7/28/2013

ليه؟

مع كل الحاجات اللي بتحصل في حياتي وحياة البلد اللي أنا عايشة فيها، بقالي شهر بقرا في الفتنة الكبرى. مش بس من أول وفاة عثمان أو توليته، إنما من أول وفاة الرسول وحتى مقتل الحسين..(لسه قلبي قافش على قراية التفاصيل من بعد وفاة الحسن.. بس هقدر إن شاء الله هقدر.. ما أنا لازم أكمل)

تخيلوا بقى الدم اللي بشوفه ع التلفزيون زائد الدم اللي بشوفه في الكتب..

لا والمرة دي مش بقرا عن الفتنة من كتب الناس اللي بتعتبر الصحابة ملايكة وإن محدش غلطان وإن اللي حصل ده مكنش بإيديهم وإنه قدر ومكتوب. المرة دي بقرا تاريخ بشر، تاريخ مجرد من أي انتماء ديني.. والحقيقة أنا ممكن ادخل على اكتئاب بجد وبحق وحقيقي زي اللي بياخدوله أدوية ده.. عقلي بيحاول يستوعب حاجات كتير بتحصل دلوقتي وحصلت من ١٤٠٠ سنة.. الاتنين مع بعض!!!

من المؤكد إن الدنيا كان المفروض تبقى ابسط من كده بس البني آدمين عقدوها.. أنا مش عارفة ليه الحقيقة. وغالبا سؤال "ليه" ده اللي هيفضل ملازمني الفترة الجاية.

ومن المؤكد كمان إن أنا بني آدم يجنح إلى السلم عامة، وبرفض الدم والعنف لدرجة إني مش متخيلة حتى الناس اللي بترفع سلاح تدافع عن نفسها بترفعه إزاي، مع إن أنا مع حق البني أدم إنه يدافع عن نفسه.. ما بالك بقى بالناس اللي بتبدأ هي الهجوم، وبتحل لنفسها دم الناس وبتبقى مستبيعة عمرها نفسه.. المشكلة مش في الموت، المشكلة إنهم بينهوا بإيدهم أي فرصة لإعادة التفكير أو الفهم أو التوبة.. منين اليقين ده بيجيبوه؟

هي الناس بتقتل بعض ليه يا كابتن مدحت؟

No comments:

Post a Comment