ترقيم

خليني أسهل عليك الأمر.

أشرح لك أنا فاهمة إزاي "النقطة" كواحدة من أهم علامات الترقيم اللي بنستخدمها.. عشان مانتعبش مع بعض!

النقطة الواحدة في آخر الكلمة يعني هو ده اللي عندك وقلته. جميل وواضح.

نقطتين بين جملتين يعني "بتاخد نفس".

أما نقطتين آخر الكلام، فيا إما بتشمل شىء من التردد أو عايز تقول "واخد لي بالك إنت؟ فكر في اللي قلته". السياق بقى بيوضح المقصود، فمش مشكلة.

٣ نقط آخر الكلام يعني في كلام تاني بين السطور لازم يتقري أو كلام مش عارف تقوله أو مش عايز تقوله أو مكسل ومتوقع إني أفهم لوحدي.

جملة تنتهي من غير ما تتبعها نقطة، بالإضافة إلى إن ده خطأ لغوي، بس ده كمان معناه إنك مستعجل وبتقفل في الكلام ومش فاضي وكده.

اللي مالوش عندي تفسير، نقط من غير كلام.. يا نعم؟