بمناسبة النظريات، عندي نظرية تانية بتقول إن "الناس الطيبين بيموتوا بدري".. عارف الناس دي اللي قلبها أبيض أوي وبتحب الناس وبتحب الخير للناس بطبيعتها.. الناس دي اللي هتساعدك دايما وتقف جمبك وتحسهم مش عايزين حاجة كبيرة من الدنيا وإن اللي بيعوزوه بيدعوا بيه ربنا وبيفضلوا لآخر عمرهم عندهم أمل كبير إن أمنيتهم تتحقق .. جواهم رضا ومابيهمهمش الحياة وسرعتها وجنانها.. ما بيعرفوش يحسدوا أو يحقدوا على حد وماعندهمش مشكلة إن في حد أحسن منهم أو محظوظ عنهم.. بيعرفوا يمتصوا الصدمات فمش بتكلكع معاهم ويكتئبوا ويكرهوا حياتهم والناس والجو ده، بيقوموا تاني بسرعة.. ما هي الحياة بالنسبة لهم مش مسألة معقدة ومش مهتمين يعرفوا إجابة "ليه" الأبدية. بيعرفوا يحبوا من غير حساب والناس بتحبهم من غير سبب.
بس بيموتوا بسرعة. بيتخطفوا. ويوحشوك دايما وبتعيط عليهم رغم إنهم ماتوا من سنين ورغم إنك مؤمن إنك هتشوفهم تاني في الجنة وإنها مسألة كام سنة ع الأرض.. فده مابيمنعش إنهم بيوحشوك وإنك دايما هتسأل ربنا "هم ماتوا ليه؟"
No comments:
Post a Comment