1/07/2010

على خلفية أحداث نجع حمادي

النهاردة كان المفروض اتصل أو ابعت sms لأصحابي وأصدقائي من المصريين الأقباط عشان أعيد عليهم. بس لما صحيت، وعرفت اللي حصل اتنكدت.

تخيلتهم وهما خارجين من الكنيسة مبسوطين وفرحانين وآمنين وفجأة بيتعرضوا لهجوم وحشي وبيتقتل منهم سبعة.

والنتيجة الطبيعية إن العيد النهاردة مش هيبقى فرحة،. وبعدين خبط في دماغي... ازاي هتصل بيهم واقولهم كل سنة وانتو طيبين؟ المفروض اتصل اعزي؟؟

ومين يعزيني؟

حاولت احلل انا ليه مش قادرة اتصل واقول كل سنة وانتو طيبين، لقيت إني مكسوفة! وكأني بشكل ما بتربطني صلة بالقتلة!

صلة ايه؟ دول لا مسلمين ولا يعرفوا معنى الإسلام، ولا مصريين ولا يعرفوا معنى الوطن، ولا بني أدمين ولا يعرفوا معنى الإنسانية.. دول أعدائي وأعداء ديني واعداء بلدي وأعداء إنسانيتي

أنا مصرة إن دي مش ممكن تكون طبيعة المصريين، انهم يقتلوا في بعض كده! أيوه بقول "في بعض"، ﻷننا كلنا واحد، كلنا من بعض، مسلمين ومسيحيين، غصب عن أي حد كلنا مصريين وكلنا بني أدمين وكلنا لينا حق الحياة والأمان اللي كفله ربنا لينا، قتل النفس اعتداء على حرمة ربنا -معروفة دي- وإذا كان في بعض المختلين عقليا -مش المختلين ماركة وزارة الداخلية- انما المختلين اللي مايفهموش لا دين ولا أخلاق ولا ادب، المجرمين اللي بيستفيد من وراهم النظام ويكبر اكتر ويتضخم اكتر ويطبق على نفسنا اكتر واكتر.. الله يحرقكوا في نار جهنم، الله يحرقكوا بنار جهلكم وغباءكم وقسوتكم.

17 comments:

  1. شكراً لك، بعض العزاء يأتي من مثل هذه المواقف الإنسانية في وقت تكاد تختفي فيه الإنسانية

    ReplyDelete
  2. على فكرة انا مسيحي بس سورى انت بتفكرى غلط لانك بتربطى نفسك بالقتلة لانهم من نفس دينك و ده معناه فكر طائفى
    هى دى مشكلتنا الحقيقيةدايما بنقسم التاس طوائف

    ReplyDelete
  3. ودا اللي خلاني راجعت نفسي، رفضت تماما وعن وعي كامل اربط نفسي بيهم

    ReplyDelete
  4. عزيزتى بنت مصرية: أشكرك لأنك عبرتى عن خالص تعازى المسلين فى مصر لأخواننا المسيحين وأكيد الجريمة دى لشخص مريض لايعبر عن كل المصريين وأشكرك دائما على تناولك لموضوعات هامة نتكلم ونعبر فيها عن أحداث حياتنا

    ReplyDelete
  5. احباء المسلمين احنا عمرنا ما قولنا انكم وحشين ولكن هناك البعض ان كان من رجال الدين او من المتعصبين او المختبئين فى ستارة الدين هم من يجب ان يحسبوا على ما فعلوا ويجب على الحكومة سرعة التصرف غى هذا الموضوع لان كدا كتير مفيش رد سريع وعلى فكرة انا ساكن فى بيت يتكةت من 8 شقق مفيش غير اتنين مسحيين انا و واحد تانى والصراحة احنا عيشين ومرتحين وكل يوم عيد نعيد على بعض وساعات نخرج مع بعض الحكومة هى اللى سابت الحبل للناس اللى انا ذكرتهم بالاعلى وشكرا على احساسك الانسانى

    ReplyDelete
  6. تفتكري اية الحل بعد الحوادث المتماثلة المتكررة اللي بقيت شئ عادي في حياة المسيحين, و التاريخ يشهد بكدة, تفتكري المسيحين حاسسين باية دلوقي؟

