوع عدد الناس الكتير له طريقة إدارة أيضا.
    - موضوع الضمير علاقته الوثيقةالوحيدة باللي بتقولي علية هي تطبيق الأوامر والمواصفات المأمور بها فقط , وبعدين إنتي زعلانة لية على الضمير دي مشكلة عامة وربنا يستر لأن الموضوع جد خطير فالعسكري وأمين الشرطة برواتبهم الهايفة والله ربنا يعينهم
    ---
    عفوا ما تزعليش - اللي يبص على موضوع لازم ياخد في حسابه جميع الزوايا
    --
    أنا باكتب الرد ده بقالي كتير - تقريبا من أول ما جيت الشغل الصبح بس ما فضيتش عشان أكمله إلا بعد فترة طويلة
    مع أرق تحياتي
    إيهاب

    ReplyDelete
  11. شموسة

    صدقتي يا اختى :)
    ---


    يعني يا استاذ ايهاب
    كان ممكن تقولك رأيك دا كله من غير ما تقول كلمة زي "عندى قصر نظر" دى، يعني ايه لازمته الشتيمةو التهزيق؟ والمفروض باه ارد على حضرتك واتجاوب مع تعليقك على اساس انه كلام يستحق المناقشة بعد ما بتشتمني؟

    بيتهيئلي لو حضرتك قريت التعليقات اللى سبقتك هتلقي حد كاتب ان فى جهاز محترم بتتمرر من خلاله الشنطة وتتفتش صح ،مش عشوائيا زي مابيحصل

    معلش باه النقطة بتاعة التفتيش بالتحسيس تحتاج مستوى تدريبي؟ايه الجملة دى اصلا؟ يعنى تبع ايه؟؟ وبعدين هو انا مش شايفة هما مين اللى يفتشوا وازاى بيفتشوا؟ صلي ع النبي دا شكلهم يقطع القلب،اكيد شفت زيهم كتير لو بتشوف عساكر امن مركزي

    ثالثا مواصفات ايه اللى عندهم يخللوا واحد يعدي وواحد تاني لأ، ما كلنا شبه بعض، واللى عدى ده فيه مية غيره شبهه وعدوا، وبعدين اذا كده يبقى انا اولى يعديني

    واخيرا انا معنديش اعتراض ان البوابة تصفر، اقرا تاني الكلام اللى انا كتباه انا بتكلم انها بتصفر عمال على بطال من غير ما يخلوا الناس تخلع متعلقاتهم اللى بتخلي البوابة تصفر ويمروا تاني لحد ما يتأكدوا، دا مابيحصلش، يبقى ضمير ايه باه اللى بنتكلم عليه

    ReplyDelete
  12. hالمحترمة / بنت مصرية:
    أولا لازم نتفق على إن إختلاف وجهات النظر لا يفسد للود قضية.
    كمان الموضوعية هي المحرك للمصداقية.
    وبعدين يا ست الكل أنا معجب بالبلوج بتاع حضرتك وماقصدش أي إهانة لاسمح الله
    دائما محسوبك ينأى بنفسه عن لغة الحوار المتدنية, وإذا شايفة إنها شتيمة فأنا آسف ولم أقصد حاكم أنا صعيدي ويمكن ينوبك شوية دبش بس والله القلب مافيهوش حاجة والنية كمان واطمني من الناحية دي.
    انا لا أقرأ جميع التعليقات فقط آخد فكرة وكويس قوي إني باكتب رد ودا نادر مش عشان حاجة بس عشان أنا مشغول جدا وعندي مسئوليات والتزامات في العمل.
    شكلهم يقطع القلب عشان رواتبهم في الطراوة وكمان الدولة مش مهتمة بهم إذا كان المهندس والدكتور واخدين على قفاهم ..
    الحقيقة أنا مش باتكلم على التحسيس تحديدا ولكن باتكلم على أسلوب التفتيش وتنفيذه يحتاج تدريب وثقافة وحاجات كتير موجودة عندنا بس نسبتها ضعيفة.
    أنا بقعد لفترات طويلة ما بشوفش عساكر عشان باعمل خارج مصر.
    حتة مواصفات اللي يعدوا وما يعديش دي محتاجة تدقيق ودليل قبل ما نقول إنهم - عفوا - معفنين أو متخلفين,
    الحقيقة يمكن بياخدوا عينات عشوائية وبتيجي فيكي لاجل بختك !!
    على كل حال زي ما قلت لحضرتك الأمان أولا ومعلش يا ستي , أنا بقولك أهو وأنا راجل ماافتكرش حد وقفني وفتشني لما كنت باشتغل في مصر ولو حد فتشني مافيش مشكلة عادي إيزي يعني إيه المشكلة الراجل بيأدي واجبة ووالله أنا مش حزب وطني بس لازم نحط نفسنا مكان اللي قدامنا حتى لو كان لامؤاخذة من الزواحف.
    ولك التحية والتقدير
    إيهاب

