عزيزي الفريق السيسي،
أنا قلبي بيقول لي أفوض عشان الغلابة اللي دمهم سايح في الشوارع ده، وعقلي بيقول لي هتفوضي على إيه بالظبط؟
وربنا بيقول "اعدلوا هو أقرب للتقوى".. وبناءا عليه، فأنا محتاجة إجابات على الأسئلة التالية عشان أقدر أفوض وضميري مستريح:
١- التفويض على إيه بالظبط؟ يعني إيه الخطة؟ كيف تخططون للقضاء على الإرهاب؟ الإجراءات بالنسبة لي مهمة.. الشيطان يكمن في التفاصيل، والغايات لا تبرر الوسائل.
٢- هل في ضمانات للتحقيق في أي تجاوزات ممكن تحصل؟ أنا معنديش اعتراض طبعا على مواجهة المسلحين بالسلاح، بس إنت عارف إن ممكن تحصل أخطاء، وإن مدنيين وعزل يروحوا في الرجلين.. وأحب أضمن إننا نقدر نحاسب المتجاوزين، مش إنو نسمع بعدها كلمة "انتو فوضتوني وأنا اتصرفت".
٣- التفويض ده هيستمر لحد إمتى..؟ أو لحد ما إيه اللي يحصل؟ أنا محتاجة غايات واضحة.. يعني بالمختصر المفيد كده إيه ال KPIs تباعتك في موضوع القضاء ع الإرهاب ده؟
وفي الآخر أحب أفكرك بمقولة واحد مش فاكراه إن البطل مش هو اللي ينتصر في الحرب، إنما البطل هو اللي يمنعها..
No comments:
Post a Comment