    تفتكري انا كشخص مسيحي المفروض اني بتمني اية يحصل لمصر؟

    انا مش قادر اعمل حاجة غير اني اطلب من ربنا انه يرد المظالم, هو اللي يقدر يتصرف

    "الرب يدافع عنكم, و انتم تصمتون"

    ReplyDelete
  7. اختنا بنت مصرية نشكرك على شعورد المرهف وحتلاقى ردى هنا
    القبض على سفاحى نجع حمادى وتساؤلات للحكومة http://christiansforever-alraga2.blogspot.com/2010/01/blog-post_09.html

    ReplyDelete
  8. ربنا مع اهالى الشداء يصبرهم ويعزيهم واكبر دليل على صدقهم ظهور السيده العذراء عقب الحادث

    ReplyDelete
  9. الى اخواننا المسيحيين نحن اخوة فى الوطن ودعونا نتحدث بالمنطق ونترك موضوع الدين الى من بتحدثون عن الاطهاد وبالاخص فى نجع حمادى بلدى المسيحيون فى نجع حمادى قبل الحادثة كانو يمارسون كل حقوقهم بكل حرية بدون اعتراض من احدث بل اصبحوا هم من يستفذون المسلمين وتطور الامر بالاعتداء على بناتهم فى حادثة وتالية واخرى ماذا تتوقع من المسلمين بعد ذلك ماذا تتوقع من يغير على عرضه وشرفه والله لم يحظى المسيحيين بحرية كالتى مارسوها عندنا فى نجع حمادى كونو ثروات واصبحو من اصحاب رؤوس الموال الضخمة وبنو الكنائس الفخمة العالية قلى بالله عليك اين يحظى الاقليات المسلمة بهذه الحرية ف سويسرا التى منعت بناء المآذن ام فى الدنمارك التى اساءت للرسول وما حدث بكم ماهو الا نتيجة لانتهاككم اعراض المسلمين ابتعدو عن اعراضنا والا ؟؟؟؟؟؟؟؟؟؟؟؟؟؟؟؟؟؟؟؟؟؟؟

    ReplyDelete
  10. فعلا شيئ حزين ان يقتل الإنسان بسبب دينه
    والأغرب غنك تلاقى ناس بتؤيد ذلك
    للأسف مصر لا يوجد فيها حرية إعتقاد
    حتى الحكومة , فكرين موضوع البهائية

    ويستمر مسلسل الغضطهاد

    ReplyDelete
  11. ربنا يحفظ مصر

    بجد والله مش كلام عاطفي فعلاً احنا لسه بخير
    صحيح فيه مؤشرات مش كويسة بدأت تظهر لكن اللي شايفه إن احنا لسه كويسيين
    بالمناسبة لسه امبارح والداتي كانت راكبة المترو -عمرها53 سنة- و كان المترو زحمة قوي و اللي قعدها مكانه شاب مسيحي...

    بالمناسبة برضه: الموضوع لازم يخرج من إيد الأمن شوية و يبقى في إيد جهات شعبية

    ReplyDelete
  12. انا بنت من نجع حمادى
    امبارح قبل الغطاس والاحتفالات تم القاء القبض علي سيارة لورى محمله بالاسلحه التى تخفيها الرمال
    علي اساس انها نقله رمل
    كانت رايحه حسب التحقيق للكنيسه
    واللي بلغ اصلا واحد مسيحى
    ده اللي وصلنى
    وسيبكم من شغلانه الاضطهاد والدين والكلام الفاضي دة
    تعتقدو لو في يهود في مصر وحصل كده هل المسيحيين والمسلمين هيقفو في وش اليهود ولا في فئه هتيجى مع اليهود ع الفئه التانيه
    انا من رائيي اننا اخوات وولاد بلد واحده
    مش كل ماتحصل حاجه نقول اسلام وانجيل
    ونبدأ نقطع في فروة بعض
    وافتكرو ان النبي عليه الصلاة والسلام قال أوصيكم بقبط مصر خيرا فأنهم أخوال إبراهيم صدق رسول الله صلي الله عليه وسلم
    كل دين فيه المثال السيئ والمثال الكويس
    واللي بيحصل لايمت للدين بصله
    ده حادث اغتصاب وقع لبنت طفله
    من شخص
    تم القبض عليه لكن العداله لم تأخذ مجراها وانتم ماتعرفوش عادات الصعيد لما المسألة تمس الشرف
    وبلاش قوله مسيحين ومسلمين عشان انا اتخنقت بجد
    لو مصر حصلت فيها حرب
    هل هيحاربو المسلمين بس ولا هيخرج للدفاع عن مصر المسلم والمسيحى
    بلاش تجرو ورا كلام الناس اللي ماوراهاش حاجه غير تولعها حريقة

