سمعت أم كلثوم وهي بتغني "الأمل"؟ بتبتدي الأغنية بالكلمة دي بس "الأمل" وتسكت. وترجع تقول "الأمل" وتسكت. أهو أنا بقى كل ما حد يجيب سيرة الأمل أفتكر أم كلثوم وهي بتقول "الأمل" واللحن يكمل قائلا تيرا را را را.
عندي دايما مشاعر متناقضة تجاه الأمل. عادة بعتبره شعلقة مالهاش لازمة وبتضيع الوقت. وساعات الصراحة بحب أساير الميل الجماعي اللي بيعتبر الأمل حاجة حلوة. بس دايما دايما بعتبر إني منتصرة لما أهزم الأمل واتخلص منه تماما في بعض المواقف. ما هو يا تحققه يا تتخلص منه، إنما بين البينين ده يقصف العمر ويدبل الأيام.
في ناس مابتعرفش تتخلص من الأمل. يفضلوا يتوقوا لهذا الشىء اللي كل الشواهد بتقول إنه عمره أبدا ما هيحصل، وهم يتجاهلوا الشواهد دي ويتشعلقوا في الأمل. يمكن عشان مش عارفين غيره. يمكن عشان اتعودوا. يمكن خايفين يحسوا باغتراب لما يسيبوا الأمل ده. معذورين. لكن الموضوع بيجي عندي أنا بقى ويفضل يؤرقني. يمكن عشان أنا بطبعي ما بحبش الكراكيب. مش هتلاقيني بحتفظ بحاجات ملهاش لزمة لفترة طويلة. وبالتالي الرغبة الدائمة في التخلص من كراكيب المشاعر بيدفعني للتخلص من المسبب الرئيسي في الكراكيب دي، ألا وهو "الأمل" تيرارارارا.
إيه تاني حاجة بتتخلص منها بعد ما بتتخلص من الأمل؟ الندم طبعا. إوعى تبص وراك وتدي فرصة لأفكارك تروح وتيجي وتخلي الندم يتسلل في مشهد درامي مؤثر ممكن يخليك تعيط أو تتهور كفاية فتدور على تليفون بياع الروبابيكا.
No comments:
Post a Comment