وحدوه

اكتشفت إني رحت أربعة عزا في الأربع شهور الأخيرة. اتنين منهم وفاة نتيجة الإصابة بالسرطان، وفاة بعد عمر طويل، وفاة مفاجئة لشاب. ساعات بحس إن الموت ليه موسم. في 2009 مات كذا حد أعرفه بردو، منهم خالتي اللي أدفع عمري عشان أقعد ساعة معاها. موسم الموت السنة دي جاي في وقت مشغولة جدا فيه بتفاصيل حياتي بشكل غالبا كان مؤذي جدا لروحي، عشان كده روحي وقفت عن كل قصص الموت دي وطلعت بنتيجة واحدة كل مرة، إن كل خسارات الدنيا تهون إلا وفاة حد بتحبه. أنا مستعدة أخسر كل شىء بجري عليه النهاردة ولا إني أخسر حد من أهلي أو معارفي أو اصحابي.. سلامتهم بالدنيا. والواحد مش هيحس قد إيه هموم حياته بسيطة وسطحية ومسيرها تتحل قصاد إنه يتخيل وفاة أحبابه. ربنا ما يحرمني منهم ولا يحرمكوا منهم. مش عايزة أصور إن الموت أزمة أو مشكلة، بالعكس.. أنا مثلا هبقى سعيدة جدا لما أقابل ربنا وتيجي فرصة أشكره على كل حاجة حلوة عملها ليا وكل ابتلاء فهمت بعده قد إيه ربنا بيحبني. وأكيد نفس الحكاية لغيري من الأموات. اللي بيموت بيرتاح. هو بس الفراق اللي صعب والانتظار لحد ما يجي دورك وتموت وتتجمع مع أحبابك مرة تانية. بس على الأمل ده بنعيش ونكمل حياتنا. ولأننا مسيرنا للموت. ولأننا مسيرنا نرتاح. ولأن كل اللي بيحصل من حاجات حلوة ومأساويات زائلة ومش مستمرة.. فلا دايم إلا وجه الله كما يردد العارفين والحانوتية :)