بعد السن ده وبعد تجارب فقد البعض سواء موت مفاجىء أو موت منتظر، كل مرة الواحد بيقف قدام نفسه ويراجع حياته ويتعلم درس جديد ويجدد دروس قديمة اتعلمها وربما نسيها مع الوقت.
علي حياته كانت إلهام لناس كتير. فوجئت إن مش أنا لوحدي اللي علي مس حياتهم بشكل أو بآخر. كل الحزن اللي ضمني النهارده وأنا أساسا قابلته مرات قليلة.
ناس كتير أوي يا علي اكتشفوا قد إيه كنت بتشتغل وبتنجز في صمت. ناس كتير حست بفراغ فقدانك..
يا ما بشر بتعيش سنين طويلة وما بيكونوش عملوا حاجة تأثر في ولو شخص واحد، وإنت يا علي وزعت طاقتك على ناس كتير، أثرت فيهم وفي مسارات حياتهم، خدمتهم.. في ناس يا علي عجوزة وهي عندها 25 سنة من كتر إحساسهم إن مالهمش لزمة.
رحيلك المفاجىء بيفكرني إن الموت مش بعيد. كام مرة قلت لنفسي كده وبعدين نسيت واتلهيت في الحياة..
الحياة اللي خايفين عليها أوي مع إنو الموت ممكن ياخدنا منها فجأة ومش هيعمل اعتبار لكل الحاجات اللي كنا لسه عايزين نعملها ولا الأسئلة اللي كنا لسه عايزين نلاقيلها إجابات ولا الناس اللي لسه ماشبعناش من حبهم.
هيفضل الرحيل المفاجىء خوفي الحقيقي. وهيفضل كل مرة يخليني أراجع علاقتي بالناس وأقرر إني أبذل كتير من المحبة والاهتمام والتواصل والوقت مع الناس اللي بحبهم.. وإني أقعد ف حضن أمي أكتر وأناكف في أبويا أكتر وأرغي مع أختي أكتر وأسمح لأخويا يغلس عليا أكتر وأعمل حاجات مسلية مع أصحابي أكتر.
No comments:
Post a Comment