6/24/2011

احلموا احلموا

أنا سبت شغلي عشان بجري ورا حلم.
لما بفكر في شريط حياتي القصير بلاقيني أخدت قرارات مصيرية كتير، منها اللي كنت مدركة وقتها إنه مصيري ومنها اللي بيظهر بعد كده قد إيه غير حياتي. بس كلها كانت عشان مستقبل أفضل أو حاضر مش عاجبني.

هو أنا عايزة إيه من حياتي؟

السؤال ده دايما بيشجعني أخد قرارات قاطعة لأنه بيظهر لي الحقيقة زي الشمس عز الضهر.

أنا عايزة أعمل تجربة حلوة ومفيدة في حياتي قبل ما أموت - وخصوصا إني احتمال كبير أوي أموت صغيرة - تجربة تبسطني وتفيد غيري، تمتعني وتضيف للناس، للمجتمع، للوطن، معنديش مانع كمان أقول للبشرية .. دي أجابة السؤال ببساطة.

التفاصيل بقى بتيجي مرتبطة بالظرف الحياتي الحالي، الفكرة والناس والفلوس والتقنية.. التوليفة دي اللي يا تخليك تقدر تعمل حاجة حلوة أو تخليك تمشي تلعن حظك في كل سما وكل أرض.

نفس التوليفة اللي هتفضل تراجع تفاصيلها كل شوية وتقيمها عشان تقرر هتقدر تكمل بيها لأخر الطريق وللا لأ.. الحاجة الوحيدة اللي مابتتغيرش هي الهدف وإنت.

إنت والهدف.. أهم نقطتين، على أن تدعمك ذاكرة قوية تنبهك لهدفك باستمرار وتجلو من عليه أي شوائب أو محاولات للتشويه .. أما المسار فهو مجموعة الناس والأقتراحات والتنبيهات والتحذيرات والتفضيلات والدروس والإلهامات اللي بتشكل يوم عن يوم فكرتنا وتخليها أكثر عمقا ورحابة.

أنا وياسمين بنعمل حاجة اسمها "سوبرماما".. بس زي ما سوبر ماما خلتني أكتب بوست جديد على بنت مصرية ودي حاجة بقت عزيزة أوي، زي ما مهربة من عنينا النوم ومسهرانا زي طفل صغير. على قد ما هي تجربة ممتعة على قد ما هي مهلكة. بنعمل حاجات كتير عشانها مش بس على مستوى الفكرة والتنفيذ، لكن على مستوى حياتنا كلها، بناخد قرارات مصيرية من نوع هندي سوبر ماما كل اللي محوشينه ولو نطول ندفع أهالينا هندفعهم.. ياسمين مرة قالت في لحظة سينمائية دراماتيكية ولا تحية كاريوكا* في زمنها: "انا هبيع دهبي لو اضطرينا" ... ههههههه

كل ده، في جو مليان حماس وإبداع وتخطيط.. وعفوية، نفس الروح اللي بنتمنى توصل لكل أم وزوجة هتتعرف بعد كام شهر على سوبر ماما.

كفاية كده، تصبحوا على خير، هنام بدري عشان ورانا بكرة اجتماع عمل من بتاع أربع خمس ساعات ده
---

* لو تعروفوا قد إيه أنا بحب تحية كاريوكا، أيقونة الفن والجمال والوطنية والجدعنة المصرية.. وبحب ياسمين

14 comments:

  1. يا الله يا زينب!
    كنت بفكر فيكي من كم يوم وبسال حالي يا ترى زينب مبسوطه انها بدأت مغامره جديده؟
    أتوقع اني عرفت الجواب
    الله معك يا زيزي :)

    ReplyDelete
  2. انا كمان بعمل مع اصحابى مشروع اعلامى على النت ..وبعد 10سنة شغل فى مؤسسات صحفية منهم 9 سنيين فى الاهرام قررت انى اسيب كل ده عشان اعمل واكتب واغطى اللى بحبه وبس.. حسيت بنفسى اوى فى البوست بتاعك .. وحستنا مشروعك بفاغ الصبر لأنى كمان ام.

    ReplyDelete
  3. بالتوفيق ..

    جميل ان الواحد يقرر مصيره بنفسه وبناءا علي الي مقتنع بيه

    ReplyDelete
  4. مياسي
    أنا جيت على بالك؟ والله بسطيني، إني باجي على بال حد :P
    ربنا يخليكي ليا يا جميلة :))


    سارة
    انا مبسوطة أوي إن في تجربة تانية بتحصل بالتوازي مع تجربتنا، ربنا يوفقك.. يمكن كمان نتعاون مع بعض مستقبلا بما إنك كاتبة وبما إن سوبر ماما فيها مساحة لمحتوى تكتبه أمهات :)


    أنس
    أهو الواحد بيحاول، والرزق على الله :)

    ReplyDelete
  5. احم... هو عيب إن الواحد يقول إنه عاوز ينط معاكو ف الحلم؟:)

    ReplyDelete
  6. غدغود، منورة البلوج :)

    هبعت لك إيميل احكيلك تفاصيل أكتر وشوفي تحبي تلعبي معانا ازاي

    تحياتي ليكي ولتميم :))

    ReplyDelete
  7. مرحباً بيكم في عالم الإنتربرينير، بجد مبسوط قوي. إن شاء الله تحققوا إللي بتحلموا بيه :)

    ReplyDelete
  8. انا اسف للخروج عن الموضوع بس انا بعتلك ميل مهم على ايميل الجى ميل اتمنى تقريه
    شكرا

    ReplyDelete
  9. جوهري. متشكرة :))

    محمد، ماوصلنيش حاجة. من فضلك ابعت لي مرة تانية.

    ReplyDelete
  10. أنا مبسوطة جداً عشانك =)
    أنا عندي مليون فكرة عايزة أطبقها بس خايفة جداً خصوصاً في الأوضاع المنيلة هنا في البلد..بس روحك العالية إنت وياسمين شجعوني إني ماخافش من التأجيل...هاسمع الكلام وأحلم =)

    ReplyDelete
  11. ده ايه الموقع التحفه ده

    لكم منى اجمل تحية

    ReplyDelete
  12. nightS

    أنا متأكدة إن أفكارك هتطلع هايلة وإنتي تقدري تحققيها يا بنوتة. لو أقدر أساعدك بأي حاجة قوليلي، احنا مالناش غير بعضينا :D

    ReplyDelete
  13. حبيبتى زيزي انا مبسوطه قوى ان مشروعك فى طريقه للنور ربنا معاكى انت وياسمين وانشاء الله يوفقكم وتكونا مثلا رائع للشباب ومش هتلحقى تبيعى اهلك انا معاكى بعد ربنا طبعا


    laila

    ReplyDelete
  14. مامتي حبيبتي، ربنا يخليكي ليا :)

    ReplyDelete