    ReplyDelete
  13. lol, ana barkab el metro kteer w ma7adesh beyfatesh wala fe 7ad wa2ef aslan !!

    bs bgad ay kalam....mafeesh 7aga f masr esmaha amn
    masr aman awy 3ashan el nas aslan 3'alaba la 7ad beyhesh wala beynesh

    ReplyDelete
  14. أنا ممتنع عن المترو بقالى فترة
    المشكلة مش ف التفتيش
    المشكلة ف إحساسى إنى متراقب ومشتبه فيه
    ــــــــــــــ

    ملحوظة
    مدونتك عاجبانى جدن
    تحياتى يا فنانة

    ReplyDelete
  15. طبعا التفتيش صوري
    ومالوش اي معني

    انا كنت نازل المترو ومعايا هاني وعبد المجيد
    وهاني معاه شنطة وانا معايا شنطة
    تطوعت اني افتح شنطتي يفتشها
    مبصش اصلا فيها
    عشان انا راجل محترم وتطوعت بالتفتيش
    وقلتله ما تفتش صاحبي كمان

    مش فاكر قال ايه
    بس كان معن الكلام
    خلاص يا باشمهندس
    توكل علي الله

    بس كدة
    :)

    يعني الامن تمام وكله عال العال

    انا مع التفتيش
    لان دي حماية للكل
    انا مش عاوز المترو يضرب والناس تموت
    عشان فيه مجانين فاكرين انهم بيرضوا ربنا
    او عشان فيه ناس مرتزقة شغالين لحساب اي جهة بيظبطوا حسابات سياسية

    مش فارقة
    بس اللي بيحصل ده
    مش تفتيش
    ده تهجيص

    ReplyDelete
  16. I agree with every word you said.
    very nice article
    great blog too
    I will be a regular reader

    ReplyDelete
  17. يا ستى انتى عاملة مشكلة لية ما هى الحكومة هتعمل اية ولا اية هتموت نفسها ماهى غرقتنا فى العبارة وولعت فينا فى القطرات وبا عتننا با الخصخصة قامت تعبت وقالت تسيب القاعدة تساعد فى اى حاجة هو كل الشغل هيكون من الحكومة دة حتى يبقى حرام نتعبها معانا ولكى اللة يا مصر

    ReplyDelete
  18. ازيك يا بنت مصريه كل سنه وانت طيبه وبصحه وخير
    ورمضان كريم انا من شهور كتير كنت بعتلك شويه اسئله كانت هتساعدجني اطلع حاجات كتير جوايا ومش بعيد لو كنت جاوبتني او ممكن تكوني فعلا جاوبتيني وانا ال مش لاقيت الرد كنت ممكن اكون عامل بلوج كبير اوي
    بس يالا الحمدلله عندي لسه امل اكتب واكتب واكتب لاخر نفس
    انا داخل بالصدفه وقريت الموضوع ال كتباه دا
    بحييكي عليه و بحييكي علي ايجابيتك الملحووظة وخوفك علي كل حاجه مهما كانت في عيون الناس بسيطه واهي حاجه وهتعدي
    واحنا لازم نتعامل مع المشكله دي بسلبياتها وبامكانياتها
    يعني ممكن واحد كان يقول طيب ما يطوروا نظم التفتيش مثلا
    انت عارفه ان الجهاز دا كدا كدا بيصفرفي بعض الاوقات لما بيكون مش شغال بيصفر
    بس لما بيبقي في حاجه خطر بيصفر بطريقه تانيه بس في مصر ربنا ال بيسترها علينا
    الحمدلله
    هو انا من المنصوره بس ياما بركب المترو وبدخل الحتت الضلمة ال تحت بترعب يعني من غير قنابل
    بس موضوع التفتيش دا صعب اوي اوي تخيلي كام الف مليون واحد بيتفتشوا وال بيفتشهم كام عسكري و الناس كمان بنتبقي زهقانه لما تمشي ساعتين من محطه لمحطه تانيه هتدويهم مكان بعيد عنهم دقيقتين
    فاكيد الموضوع هيتعب الطرفين عشان كدا نقول يارب استرها علينا يارب ونعمل ال علينا ونروح للعسكري ونقوله يا عم فتشنا ففتش
    ربنا يكرمك يارب وياريت الاقي ردك
    montana master of love
    www.givns.com

    ReplyDelete