    ReplyDelete
  13. جميل روح الوطنية والتسامح دى تحياتى ليكى

    ReplyDelete
  14. أختي زينب ...
    بجد كلامك زين
    بس للأسف .. التصرف ده تصرف "مصري" مش تصرف اسلامي
    انا مصري .. و بقولها بصراحة ... الحدث ده (و حوادث كتير زييه) مش بتحصل غير في مصر
    حتي في بلاد اسلامية تانية كتير ... و اكتر تشدد دينيا من مصر .. ماحدش بيعمل كده

    المصريين متعصبين ... دينيا و فكريا و في الكورة و
    في كل حاجة
    المصريين so extreme
    يا يحبو قوي .. يا يكرهو قوي
    المصررين بيتفننوا ازاي يلاقو سبب يتيحيزوا لحلافئهم حب اعمي مبالغ (زي حب النادي الآهلي او خلافه) ه و يا سلام لما يكرهو من اخلتف في وجه نظره او في انتمائه لمجموعة تانية غيرهم
    عندهم مية سبب و سبب يكرهو بيه الطرف التاني لمجرد انه "مختلف" عنهم
    انا شفت ناس بتكره بعض عشان الكورة ، عشان اختلاف الوسط الاجتماعي ، عشان اي اختلاف بسيط في وجهات النظر .. وطبعا عشان الدين
    انا اسف اني اكون الكلام ده .. لكن دي الحقيقة ..

    يارب ماتلغيش تعليقي

    Roky

    ReplyDelete
  15. اختي الكريمة انا لست مصريا بالجنسية, ولكنني مصري بالقلب, فمصر لي معها قصة حب اكبر من ان تصفها كلمات او تحيط بها معاني ,اولا لانني نهلت من بحر علمها و حضارتها, ثانيا لانني اجد شعبها شعب طيب حنون مثقف, فزرتها بسبب ذلك 3 مرات ولازالت اتمنى زيارتها ,اقول هذا الكلام وانا على يقين ان ما حدث في نجع حمادي ليس الا ايماء لما يحاك ضد مصر العزيزة من جهات مقيتة و ان بدا ان الامر ليس له علاقة بذلك باعتبار ان من حبك العملية مصري فطالما كان ملف الاقباط هو اللوكة التي على افواه المغرضين من اعداء الامة الذين يبحثون عن اي هفوة ليتدخلوا فيشؤون البلاد الداخلية كماهو الشان بالنسبة للعديد من الدول العربية, لكن هيهات لقد ابان الشعب المصري على مدى تاريخ انه شعب متحد متكافل متسامح بغض النظر عن ديانته فقد حارب المسلم مع المسيحي في حروب متعددة جنبا الى جنب واختلطت دماؤهم حينا وتشابكت اياديهم احيانا

    ReplyDelete
  16. هذه تدوينة موفقة وكثير من الردود بها كذلك موفق جداً

    ReplyDelete
  17. ياجماعه هذا كلام كله لف ودوران انا عارف المسيحيين
    ولى اصدقاء منهم ولكن كلامى مش هيعجب النصارى
    اولا سبب هذه المشكله هى النصارى بافعالهم التى تربى العداءات معلش اولا هذه المشلكله كان بيت يخص واحد من المسلمين فى منطقه كلها نصارى وارادوا شراءه وعرضوا عليه مبالغ كبيره ولكنه لم يرضى وخطفوا بنته واغتصبوها ونشروا صورها حتى ينتقموا من ابوها او يلوو ذراعه فأنتقم منهم بهذه الطريقه عندما لم تحرك الحكومه ساكنا يقولوا الالنار ولا العار هذه هى الحقيقه وسيبونا من كلام اللى من -----

    ReplyDelete